Ko Hono Fakaʻaongaʻi ʻo e Tohi Lēsoní

ʻOku ʻi he tohi lēsoni ko ʻení ha ngaahi lēsoni ki hono akoʻi ʻo e fānaú ʻoku nau taʻu tolu ʻi heʻene aʻu ki he ʻaho 1 ʻo Sānualí. ʻE lava foki ʻe he kau faiakó ʻo fulihi e tohi lēsoni ko ʻení ke fakaʻaongaʻi ʻi he fānau māhina ʻe 18 ʻo aʻu ki he taʻu tolú. Kapau ʻoku kau ha fānau ʻoku siʻi hifo he taʻu tolú ki he Palaimelí, ʻoku totonu ke nau kau ki he kalasi nēsilí ʻo mavahe ia mei he fānau taʻu tolú tukukehe kapau ko ha uooti pe kolo ʻoku toko siʻi ʻaupito. Kapau ʻoku laka hake he toko valú pe toko hongofulú ʻa e fānau ʻoku nau toʻu tatau ʻi he uōtí pe koló, ʻe lava ke vahe-vahe leva ʻa e kalasí.

ʻOku totonu ke vakai ʻa e kau faiako ʻi he fānau nēsilí ki he konga “Ko Hono Fulihi ʻo e Tohi Lēsoní ke Fakaʻaongaʻi ʻi he Nēsilí,” ʻi he kamataʻanga ʻo e peesi 00 [ix], ʻo tānaki atu ki he konga ko ʻení.

ʻOku totonu ke fakapapauʻi ʻe he kau takí mo e kau faiakó ʻi he faʻa lotu, ʻa e founga lelei taha ʻe lava ke fokotuʻutuʻu maau ʻaki e kalasí mo fakaʻaongaʻi ʻo e ngaahi lēsoní mo e ngaahi ʻekitivitī ʻi he tohi lēsoní ni ke feau ʻaki e ngaahi fie maʻu ʻa e fānau ʻi honau uōtí pe koló.

Ko e Kalasi ʻa e Taʻu Tolú

Ko e fānau ko ia ʻoku taʻu tolu ʻi heʻene aʻu ki he ʻaho 1 ʻo Sānuali, ʻoku nau kau kinautolu ki he kalasi ʻa e taʻu tolú.

Taumuʻá

Ko e taumuʻa ʻo e kalasi taʻu tolú ke tokoniʻi e fānau ʻi hono fakatupulekina ha mahino mo ha ʻofa ki he Tamai Havani pea mo Sīsū Kalaisi, aʻusia ha ngaahi meʻa lelei ʻi he Palaimelí pea mo fakatupulaki ʻenau ongoʻi mahuʻingaʻia ʻia kinautolú.

Lotú

ʻOku totonu ke kamata mo fakaʻosi e kalasi kotoa pē ʻaki hano fai ʻe ha taha ʻo e fānaú ha lotu. Ko e anga-mahení, ʻe fai ʻa e lotu kamatá ʻi he kamataʻangá pea ko e lotu tukú ʻi he fakaʻosinga ʻo e kalasí. Akoʻi e fānaú ke nounou mo faingo-fua ʻenau fanga kiʻi lotú. Tokoniʻi kinautolu ʻo ka fie maʻu.

Taimi Tēpilé

ʻOku fakahoko ʻe he kalasí ni ha hiki māmālie mei he kalasi nēsili ki he Palaimeli anga-mahení. Lolotonga e konga ʻuluaki ʻo e taʻu, ʻe lelei kapau ʻe fakahoko pē ʻe he fānau taʻu tolú ia ʻenau taimi feʻinasiʻaki mo ʻenau taimi ʻekitivitii ʻi honau lokiako pē ʻo nautolú. Pea ʻi he toenga leva ʻo e taʻú, ʻe nau lava ʻo ʻalu ʻo taimi feʻinasiʻaki fakataha mo e fānau Palaimeli kehe. ʻE fakapapauʻi e matuʻotuʻa ʻo e fānau ʻi he kalasí he taimi ʻoku fakahoko ai ʻe he kalasí ʻa e liliú. Tokanga ke ke siofi ʻa e fānau ke ʻiloʻi e taimi ʻoku nau mateuteu aí, pea talanoa ki ai mo e kau palesitenisī ʻo e Palaimelí ke ʻiloʻi e taimi ʻoku totonu ke fakahoko ai e liliu ko iá.

