Shapita 9
Bambi
Nganyi udi wakula bua Tatu wetu wa mu Diûlu pa buloba lelu ne udi mua kutuambila tshidi Tatu wetu wa mu Diûlu musua bua tumanya ne tuenza?
Muambi Udi Muntu Udi Wakula bua Tatu Wetu wa mu Diûlu
Tatu wetu wa mu Diûlu udi usungula muntu bua kuakula buenda pa buloba. Muntu ewu udi ubikidibua ne muambi. Muambi udi unanga Tatu wetu wa mu Diûlu ne wenza malu adi Tatu wetu wa mu Diûlu musua bua enza. Tatu wetu wa mu Diûlu udi ulongesha muambi malu atudi dijinga ne kumanya ne kuenza. Nunku muambi udi utuambila malu awu. Padi muambi wakula bua Tatu wetu wa mu Diûlu, udi wamba malu avua Tatu wetu wa mu Diûlu nkayenda ne bua kuamba bikala Tatu wetu wa mu Diûlu uvua wakula kutudi.
Ebi bidi bimua bia ku bintu bidi muambi utuambila:
-
Udi utuambila ne Yezu udi Muana wa Tatu wetu wa mu Diûlu, ne Yezu udi Mupandishi wetu, ne malongesha a Yezu adi malelela.
-
Udi utulongesha malu avua Tatu wetu wa mu Diûlu muamba bua tuenza.
-
Udi utuambila bua tuimanyika kuenza malu mabi.
-
Udi utuambila bua malu adi alua kufika mu matuku alualua.
Amu Tatu wetu wa mu Diûlu ki udi mua kusungula muambi. Bantu kabena mua kusungula muambi to. Muntu kena bua kudisungula bua kuikala muambi to. Tatu wetu wa mu Diûlu udi upesha muambi bukôkeshi bua kuenza mudimu wenda ne kuakula buenda. Muntu kena bua kuimanyina Tatu wetu wa mu Diûlu bikalaye kayi ne bukôkeshi ebu to.
Dilejangana
-
Muambi udi wakula bua nganyi?
-
Bimua bia ku bintu kayi bidi muambi utuambila?
Tatu Wetu wa mu Diûlu Utu Amu Utuma Bambi bua Kutuambuluisha
Tatu wetu wa mu Diûlu utu amu utangila bana benda pa buloba. Katshia ku tshikondu tshia Adama, uvua utuma bambi bua kuambuluisha bana benda. Udi utuma bambi bua kudimuija bantu ku njiwu. Udi ubatuma bua bepula bantu ku dipampakana. Udi ubatuma bua kuambuluisha bantu badilongola bua malu manena. Aba badi bamua ba ku bambi bavua Tatu wetu wa mu Diûlu mutuma:
-
Noa: Wakadimuija bantu ne Tatu wetu wa mu Diûlu uvua ne bua kutuma mvula munena bua kubabutula bikalebu kabayi bimanyika kuenza malu mabi.
-
Abalahama: Wakatumikila Tatu wetu wa mu Diûlu ne wakalongesha bana benda bua kutumikila Tatu wetu wa mu Diûlu. Tatu wetu wa mu Diûlu wakalaya bua kupesha Abalahama ne ndelanganyi yenda bintu bia bungi.
-
Mose: Wakalombola bantu ba mu Isalele pambelu pa Ejipitu tô ne mu bulaba buvua Tatu wetu wa mu Diûlu mubalongoluela.
Lelu, kabidi, Tatu wetu wa mu Diûlu mmutuma bambi. Umua wa ku bambi uvuaku kakuyi mutantshi mula uvua muntu ubikidibua ne Joseph Smith. Uvua musombela mu Etat Unis wa Amelika. Mu 1820, Joseph Smith uvua ne bidimu 14. Mu tshikondo atshi, bantu ba bungi bavua baya mu ekelezia mishilangana, mu dikeba dia Ekelezia mulelela. Joseph uvua musua kuikala muntu muimpa ne kupeta Ekelezia mulelela wa Tatu wetu wa mu Diûlu.
