Shapita 25
Mukenji wa Bunonoka
Tatu wetu wa mu Diûlu wakatupesha bukola bua tshijila bua kulela bana. Wakatuambila bua kuenza mudimu ne bukola ebu. Bituenza nabu mudimu bimpa, tudi mua kuikala ne disanka dia bungi.
Tatu Wetu wa mu Diûlu Wakatuambila bua Tulela Bana ne Tutumikila Mukenji wa Bunonoka
Pavua Adama ne Eva baselangana, Tatu wetu wa mu Diûlu wakabambila bua balela bana. Wakambila Adama ne mukajienda, Eva, bua balela bana bua ne nyuma idi mu diûlu idi mua kulua pa buloba ne kupeta mibidi ya misunyi ne mifuba. Mubidi wa musunyi ne mifuba udi dimua dia ku mapa manena adi Tatu wetu wa mu Diûlu mutupesha. Tatu wetu wa mu Diûlu udi ne mubidi wa musunyi ne mifuba, ne mmusua bua bana benda bafuanangana nenda.
Bukola bua kulela bana budi bua tshijila tshia bungi. Tatu wetu wa mu Diûlu wakatupesha mukenji udi utuambila mushindu wa kuenza mudimu ne bukola ebu. Mukenji ewu udi ubikidibua ne mukenji wa bunonoka. Udi wamba ne, tudi ne bua kuikala ne mamanyangana a mubidi amu ne muntu utudi baselangana mu dîyi dia ditunga. Etshi tshidi tshiumvuija ne, katuena ne bua kuikala ne mamanyangana a mubidi kumpala kua tuetu kusedibua to, ne patudi tusedibua tudi ne bua kuikala ne mamanyangana a mubidi amu ne muluma wetu anyi mukaji wetu.
Kutula difu, anyi kumbusha muana udi kayi muanji kuledibua munda mua mamu wenda ne kumufuisha anyi kumushipa patshidiye munda mua mamu, tshidi tshibi, amu pikalaku bualu busunguluka, budi bujinga kuitabibua ne budimu mu disambila ne diambuluisha dia muepiskopo anyi mulombodi mukulu wa ditamba. Katuena bua kuambuluisha muntu mukuabu bua kutula difu to.
Baledi ki badi ne bua kulongesha mukenji wa bunonoka kudi bana babu. Baledi badi ne bua kubalongesha ne, mibidi yabu idi ya tshijila ne kabena bua kuanyishila muntu bua kulenga bimua bitupa bia mibidi yabu to. Badi ne bua kuakaja ngenyi mibi ne mêyi mabi adi bana babu balonga kudi bakuabu.
Bu mudi bana bakola, badi ne bua kulongeshibua ne, Tatu wetu wa mu Diûlu uvua mutupesha bukola bua kulela bana, ne kuenza mudimu ne bukola ebu patudi tuselangana kudi kuimpa. Mu tshikondu tshidi bana betu ne bidimu 12 anyi 13, tudi ne bua kuikala bamana kubambuluisha bua bumvua mushindu udi bana bafukibua. Tudi ne bua kubalongesha kumpala kua diba mu mushindu wa mbabi bua kubalama ku malongesha mabi ne a mashimi.
Dilejangana
-
Bua tshinyi Tatu wetu wa mu Diûlu udi utupesha bukola bua kulela bana?
-
Mukenji wa Bunonoka ntshinyi?
-
Ntshinyi tshitudi ne bua kulongesha bana betu pa mibidi yabu?
Satana Mmusua bua Tunyanga Mukenji wa Bunonoka
Satana mmusua kutupangisha bua kualukila kudi Tatu wetu wa mu Diûlu. Satana mmusua bua tunyanga mukenji wa bunonoka. Mmusua bua tuela meji ne, bukola bua kulela bana kabuena bua tshijila to. Mmusua bua tuela meji ne, kunyanga mukenji wa bunonoka kakuena kubi to.