ʻE lava ke ʻalu e fānau taʻu tolú ʻo kau fakataha mo e fānau Palaimeli kehé ʻi he ngaahi polokalama kamata mo fakaʻosí he taʻu kakato.

Ko e anga maheni ʻo e Palaimelí ko e houa ʻe 1 mo e miniti ʻe 40. ʻOku feʻunga ʻa e polokalama kamatá mo e polokalama tāpuní mo ha miniti ʻe 20, pea miniti ʻe 5 leva ki he fānaú ke nau takitaha ō ai ki honau ngaahi lokiakó. Kapau ʻoku taimi feʻinasiʻaki pē ʻa e fānau taʻu tolú ia ʻi honau lokiakó, pea ʻe miniti leva ʻe 75 ʻa e taimi kalasí. ʻE lava ke liliu e taimi tēpile ko ʻeni ʻoku fokotuʻu atú ʻo fakatatau mo e ngaahi fie maʻu fakalotofonuá:

Taimi Fakafeʻiloakí:	miniti ʻe 10 – 15
Taimi Lēsoní:	miniti ʻe 25 – 30
Taimi Feʻinasiʻakí mo ʻEkitivitií:	miniti ʻe 20 – 25
Taimi Tāpuní:	miniti ʻe 10 – 15

ʻI he taimi ʻoku kau fakataha ai e fānau taʻu tolú mo e toenga ʻo e Palaimelí ʻi he taimi feʻinasiʻakí, ʻe miniti leva ʻe 40 ʻa e taimi kalasí pea ʻe kau ai e taimi lēsoní mo ha kiʻi fakafeʻiloaki nounou pea mo e taimi tāpuní.

Taimi Fakafeʻiloakí: Ko e taumuʻa ʻo e taimi fakafeʻiloakí ke tuku ha taimi ki he fānaú ke nau talanoa mo fengāueʻaki ai mo e faiakó pea mo e niʻihi kehé ʻi he founga anga-mahení. ʻE ongoʻi malu mo ongoʻi lata ange ai ʻa e fānaú ʻi he Palaimelí ʻo kapau te nau tauʻatāina ke feʻunuaki holo lolotonga e taimi ko ʻení.

Tokoni ke ongoʻi ʻe he kiʻi tamasiʻi mo e kiʻi taʻahine kotoa pē ʻoku talitali lelei ia pea ʻokú ne lata ʻi he kalasí. Fakahaaʻi ha ʻofa, ongoʻi fiefia pea mo ha fakaʻa-paʻapa ʻo fou ʻi hoʻo ngaahi leá mo hoʻo ngaahi tōʻongá. Mou aleaʻi e ngaahi fie maʻu mo e ngaahi meʻa ʻoku tokanga makehe ki ai e fānaú. ʻE lava ke kau he ngaahi tefito ke aleaʻí ʻa e:

• Ngaahi meʻa ne toki hoko he moʻui ʻa e fānaú, hangē ko ha pēpē foʻou ʻi honau ʻapí pe ko ha ʻeva fakafāmili ne toki fai.

• Ngaahi ʻaho mālōlō makehe.

• Ko e ʻeá.

• Anga ʻo ʻenau vakai ki natulá.

• Ngaahi taukei fakasōsiale hangē ko e fanongó, vahevahé mo e ʻulungāanga leleí.

• Ngaahi ʻulungāanga leleí.

ʻE lava foki ke fakaʻaongaʻi e fanga kiʻi vaʻinga loulouhiʻi nimá, polokalama faofaó pea mo ha ngaahi hiva ke tokoni ki he fānaú ke taʻofi ʻaki ʻenau hohaʻá.

