Ngaahi Tohi Lēsoni Palaimelíi mo e Taimi Fevahevaheʻakí

Lēsoni 16: ʻOku ʻi ai Hoku Sino

Lēsoni 16

ʻOku ʻi ai Hoku Sino

Taumuʻá

Ke tokoniʻi ʻa e fānaú taki taha ke ne houngaʻia mo fakaʻapaʻapaʻi ʻa honau sino fakakakanó.

Teuteú

Ako ʻi he faʻa lotu ʻa e Tāniela 1 mo e Tokāteline mo e Ngaahi Fuakavá 89. Vakai foki ki he Ngaahi Tefitoʻi Moʻoni ʻo e Ongoongoleleí (31110), vahe 29.
Ngaahi nāunau ʻoku fiemaʻú:
1. Tohi Tapú mo ha Tokāteline mo e Ngaahi Fuakava
2. Fakatātā 1–5, Ko ha Fāmili mo ha kiʻi Pēpē (62307); fakatātā 1–37, Ko Taniela ʻi Heʻene Fakafisinga ʻa e Meʻakai mo e Uaine ʻa e Tuʻí (Ko e Ngaahi Fakatātā ʻo e Ongoongoleleí 114;62094); fakatātā 1–38, Ko ha Longaʻi Fānau ʻOku Nau Vaʻinga mo ha Foʻi Pulu.
Fai mo ha ngaahi teuteu ʻe fiemaʻu ki ha ʻekitivitī fakatupulaki te ke fie fakaʻaongaʻí.

Fakatokanga ki he faiakó: Matuʻaki tokanga ki he ongoʻi ʻa e fānau ʻi hoʻo kalasí ʻa ia ʻoku ʻi ai haʻanau palōpalema fakaesino. Fakatefito pē ki he ngaahi meʻa ʻoku lava ʻe he sinó ke faí, kae ʻikai ko ʻenau taʻe malavá.

Ngaahi ʻEkitivitī ke ako mei aí

Fakaafeʻi ha taha ʻo e fānaú ke ne fai ʻa e fua lotú

ʻEkitivitī ke taki ʻaki e tokangá

ʻAi e fānaú ke nau tuʻu ki ʻolunga. Tokoniʻi kinautolu ke nau hivaʻi mo fakatātaaʻi ʻa e “ʻUlu, Uma, Tui mo e Vaʻe” (Children’s Songbook). Hivaʻi māmālie ʻa e foʻi hivá ke nau lava ʻo tuhu pe ueʻi ʻa e ngaahi konga ʻo e sinó ʻi he taimi ʻoku aʻu ai ki he konga ko iá. ʻO hangē ko ʻení, kamokamo ho ʻulú, ngaue ʻa e ongo umá, peluki e ongo tuí, tuʻu ʻete ʻi ho loulouhiʻi vaʻé.

ʻUlu, uma, tui mo e vaʻe, tui mo e vaʻe, tui mo e vaʻe,

ʻUlu, uma, tui mo e vaʻe, mata, telinga, ngutu, mo e ihu.

Fakahā ange ki he fānaú ke nau fakaʻaongaʻi e ngaahi kongokonga honau sinó ke tokoni ʻi heʻenau hivaʻi ʻa e foʻi hivá.

Naʻe palani ʻa e Tamai Hēvaní ke tau taki taha maʻu ha sino fakamatelie

Toe fakamanatu mo e fānaú ʻa e taimi naʻa tau nofo ai ʻi hēvani mo e Tamai Hēvaní pea mo Sīsū Kalaisí, naʻe ʻikai ke ʻi ai hatau sino kakano. Ko ha ngaahi laumālie pē kitautolu ai. Naʻa tau fiemaʻu ai ke tau omi ki māmani ʻo maʻu ha sino kakano. Naʻe palani ʻe he Tamai Hēvaní ke fanauʻi mai kitautolu ki he māmaní ʻo ʻi ai haʻatau mātuʻa fakaemāmani ke nau tokangaʻi kitautolu.

Fakaʻaliʻali ʻa e fakatātā 1–5, Ko ha Fāmili mo ha Kiʻi Pēpē.

Ko hai ʻa e kakai ʻi he fakatātā ko ʻení?
Ko hai naʻá ne palani ke tau omi ki he māmaní ʻo maʻu ʻa e sino kakanó pea maʻu mo hatau ngaahi fāmilí?

