Ngaahi Tohi Lēsoni Palaimelíi mo e Taimi Fevahevaheʻakí
Lēsoni 11: ʻOku ou Fakafetaʻi Koeʻuhí ko e Iká

Lēsoni 11

ʻOku ou Fakafetaʻi Koeʻuhí ko e Iká

Taumuʻá

Ke tokoniʻi ʻa e fānaú taki taha ke ne ongoʻi houngaʻia ki he Tamai Hēvaní mo Sīsū Kalaisi koeʻuhí ko e iká pea mo e fanga monumanu ʻo e vaí.

Teuteú

  1. Ako ʻi he faʻa lotu ʻa e Sēnesi 1:20–23; Siona 1–3; Mātiu 14:15–21; mo e Luke 5:1–11.

  2. Ngaahi nāunau ʻoku fiemaʻú:

    1. Tohi Tapú

    2. Kiʻi ika pepa (vakai ki he sīpinga ʻi mui he lēsoní).

    3. ”Vaʻakau taumātaʻu” – ko ha vaʻakau ʻoku nonoʻo ki ai ha afo pea mo ha meʻa pineʻi pepa, pe ko ha konga tepi fakapipiki, pe makinito kuo nonoʻo ki he muiʻi afó.(tauhi ʻa e ʻakau taumātaʻu ko ʻení ke fakaʻaongaʻi ʻi ha lēsoni he kahaʻú.)

    4. Meʻa faʻoʻanga ke tuku ai e ika pepá.

    5. Kapau ʻe lava, ʻomai ha ngaahi fakatātā ʻo ha ika pe ha faʻahinga monumanu ʻoku nofo ʻi he vaí.

    6. Konga fakatātā 1–5, Ko ha ika (ʻe lava ke maʻu ha konga fakatātā pehē mei he Primary Visual Aid Cutouts, set 4).

    7. Fakatātā 1–1, Ko e Māmaní (62196); fakatātā 1–24, Ko Sīsū mo e Kau Toutai (Ko e Ngaahi Fakatātā ʻo e Ongoongoleleí 210; 62138); fakatātā 1–25, Ika; fakatātā 1–26, Poto; fakatātā 1–27, Ko e Fonu.

  3. Fai mo ha ngaahi teuteu ʻe fiemaʻu ki ha ʻekitivitī fakatupulaki te ke fie fakaʻaongaʻi.

Ngaahi Ekitivitī ke ako mei aí

Fakaafeʻi ha taha ʻo e fānaú ke ne fai e fua lotú

ʻEkitivitī ke taki ʻaki e tokangá.

ʻAi e fānaú ke nau fakakaukau ʻoku nau tuʻu ʻi ha funga hala fakakavakava ʻo sio hifo ki he funga anovaí pe vaitafé.

ʻEkitivitī ke taki ʻaki e tokangá.

  • Ko e hā e meʻa ʻokú ke sio ki ai ʻi hoʻo vakai hifo ki he loto vaí?

ʻAi ke tuʻu ʻa e fānaú ʻo kakau ʻo hangē ha iká ʻi he loto vaí.

Naʻe folofola ange ʻa e Tamai Hēvaní kia Sīsū Kalaisi ke Ne fakatupu ʻa e iká mo e fanga monumanu ʻo e vaí

Fakaʻaliʻali ʻa e fakatātā 1–1, Ko e Māmaní, pea mou toe fakamanatu ʻa e ngaahi meʻa kotoa pē ne finangalo ʻa e Tamai Hēvaní kia Sīsū ke ne fakatupú ʻa ia ne mou ʻosi lau ki ai ʻi he ngaahi lēsoni ki muʻá. Tala ange ki he fānaú naʻe fakatupu foki e Sīsū mo e iká (vakai, Sēnesi 1:20–23). Ko e iká ko e konga ia ʻo e palani ʻa e Tamai Hēvaní ki he māmaní. Fakaʻaliʻali ʻa e fakatātā 1–25, Ko e Iká, pea mou talanoa kau ki he feituʻu ʻoku nofo ai ʻa e iká.