Taimi Lēsoní: Muimui ki he fakahinohino anga maheni ʻo e lēsoni takitaha, pea fulihi ia ʻo fakatatau mo e fiemaʻu ʻa hoʻo kalasí. Fakatefito ʻi he mahino mo e ngaahi meʻa ʻoku tokanga ki ai ʻa e fānaú. Filifili ha ngaahi talanoa mo ha ngaahi ʻekitivitī te nau akoʻi lelei ki hoʻo kalasí ʻa e ngaahi tefitoʻi moʻoni mahuʻinga ʻo e lēsoní. Filifili ha ngaahi ʻekitivitī mei he konga ki he “Ngaahi ʻEkitivitī Fakatupulakí” ʻa ia ʻokú ke ongoʻi ʻe ʻaonga ki he fānau ʻi hoʻo kalasí. Fakaʻaongaʻi e ngaahi ʻekitiv-itī ko ʻení ʻi ha faʻahinga taimi pē te ke loto ki ai he lolotonga ʻa e lēsoní. ʻOku ako lelei ange e fānaú ʻi haʻanau toutou fakahoko ha meʻa, ko ia te ke lava ʻo fakaʻaon-gaʻi ʻa e ʻekitivitī, foʻi hiva, talanoa pe ko ha potu folofola tatau pē ʻo lahi ange he tuʻo tahá ʻi he lolotonga ʻo ha lēsoni pe ʻi ha ngaahi lēsoni ʻa mui ange.

Akoʻi e lēsoní ʻo fakatatau mo e fakahokohokó, tukukehe ʻa e lēsoni 45 mo e 46 (Pekiá mo e Kilisimasí).

Taimi Feʻinasiʻakí mo ʻEkitivitií: ʻI hono fai ʻo e taimi feʻinasiʻakí ʻi he kalasí kae ʻikai ke fai fakataha mo e fānau Palaimeli kehé, hanga ʻo fakaʻaongaʻi e ngaahi ʻeki-tivitī ʻi he lēsoní pea mo e ngaahi konga he taimi feʻinasiʻakí ko e “Ngaahi ʻEkitivitī Fakatupulakí.” Te ke lava foki ke mou toe fai e ngaahi ʻekitivitī ʻoku man-ako taha ai e fānaú mei ha ngaahi lēsoni ki muʻa ange. Fakakau ai ha taimi ki he ngaahi hiva Palaimelí (vakai ki he konga “Ko e Hiva ʻi he Lokiakó,” peesi viii). Poupouʻi e fānaú ke nau kau fakataha ki ai mo fevahevaheʻaki ʻenau ngaahi fakakaukaú.

Hili e kamata kau fakataha ʻa e fānau taʻu tolú mo e fānau Palaimeli kehé ʻi he taimi feʻinasiʻakí, ʻe lava ke ʻai pē mo kole ange ke nau fai ha polokalama he taimi feʻinasiʻakí. Palani ha kiʻi polokalama nounou ʻi he ongoongoleleí ʻe kau kotoa ki ai e fānau ʻo e kalasí. Te ke lava ʻo:

• Tokoniʻi e fānaú ke nau fakafaivaʻi ha foʻi talanoa pe meʻa ne hoko mei ha taha ʻo e ngaahi lēsoní.

• ʻAi ke fakaʻaongaʻi ʻe he fānaú ha ngaahi fakatātā ke tokoni ki hano fai ha foʻi talanoa mei ha taha ʻo e ngaahi lēsoní.

• ʻAi ke vahevahe ʻe he tamasiʻi pe taʻahine takitaha ha potu folofola pe fakakaukau ʻo fekauʻaki mo ha tefitoʻi moʻoni ʻo e ongoongoleleí.

• ʻAi ke hivaʻi ʻe he fānaú ha foʻi hiva ʻo fekauʻaki mo ha tefitoʻi moʻoni kuo akoʻi.

Taimi Tāpuní: Mou vakaiʻi mo fakanounouʻi e ngaahi tefitoʻi fakakaukau ʻo e lēsoní. Tautefito hoʻo fakamatalá ki ha ngaahi kupuʻi lea fakafolofola nounou ʻe taha pe ua mei he lēsoní pea fakamamafaʻi e ngaahi tefitoʻi fakakaukaú ke lava ʻe he fānaú ʻo vahevahe kinautolu ʻi ʻapi. Fakaafeʻi ha taha ʻo e fānaú ke ne fai e lotu tukú.