ʻEkitivitií

ʻAi ke tuʻu ʻa e fānaú ʻo faʻifaʻitaki hoʻo meʻa ʻoku faí ʻi hoʻo fakamatalaʻi ko hotau ngaahi sinó ʻoku kamata ia mei hotau tumuʻaki ʻulú (ala ki ho ʻulú) ki hotau louhiʻivaʻé (ala ki ho ʻuluʻuluvaʻé). Ko hotau matá (malimali) mo hotau ʻuluʻulunimá (ʻai e ʻuluʻulunimá ke ngaungaue) ko e ngaahi konga pē ia hotau sinó. ʻAi e fānaú ke nau tafoki takai tuʻo taha pea nau tangutu ki lalo.

Fakamatalaʻi ange ko hotau sinó te nau lava ke fai ha ngaahi meʻa lahi. Ko e konga kotoa pē ʻo hotau sinó ʻoku ʻi ai hono fatongia pau ke fai.

ʻEkitivitií

Ko e hā te ke lava ʻo fai ʻaki ho matá?
Ko e hā te ke lava ʻo fai ʻaki ho ongo telingá?
Ko e hā te ke lava ʻo fai ʻaki ho ngutú?
Ko e hā te ke lava ʻo fai ʻaki ho ongo nimá?
Ko e hā te ke lava ʻo fai ʻaki ho ongo vaʻé?

ʻEkitivitií

Ai e fānaú ke nau tuʻu ki ʻolunga ʻo fakatātaaʻi ʻa e ngaahi vēsí ni:

ʻOku ʻi ai Hoku Sino Fakaʻofoʻofa

ʻOku ʻi ai hoku sino fakaʻofoʻofa (Ala ki ho fatafatá)
Naʻe palani ʻe he Tamai Hēvaní moʻoku
Naʻá Ne ʻomai hoku ongo telinga ke u lava ʻo fanongo (Ala ki ho telingá ʻo fakafanongo)
 Mo ha ongo mata ke u lava ʻo mamata (Ala ki ho matá)

ʻOku ʻi ai hoku ongo nima ke u lava ʻo pasi (Pasiʻi ho ongo nimá)
Ongo vaʻe ke u tafoki takai (Tafoki takai)
ʻO kau ka fiemaʻu, te u lava ke ala
Ki hoku ʻuluʻuluvaʻé ʻi he kelekelé (Punou ʻo ala ki ho loulouhiʻi vaʻé)

ʻI heʻeku fakakaukau ki hoku sinó (Tuhu ki ho manifí)
Ko e meʻa lelei tahá he naʻe (Tangutu ki lalo)
Palani ia ʻe he Tamai Hēvaní
Ke fōtunga tatau pē mo Ia.

ʻOku fiemaʻu ʻe he Tamai Hēvaní mo Sīsū Kalaisi ke tau tokangaʻi hotau sinó

Fakamatalaʻi ange, ʻi he mahuʻinga ko ia hotau sinó, kuo ʻomai ai ʻe he Tamai Hēvaní mo Sīsū Kalaisi ha ngaahi tuʻutuʻuni ke tokoniʻi kitautolu ke tau tokangaʻi hotau sinó mo tauhi kinautolu ke mālohi pea mo moʻui lelei. Ko e ngaahi tuʻutuʻuni ko ʻení ʻoku ui ko e Lea ʻo e Potó. Fakaʻaliʻali ha Tokāteline mo e Ngaahi Fuakava (pe fakaʻaliʻali ange ʻa e kamataʻanga ʻo e Tokāteline mo e Ngaahi Fuakavá ʻi he Tohi ʻoku paaki fakataha ai ʻa e ngaahi folofola). Fakamatalaʻi ange ko e Lea ʻo e Potó ʻoku paaki ia ʻi he tohi folofola ko ʻení.

Aleaʻi ʻa e faʻahinga meʻakai ʻoku talamai ʻe he Lea ʻo e Potó ʻa ia te ne tokoni ke tauhi hotau sinó ke moʻui leleí, ʻo hangē ko e fuaʻi ʻakaú, vesitapoló, mo e ngaahi tengaʻi ʻakaú. Pea aleaʻi mo e ngaahi meʻa naʻe fakahā mai ʻe he Tamai Hēvaní mo Sīsū ke ʻoua te tau fakaʻaongaʻí, hangē ko e tapaká, kava mālohí, mo e kofí. Tokoniʻi e fānaú ke nau ʻiloʻi ko e taimi ko ia ʻoku tau talangofua ai ki he Lea ʻo e Potó ʻo kai ʻa e meʻakai totonú, ʻoku hōifua leva ʻa e Tamai Hēvaní mo Sīsū Kalaisi mo tapuakiʻi ʻa kitautolu.