Dimua dituku, Joseph uvua ubala mukanda wa tshijila ubikidibua ne Bibilia. Wakabala ne: biwikala musua kumanya tshintu, udi ne bua kulomba Tatu wetu wa mu Diûlu, ne Tatu wetu wa mu Diûlu neakuambila. Uvua muitabuija ne Tatu wetu wa mu Diûlu uvua mua kumuambila malu avuaye ne bua kuenza. Wakapangidika bua kuenza disambila disunguluka kudi Tatu wetu wa mu Diûlu.
Mudinda mukuabu, Joseph wakaya ku dîtu dikesa bua kusambila. Pavuaye usambila, bukenka buvua butoka bikola bupita diba buakapueka bufuma mu diûlu. Mu bukenka ebu wakamona Tatu wetu wa mu Diûlu ne Yezu Kilisto. Tatu wetu wa mu Diûlu wa kafunkuna Yezu ne kuamba ne: “Ewu udi Muan’anyi Musuibue. Muteleja!”
Joseph wakateleja bionsu biakamuambila Yezu, ne wakatumikila maludiki akamupesha Yezu.
Pakalua Joseph muntu mukola, Tatu wetu wa mu Diûlu wakamusungula bua kuikala muambi wenda. Uvua muambi muimpa. Wakalongesha bantu malu avua Tatu wetu wa mu Diûlu musua bua benza.
Joseph Smith wakafua mu 1844. Panyima pa lufu luenda, Tatu wetu wa mu Diûlu wakasungula mukuabu muntu bua kuikala muambi. Lelu, musangu yonsu udi muambi ufua, Tatu wetu wa mu Diûlu udi usungula mukuabu muntu bua kuakula buenda pa buloba.
Tatu wetu wa mu Diûlu wakatuma bambi mu tshikondu tshietu.
Joseph Smith
Brigham Young
John Taylor
Wilford Woodruff
Lorenzo Snow
Joseph F. Smith
Heber J. Grant
George Albert Smith
David O. McKay
Joseph Fielding Smith
Harold B. Lee
Spencer W. Kimball
Ezra Taft Benson
Howard W. Hunter
Gordon B. Hinckley
Thomas S. Monson
Russell M. Nelson
Dilejangana
-
Mbamua ba ku bambi kayi bavua Tatu wetu wa mu Diûlu musungula?
-
Ntshinyi tshivua Joseph Smith muenza?
Kudi Muambi pa Buloba Lelu
Tatu wetu wa mu Diûlu mmunanga bana benda badi pa buloba lelu. Udi mumanya ne tudi ne ntatu ya bungi. Mmutuma muambi bua kutuambuluisha. Udi wakula ne muambi lelu amu bu muvuaye wakula ne bambi ku kala. Tatu wetu wa mu Diûlu udi upesha muambi ewu maludiki bua bantu ba buloba bujima. Muambi udi muntu umua udi mua kupeta maludiki a kudi Tatu wetu wa mu Diûlu bua buloba bujima.
Muambi udi koku lelu mmuntu muimpa. Mmunanga Tatu wetu wa mu Diûlu ne mmusua kumutumikila. Tatu wetu wa mu Diûlu udi wambila muambi malu adiye musua bua tumanya ne tuenza.
Dilejangana
-
Bua tshinyi Tatu wetu wa mu Diûlu mmutuma muambi lelu?
-
Muambi udi upeta maludiki bua kupesha nganyi?
-
Bua tshinyi tudi mua kuitabuija bionsu bidi muambi utuambila?
Tatu Wetu wa mu Diûlu Udi Utuambuluisha Patudi Tutumikila Maludiki Adiye Ufila kudi Muambi
Tatu wetu wa mu Diûlu wakatutumina mukenji bua tutumikila muambi wenda padi muambi wakula buenda. Patudi tutumikila maludiki adi Tatu wetu wa mu Diûlu ufila kudi muambi, tudi tulonga bua kulua bafuanangana ne Tatu wetu wa mu Diûlu. Tudi tulonga malu atudi ne bua kuenza. Tudi mua kulonga bua kusolakaja ntantu patudi nayi. Tatu wetu wa mu Diûlu neatuambuluisha, ne netupeta ditalala mu mitshima yetu.
Dilejangana
-
Bua tshinyi tudi ne bua kuteleja ku malu adi muambi utuambila bua kuenza?
-
Mushindu kayi watuambuluisha Tatu wetu wa mu Diûlu bua kuenza malu adiye muludika muambi bua kutuambila?