ʻOku ou Fakafetaʻi Koeʻuhí Ko Hoku ʻApi Nofoʻangá

Taumuʻá

Ke fakalotolahiʻi ʻa e fānaú taki taha ke nau maʻu ha loto houngaʻia koeʻuhí ko honau ʻapí pea ke tokoni ke tauhi lelei ia.

Teuteú

Ako ʻi he faʻa lotu ʻa e 1 Nīfai 2:2–6; 17:7–8; 18:6, 23.
Ngaahi nāunau ʻoku fiemaʻú:
1. Tohi Molomona.
2. Poulu pe hina vai, poulu pe ipu kelekele, kiʻi vaʻakau. Kapau te ke saiʻia ange ai, peá ke ʻomai ha fakatātā ʻo ha ano vai, kelekele, pea mo ha fuʻu ʻakau.
3. Pepa mo ha ngaahi kala valivali, pe ngaahi peni vahevahe.
4. Fakatātā 1–60, Ko e Tūʻuta ʻa Līhai mo Hono Kakaí ʻi he Fonua ʻo e Talaʻofá (Ko e Ngaahi Fakatātā ʻo e Ongoongoleleí 304; 62045); fakatātā 1–61, Ko e Fononga mei Nāvuú (Ko e Ngaahi Fakatātā ʻo e Ongoongoleleí 410; 62493).
Fai mo ha ngaahi teuteu ki ha ngaahi ʻEkitivitī Fakatupulaki te ke fie fakaʻaongaʻí.

Ngaahi ʻEkitivitī Ke Ako Mei Aí

Fakaafeʻi ha taha ʻo e fānaú ke ne fai ʻa e fua lotú.

ʻEkitivitī ke taki ʻaki e tokangá

Fakaʻaliʻali ʻa e poulu ʻoku ʻi ai ʻa e vaí peá ke ʻeke ange pe ko e hā ha faʻahinga ʻinisēkite pe manu ʻoku nofo ʻi he vaí. Tuku ki he fānaú ke nau fakakaukau ki he lahi taha ʻe ala maʻú. Fakaʻaliʻali ʻa e kelekelé pea mo e vaʻa ʻakaú, pea tokoniʻi ʻa e fānaú ke nau fakakaukau ki he fanga monumanu mo e fanga ʻinisēkite ʻoku nau nofo ʻi he kelekelé mo e ʻuluʻakaú.

ʻEkitivitī ke taki ʻaki e tokangá

ʻOkú ke pehē ʻe anga fēfē kapau ko ho nofoʻangá ʻa e vaí?
Ko e hā ʻa e meʻa naʻe mei hoko kapau ko ho nofoʻangá ha fuʻu ʻakau?

ʻOku lahi ʻa e faʻahinga ʻo e nofoʻangá

Fakamatalaʻi ange ko e fanga monumanú mo e fanga ʻinisēkité ʻoku nau nofo ʻi ha ngaahi nofoʻanga kehekehe. ʻOku nofo foki mo e kakaí ʻi ha ngaahi nofoʻanga kehekehe.

Talanoá

Fakaʻaliʻali ʻa e fakatātā 1–60, Ko e Tūʻuta ʻa Līhai mo Hono Kakaí ki he Fonua ʻo e Talaʻofá peá ke fakahā ange ʻa e Tohi ʻa Molomoná ʻi he lolotonga hoʻo fai ʻa e talanoa fekauʻaki mo Līhai mo hono fāmilí pea mo e faʻahinga nofoʻanga naʻa nau nofo aí (Vakai ki he 1 Nīfai 2:1–6; 17:7–8; 18:6, 23). Naʻe ʻi ai ha nofoʻanga lelei ʻo Līhai mo hono fāmilí ʻi Selūsalema, pea ʻi he folofola ange ʻa e ʻOtuá ki ai ke mavahe mei Selūsalemá, naʻa nau fāi fononga ʻi he toafá mo nau nofo ʻi he ngaahi fale fehikitakí. Hili ha ngaahi taʻu lahi naʻe folofola ʻa e ʻOtuá kia Nīfai, foha ʻo Līhaí, ke ne foʻu ha vaka. Naʻe nofo ʻa Līhai mo hono fāmilí ʻi he vaká he lolotonga ʻenau fononga ki he fonua ʻo e talaʻofá, ʻa ia ko ha feituʻu naʻe teuteu ʻe he Tamai Hēvaní mo Sīsū maʻanautolu ke nau nofo ai. Hili ʻenau tūʻuta ki he fonua ʻo e talaʻofá, naʻe nofo ʻa Līhai mo hono fāmilí ʻi he ngaahi fale fehikitakí kae ʻoua kuo nau lava ʻo langa ha ngaahi nofoʻanga pau.