Satana udi wenza mudimu ne mishindu midimuka bua kutusuisha bua tunyanga mukenji ewu. Udi utêta bua kutuelesha meji ne, kulekela bakuabu bamona ne balenga mibidi yetu bidi bitabibua. Satana mmusua bua tuikala ne meji mabi. Udi utusaka bua tutangila bimfuanyi, bindidimbi, ne maja bidi bitutêta bua katuikadi banonoka to. Udi kabidi utusaka bua tuja maja ne tuteleja miyuki, bilela, ne misambu bidi bitutêta bua katuikadi banonoka to. Satana mmusua bua tuenza malu â bua mibidi yetu kayikadi ya tshijila to ne bua tuenza mudimu ne bukola bua kulela bana mu mushindu mubi.
Imua misangu Satana udi ututêta kupitshila ku lumvu luetu. Satana mmumanya patudi nkayetu, bakondakaja, anyi katuyi ne disanka. Udi usungula bikondu ebi bia buteketa bua kutuenzeja bua tunyanga mukenji wa bunonoka. Mmusua bua tuela meji ne, tudi ne bunema bua kuenza mudimu ne bukola bua kulela bana mu mushindu yonsu utudi basua kuenza nabu. Udi utêta bua kutuelesha meji ne, kakuena tshintu tshibi tshiatufikila bituanyanga mukenji wa bunonoka to.
Tatu wetu wa mu Diûlu udi mua kutupesha makanda a kukandamena matêta a Satana. Kena musua bua tumona bintu bibi anyi tuela meji ku bintu bibi to. Wakalaya ne, kakulekela Satana atutêta bipita makanda etu to. Mmulongolola mushindu wa tuetu kutamba matêta.
Tudi mua kusambila Tatu wetu wa mu Diûlu bua diambuluisha dia kukandamena Satana. Patudi tusambila, Tatu wetu wa mu Diûlu neatuma Nyuma wa Tshijila bua kutuambuluisha. Nyuma wa Tshijila neatuambuluisha bua kuvuluka ne, mibidi yetu idi ya tshijila ne bukola bua kulela bana budi bua tshijila. Nyuma wa Tshijila neatuambuluisha bua katuenji mudimu ne bukola ebu mu mushindu mubi to. Neatuambuluisha bua kusungula bintu bimpa bia kumona ne kubala ne kuelela meji. Neatuambuluisha bua kuvuluka ne, kunyanga mukenji wa bunonoka nekutubungamija ne kutumikila mukenji ewu nekutupesha disanka.
Dilejangana
-
Bua tshinyi Satana mmusua bua tunyanga mukenji wa bunonoka?
-
Ntshinyi tshitudi mua kuenza bua kukandamena matêta a Satana?
-
Mushindu kayi watuambuluisha Tatu wetu wa mu Diûlu bua kutumikila mukenji wa bunonoka?
Kunyanga Mukenji wa Bunonoka Kudi Kuikala Bubi Bukola
Mamanyangana a mubidi adi mimpa ne makezuka padiwu malamibua pankatshi pa muluma ne mukajienda badi banangangana ne banemekangana. Adi mushindu uvua Tatu wetu wa mu Diûlu mutupesha bua kulela bana. Adi kabidi mushindu udi baluma ne bakaji baleja dinanga umua ne mukuabu ne balua pamua mu kumvua kuabu. Kadi bua kumanyangana mubidi pambelu pa dibaka kudi kuikala bubi bukola.
Kunyanga mukenji wa bunonoka kudi kutuenza katuyi ne disanka. Patudi tumanya ne, katuena batumikila Tatu wetu wa mu Diûlu, netudiumvua bapîshibua ne netumvua bundu. Netumanya ne, tudi benza mudimu mu mushindu mubi ne bukola bua tshijila budiye mutupesha ne tudi bavuija bakuabu kabayi ne disanka. Kunyanga Mukenji wa bunonoka kudi mua kuenza bua muana mukesa aledibua kayi ne dîku dienda to.
