Naʻe Fakatupu ʻa ʻĀtama mo ʻIvi ʻi he Tatau ʻo e Tamai Hēvaní

Taumuʻá

Ke tokoniʻi ke mahino ki he fānaú taki taha ko ʻĀtama mo ʻIví naʻe fakatupu kinaua ʻi he fōtunga ʻo e Tamai Hēvaní.

Teuteú

Ako ʻi he faʻa lotu ʻa e Sēnesi 1;2:15–25; mo e vahe 3. Vakai, Ngaahi Tefitoʻi Moʻoni ʻo e Ongoongoleleí (31110 900), vahe 5 mo e 6.
Ngaahi nāunau ʻoku fiemaʻú:
1. Tohi Tapú
2. Konga fakatātā 1–1 ʻo aʻu ki he 1–25 (ʻe lava ke maʻu ʻa e ngaahi konga fakatātā tatau pehē mei he Primary Visual Aid Cutouts sets 3,4 mo e 5).
3. Fakatātā 1–33, Ko ʻĀtama mo ʻIvi (Ko e Ngaahi Fakatātā ʻo e Ongoongoleleí 101;62461); fakatātā 1–34, Ko ʻĀtama mo ʻIvi ʻi heʻena akoʻi ʻena Fānaú.
Fai mo ha ngaahi teuteu ʻe fiemaʻu ki ha ʻekitivitī fakatupulaki te ke fie fakaʻaongaʻí.

Ngaahi Ekitivitī ke ako mei aí

Fakaafeʻi ha taha ʻo e fānaú ke ne fai e fua lotú

ʻEkitivitī ke taki ʻaki e tokangá.

Kole ange ki he fānau kotoa pē ʻa e Tamai Hēvaní ke nau tuʻu ki ʻolunga. Fakamanatu ange ki he fānaú ko e fānau kotoa kitautolu ʻa e Tamai Hēvaní, ko ia ai ʻoku totonu ke tuʻu ʻa e tokotaha kotoa pē.

Hivá

Hivaʻi ʻa e “Ko e Fānau Au ʻa e ʻOtuá” (Children’s Songbook) fakataha mo e fānaú. Fakatokangaʻi ange ʻoku fakamahinoʻi mai ʻe he foʻi hivá ni kiate kitautolu naʻe ʻomai ʻe he Tamai Hēvaní kiate kitautolu ha ʻapi fakaemāmaní.

Ko e fānau au ʻa e ʻOtuá
Naʻá ne ʻomi au ki māmani
Ki ha ʻapi mo ha mātuʻa 
Angalelei mo ʻofa

Tataki au, tauhi au, pea ta ō mo au
Ke u ʻilo ʻa e halá
Akoʻi au pea te u ʻilo pau
Te u nofo mo ia ha ʻaho.

Naʻe fakatupu ʻa e māmaní ʻo fakatatau mo e palani ʻa e Tamai Hēvaní

ʻEkitivitií

Fulihi fakafoʻohifoʻi ʻa e ngaahi kongokonga fakatātaá ʻi ha funga tēpile pe ko ho fungá.

ʻEkitivitií

Ko e hā ʻa e ngaahi meʻa naʻe fakatupu ʻe Sīsū ki he māmaní?

ʻI hano tali ʻe ha taha ʻo e fānaú ʻa e ngaahi meʻa naʻe fakatupú, ʻai ke ne fakaʻaliʻali ʻa e ngaahi kongokonga fakatātā ʻoku tatau mo ʻene talí.

ʻEkitivitií

Ko e hā fua ʻa e ngaahi meʻa ne fakatupu ʻoku ke houngaʻia aí?

Tokoniʻi ʻa e fānaú ke nau ʻiloʻi ko e foʻi māmaní mo e meʻa kotoa pē ʻi aí naʻe fakatupu ia maʻatautolu ke tau fakaʻaongaʻi mo fiefia ai. Fakamanatu ange ki he fānaú ko e māmaní mo e meʻa kotoa pē ʻi aí ko e ngaahi konga pē kinautolu ʻo e palani ʻa e Tamai Hēvaní.

Hivá

Hivaʻi fakataha mo e fānaú ʻa e “Ko e Fānau Au ʻa e ʻOtuá”.