Talanoá

Ko e hā ha ngaahi faʻahinga kehekehe ʻo e ʻapí naʻe nofo ai ʻa Līhai mo hono fāmilí?

Talanoá

Fakaʻaliʻali ʻa e fakatātā 1–61, Ko e Fononga mei Nāvuú. Hanga ʻo fai ʻa e talanoa ki he fuofua kāingalotu ʻo e Siasí ʻa ia naʻa nau langa ʻa Nāvuú. Naʻa nau ngāue mālohi ke langa ʻa honau ngaahi ʻapí pea mo ha temipale fakaʻofoʻofa. Ka naʻe ʻi ai ha kakai naʻe ʻi Nāvū naʻe ʻikai te nau saiʻia ʻi he kāingalotu ʻo e Siasí pea nau fakamālohiʻi kinautolu ke nau mavahe. Naʻe fononga ʻa e kāingalotu ʻo e Siasí mo ha fanga kiʻi meʻa iiki pē ʻa ia naʻa nau lava ʻo faʻo ki heʻenau ngaahi saliote fonongá. Koeʻuhí naʻe fuʻu iiki ʻa e ngaahi saliote ko ení, naʻe pau ai ke tuku ʻe he fānaú ʻenau ngaahi meʻa vaʻingá ʻi Nāvū. Naʻe tokolahi ʻa e kakai naʻa nau nofo pē ʻi heʻenau saliote fakafalé pea ʻi he ngaahi fale fehikitakí ʻo taimi lōloa.

Talanoá

Ko e hā hano faingataʻa haʻate nofo saliote fakafale pe fale fehikitaki?

ʻEkitivitií

ʻAi ʻa e fānaú ke nau tuʻu ʻo fakatātaaʻi ʻa e veesi ʻekitivitī ko ʻení:

Naʻe fononga ʻa e fānau ʻa e kau paioniá mo talanoa (ʻalu tuʻu maʻu);
Pea nau vaʻinga ha ngaahi vaʻinga mo tāfue mo hopo (punopuna pe puna māʻolunga ʻi ho tuʻuʻangá).
ʻI heʻene poʻulí naʻe fetapaki ʻa e fetuʻú mo ngingila (fakaava mo kuku ho ongo nimá);
Naʻa nau mohe ʻi he loto salioté mo misi (kuikui ho matá pea ʻolunga ho ʻulú ʻi ho ongo nimá).

Ko e ʻapí ʻa e feituʻu ʻoku ʻofaʻi ai ʻa kitautolú

Fakamatalaʻi ange ko e faʻahinga nofoʻanga ko ia ʻoku tau nofo aí ʻoku ʻikai ke fuʻu mahuʻinga. ʻE lava pē ke tau nofo ʻi ha fale lahi pe ʻi ha fale ʻoku siʻisiʻi, pe ko ha fale nofo totongi, ʻi ha fale fehikitaki, pe ha vaka. Ko e meʻa ʻoku mahuʻingá ʻa e hoko ko ia ʻa hotau nofoʻangá ko ha feituʻu ʻoku ʻofaʻi kātoa ai ʻa e mēmipa ʻo e fāmilí. Fakamatala ʻo fekauʻaki mo ho ʻapi nofoʻanga pea mo e meʻa ʻokú ke fai ke ngaohi ia ke hoko ko ha feituʻu ʻoku ʻi ai ʻa e ʻofá.

Ko e hā ʻa e ʻuhinga ʻokú ke saiʻia ai ke ke ʻi ʻapí?
ʻOkú ke ʻilo fēfē ʻoku ʻofa ho fāmilí ʻiate koe?
Kuó ke mohe nai ʻi ha feituʻu kehe mei ʻapi?
Naʻá ke mohe ʻi fē?
Naʻá ke ongoʻi fēfē ʻi he taimi naʻá ke foki ai ki ʻapí?

Fakamanatu ange ki he fānaú ʻa hono lelei ʻa ʻenau foki mai ki honau ngaahi ʻapí pea mo honau ngaahi moheʻangá.

ʻEkitivitií

ʻAi ʻa e fānaú ke nau tuʻu, fakafanongo ʻi he taimi te ke lau atu ai ʻa e ngaahi lea ʻo e “ʻApí” (Children’s Songbook, p.192). Tala ange ki he fānaú ke nau hanga ʻo kuku honau fatafatá ʻi he taimi te nau fanongo ai ki he foʻi lea ko e ʻapí. Kapau ʻokú ke fiemaʻu, toe lau ʻa e vēsí pea tuku ki he fānaú ke nau lau ia fakataha mo koe.

ʻOku ʻi he ʻapí ʻa e mafu tefuá,
ʻA e māfaná mo e hulu fau ʻa e ʻofá.
ʻOku ʻi he ʻapí ʻa e māfaná, mo e ʻōʻōfakí
ʻO e ngaahi nima ʻofa moʻoní.