Teuteu ʻo e Ngaahi Lēsoní

Ko e fuofua meʻa mahuʻinga ki hono akoʻi lelei ʻo e fānau īkí ke ʻiloʻi mo ʻofaʻi kinautolu. ʻIloʻi peá ke fakaʻaongaʻi e ʻuluaki hingoa ʻo e fānau ʻi hoʻo kalasí he taimi ʻokú ke lea ai kia kinautolú. Fengāueʻaki fakatāutaha mo kinautolu pea ke ako ke ke ʻiloʻi ʻenau moʻui. Fekumi ki ha ngaahi founga ke fakakau ai kinautolu ʻi he lēsoní pea mo ʻai ke ʻuhinga fakatāutaha ʻa e lēsoní kia kinautolu. Fakahaaʻi hoʻo ʻofa mo hoʻo tokanga totonu ki he fānau kotoa pē ʻi hoʻo kalasí.

Ko e meʻa mahuʻinga hono uá, ke ke mateuteu. Kamata teuteu e lēsoni takitaha ke ʻoua naʻa toe siʻi ange he uike ʻe taha ki muʻa. Lau ʻa e lēsoní kakato; pea ako ia ʻi he faʻa lotu ke ke ʻiloʻi e founga lelei taha ke akoʻi ʻaki e ngaahi tefitoʻi moʻoní ki he fānau ʻi hoʻo kalasí. Fili ha ngaahi ʻekitivitī fakatupulaki ke tānaki atu ki he ngaahi ʻekitivitī ʻi he lēsoni pea ke pukeʻaki e tokanga mo e kau mai ʻa e fānau ki he lēsoní. Palani ha ngaahi ʻekitivitī kehekehe peá ke lava pē ʻo feliuliuaki ngofua ʻi hono fakaʻaongaʻi kinautolu ke feau ʻaki e ngaahi fie maʻu ʻa e kalasí. ʻAi ke ke ʻiloʻi lelei ʻa e lēsoní ke ʻoua naʻá ke laukonga mei he tohi lēsoní. Tauhi e fetuʻutaki mata ki he mata mo e fānaú ki he lahi taha ʻe ala lavá. Faʻa lotu ʻi hoʻo teuteu e lēsoni takitaha, ʻo fekumi ki he Laumālié ke ne fakahinohinoʻi koe ʻi hoʻo teuteu mo faiakó.

Akoʻi ʻo e Ngaahi Lēsoní

ʻʻI hoʻo akoʻi ki he fānaú ʻa e ngaahi tefitoʻi moʻoni ʻo e ongoongoleleí, ʻoku totonu ke ke poupouʻi e fānaú ke nau ʻofa ʻi he ongoongoleleí. ʻE lava ke tokoni atu e ngaahi fokotuʻu ko ʻení ke ke ʻai ke fakafiefia ʻa e Palaimelí ki he fānau ʻi hoʻo kalasí:

• ʻʻOange ki he fānaú ha ngaahi faingamālie lahi ke nau talanoa mo kau ai ki he lēsoní.

• Fakafanongo ki he taimi ʻoku talanoa ai e fānaú peá ke feinga ke fai ha tali ʻoku lelei mo totonú.

• Loto vilitaki. Kapau ʻe fiefia ha faiako ʻi he Palaimelí, ʻe fiefia foki mo e fānaú ʻi he Palaimelí.

• Lea ʻi he leʻo ʻofa.

• Faʻa kātaki, anga lelei mo ʻofa, tautefito ki he taimi ʻoku helaʻia pe hohaʻa ai e fānaú.

• Tokanga lelei ki he ʻulungāanga leleí peá ke tukunoaʻi ʻa e ʻulungāanga koví ʻo ka lava.

• Teuteuʻi ha ngaahi ʻekitivitī kehekehe peá ke lava ʻo feliliuaki ngofua pē ʻi ono fakaʻaongaʻi kinautolu ke feau ʻaki e ngaahi fie maʻu ʻa e fānaú. ʻOku siʻisiʻi pē e taimi tokanga ia ʻa e fānau īkí pea fie maʻu ke nau toutou ngaue holo.

• Feinga ke toe tohoakiʻi e tokanga ʻa e fānaú he taimi ʻoku fai ai ha fakakikihí.

• Manatuʻi ʻoku fakafiefia ange ki he fānau īkí ʻa e fanga kiʻi talanoá, ngaahi nāunau ʻoku nau mamata mo fanongo ki aí, hivá pea mo e ngaue holó. ʻOku nau fiefia ʻi hano toutou fakahoko ʻo ha ngaahi ʻekitivitī mo ha ngaahi hiva tautefito ki he ngaahi ʻekitivitī mo e ngaahi hiva ʻoku nau ʻiloʻi leleí.