  • Kuó ke mamata ʻi ha ika?

Tuku ke talanoa ʻa e fānaú fekauʻaki mo ha ika kuo nau mamata ai.

Fakaʻaliʻali mo e konga fakatātā 1–5, pea mo ha fakatātā pe ko ha ika naʻá ke maʻu mai. Fetalanoaʻaki ki he faʻahinga kehekehe ʻo e iká, hangē ko e fanga kiʻi ika lanu koulá, ika ʻo e anovaí, valú, ʻangá, pe ko e hā pē e faʻahinga ika ʻoku feangainga mo e fānau ʻo e kalasí.

  • Ko e hā mo ha toe fanga monumanu ʻoku nofo ʻi he vaí ʻo makehe mei he iká?

Fakaʻaliʻali ʻa e fakatātā 1–26, Ko e Potó, mo e fakatātā 1–27, Ko e Fonú. Talanoa ʻo fekauʻaki mo e potó mo e fonú pea mo e feituʻu ʻoku nau nofo aí. Lave foki ʻo fekauʻaki mo e fanga tofuaʻá, fanga paká, fanga silá, pea mo e fanga monumanu kehe ʻo e vaí. Fakamatala ange ʻoku nofo ʻa e fanga monumanu ʻe niʻihi ʻo e vaí ʻi he tahí, niʻihi ʻi he ngaahi anovaí, pea niʻihi ʻi he ngaahi vaitafé.

ʻEkitivitií

Tokoniʻi ʻa e fānaú taki taha ke nau fakakaukau ki ha manu ʻoku nofo he vaí, pea nau ngaue, puna, pe kakau ʻo hangē ko e manu ko iá.

Talanoá

Hiki hake e Tohi Tapú ki ʻolunga pea fakamatalaʻi ange te tau lava ʻo lau fekauʻaki mo e iká ʻi he folofolá. Fai ange e talanoa ʻo Sioná, ʻo hangē ko ia ʻi he Siona 1–3. Fakamatalaʻi ange naʻe teuteuʻi ʻe Sīsū ha fuʻu ika ke ne folo ʻa Siona koeʻuhí ke ʻoua naʻa melemo. Naʻe ʻi ai ha ngāue ʻa Sīsū maʻa Siona ke ne fakahoko. Mahalo pē te ke fie lau leʻo lahi ha veesi ʻe taha pe ua, ʻo hangē ko e Siona 1:17 pe Siona 2:1, ʻi he lolotonga ʻa hoʻo fai ange ʻa e talanoá. (Kapau te ke lau leʻo lahi ha veesi, fakamatalaʻi ange ʻoku faʻa ui ʻi he taimi ʻe niʻihi ʻa Sīsū “ko e ʻEikí”.)

Talanoá

  • Ko hai naʻá ne ʻomai ʻa e fuʻu iká ke ne folo ʻa Sioná? (Vakai, Sione 1:17.)

  • Ko e hā e meʻa ʻa Siona naʻe fai ʻi hono folo ia ʻe he iká? (Vakai, Sione 2:1.)

  • Ko e hā e meʻa naʻe fai ʻe Siona ʻi he taimi ne hū ai ki tuʻa mei he iká? (Vakai, Sione 3:1–3.)

  • Naʻe tui nai e kakaí kia Siona ʻo nau fakatomala? (Vakai, Siona 3:5,10.)

Talaange ki he fānaú ʻoku ʻi ai e fanga ika ʻe niʻihi ʻoku fuʻu lalahi, ʻo hangē ko e ika naʻá ne folo ʻa Sioná, pea ʻoku iiki ʻa e niʻihi pea te nau lava ʻo nofo pē ʻi ha foʻi poulu.

ʻEkitivitií

Tokoniʻi e fānaú ke nau fai ʻa e fanga kiʻi vaʻinga ko ʻení mo honau ʻuluʻulu tuhú:

Ko e Ika Koulá

ʻOku ʻikai ke ʻi ai ha vaʻe ʻa hoku ʻofaʻangá ko ha kiʻi ika koula (Ala ki ho ongo motuʻa vaʻé).