Ko ʻĀtama mo ʻIví ko e konga kinaua ʻo e Palani ʻa e Tamai Hēvaní

ʻAi ke mamata ʻa e fānaú ki he konga fakatātā ʻoku fakaʻaliʻalí.

Ko e hā mo ha toe meʻa ʻoku fiemaʻu ke ʻi he māmaní?

Fakaʻaliʻali ʻa e fakatātā 1–33, Ko ʻĀtama mo ʻIvi. Fakamatalaʻi ange ʻi he hili hono fakatupu ʻa e meʻa kotoa pē, naʻe fakatupu leva ʻa ʻĀtama mo ʻIvi. Talanoa ange kau ki he fakatupu ʻo e tangatá, ʻo hangē ko ia ʻi he Sēnesi 1:26–28. Fakamatalaʻi ange ko ʻĀtama mo ʻIvi ʻa e fuofua kakai ke nofoʻi ʻa e māmaní. Naʻá na maʻu ha sino ʻo e kakano mo e ngaahi hui ʻa ia naʻe hangē tofu pē ko e sino ʻo e Tamai Hēvaní.

Ko hai ʻa e fuofua tangata naʻá ne nofo ʻi he māmaní?
Ko hai ʻa e fuofua fefiné?
Ko e faʻahinga sino fēfē naʻe maʻu ʻe ʻĀtama mo ʻIví?

ʻAi ke ala ʻa e fānaú ki honau ongo nimá, pea ke fakamanatu ange ko honau ngaahi sinó ʻoku tatau pē ia mo e ongo sino ʻo ʻĀtama mo ʻIví.

Talanoá

ʻI hoʻo fakaʻaongaʻi ʻa e fakatātā 1–33, Ko ʻĀtama mo ʻIvi, fai ange ʻa e talanoa ʻo ʻĀtama mo ʻIví ʻi hoʻo lea pē ʻaʻaú, peá ke fakamamafaʻi ʻa e ngaahi tefitoʻi meʻa ko ʻení (vakai, Sēnesi 2:15–25;3):

Talanoá

ʻI he hili hono maʻu ʻe ʻĀtama mo ʻIvi ʻa e sino fakamatelié, naʻá na nofo ʻi ha feituʻu fakaʻofoʻofa naʻe ui ko e Ngoue ko ʻĪtení.
Naʻe fakahoko ʻa e mali ʻa ʻĀtama mo ʻIvi ki he Taʻengatá ʻe he Tamai Hēvaní.
Naʻe tupungofua pē ʻa e ʻakau matalá mo e ʻakau fuá ʻi he Ngoue ko ʻπtení, pea naʻe lalata ʻa e fanga monumanú kotoa pē.
Naʻe ʻikai ke ʻiloʻi ʻe ʻĀtama mo ʻIvi ia ʻa e faikehekehe ʻo e leleí mo e koví.
Naʻe ʻikai ke lava ʻo ʻi ai ha fānau ia ʻa ʻĀtama mo ʻIvi.
Naʻe lava ke kai ʻe ʻĀtama mo ʻIvi ʻa e fuaʻi ʻakaú mei he fuʻu ʻakau kotoa pē tuku kehe pē ʻa e fuʻu ʻakau ʻe taha.
Naʻe kai pē ʻe ʻĀtama ia mo ʻIvi ʻa e fuaʻi ʻakau mei he fuʻu ʻakau ko iá.
Naʻe pau ai ke mavahe ʻa ʻĀtama mo ʻIvi mei he Ngoue ko ʻĪtení.
Naʻe mafuli leva ʻa e māmani kātoa. Naʻe pau ke ngāue mālohi ʻa ʻĀtama mo ʻIvi ke maʻu haʻana meʻakai, kamata ke tupu mo e vaó, pea hehengi leva mo e fanga monumanú.
Naʻe kamata leva ke ʻi ai ha fānau ʻa ʻĀtama mo ʻIvi.

Fakaʻaliʻali ʻa e fakatātā 1–34, Ko ʻĀtama mo ʻIvi ʻi heʻena Akoʻi ʻena Fānaú. Fakamatalaʻi ange naʻe tāpuekina ʻa ʻĀtama mo ʻIvi ʻaki ha fānau tokolahi. Ko e ʻ uluaki mātuʻa kinaua ʻi he māmaní. Naʻá na akoʻi ʻena fānaú fekauʻaki mo e Tamai Hēvaní pea mo Sīsū. Naʻe tupu tokolahi hona fāmilí ʻo mafola ki he funga ʻo e māmaní.