Ngaahi Hiva ʻi he Lokiakó

ʻʻOku ʻi he lēsoni takitaha he tohi lēsoni ko ʻení ha ngaahi hiva ke tokoni ki hono fakamālohia e ngaahi akonaki ʻo e ongoongoleleí. ʻOku ʻikai fie maʻu ia ke ke taukei he hivá kae toki fakafiefia mo mahuʻinga mālie ʻa e hiva ʻi lokiakó. He ʻikai ʻiloʻi ʻe he fānaú ia pe ʻokú ke hiva lelei pe ʻikai; ko e meʻa pē te nau ʻiloʻí ʻokú ke fiefia ʻi he hivá. Ako ke ke ʻiloʻi lelei e foʻi hiva takitaha, pea akoako ia ke hoko ko ha konga ʻo hoʻo teuteu lēsoní. Kapau ʻe lava, ʻe lava ke tokoni atu ʻa e Tohi Hiva ʻa e Fānaú ʻi he kāseté (hivá ʻataʻatā pē, 52505; hivá mo e fakaleá, 52428) pe CD (hivá ʻataʻatā pē, 50505; hivá mo e fakaleá, 50428) ki hoʻo ako e ngaahi hivá. Te ke lava foki ʻo fakaʻaongaʻi e ngaahi hiki ko ʻení ʻi hoʻo hiva ʻi he lokiakó.

Ko e toutou hivaʻí ko e founga lelei taha ia ke akoʻi ʻaki e hivá ki he fānaú.Te ke lava ʻo fakaʻaongaʻi tuʻo lahi ha foʻi hiva tatau pē lolotonga ha lēsoni.ʻE lava ke tokoni hano fakatātaaʻi faingofua ʻo e foʻi hivá ki hono fakakau e fānaú ki he hivá.Kapau ʻoku ʻiloʻi lelei ʻe he fānaú ʻa e foʻi hivá pea nau fiefia ʻi hono hivaʻí, pea mou toutou hivaʻi ia lolotonga e taimi lēsoní, taimi feʻinasiʻakí pea mo e taimi ʻekitivitií.

Ke akoʻi ha foʻi hiva pe ʻekitivitī foʻou ki he fānaú:

• Ako maʻu loto ʻa e foʻi hivá pe ko e ʻekitivitií ki muʻa pea fai e kalasí.

• Fakafeʻiloaki ʻa e foʻi hiva foʻoú pe foʻi ʻekitivitií ʻaki haʻo hivaʻi pe lau ia ki he fānaú. Fakatātaaʻi kapau ʻoku ʻi ai.

• Fakaafeʻi e fānaú ke nau hiva pe lau fakataha e fakaleá mo koe. He ʻikai ke nau ʻiloʻi leva ʻa e fakaleá, ka ʻo kapau te ke toutou lau ʻa e foʻi hivá pe veesi ʻekitivitií, te nau ako leva ʻa hono fakaleá.

• Lau māmālie ke mahino ki he fānaú ʻa e fakaleá mo hono fakatātaaʻí.

• Toutou fakaʻaongaʻi ha ngaahi nāunau tokoni fakafaiako ke tokoni ki hono fai ʻo e foʻi hivá pe veesi ʻekitivitií. ʻOku tokanga mo ako lelei ange ʻa e fānaú ʻo kapau te nau mamata ki ha meʻa.

• Fakanounouʻi e foʻi hivá pe veesi ʻekitivitií ʻo kapau ʻe fakaʻau ke hohaʻa e fānaú. Kapau ʻoku lōloa ha foʻi hiva pe veesi ʻekitivitī, te ke lava ʻo tokoni ki he fānaú ke nau fakatātaaʻi lolotonga haʻo hivaʻi pe lau tokotaha pē hono fakaleá.

He ʻikai fie fakataha maʻu pē hiva e fānau īkí mo koe, ka teu nau fiefia ke kau mai ʻaki haʻanau fakafanongo ki hano hivaʻi ia.

Ngaahi Nāunau Tokoni Fakafaiakó

ʻʻOku mahuʻinga e nāunau tokoni fakafaiakó ʻi hono akoʻi ʻo e fānau īkí. ʻE lava ke tokoni e ngaahi fakatātaá, mo e ngaahi nāunau kehe ʻoku lava ʻo mamataʻí ki hono maʻu mo hono pukepuke e tokanga ʻa e fānaú, ʻo tokoni ai ke manatuʻi lelei ʻe he fānaú e meʻa ʻokú ke akoʻí.

