ʻE lava Ke u Lotu ki he Tamai Hēvaní

Taumuʻá

Ke tokoniʻi ʻa e fānaú taki taha ke ne ako e founga ke lotu ai ki he Tamai Hēvaní pea mo ne ʻiloʻi te Ne ʻafio mai.

Teuteú

Ako ʻi he faʻa lotu ʻa e Taniela 6. Vakai, Ko e Ngaahi Tefitoʻi Moʻoni ʻo e Ongoongoleleí (31110 900), vahe 8.
Ngaahi nāunau ʻoku fiemaʻú:
1. Tohi Tapú
2. Fakatātā 1–9, Ko e Lotu Pongipongí (62310); fakatātā 1–10, Ko e Lotu Fakafāmilí (62275); fakatātā 1–14, Ko e Taniela ʻi he ʻAna ʻo e Fanga Laioné (Ko e Ngaahi Fakatātā ʻo e Ongoongoleleí 117;62096); fakatātā 1–15, Ko e Tāpuakiʻi ʻo e Meʻatokoní.
Fai mo e ngaahi teuteu ʻe fiemaʻu ki ha ʻEkitivitī Fakatupulaki te ke fie fakaʻaongaʻí.

Ngaahi ʻEkitivitī ke ako mei aí

Fakaafeʻi ha taha ʻo e fānaú ke ne fai ʻa e fua lotú

ʻEkitivitī ke taki- ʻakiʻi e tokangá

Tuku ke tuʻu maʻu pē ʻa e kiʻi tamasiʻi pe taʻahine naʻá ne fai ʻa e fua lotú ʻi muʻa he kalasí.

Fakamanatuʻi ki he kalasí ne tau ako ʻi he lēsoni ʻo e uike kuo ʻosí, naʻa tau nofo fakataha mo e Tamai Hēvaní ki muʻa pea toki fanauʻi kitautolú. Naʻe fekauʻi mai ai kitautolu ʻe he Tamai Hēvaní ki he māmaní.

ʻEkitivitī ke taki- ʻakiʻi e tokangá

ʻE anga fēfē haʻatau fakataufolofola ki he Tamai Hēvaní ʻi he lolotonga ʻo ʻetau ʻi he māmaní?
Ko hai naʻe lea ki ai ʻa (hingoa ʻo e toko taha ne lotú) ʻi he taimi naʻe lotu aí?

Tokoniʻi ʻa e fānaú ke nau ʻiloʻi ko e taimi ko ia ʻoku tau lotu aí, ko ʻetau fefolofolai hangatonu ia mo e Tamai Hēvaní.

ʻE lava ke tau lotu ki he Tamai Hēvaní

Fai hoʻo fakamoʻoní, neongo pē ʻoku ʻikai ke tau lava ʻo sio ki he Tamai Hēvaní, te tau lava pē ke lotu kiate Ia pea te Ne fanongo ki heʻetau ngaahi lotú.

Fakaʻaliʻali ʻa e fakatātā 1–9, Ko e Lotu Pongipongí.

Ko e hā e meʻa ʻoku lolotonga fai ʻe he kiʻi taʻahine ko ʻení?
Ko hai ʻokú ne talanoa ki aí?
Ko e hā e meʻa ʻokú ke fakakaukau ʻoku leaʻaki ʻe he kiʻi taʻahiné ni ki he Tamai Hēvaní?

ʻI he taimi ʻokú ke aleaʻi ai mo e fānaú ʻa e ngaahi taimi ʻoku tau lotu aí, fakaʻaongaʻi ʻa e fakatātā 1–9, Ko e Lotu Pongipongí; fakatātā 1–10, Ko e Lotu Fakafāmilí; fakatātā 1–15, Tāpuakiʻi ʻo e Meʻatokoní. Fakamatalaʻi ange te tau lava pē ke lotu ki he Tamai Hēvaní ʻi ha taimi pē te tau fiemaʻu ai; ko e taimi anga mahení ʻa e taimi ʻoku tau ʻā hake aí pea mo e taimi ʻoku tau ʻalu ai ke mohé, ngaahi taimi ʻo e houa kaí, fakataha mo hotau ngaahi fāmilí, pea mo e ngaahi taimi ko ia ʻoku tau fiemaʻu ai ha ngaahi tokoni makehé. Tuku ke puke hake ʻe he fānaú ʻa e fakatātā totonú ʻi he taimi ʻoku mou aleaʻi aí.