Talanoá

Ko e hā e meʻa naʻe fai ʻe ʻĀtama mo ʻIví ʻi hili ʻena mavahe mei he Ngoue ko ʻĪtení?

Fakamatalaʻi ange naʻe fiefia mo fakaʻaongaʻi ʻe ʻĀtama mo ʻIvi pea mo ʻena fānaú ʻa e ngaahi ʻakaú mo e fanga monumanu kotoa pē ʻa ia naʻe fakatupu ki he māmaní.

ʻEkitivitií

Tokoniʻi e fānaú ke nau fakatātaaʻi ʻa e kiʻi faivá ni:

ʻĀtama mo ʻIvi

Naʻe nofo ʻa ʻĀtama mo ʻIvi ʻi he māmaní (Fakatahaʻi e ongo louhiʻinimá ke hangē ha ipú)
ʻI he taimi naʻe kei foʻou aí.
Naʻá na tokangaʻi ha fanga monumanu tokolahi (Fakaʻaongaʻi ho nima ke amoamo ʻaki ho nima ʻe tahá)
Pea mo e meʻakai naʻá na toó (ʻAi ho nimá ki ho ngutú ʻo hangē ʻoku ke kaí)
Naʻe ʻi ai ha fānau ʻa ʻĀtama mo ʻIvi (Fakatahaʻi ha foʻi tuhu ʻe ua)
ʻA ia naʻe ʻi ai mo ʻenau fānau ʻanautolu foki (Tānaki mai mo ha foʻi tuhu ʻe ua kehe)
ʻI he taimí ni kuo tokolahi e fānau kuo fanauʻí (Ngaungaue ho ʻuluʻulutuhú kotoa)
Vakai ange ā ki he tupulaki ʻa e māmaní (Fakatātaaʻi ʻaki ho ongo nimá ha fuʻu foʻi fuopotopoto fōlahi pea toe fakamafao atu ho ongo nimá ki he tafaʻakí)

ʻAi ke ʻiloʻi ʻe he fānaú ko e konga pē kitautolu ʻo ha fāmili pē ʻe taha, koeʻuhí ko ʻĀtama mo ʻIvi ʻa e ongo fuofua mātuʻa ʻi he māmaní.

Naʻe ʻafioʻi ʻe he Tamai Hēvaní mo Sīsū kuo lelei ʻa e māmaní

Lau leʻo lahi ʻa e sētesi ʻuluakí ʻi he Sēnesi 1:31. ʻAi ke toe lau tuʻo ua ʻe he fānaú ʻa e sētesí ni fakataha mo koe. Fakamatalaʻi ange naʻe ʻafioʻi ʻe he Tamai Hēvaní mo Sīsū ko e ngaahi meʻa kotoa pē kuo Na fakatupu ʻoku lelei. Ko e meʻa mahuʻinga angé, naʻá na ʻafioʻi ʻoku tau lelei, pea ʻoku na ʻofa lahi ʻi he tokotaha fakatāutaha kotoa pē ʻo kitautolu.

Fakamoʻoní

Fai ʻa hoʻo fakamoʻoni ki he ʻofa ʻa e Tamai Hēvaní mo Sīsū kiate kitautolu taautaha. Fakamatalaʻi ange ko e māmaní mo e meʻa kotoa pē ʻi aí ʻoku ʻa tautolu ia ke tau fakaʻaongaʻi mo fiefia ai. ʻI he taimi ʻoku tau fakatokangaʻi ai ha matalaʻi ʻakau, ha foʻi fetuʻu, pe ha meʻa pē ne fakatupu, ʻoku fakamanatuʻi ai kitautolu ʻoku ʻofa ʻa e Tamai Hēvaní mo Sīsū ʻiate kitautolu. Fakahaaʻi ʻa hoʻo houngaʻia ʻi he ʻofa ʻa e Tamaí mo Sīsuú pea mo e foʻi māmaní.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitī ko ʻení ke ke fakaʻaongaʻi ʻi he lēsoní.