ʻOkú ne kakau fakalongolongo holo pē mo tui hono ihú (Ala ki ho ihú.)

ʻOku ʻikai lava ke ne haʻu ki ʻuta ke ma vaʻinga, pe ʻe lava ke u ʻalu ʻo kakau (Fakatātaaʻi ʻa e kakaú.)

Neongo pē ʻokú ou pehē, “Haʻu ki utá ni ke ta vaʻinga,”

Naʻe hangē ʻokú ne pehē mai, “Haʻu ki heni ke ta vaʻinga.”

Talanoá

Toe fakaʻaliʻali ʻa e Tohi Tapú, pea fai e talanoa ʻoku hā ʻi he Mātiu 14:15–21.

Mahalo te ke fie lau leʻo lahi ha taha ʻo e ongo vēsí ni, ʻo hangē ko e Mātiu 14:16–17, ʻi he lolotonga hoʻo fai ʻa e foʻi talanoá.

Talanoá

  • Ko e hā ne heka ai ʻa Sīsū ʻi he vaka ʻo Saimone Pitá? (Vakai, Luke 5:3.)

  • Ko e hā ne folofola ange ʻa Sīsū kia Saimone Pita ke ne faí? (Vakai, Luke 5:4.)

  • Ko e hā ne maʻu ʻe Saimone Pita ʻi hono kupengá? (Vakai, Luke 5:6.)

Naʻe folofola ʻa e Tamai Hēvaní kia Sīsū ke ne fakatupu ʻa e iká mo e fanga monumanu ʻo e vaí ki heʻetau fakaʻaongaʻí

Fakamatalaʻi ange naʻe folofola ʻa e Tamai Hēvaní kia Sīsū ke ne fakatupu ʻa e iká mo e fanga manu ʻo e vaí ke tau fakaʻaongaʻi ia ko ha meʻatokoni mo ha ngaahi taumuʻa kehe.

Talanoá

Toe foki pē ki he Tohi Tapú, fai ange e talanoa ʻoku hā ʻi he Mātiu 14:15–21 Mahalo te ke fie lau leʻo lahi ha taha ʻo e ongo vēsí, ʻo hangē ko e Mātiu 14:16–17, ʻi hoʻo fai ʻa e talanoá.

Talanoá

  • Ko e hā e meʻa ʻa Sīsū naʻá ne fai ʻi he fiekaia ʻa e kakaí? (Vakai, Mātiu 14:15–16.)

  • Ko e hā naʻe fafanga ʻaki ʻe Sīsū e kakaí? (Vakai, Mātiu 14:19.)

ʻEkitivitií

Fakaʻaliʻali ki he kalasí ʻa e ʻakau taumātaʻu naʻá ke teuteu maí, pea fakaafeʻi mai ha taha ʻo e fānaú ke ne haʻu ʻo taumātaʻu. Tuku ha ngaahi kongokonga fakatātā ʻo e ngaahi iká ki he loto tauhiʻanga iká, pea ʻi he taimi ʻe tuku hifo ai ʻe he kiʻi tokotahá ni ʻa e afó ki he loto tauhiʻanga iká, fakapipikiʻi ha kiʻi ika ki he meʻa pineʻi pepá, pe ko e tepi fakapipikí, pe ko e makinitó pea tuku ki he tokotahá ni ke ne fusi hake ia. ʻOange ha faingamālie ki he tokotaha taki taha ke ne taumātaʻu.

Tuku ange ʻa e fānaú ke nau fakamatalaʻi ha taimi ne nau toutai ai pe kai ika.

Fakamoʻoní

Fakahaaʻi ʻa hoʻo houngaʻia ʻi he iká mo e fanga manu ʻo e vaí.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitī ko ʻení ke fakaʻaongaʻi ʻi he lolotonga ʻa e lēsoní.