Naʻe akoʻi kitautolu ʻe Sīsū Kalaisi ke tau lotu ki he Tamai Hēvaní

Fakamatalaʻi ange naʻe akoʻi kitautolu ʻe Sīsū ke tau fai ʻa e ngaahi meʻa pau ʻi he taimi ʻoku tau lotu aí. ʻI he taimi ʻoku tau teuteu ai ke lotú, ʻoku tau fakakaukau-loto ki he Tamai Hēvaní.

Ko e hā e meʻa ʻoku tau fai mo hotau ongo nimá ʻi he taimi ʻoku tau lotu aí?
Ko e hā e meʻa ʻoku tau fai mo hotau ʻulú pea mo hotau matá ʻi he taimi ʻoku tau lotu aí?

ʻEkitivitií

Tuku ke faʻifaʻitaki ʻe he fānaú hoʻo ngaahi tōʻongá lolotonga haʻo fakatātaaʻi ʻa hoʻo teuteu ke lotu, ʻaki hoʻo kūnima, punou ho ʻulú, pea kuikui mo ho matá. Kole leva ki ha taha ʻo e fānaú ke tuʻu ʻi muʻa he kalasí, pea tuku ke faʻifaʻitaki ʻe he toenga ʻo e fānaú ʻene ngaahi tōʻongá ʻi he taimi ʻokú ne teuteu ai ke fai ha lotu.

Hivá

Toutou lau fakataha mo e fānaú ʻa e ngaahi lea ʻo e “Hiva ʻo e Lotú” (Children’s Songbook). Faʻifaʻitaki e ngaahi meʻa ʻoku fokotuʻu atu ʻe hono ngaahi leá.

Ke punou hifo ho ʻulu,
Kuikui ʻa ho mata,
Lolotonga fai ʻa e lotú
Ki ho tau ʻOtuá.

Hivá

Ko e hā mo ha toe meʻa te tau lava ʻo fai ʻi heʻetau teuteu ke lotú?

Fakamatalaʻi ange, ʻi heʻetau fai ʻetau ngaahi lotu fakafāmilí pe fakafoʻituituí ʻi hotau ngaahi ʻapí, ʻoku ʻikai ngata pē ʻi heʻetau kūnimá, punou hotau ʻulú, pea mo e kuikui hotau matá, ka ʻoku tau faʻa tūʻulutui foki.

ʻEkitivitií

Fakamatalaʻi ange ʻoku ʻi ai ʻa e ngaahi meʻa mahuʻinga ʻoku tau leaʻaki ʻi heʻetau lotú. Lau atu ʻa e ngaahi lea ʻo e veesi ʻuluaki ʻo e “Oku ou Lotu ʻi he Tuí” (Children’s Songbook). ʻAi ʻa e fānaú ke nau fakafofongaʻi ʻaki ʻa e foʻi tuhu ʻe taha ki he meʻa mahuʻinga kotoa pē ʻi he ngaahi meʻa ʻe fā ʻoku tau leaʻaki ʻi heʻetau lotú.

ʻOku ou kamataʻaki ʻeku pehē “ʻE Tamai Hēvani”;
ʻO fakamālō kiate Ia ʻi he ngaahi tāpuaki kuó Ne foaki maí;
Pea ʻi he loto fakatōkilalo ʻoku ou kole ʻa e ngaahi meʻa ʻoku ou fiemaʻú,
ʻI he Huafa ʻo Sīsū Kalaisí, ʻĒmeni.

ʻEkitivitií

ʻOku anga fēfē ʻa e kamata ʻo ʻetau ngaahi lotú?
Ko e hā ha meʻa te tau fakamālō ai ki he Tamai Hēvaní?
Ko e hā ha meʻa te tau kole mei he Tamai Hēvaní?
ʻE anga fēfē haʻatau fakaʻosi ʻa ʻetau ngaahi lotú?

ʻOku ʻafio ʻa e Tamai Hēvaní kiate kitautolu ʻi heʻetau lotú

Talanoá

Fakaʻaliʻali ʻa e fakatātā 1–14, Ko Taniela ʻi he ʻAna ʻo e Fanga Laioné. Fai ʻa e talanoa mei he Taniela 6. Lau leʻo lahi ʻa e konga ʻuluaki ʻo e veesi 22 ke fakamahinoʻi e ʻuhinga ne ʻikai lavea ai ʻa Taniela ʻi he lolotonga ʻo ʻene ʻi he ʻana ʻo e fanga laioné.