Fili ha ngaahi ʻekitivitī mei he lēsoni 8 ʻo aʻu ki he lēsoni 13 ke mou fakahoko mo e fānaú, hangē ko e “Fakatupu ʻa e ʻOtuá” mo “Noa”.
Toe fakamanatu ʻa e meʻa naʻe hoko ʻi he ʻaho takitaha ʻo e Fakatupú ʻi he lolotonga hono lau tahataha ʻe he fānaú ʻa e ngaahi ʻahó ʻi honau ʻuluʻulunimá.
Hivaʻi pe lau ʻa e ngaahi lea ʻo e “ʻOku ʻOfa ʻa ʻeku Tamai Hēvaní ʻIate Au” (Children’s Songbook) fakataha mo e fānaú.
Tuku ke valivali ʻe he fānaú ha fakatātā ʻo ha taha ʻo e ngaahi meʻa ko ha konga ʻo e palani ʻa e Tamai Hēvaní, hangē ko e matalaʻi ʻakaú, fuʻu ʻakaú, pe ko e laʻaá. Tohi ʻi he konga ki ʻolunga ʻo e laʻi pepa ʻa e kiʻi tamasiʻi pe kiʻi taʻahine kotoa pē ʻa e ʻOku ou fakafetaʻi ʻi he māmaní.

Ngaahi ʻEkitivitī Kehe Maʻá e Fānau Iiki Angé

Lau ʻa e ngaahi lea ʻo e “Māmani Lahí” (Children’s Songbook). Tokoniʻi ʻa e fānaú ke nau fakatātaaʻi ʻo hangē ko ia ʻoku hā atu ʻi laló:

Māmani lahi fuopotopoto lelei ʻa e faʻú (Faʻu ha foʻi siakale ʻaki haʻo puke ho ongo nimá)

ʻA e ʻOtua funganí (ʻAi ho ongo nima ki ʻolunga ʻi ʻolunga ʻi he ʻulú)

Moʻunga pea mo e teleʻá (ʻAi ho ongo nimá ki muʻa ʻi ho sinó pea tuʻu tonu hake ho ongo umá ki ʻolunga)

ʻAkau mo e fanga manu lalahi mo e iiki (Hiki ho ongo nimá ke māʻolunga pea folahi ʻo tuku ki lalo ʻaki ho lauʻinimá)

Maama ʻa e ngaahi fetuʻu he pō, laʻā he ʻahó ʻoku ulo māfaná (Folahi ho lauʻin-ima ʻo toe ʻai ke māʻulalo ange ki lalo)

Māmani lahi fuopotopoto ʻoku ʻofa mai mo e ngaahi tāpuaki (Faʻu ha foʻi siakale fuolahi ʻi ʻolunga ʻi ho ʻulú ʻaki ho ongo umá.)
Tokoniʻi ʻa e fānaú ke nau fakatātaaʻi ʻa e fanga kiʻi vaʻinga ko ʻení mo honau ʻuluʻulutuhú ʻi he lolotonga hoʻo lau ʻa hono ngaahi leá.

Ko e Fakatupu ʻo Māmani ʻe he ʻOtuá

Naʻe faʻu ʻe he ʻOtuá ʻa e māhiná (Hili ho ongo nimá ʻi ho funga ʻulú.)

Pea mo e ngaahi fetuʻu ngingilá (Hiki ki ʻolunga ho ongo nimá, peá ke hanga ʻo tuku mo tukuange.)

Peá Ne fokotuʻu ia ki he langí (Feinga ke kakapa ki ʻolunga)

Naʻá Ne faʻu mo e laʻaá (Tuku ho ongo nimá ki ho funga ʻulú)

Pea mo e ngaahi ʻakaú (ʻAi ho ongo nimá ke na tuʻu hangatonu ki ʻolunga)

Mo e ngaahi matalaʻi ʻakaú (Hanga ʻo ʻai ho nimá ʻo hangē ha ipú)

Pea mo e fanga kiʻi manupuna ʻoku puná (ʻAi ho nima ʻo hangē ʻokú na taʻataʻaló)

(Mei he Fascinating Finger Fun by Eleanor Doan. Copyright © 1951. Ke fakaʻaongaʻi pē ʻi hano fakangofuaʻi.)