ʻOku Tokoniʻi au ʻe he Sākalamēnití ke u Fakakaukau kia Sīsū

Taumuʻá

Ke fakalotolahiʻi ʻa e fānaú taki taha ke nau fakakaukau kia Sīsū Kalaisi lolotonga ʻa e sākalamēnití.

Teuteú

Ako ʻi he faʻa lotu ʻa e Luke 22:19–20 mo e 3 Nīfai 18:1–11. Toe vakai ki he Ngaahi Tefitoʻi Moʻoni ʻo e Ongoongoleleí (31110 900), vahe 23.
ʻI ha fakangofua mei he palesiteni ʻo e Palaimelí, kole ki he pīsopé ke fokotuʻutuʻu ke haʻu ha mēmipa ʻo e kōlomu ʻo e kau taulaʻeikí ki hoʻo kalasí ʻi ha kiʻi miniti nounou ʻi he kamata ʻa e lēsoní. ʻOku totonu ke mateuteu ʻa e mēmipa ʻo e kōlomu ʻo e kau taulaʻeiki ke ne fakamatalaʻi ʻa hono ngaahi fatongia ʻi hono tāpuakiʻi ʻo e sākalamēnití pea mo ʻene ngaahi ongo ʻo fekauʻaki mo e ouau toputapú ni.
Ngaahi nāunau ʻoku fiemaʻú:
1. Ha Tohi Tapu mo ha Tohi Molomona.
2. Ngaahi fakatātā mei ha meʻa naʻe hoko ʻi he moʻui ʻa Sīsuú, hangē ko e fakatātā 1—16, Ko e ʻAloʻi ʻo Sīsū ʻi he ʻAiʻangakai ʻo e Manú (Ko e Ngaahi Fakatātā ʻo e Ongoongoleleí 201; 62495); fakatātā 1–17, Ko e Tamasiʻi ko Sīsuú ʻi he Temipalé (Ko e Ngaahi Fakatātā ʻo e Ongoongoleleí 205; 62500); fakatātā 1–19, Ko Kalaisi mo e Fānaú (Ko e Ngaahi Fakatātā ʻo e Ongoongoleleí 216; 62467); fakatātā 1–43, Ko Hono Fakaʻā ʻe Sīsū ʻa e Kuí (Ko e Ngaahi Fakatātā ʻo e Ongoongoleleí 213; 62145); pea mo ha ngaahi fakatātā kehe te ke fie fakaʻaongaʻi.
3. Fakatātā 1–3, Ko Sīsū ko e Kalaisi (Ko e Ngaahi Fakatātā ʻo e Ongoongoleleí 240; 62572); fakatātā 1–8, Ko e Tufaki ʻo e Sākalamēnití (62021); fakatātā 1–44, Ko e Ako ʻa Sīsū ʻi he Hemisifia Hihifo (Ko e Ngaahi Fakatātā ʻo e Ongoongoleleí 316; 62380); fakatātā 1–70, Ko e ʻOhomohe Fakaʻosí (Ko e Ngaahi Fakatātā ʻo e Ongoongoleleí 225; 62174).
Fai mo e ngaahi teuteu kotoa pē ki ha ngaahi ʻekitivitī fakatupulaki te ke fie fakaʻaongaʻi.

Ngaahi ʻekitivitʻí ke Ako Mei aʻí

Fakaafeʻi ha taha ʻo e fānaú ke ne fai ʻa e fua lotú.

ʻEkitivitī ke taki ʻaki e tokangá

Fakaʻaliʻali ʻa e fakatātā 1–8, Ko e Tufaki ʻo e Sākalamēnití. Fakahā ki he fānaú ko e fakataha ko ia ʻoku tau faʻa fai ʻi he Sāpate ʻoku ui ia ko e houalotu sākalamēnití.

ʻEkitivitī ke taki ʻaki e tokangá

Ko e hā hono ʻuhinga ʻoku tau ui ai ʻa e fakatahaʻangá ni ko e houalotu sākalamēnití?

Fakafeʻiloaki ange ʻa e mēmipa ʻo e kōlomu ʻo e kau taulaʻeikí ki he fānaú. ʻAi ke ne fakamatalaʻi ʻa e fatongia ʻo e Lakanga Taulaʻeiki Faka-ʻĒloné ki he sākalamēnití. ʻAi ke ne fakahā ʻene ngaahi ongo ʻo fekauʻaki mo hono fatongia ʻi he ouau toputapú ni. Fakamālō kiate ia ʻi heʻene haʻú pea tuku ke ne foki ki heʻene fakataha fakakōlomú pe kalasi Lautohi Faka-Sāpaté.