Fakamatalaʻi ange naʻe fie lotu ʻa Taniela koeʻuhí he ko e fono ia mei he Tamai Hēvaní pea naʻá ne toe fiemaʻu foki ke fakamālō ki he Tamai Hēvaní ʻi he ngaahi tāpuaki kuó ne maʻú.

Talanoá

Ko e hā e meʻa naʻe fai ʻe he tuʻí koeʻuhí ko e lotu ʻa Tanielá? (Vakai, Taniela 6:16.)
Ko e hā e meʻa ne hoko kia Taniela ʻi he ʻana ʻo e fanga laioné? (Vakai, Taniela 6:22.)
ʻOku anga fēfē hoʻo ʻiloʻi naʻe fanongo e Tamai Hēvaní ki he lotu ʻa Tanielá? (Vakai, Taniela 6:23.)

Fakamoʻoní

Fakahā ange ha taimi ne fanongo ai ʻa e Tamai Hēvaní ki hoʻo ngaahi lotú. Kole ange ki he fānaú ke nau tala mai ha ngaahi meʻa ne hoko kiate kinautolu fekauʻaki mo haʻanau lotu.

Fakahā ange ki he fānaú ʻa hoʻo houngaʻia ʻi he lava ko ia ke tau lotu ki he Tamai Hēvaní, pea fakapapauʻi ange kiate kinautolu ʻoku ʻafio mai ʻa e Tamai Hēvaní kiate kitautolu ʻi heʻetau lotú.

ʻI hoʻo kole ange ki ha taha ke ne fai ʻa e lotu tukú, toe fakamanatuʻi ʻa e ngaahi founga ko ia ʻo ʻetau teuteu ke fai ha lotu.

Fakamoʻoní

Ko e hā te tau fai ʻi heʻetau teuteu ke lotú? (Kūnima, punou mo e ʻulú, pea kuikui mo e matá.)
Ko e hā ʻa e ʻuluaki meʻa ʻe leaʻaki ʻe (hingoa ʻo e taha ʻe lotú) ʻi heʻene lotú?
Ko e hā ha meʻa ʻe fakamālō ai ʻa (hingoa ʻo e taha ʻe lotú) ki he Tamai Hēvaní?
Ko e hā ha meʻa ʻe ala kole ʻe (hingoa ʻo e taha ʻe lotú) ki he Tamai Hēvaní?
ʻE anga fēfē ha fakaʻosi ʻe (hingoa ʻo e taha ʻe lotú) ʻa ʻene lotú?

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitī ko ʻení ke fakaʻaongaʻi ʻi he lolotonga ʻo e lēsoní.

Lī ha meʻa molū ʻo hangē ko ha kiʻi tangai piini pe foʻi pulu, ki he fānaú. ʻI he hapo pē ʻe he kiʻi tamasiʻí pe taʻahiné taki taha ʻa e meʻa ʻokú ke lī atu ki aí, kole ange ke ne fakakakato ʻa e sētesi ko ʻení “ʻI heʻeku lotú, te u lava ʻo fakamālō ki he Tamai Hēvaní koeʻuhí ko .” ʻE lava ke tali ʻa e kiʻi tamasiʻí pe taʻahiné, “Hoku Fāmilí.” ʻI he hili ʻa e paasi ki he toko taha kotoa pē he kalasí, toe kamata mei muʻa pea tuku ki he fānaú ke nau talamai ʻa e ngaahi meʻa te nau lava ʻo ala kole mei he Tamai Hēvaní ʻi he taimi te nau lotu aí. ʻE lava ke ke fakaʻaliʻali ange ha ngaahi fakatātā ke fakatupu ai haʻanau ngaahi fakakaukau.
Lau ʻa e ngaahi lea ʻo e “Hiva ʻo e Fakafetaʻí” (Children’s Songbook) pea mo fakatātaaʻi ʻo hangē ko ia ʻoku fakahinohino atu ʻi laló:

ʻOku mau Fakafetaʻi koeʻuhí ko ha māmani fakaʻofoʻofa (fakatātaaʻi ʻaki ho nimá ha fuopotopoto ke fakatātaaʻi ʻaki ʻa e māmaní);

ʻOku mau Fakafetaʻi ʻi he meʻatokoni ʻoku mau maʻú (Fakangalingali ʻokú ke ʻai ha meʻakai ki ho ngutú)

ʻOku mau Fakafetaʻi he fanga manupuna ʻoku hivá (fakatahatahaʻi ho ʻuluʻulutuhu ke fakatātaaʻi ʻaki e muʻatosi ʻo ha manupuna.);

Fakafetaʻi ki he ʻafioná, ʻe ʻOtua, ʻi he ngaahi meʻa kotoa pē (folahi atu ho ongo uma ki he tafaʻakí)!