  1. Tuku ke valivali ʻe he fānaú ʻa e fanga kiʻi ika naʻe maʻu ʻi heʻenau vaʻinga taumātaʻú (toe fai ʻa e ʻekitivitií ni ʻo ka fiemaʻu). Tohiʻi ʻa e ʻOku ou fakafetaʻi ʻi he iká ʻi he tuʻa ʻo e kiʻi ika kotoa pē ʻa e fānaú taki taha.

  2. ʻAi e fānaú ke nau tangutu ʻi ha vaeua ʻo ha fuopotopoto. Tuku kotoa e fanga kiʻi ika ne valivali ʻe he fānaú ki he falikí, ʻi muʻa ʻiate kinautolu. Lau fakataha ʻa e veesi ko ʻení:

    Ko e kiʻi ika siʻisiʻi ʻi he vaí,

    Te u lava ʻo puke koe taʻe ngāueʻaki ha mātaʻu.

    Tuhuʻi ha toko taha pea tuku ange ke ne fili haʻane kiʻi ika ʻaki haʻane tuhuʻi ʻaki e ʻakau taumātaʻú pe ko haʻane tuhu pē ki ai. ʻE pehē ʻe he kiʻi tamasiʻí, “Naʻá ku maʻu ha ika ,” tuku ke ne leaʻaki e lanu ʻo e iká. ʻE tauhi leva ʻe he ʻapí. Hokohoko atu pē kae ʻoua kuo kakato kotoa ʻa e fānaú.

  3. Hiva fakataha mo e fānaú “ʻOku mau Fakamālō atu ʻe Tamai” (Children’s Songbook).

  4. Tokoniʻi e fānaú ke nau fai ʻa e kiʻi vaʻinga ko ʻení mo honau ʻuluʻulu-tuhú. Fakamatalaʻi ange ko e minó ko ha kiʻi ika siʻisiʻi.

    Ko ha Kiʻi Fonu

    ʻOku ou maʻu ha kiʻi fonu siʻisiʻi.

    ʻOkú ne nofo ʻi ha puha (Fakatātaaʻi ha kiʻi puha ʻaki ho ongo nimá).

    ʻOkú ne kakau ʻi he vaitafé (Fakatātaaʻi e sīpinga ʻo e kakaú),

    Peá ne kaka ʻi he ngaahi maká (Fakatātaaʻi ʻaki ho ʻuluʻulu-tuhú ha kaka ki ʻolunga).

    Naʻá ne ʻohofi ha mino (Pasiʻi e nimá).

    Naʻá ne ʻohofi ha kutu-fisi (Pasiʻi e nimá).

    Naʻá ne ʻohofi ha namu (Pasiʻi e nimá)

    Peá ne ʻohofi foki mo au!

    Naʻá ne maʻu e kiʻi minó (Pasiʻi e nimá)

    Naʻá ne maʻu mo e kutufisí (Pasiʻi e nimá);

    Naʻá ne maʻu ʻa e namú (Pasiʻi e nimá);

    Ka naʻe ʻikai te ne maʻu au!

    (Vachel Lindsay, mei he Collected Poems of Vachel Lindsay. Copyright © 1920 by Macmillan Publsihing Co., Inc., fakafoʻou 1984 ʻe Elizabeth C. Lindsay. Ke toki fakaʻaongaʻi pē ʻi ha fakangofua.)

  5. Fakaʻaongaʻi ha kiʻi ika pepa ʻe nima ki he ʻekitivitī ko ʻení. Fakamatalaʻi ange ko e brook ko ha kiʻi vaitafe siʻisiʻi, pea ko e Nook ko ha kiʻi toitoiʻanga.

    Fanga Kiʻi Ika Iiki ʻe Nimá

    ʻAi ke tuʻu ha toko nima ʻi muʻa he kalasí ʻo nau pukepuke taki taha ha kiʻi ika.

    Naʻe lele holo ha fanga kiʻi ika iiki ʻe nima ʻi ha kiʻi vai.