Naʻe foaki mai ʻe Sīsū ʻa e sākalamēnití ke tokoniʻi kitautolu ke tau manatuʻi Ia

Fakaʻaliʻali ʻa e fakatātā 1–3, Ko Sīsū ko e Kalaisí. Fakamanatu ki he fānaú ko Sīsuú ko e ʻAlo ia ʻo e Tamai Hēvaní. Koeʻuhí naʻe ʻofa lahi ʻa Sīsū ʻiate kitautolu, naʻá ne hāʻele hifo ki he māmaní ʻo hoko ko hotau Fakamoʻui. Naʻá Ne fakamoʻui ʻa e mahakí, akoʻi ʻa e ongoongoleleí, pea fakahā ʻa e founga totonu ke tau moʻuiʻakí. Pea na’á ne pekia maʻatautolu.

Talanoá

Fakaʻaliʻali ʻa e fakatātā 1–70, Ko e ʻOhomohe Fakaʻosí. Fai ʻa e talanoa ʻo e ʻOhomohe Fakaʻosí, hangē ko ʻene hā ʻi he Luke 22:19–20. Lau leʻo lahi mei he Tohi Tapú ʻa e konga fakaʻosi ʻo e veesi 19: “Fai ʻeni ʻi he fakamanatu kiate Au.” Fakamatalaʻi ange naʻe folofola ʻa Sīsū ki heʻene kau ʻaposetoló ke nau fakataha ʻi he Sāpate kotoa pē, pea fakamanatua Ia ʻi hono maʻu ʻo e sākalamēnití.

Fakaʻaliʻali ʻa e fakatātā 1–44, Ko e Ako ʻa Sīsū ʻi he Hemisifia Hihifó. Fakamatalaʻi ange ko e taimi naʻe ʻaʻahi ai ʻa Sīsū ki he Kau Nīfaí, naʻá ne toe fakahā kiate kinautolu ke nau fakataha ʻi he Sāpate kotoa pē pea fakamanatua Ia ʻi hono maʻu ʻo e sākalamēnití (Vakai ki he 3 Nīfai 18:1–11).

Talanoá

Ko hai ʻoku totonu ke fakakaukau ki ai ʻa e kau ʻaposetoló ʻi he taimi ʻoku nau maʻu ai ʻa e sākalamēnití?
Ko hai naʻe totonu ke fakakaukau ki ai ʻa e Kau Nīfaí ʻi he taimi ʻoku nau maʻu ai ʻa e sākalamēnití?
Ko hai ʻoku totonu ke tau fakakaukau ki aí ʻi he taimi ʻoku tau maʻu ai ʻa e sākalamēnití?
Ko e fē taimi ʻoku tau maʻu ai ʻa e sākalamēnití?

ʻEkitivitií

Fai ʻa e veesi ʻekitivitī ko ʻení mo e fānaú:

ʻOku ou fiefia ʻi heʻeku haʻu he ʻahó ni ki he lotú

ʻOku ou fiefia ʻi heʻeku haʻu he ʻahó ni ki he lotú (Fakatahaʻi ʻa e ongo nimá pea faʻu ʻa e taua ʻo e fale lotu ʻaki hono fakatahaʻi ʻa e muʻa tuhú)
ʻOku ou saiʻia ke u fanongo (ʻai ʻa e nimá ki ho tuʻa telingá)
Pea mo lotu (kūnima pea punou ho ʻulú)
ʻOku ou ako ʻo fekauʻaki mo Sīsū ʻi ʻolunga (tuhu ki ʻolunga);
ʻOku ou fakakaukau kia Sīsū mo ʻEne ʻofá (fakafehauaki ho ongo nimá ʻi muʻa ʻi ho fatafatá).

Talanoá

Fakaʻaliʻali tahataha ʻa e ngaahi fakatātā ʻo e moʻui ʻa Sīsuú. Kapau ʻoku ʻiloʻi ʻe he fānaú ʻa e fakatātaá, tuku ke nau fai ʻa e talanoá. Kapau ʻoku ʻikai te nau ʻiloʻi ʻa e talanoá, vahevahe nounou ia mo kinautolu. Tuku ki he lahi taha ʻo e fānaú ke nau kau ʻi hono fai ʻo e talanoá.

Talanoá

Ko e hā ʻa e ngaahi talanoa ʻo Sīsū ʻoku ke lava ʻo fakakaukau ki ai ʻi he taimi sākalamēnití?