(mei he First Year Music by Hollis and Dann. Copyright © 1957 by D.C. Heath and Company. Ke toki toe paaki pē ʻi hano fakangofuaʻi.)
Lau ʻa e veesi mei he “Oku ou fakamālō koeʻuhí ko hoku ongo matá,” mo tuhu ki he konga ko ia ʻo e sinó ʻi he taimi ʻoku lave ai ʻo kau ki aí:

ʻOku ou fakamālō koeʻuhí ko hoku ongo matá

ʻA hoku ongo telingá, ngutú mo hoku ihú;

Fakamālō koeʻuhí ko hoku ongo nimá mo e umá

ʻA hoku ongo vaʻé, mo e louhiʻi vaʻé.

(Toʻo mei he veesi ne faʻu ʻe Lucy Picco.)
ʻAi ke fakatātaaʻi ʻe he fānaú ʻa e talanoa ʻo Taniela ʻi he ʻana ʻo e fanga laioné. ʻE lava pē ke ke ʻomai ha fanga kiʻi teunga maʻamaʻa pē mo faingofua. Kapau ʻoku ʻikai te ke fie fakatātaaʻi ʻa e talanoá kakato, peá ke ʻai ʻa e fānaú ke nau fakatātaaʻi ko ha fanga laione ngungulu kinautolu pea ʻai ke nau tāpuniʻi honau ngutú ʻo hangē ko hano tāpuniʻi ʻe he ʻāngeló.
Hivaʻi pe lau ʻa e ngaahi lea ʻo e “ʻOku mau Fakamālō atu ʻe Tamai” (Children’s Songbook, p. 20) or “We Bow Our Heads” (Children’s Songbook) pe “Punou Ho ʻUlú” (Children’s Songbook).
Tuku ke tā fakatātaaʻi ʻe he fānaú ʻa e ngaahi meʻa ʻa ia te nau ala fakamālō ai ki he Tamai Hēvaní ʻi he taimi ʻoku nau lotu aí. Tohiʻi ʻi he fakatātā taki taha ʻa e (ʻI he taimi ʻoku ou lotu aí, Te u lava ʻo fakamālō ki he Tamai Hēvaní koeʻuhí ko e:

Ngaahi ʻEkitivitī Kehe Maʻá e Fānau Iiki Angé

Fakamanatu ki he fānaú ko e taimi ʻoku tau lotu aí, ʻoku tau fakataufolofola ai ki he Tamai Hēvaní, ʻa ia ʻoku ne ʻofaʻi mo fakafanongo mai kiate kitautolu. Tokoniʻi ʻa e fānaú ke nau lau ʻa e vēsí ni:

ʻOku ou ʻofa ʻi heʻeku Tamai Hēvaní;

ʻOku ou fakamālō kiate Ia ʻi heʻeku lotú.

ʻOku ʻofa ʻeku Tamai Hēvaní ʻiate au;

ʻOku ne fanongo ki he ngaahi meʻa ʻoku ou leaʻakí.
Tokoniʻi ʻa e fānaú ke nau lau ʻa e taha pe ongo vēsí ni fakatouʻosi, pea fakatātaaʻi mo hono ngaahi leá:

ʻOku tau kūnima, pea punou mo hotau ʻulú,

Kuikui hotau ngaahi matá, pea ʻoku mateuteu leva.

ʻOku tau kūnima mo punou hotau ʻulú

Pea fakafanongo ʻi he lolotonga ʻo e lotú.
Tā ʻa e sīpinga ʻo e nima ʻo e tamasiʻi kotoa pē ʻi ha laʻi pepa talanoa fekauʻaki mo e ngaahi meʻa ʻoku tonu ke tau fai ʻaki hotau ngaahi nimá ʻi he taimi te tau lotu aí. Tuku ke valivali ʻe he fānaú ʻa e fakatātā honau ngaahi nimá ʻi he lauʻi pepá. Fakahingoa ʻa e kiʻi fakatātā kotoa pē ʻaki ʻa e hingoa ʻo e kiʻi tamasiʻi ʻoku ʻaʻana e fakatātā ʻo e nimá.