ʻOku fakakau atu he tohi lēsoní ʻa e ngaahi fakatātā ʻoku fie maʻu ʻi he ngaahi lēsoní. ʻOku ʻi he konga “Teuteu” ʻo e lēsoni takitaha ʻa e ngaahi fakatātā ʻoku fakaʻaongaʻi he lēsoni ko iá ʻo fakatatau mo e tefitó mo hono fiká. ʻOku hanga ʻe he ngaahi mataʻifika he loto haʻí ʻo fakamahinoʻi mai e fakatātā takitaha (pe ko ha fakatātā tatau mo ia) ʻi he Ngaahi Fakatātā ʻo e Ongoongoleleí (34730 900 pe 34735 900) pea mo e laipeli ʻo e falelotú. ʻOku hā foki ʻi he konga ko e “Teuteú” ʻo e lēsoni takitaha ʻa e fakatātā takitaha ʻo fakatatau mo hono fika ʻi he tohi lēsoní pea mo e seti fakatātā Tokoni Fakafaiako ʻa e Palaimelí (33239–33250 pe 08456) ʻa ia ʻoku ʻi ai ʻa e ngaahi fakatātā tatau pē.

ʻOku hoko e ngaahi meʻa ʻoku tau lava ʻo ala ki aí, ko ha ngaahi tokoni fakafaiako lelei ia ʻoku lava ke fai ha mamata ki ai tautautefito kapau ʻoku maheni e fānaú he toutou ala pe toʻotoʻo kinautolú. ʻI he taimi te ke fai ai ha foʻi talanoa fakafolofola, hanga ʻo fakaʻaongaʻi hoʻo ngaahi folofolá pe ngaahi folofola ʻa e falelotú ke hoko ko ha fakatātā ʻo ha ngaahi meʻa ʻe ala mamata ki ai ʻa e fānaú.

Ngaahi Fakahinohino Makehe ki Hono Fakakau ʻo e Fānau Faingataʻaʻia Fakaesinó

ʻOku tā ʻe he Fakamoʻuí ʻa e sīpinga maʻatautolu ʻi he ongoʻi manavaʻofa ki he kakai ʻoku faingataʻaʻia fakaesinó. ʻI Heʻene ʻaʻahi ki he kau Nīfaí hili ʻEne Toetuʻú, naʻá Ne folofola ʻo pehē:

“ʻOku ʻi ai hamou niʻihi ʻoku mahaki? Mou ʻomi ʻa kinautolu ki heni. ʻOku ʻi ai hamou niʻihi ʻoku ketu pe kui pe pipiki pe mutu, pe kilia pe mate honau kupu, pe tuli pe puke ʻi ha mahaki ʻe taha? ʻOmi ʻa kinautolu ki heni, pea te u fakamoʻui ʻa kinautolu, he ʻoku ou ʻofa kiate kimoutolu; ʻoku fonu hoku lotó ʻi he ʻofa” (3 Nīfai 17:7).

ʻI hoʻo hoko ko ha faiako Palaimelí, ʻokú ke ʻi ha tuʻunga fisifisimuʻa ai ke fakahaaʻi ha manavaʻofa. Neongo pē mahalo ne ʻikai akoʻi koe ke ke fai ha tokoni faka-palofesinale, ka ʻi hoʻo hoko ko e faiakó ʻe lava ke mahino kiate koe mo ke tokoniʻi foki e fānau ʻoku faingataʻaʻia fakaesinó. ʻOku fie maʻu ʻa e tokangá, mahinó mo e holi ko ia ke fakakau mai e mēmipa kotoa pē ʻo e kalasí ʻi he ngaahi ʻekitivitī akó.