    Pea hola ha taha ia ki hano toitoiʻanga fakapulipuli (ʻalu ha tokotaha ʻo e toko-nimá ni ki hono nofoʻangá ʻo hangē ʻokú ne kakau ki aí).

    Ko e fanga kiʻi iká ni, ʻa e fanga kiʻi ika ko ʻení, naʻa nau fiefia heʻenau vaʻingá,

    Ko e fanga kiʻi iká ni, ʻa e fanga kiʻi ika ko ʻení, naʻa nau vaʻinga he ʻaho kakato.

    Hivaʻi ha veesi kehe ʻo ngāueʻaki ʻa e kiʻi ika ʻe faá, holo hifo ki he tolú, pea ua. Kae foki ʻa e kiʻi tamasiʻi ʻe taha ʻi he veesi kotoa pē. ʻI he toe pē ʻa e tokotahá, fakaʻaongaʻi leva ʻa e veesi ko ʻení.

    Naʻe ʻi ai ha kiʻi ika naʻe lele holo he kiʻi vaitafé;

    Peá ne hola atu ia ki hano kiʻi toitoiʻanga fufū.

    Kiʻi ika, ʻa e kiʻi ika ko ʻení, naʻe fiefia heʻene vaʻingá,

    Kiʻi ika, ʻa e kiʻi ika ko ʻení, naʻá ne vaʻinga he ʻahó kotoa.

Ngaahi ʻEkitivitī Kehe Maʻá e Fānau Iiki Angé

  1. Fakaʻaliʻali ʻa e fakatātā 1–25, Ko e Iká; fakatātā 1–26, Ko e Potó; mo e fakatātā 1–27, Ko e Fonú. ʻI hoʻo lea pe ʻaʻaú, fai ange e talanoa ʻo e fakatupu ʻo e iká pea mo e fanga manu ʻo e vaí (vakai, Sēnesi 1:20–123). Fakahaaʻi ʻa hoʻo houngaʻia ʻi he iká mo e fanga manu kehe ʻo e vaí.

  2. Talaange ki he fānaú ʻoku tokolahi e fanga manu ʻoku nau nofo ʻo ofi, pē ʻi he loto vaí. Tuku ke nau mateʻi mai ʻa e manu ʻokú ke fakakaukauʻí, lolotonga hoʻo ʻoange tahataha ʻa e fanga kiʻi meʻa fakatupu fakakaukau ko ʻení:

    1. Ko hoku kilí ʻoku lanu-mata pea molemole mo hekeheke. ʻOku ou tohopo.ʻOku ou nofo ofi ki he ngaahi anovaí, ngaahi vaitafé, pe anovai īkí. Te ke lava ʻo mateʻi mai pe ko hai au?

      (ʻI he ʻosi hono mateʻi mai ʻe he fānaú ʻa e “potó”, fakaʻaliʻali ange ʻa e fakatātā 1–26, Ko e Potó, pē ko haʻo tā ha fakatātā ʻo ha poto he palakipoé.)

    1. ʻOku ou fuʻu veʻe tuai. ʻOku ou maʻu ha tuʻa fefeka. ʻI he taimi ʻoku ou ilifia aí, ʻoku nou mai hoku ʻulú, mo hoku ngaahi tāpaté ki hoku lalo tuʻá. Ko e hā au?

      (ʻI he hili hano mateʻi ʻe he fānaú ʻa e “fonú,” fakaʻaliʻali ange ʻa e fakatātā 1–27, Ko e Fonú, pe tā ha fakatātā ʻo ha fonu he palakipoé.)

    ʻI he hili ha mateʻi ʻe he fānaú ʻa e ongo manú ni, tuku ke nau tohopo holo ʻo hangē ha fanga potó; pea tuku ke nau totolo holo ʻo hangē ko e fanga fonú.

  3. Hivaʻi mo e fānaú ʻa e “Ko e hā ʻOkú Ke Fai ʻI he Faʻahitaʻu Māfaná?” (Children’s Songbook).

fish