Amu mibi ibidi ki idi mikola menamena mipita kunyanga kua mukenji wa bunonoka. Idi mikala: Kuvila Nyuma wa Tshijila ne kushipa. Aba badi banyanga mukenji wa bunonoka badi mua kubuikidibua. Tatu wetu wa mu Diûlu wakamba ne, bikalabu ne ditabuija mu Yezu ne bakudimuna mitshima ku mibi yabu, yeya neababuikidila. Aba badi banyanga mukenji wa bunonoka ne kabayi bakudimuna mitshima, kabakukumbana bua kusomba ne Tatu wetu mu Diûlu to.
Aba bavua bangatshibua anyi banyangibua ku bukola, kabena bapila ku dinyanga dia mukenji wa bunonoka to.
Dibuikidila didi dilua amu kupitshila ku ditabuija mu Yezu ne ku dikudimuna dia mutshima. Tudi ne bua kumanya ne tudi benza bubi ne tumvua dibungama dishuwa bua bubi butudi benza. Tudi ne bua kulekela dienza tshintu tshidi tshibi ne tutonda bubi kudi Tatu wetu wa mu Diûlu, kudi muntu utudi benzela bubi, ne kudi mukôkeshi wa buakuidi mukumbanyina (muepiskopo, mulombodi mukulu wa ditamba, anyi mulombodi mukulu wa bukenji). Tatu wetu wa mu Diûlu wakamba ne neabuikidila aba badi ne ditabuija mu Yezu, batonda mibi yabu kudi Tatu wetu wa mu Diûlu ne kudi mulombodi wa Ekelezia mukumbanyina, ne mukudimuna mutshima ne moyo mujima. Muntu yonsu udi kayi wenza malu onsu â, kena mukudimuna mutshima bushuwa to ne kakubuikidibua to.
Dilejangana
-
Bua tshinyi kunyanga kua mukenji wa bunonoka kudi kuikala bubi bukola?
-
Ntshinyi tshidi tshitufikila patudi tunyanga mukenji wa bunonoka?
-
Bua tshinyi tudi ne bua kutumikila mukenji wa bunonoka?
-
Ntshinyi tshitudi ne bua kuenza bua kukudimuna mutshima ku dinyanga dia mukenji wa bunonoka?
Kutumikila Mukenji wa Bunonoka Kudi Kutupesha Disanka
Patudi tutumikila mukenji wa bunonoka, tudi tuleja tshilejilu tshimpa tshia bana betu kulonda. Tudi bamanya ne Tatu wetu wa mu Diûlu udi ne disanka netu patudi tumutumikila. Patudi tuwutumikila, aba badi mu dîku dietu badi bamanya ne tudi babananga, ne katuena ne kipatshila ka kudiumvua babingishibua anyi bundu to. Tudi tulua bafuanangana ne Tatu wetu wa mu Diûlu. Tatu wetu wa mu Diûlu udi utubenesha tuetu ne bana betu, anyi bana batualela, patudi tutumikila mukenji wa bunonoka.
Kuenza mudimu ne bukola budi Tatu wetu wa mu Diûlu muteka mu mibidi yetu mu dibaka nekututuadila disanka. Bua bantu babidi babaki, kuikala ne mamanyangana a mubidi kudi mua kutuala disanka. Kudi mua kubasemeja pamua ne lumvu lukola lua dinanga. Bana badi ne bua kuledibua badi dibenesha dia kudi Tatu wetu wa mu Diûlu. Imua misangu bana ba lutatu badi mua kufila disumpakana dia bungi ne dibungama kudi baledi babu, badi pabu batuala disanka dinena. Dimua dia ku masanka ditudi tumanya mu moyo wetu nedilua pa kumona bana betu bakola, balonga, baselangana, ne balela babu bana nkayabu.
Dilejangana
-
Mmabenesha kayi atudi tupeta patudi tutumikila mukenji wa bunonoka?
-
Bua tshinyi tudi ne disanka patudi tutumikila mukenji wa bunonoka bipita patudi katuyi tuwunemeka?