ʻE lava ke tau tokoni ki hotau ngaahi fāmilí ke tokangaʻi ʻa hotau ngaahi ʻapí

Fakamatalaʻi ʻoku fiemaʻu kitautolu ke tau tokangaʻi ʻa hotau ngaahi ʻapí koeʻuhí ke nau hoko ko ha ngaahi feituʻu lelei ke tau nofo ai. ʻOku totonu ke tokoni ʻa e mēmipa kotoa pē ʻo e fāmilí ke tauhi ʻa e ʻapí ke maʻa mo maau.

ʻEkitivitií

ʻAi ʻa e fānaú ke nau fakatātaaʻi fakalongolongo ha ngaahi meʻa te nau lava ʻo fai ke tauhi honau ngaahi ʻapí ke maʻa mo maau, ʻo hangē ko hono tānaki ʻo e ngaahi meʻa vaʻingá, tafi ʻo e falikí, pelupelu mo tuku fakalelei ʻa honau ngaahi valá.

Fakaafeʻi tahataha ʻa e fānaú ki muʻa ke nau tuʻu ʻo ofi atu kiate koe. Fakamatalaʻi ange ki he fānaú taki taha ha ngaahi meʻa ʻa ia te nau lava ai ʻo hoko ko ha taha tokoni lelei ʻi ʻapi. Fehuʻi ange ki he fānaú taki taha pe ko e hā ʻa e faʻahinga meʻa te nau lava ʻo tokoni ai ʻi he faʻahinga meʻa pehení. Fakatātā ʻaki ʻeni, pe te ke faʻu pē ha meʻa ʻoku ala hoko, ʻa ia ʻe feʻunga pea mo e kau mēmipa ʻo hoʻo kalasí.

ʻEkitivitií

Ko haʻane mahua fakafokifā ha ipu vai ki he falikí. Ko e hā ʻa e meʻa ʻoku totonu ke ke faí?
Naʻá ke vaʻinga mo hoʻo ʻū kongokonga papá ʻi he hoʻataá hono kotoa. Kuo hokosia ʻa e taimi kaí. Ko e hā ʻa e meʻa ʻoku totonu ke ke fai ki hoʻo ʻū kongokonga papá?
ʻOku fakavavevave ʻa hoʻo faʻeé ʻi hono ngaohi ʻo e kai efiafí ʻo tuku ki he funga tēpilé. ʻOkú ne fiemaʻu ha taha ke ne hanga ʻo fokotuʻutuʻu fakalelei ʻa e funga tēpilé ki muʻa pea toki kai ʻa e fāmilí. Ko e hā ʻa e meʻa te ke lava ʻo faí?
Kuo ʻosi fō pea mo pelupelu fakalelei ho valá. Ko e hā hoʻo meʻa ʻoku totonu ke ke fai ki aí?
Naʻá ke toki vaʻinga pē ʻi tuʻa pea kuo pelepela ho suú. Ko e hā ʻa e meʻa ʻoku totonu ke ke fai ki muʻa pea ke toki hū mai ki falé?
Kuo moveuveu ho moheʻangá ʻi hoʻo ʻā hake ʻi he pongipongí. Ko e hā ʻa e meʻa ʻoku totonu ke ke fai ki aí?

Fakalotolahiʻi ʻa e fānaú ke nau talanoa ʻo fekauʻaki mo e ngaahi meʻa te nau fai ke tauhi honau ngaahi ʻapí ke maau mo maʻá. Fakamatala ki he fānaú ʻa e founga ʻokú ke fakaʻaongaʻi ke tauhi ho ʻapí ke maau mo maʻá.

ʻEkitivitií

Tufa ki he fānaú taki taha ha ngaahi lauʻi pepa mo ha kala valivali pe peni vahevahe pea tuku ki he fānaú taki taha ke nau tā ha fakatātā ʻo ha faʻahinga meʻa ʻa ia te nau fai lolotonga ʻa e uiké ke tokoni ki honau ʻapí. Fakahingoa ʻa e fakatātaá taki taha ʻaki ʻa e ʻOku ou fakafetaʻi koeʻuhí ko hoku ʻapí.

Fakamoʻoní

Fakahaaʻi ʻa e ngaahi ongo ʻokú ke maʻu fekauʻaki mo ho ʻapí. Peá ke fakahaaʻi foki ʻa hoʻo houngaʻia ki he Tamai Hēvaní mo Sīsū ʻi heʻena tāpuakiʻi koe mo ho ʻapí.

Ngaahi Ekitivitií Fakatupulakí

Fili ha niʻihi ʻo e ngaahi ʻekitivitī ko ʻení ke ke fakaʻaongaʻi ʻi he lolotonga ʻo e lēsoní.