Tuku ki he fānaú ke nau fai ha ngaahi talanoa kehe ʻo fekauʻaki mo Sīsū ʻa ia te nau lava ʻo fakakaukau ki ai lolotonga ʻa e sākalamēnití. Kapau ʻoku ʻikai te nau lava ʻo fakakaukau ki ha taha, tala ange ha taha pe ua ʻo e ngaahi talanoa ʻo Sīsuú ʻokú ke saiʻia ke ke fakakaukau ki ai lolotonga ʻa e sākalamēnití.

Te tau lava pē ʻo anga ʻapasia lolotonga ʻa e sākalamēnití

ʻEkitivitií

Tokoniʻi ʻa e fānaú ke nau lau ʻa e veesi ko ʻení, fakaʻaongaʻi ʻa e fakatātā ʻoku fakamatalaʻi atú:

Te u kūnima (kūnima)
Te u punou hoku ʻulú (punou ho ʻulú)
Pea fakalongolongo, fakalongolongo pē (fanafana ʻa e laine ko ʻení)
ʻI he taimi ʻoku tapuakiʻi ai ʻa e sākalamēnití,
Te u manatuʻi Koe.

Fakamatalaʻi ange koeʻuhí naʻe foaki mai ʻe Sīsū ʻa e sākalamēnití ke tokoniʻi kitautolu ke tau manatuʻi Iá, ʻoku mahuʻinga ke tau fakakaukau kia Sīsū pea mo tokoniʻi ʻa e niʻihi kehé ke nau fakakaukau kiate ia foki. Te tau lava ʻo fai ʻení ʻi heʻetau anga ʻapasia lolotonga ʻa e sākalamēnití.

ʻEkitivitií

Fanafana ange ha taha ʻo e ngaahi fakamatala ko ʻení ki ha taha ʻo e fānaú pea tuku ki he tamasiʻí pē taʻahiné ke ne toe tala ia ki he kalasí. Hokohoko atu mo e ngaahi fakamatala kehe mo e fānau ko eé.

ʻEkitivitií

ʻOku tau teuteu ki he sākalamēnití ʻi heʻetau hiva ʻa e himi fakalaumālie ʻa ia ʻokú ne fakamanatuʻi mai ʻa Sīsū.
ʻOku tau fanongo fakalelei ʻi he taimi ʻoku fai ai ʻa e lotu tapuakiʻi ʻo e maá.
Ko e taimi ko ia ʻoku aʻu mai ai ʻa e maá, ʻoku tau toʻo pē ʻa e taha.
ʻOku tau fanongo fakalelei ʻi he taimi ʻoku fai ai ʻa e lotu tapuakiʻi ʻo e vaí.
ʻOku tau inu ʻi he anga ʻapasia ʻa e vaí pea fakafoki ʻa e ipú ki he laulaú.
ʻOku ʻikai te mau vaʻingaʻaki ʻa e maá pe ko e ngaahi ipu sākalamēnití.

Fakamatalaʻi ange ʻi heʻetau fai ʻení ʻoku tau fakahā ai ʻoku tau anga ʻapasia ʻi heʻetau maʻu ʻa e sākalamēnití.

ʻEkitivitií

ʻE anga fēfē ʻa ʻetau anga ʻapasia lolotonga ʻa e sākalamēnití?

ʻEkitivitií

ʻAi ʻa e fānaú ke nau fanongo fakalelei ki he ngaahi fakatātā te ke fakamatalaʻí. Fakahā ange kiate kinautolu ke nau tuʻu ki ʻolunga kapau ʻokú ke leaʻaki ha meʻa ʻoku totonu ke nau fai pe fakakaukau ki ai lolotonga ʻa e sākalamēnití. Fakahā ange kiate kinautolu ke nau tangutu ki lalo kapau ko e meʻa ʻokú ke leaʻaki ʻoku ʻikai totonu ke nau fai pe fakakaukau ki ai lolotonga ʻa e sākalamēnití. Fakaʻaongaʻi ʻa e ngaahi fakatātā ko ʻení pe ha meʻa pē ʻaʻaú:

ʻEkitivitií

Fanongo fakalelei ʻi he taimi ʻoku fai ai ʻa e lotu tapuakiʻi ʻo e sākalamēnití.
Manatuʻi ʻoku ʻofa ʻa e Tamai Hēvaní mo Sīsū ʻiate kitautolu.
Fakakaukau ki haʻo ʻalu ʻi ha kai meʻakai.
Manatu naʻe hanga ʻe Sīsū ʻo ngaohi ke moʻui lelei ʻa e kakai naʻe puké.
Talanoa ki ho tuongaʻané pe tuofefiné.
Ngaungaue holo.
Fakakaukau ki he tāpuakiʻi ʻe Sīsū ʻa e fānaú.