ʻE lava ke ongoʻi ʻa e Laumālié ʻe he fānau ʻoku faingataʻaʻia fakaesinó neongo pe ko e hā e tuʻunga mahino ʻoku nau maʻú. Neongo ʻe ʻi ai ha fānau he ʻikai ke nau kau ki he Palaimelí he kotoa ʻo e taimí, ka ʻe fie maʻu ke nau maʻu ha faingamālie ke kau nounou pē ki ai ke nau ongoʻi e Laumālié. ʻE malava pē ke ʻi ai hao hoa faiako ʻokú ne ongoʻingofua e ngaahi fie maʻu ʻa e fānaú, ke feohi mo e fānaú ʻi he Palaimelí naʻa fie maʻu ʻe he kiʻi tamasiʻí pe taʻahiné ke mavahe mei he toenga ʻo e fānaú lolotonga ʻa e Palaimelí.

ʻE ʻi ai ha niʻihi he kalasí te nau palopalema he faingataʻaʻia fakaesinó, faingataʻaʻia he anga ʻo e vakaí pe mole ʻa e fanongó, ʻikai ʻatamai lelei, palopalema ʻi he leá, ʻulungāangá, feohi mo e kakaí, puke fakaʻatamai, palopalema he ngaue holó pe faʻa toutou puke. ʻE ʻi ai ha niʻihi te nau lau ʻoku ʻikai ke nau maheni pea ngali faingataʻa ʻa e lea ʻoku ngāueʻakí pea mo e anga fakafonua ʻo honau feituʻú. Kae tatau ai pē pe ko e hā e ngaahi tūkunga fakatāutahá, ʻoku kei ʻinasi pē ʻa e tamasiʻi mo e taʻahine takitaha ʻi he ngaahi fie maʻu tatau ke ʻofaʻi mo tali lelei kinautolu pea ke nau ako foki ki he ongoon-goleleí ʻo ongoʻi e Laumālié mo kau lelei mai pea tokoniʻi ai foki e niʻihi kehé.

ʻE lava ke tokoniʻi koe ʻe he ngaahi fakahinohino ko ʻení ke ke akoʻi ha kiʻi tamasiʻi pe taʻahine ʻoku faingataʻaʻia fakaesino:

• Vakai fakalaka atu ʻi hono faingataʻaʻia fakaesinó peá ke feinga ke ʻiloʻi e kiʻi tamasiʻí pe taʻahiné. Anga totonu, anga fakakaumeʻa mo anga-ʻofa.

• Ako ke ʻiloʻi e ngaahi mālohinga pe ngaahi meʻa pau ʻoku faingataʻaʻia ai e kiʻi tamasiʻí pe taʻahiné.

• Fai e feinga kotoa pē ke akoʻi mo fakamanatu ki he kalasí ʻa honau fatongia ke fakaʻapaʻapaʻi e tokotaha kotoa pē he kalasí. ʻE lava ke hoko hano tokoniʻi ʻo ha taha he kalasí ʻoku faingataʻaʻia fakaesinó ko hano ako ʻo ha ʻulungāanga faka- Kalaisi ki he kalasí kotoa.

• Feinga ke ʻiloʻi e founga lelei taha ke akoʻi ʻaki e fānaú ʻaki haʻo talanoa mo e ngaahi mātuʻá, kau mēmipa kehe ʻo e fāmilí pea mo e kiʻi tamasiʻí pe taʻahiné ʻo ka taau ke fai pehē.

• Ki muʻa peá ke ui ha taha he fānaú ʻoku faingataʻaʻia fakaesino ke ne fakahoko ha lotu pe kau mai ʻi ha founga kehe, tomuʻa fehuʻi ange pe ʻokú ne fie kau mai ki he kalasí. Fakamamafaʻi e meʻa kotoa pē ʻe lava ʻe he kiʻi tamasiʻi pe taʻahine takitaha pea pehē foki ki hono ngaahi talēnití pea feinga ke ʻiloʻi ha ngaahi founga te nau takitaha lava ʻo kau lelei mai ai ki he kalasí.

• Fulihi ʻa e ngaahi nāunau fakalēsoní mo e ngaahi ʻātakaí ke feau e ngaahi fie maʻu fakatāutaha ʻa e fānau ʻoku faingataʻaʻia fakaesinó.

ʻOku lava ke maʻu ha ngaahi nāunau ke tānaki atu ki hono akoʻi ʻo e fānau ʻoku faingataʻaʻia fakaesinó mei he ngaahi senitā tufakiʻanga nāunau ʻo e Siasí (vakai ki he “Ngaahi Nāunau Maʻá e Kau Faingataʻaʻia Fakaesinó” ʻi he Church Materials Catalog).