ʻOmai ha fanga kiʻi meʻa mei ʻapi ʻi ha tangai (ha meʻa ʻe taha ki he kiʻi tamasiʻi pe taʻahine taki taha). Tuku ke fili ʻe he fānaú taki taha ha meʻa mei he loto tangaí pea ke fakamatalaʻi ange ʻa e founga hono fakaʻaongaʻí ʻi haʻanau tokoni ʻi honau ʻapí. Hangē ko ení, ʻe lava ke fakaʻaongaʻi ha konga tupenu ki hono tā ʻaki ʻa e efú pe holoholo ʻaki ʻa e ngaahi peletí, ʻe lava ke fakaʻaongaʻi ha sēpuni ʻi he taimi ʻokú ke hanga ʻo fokotuʻutuʻu fakalelei ai ʻa e tēpilé ʻi ha houa kai, ʻe lava ʻo ʻave ha kiʻi meʻa vaʻinga ʻo tuku fakalelei ʻi he taimi ʻokú ke hanga ai ʻo fakamaau ʻa e lokí.
Hivaʻi pe fakatātāʻí ʻa e ngaahi lea ʻo e “Fakakata ke faí” (Children’s Songbook, p. 253), mo ke fakaʻaongaʻi ʻa e ngaahi kupuʻi lea ʻo hangē ko e “fakamaau hoku moheʻangá” pe “fokotuʻutuʻu ʻo e tēpilé”.
Tā ʻa e fōtunga ʻo e laʻi nimá ʻi ha lauʻi pepa ke ʻave ia ki ʻapi. Fakahingoa ʻaki ʻa e lauʻi pepá taki taha ʻa e ʻOku ou maʻu ha ongo nima faʻa tokoni. Talanoa fekauʻaki mo e ngaahi meʻa ʻe lava ʻe he ngaahi nima ʻo e fānaú ke tokoni aí.
ʻAi ʻa e fānaú ke nau pehē pē ko honau ngaahi seá ko e saliote fakafale. ʻAi ke nau hanga ʻo fokotuʻutuʻu honau ngaahi seá ʻi ha fuopotopoto ʻo hangē ko ia naʻe fai ʻe he kau paioniá ʻi he taimi poʻulí ke maluʻi kinautolu mei he kakai anga taʻe fakakaumeʻá mo e fanga manu kaivaó. ʻAi ke nau hanga ʻo fakatātaaʻi hano tafu ʻo ha afi pea mo hono fai ʻo ha meʻatokoni, ke nau hiva mo tauʻolunga ʻi he ʻosi ʻa e kai efiafí, ke nau kaka ki heʻenau ngaahi saliote fakafalé (ngaahi sea) ke nau mohe.
ʻOmai ha ngaahi fakatātā ʻo ha ngaahi fale pe ʻapi kehekehe, pe te ke tā kinautolu ʻi he palakipoé pe ko ha lauʻi pepa. Aleaʻi mo e fānaú pe ko e hā ʻa e ngaahi meʻa ʻoku langa ʻaki ʻa e ngaahi falé taki taha pe ʻe anga fēfē ʻo kapau te tau nofo ai. ʻE lava ke ke fakakau mai ki ai ha fale fehikitaki pe tēniti, ha fale ʻoku langa mei he ʻaisí ʻo hangē ko ia ʻoku ngāueʻaki ʻe he kau ʻEsikimó, ha kāsolo, ha fale papa, pe ko ha kiʻi fale ʻoku fakapou māʻolunga.

Ngaahi Ekitivitií Kehe Maʻá e Fānau Iiki Angē

Hivaʻi pe lau ʻa e ngaahi lea ʻo e “ʻOku Tau Fiefia Ke Tokoni” (Children’s Songbook, p.198). Tuku ki he fānaú ke nau fakatātaaʻi ʻa e ngaahi meʻa ʻa ia te nau lava ʻo fai ke tokoni ki honau ngaahi ʻapí.
Tokoniʻi ʻa e fānaú ke nau fakatātaaʻi ʻa e kiʻi vaʻinga louhiʻi nima ko ʻení:

Louhiʻi nima femoʻuekina (kuku ho ongo nimá pea hiki hake),

Ko hai te ne tokoniʻi kitautolu ke tau talangofuá?

“Ko au.” “Ko au.” “Ko au.” “Ko au.” (fokotuʻu hake ha foʻi tuhu ʻi he taimi kotoa pē ʻoku ke pehē ai, “Ko au” kae ʻoua kuo ʻosi kotoa e louhiʻinimá ki ʻolunga),

Ko e lea ia ʻa e ngaahi louhiʻi nima femoʻuekiná.