Fakamoʻoní

Fai hoʻo fakamoʻoní ʻo fekauʻaki mo hoʻo houngaʻia ke maʻu ʻa e sākalamēnití ke tokoniʻi kitautolu ke manatuʻi ʻa Sīsū pea mo e meʻa naʻá Ne fai maʻatautolú. Fakamatalaʻi ange ʻoku ke fuʻu houngaʻia ʻi he taimi ko ia ʻoku anga ʻapasia ai ʻa e toko taha kotoa pē lolotonga ʻa e sākalamēnití ka ke lava ʻo fakakaukau tāfataha pē kia Sīsū.

Ngaahi ʻEkitivitī Fakatupulakí

Fili ha ngaahi ʻekitivitī mei heni ke fakaʻaongaʻi lolotonga ʻa e lēsoní.

ʻAi ʻa e fānau taki taha ke nau tā ha fakatātā ʻo ha tamasiʻi pē taʻahine ʻokú ne maʻu ʻa e sākalamēnití. Fakahingoa ʻa e fakatātā taki taha Te u lava ʻo fakakaukau kia Sīsū ʻi heʻeku maʻu ʻa e sākalamēnití.
ʻOmai ki he kalasí ʻa e ngaahi laulau sākalamēniti ʻosi ki he maá mo e vaí. Tuku ki he fānaú ke nau sio mo toʻo ʻa e ngaahi laulaú. ʻAi ʻa e fānaú ke nau fakamatalaʻi ʻa e meʻa ʻoku hoko ʻi he houalotu sākalamēnití lolotonga ʻa e tāpuakiʻi ʻo e sākalamēnití.
ʻAi ʻa e fānaú ke nau fakatātaaʻi ha ngaahi talanoa ʻoku nau saiʻia ai mei he moʻui ʻa Sīsuú.

Ngaahi ʻEkitivitī kehe Maʻá e Fānau iiki angé

Fakamatalaʻi ʻa e sākalamēnití ʻi ha founga mahino ngofua: Fakaʻaliʻali ha fakatātā ʻo Sīsū pea tala ki he fānaú ʻoku ʻi ai ʻa e taimi ʻi he Sāpaté ʻoku tau manatuʻi ai ʻa Sīsū ʻi ha founga makehe. Tala ki he fānaú ko e taimi ʻeni ʻoku tau kai ai ha meʻi mā mo inu ha kiʻi ipu vai lolotonga ʻa e houalotu sākalamēnití. Fakamatalaʻi ange ko e lolotonga ʻa e sākalamēnití ʻoku tau manatu ki he ngaahi ʻofa ʻa Sīsū ʻiate kitautolú mo fakakaukau ki he ngaahi meʻa kuo ne fai ke tokoniʻi kinautolu ke tau fiefiá.
Hivaʻi pe lau ʻa e ngaahi lea ʻo e “Tala mai ʻa e Talanoa ʻo Sīsū” (Children’s Songbook, p. 57) pē “ʻOku Fiemaʻu ʻe Sīsū” (Children’s Songbook, p. 60).
Tokoniʻi ʻa e fānaú ke nau fai ʻa e veesi ʻekitivitī ko ʻení lolotonga ko ia hoʻo lau ʻa hono ngaahi leá:

Ko e Fakatupú

Naʻe folofola ʻa Sīsū ʻoku totonu ke ulo ʻa e laʻaá (ʻai ho ongo nimá ʻo tā ʻaki ha siakale ʻi ʻolunga ʻi ho ʻulú.)

ʻOku totonu ke tō ʻa e ʻuhá (ʻohifo ho ongo nimá ʻi muʻa ho sinó kae ngaungaue ho ʻuluʻulu tuhú),

ʻOku totonu ke tupu ʻa e matalaʻi ʻakaú (ʻai e ongo nimá ke hangē ha ipú, fakahanga hake ʻa e laʻi nimá ki ʻolunga).

Naʻe folofola ʻa Sīsū ʻoku totonu ke hiva ʻa e fanga manupuná (kuku mo fakaava ho louhiʻi nimá ʻo hangē ha ngutu ʻo ha manupuná)

Pea naʻe pehē, naʻe pehē (kūnima).

(Jonnie B. Wood, in Sing, Look, Do, Action Songs for Children, ed. Dorothy M. Peterson [Cincinnati: Standard Publishing Co., 1965].)

Fakamanatu ki he fānaú naʻe ʻosi foaki mai ʻe Sīsū ʻa e ngaahi meʻa lahi ke tau fiefia ai. Lolotonga ʻa e sākalamēnití te tau lava ʻo fakahā ʻoku tau houngaʻia ʻi heʻetau fakakaukau kia Sīsuú.