Talanoá

Fai ange ʻa e talanoa ʻi he Taniela vahe ʻuluakí, ʻi hono kai ko ia ʻe Taniela ʻa e meʻakai naʻe fiemaʻu ʻe he Tamai Hēvaní ke ne kaí. Fakaʻaliʻali ʻi hono taimi totonu ʻa e fakatātā 11–37, Ko Taniela ʻi Heʻene Fakafisinga ʻa e Meʻakai mo e Uaine ʻa e Tuʻí.

Talanoá

Ko e hā naʻe fai ʻe Taniela ʻi he taimi naʻe folofola ange ai ʻa e Tuʻí ke ne kai ʻa e meʻakai naʻe ʻikai sai kiate iá? (Vakai, Taniela 1:8, 12–13.)
Naʻe anga fēfē ʻa hono tāpuakiʻi ʻo Taniela mo hono ngaahi kaumeʻá ʻi heʻenau talangofua ki he ngaahi lao ʻa e Tamai Hēvaní fekauʻaki mo e meʻa ʻoku totonu ke kaí? (Vakai, Taniela 1:15, 17, 20.)
Ko e hā ʻa e ngaahi meʻakai fakatupu moʻui lelei ʻokú ke faʻa kaí?
Ko e hā ʻoku totonu ai ke ke kai ha meʻakai ʻoku fakatupu moʻui leleí?
ʻOkú ke ongoʻi fēfē ʻi he taimi ʻokú ke kai ai ʻa e meʻakai ʻoku lelei kiate koé?

Fakamatalaʻi ange ʻoku fiemaʻu ke tau fai mo ha ngaahi meʻa kehe ke tauhi ʻa hotau sinó ke mālohi mo moʻui lelei.

Fakaʻaliʻali ʻa e fakatātā 1–38, Ko ha Longaʻi Fānau ʻOku Nau Vaʻinga mo Ha Foʻi Pulu.

Talanoá

Ko e hā ʻoku fai ʻe he longaʻi fānau ko ʻení?
Ko e hā ʻoku mahuʻinga ai ke fakamālohisinoʻi hotau sinó?
Ko e hā mo ha ngaahi toe founga te tau lava ʻo fakamālohisinoʻi ai hotau sinó?

Fakatahaʻi ho ongo nimá ki he tafaʻaki ho kouʻahé pea kuikui mo ho matá ʻo hangē ʻokú ke mohé.

Talanoá

Ko e hā ʻoku ou faʻifaʻitakí?
Ko e hā hano mahuʻinga ke maʻu ha mohe feʻunga?

Fakatātaaʻi haʻo fanofano ho nimá.

Talanoá

Ko e hā e meʻa ʻokú ou fakatātāʻí?
Ko fē e taimi ʻoku totonu ke fanofano ai hotau nimá?
Ko fē e taimi ʻoku tonu ke tau kaukau aí?
Ko fē e taimi ʻoku tonu ke tau fufulu nifo aí?
Ko e hā ʻoku tau fiemaʻu ai ke tau maʻá?

Aleaʻi mo ha ngaahi lao mahuʻinga ʻo e moʻuí, ʻo hangē ko e teuteu lelei fakatatau mo e tūkunga ʻo e ʻeá, angaʻaki ʻa e fakaʻehiʻehí ke ke malú, pea mo e maʻu ʻo e ʻea leleí.

ʻOku fiemaʻu ʻe he Tamai Hēvaní mo Sīsū ke tau maluʻi hotau sinó

Fakamatalaʻi ange ʻoku fiemaʻu ʻe he Tamai Hēvaní mo Sīsū ke tau maluʻi hotau sinó mei he fakatuʻutāmakí mo e ngaahi lavelaveá. ʻEke ange ki he fānaú ha faʻahinga fakatuʻutāmaki te nau ala fetaulaki mo ia ʻaki haʻo fakaʻaongaʻi ʻa e ngaahi fehuʻi ko ʻení pe ko haʻo faʻu pē ʻe koe haʻo ngaahi fehuʻi:

Ko e hā ʻe hoko ʻo ka ke ka vaʻinga ʻaki ha ngaahi masi?
Ko e hā ʻe hoko ʻo ka ke ka vaʻinga ʻi he hala puleʻangá pe vaʻinga takai ʻi he ngaahi meʻalelé?
Ko e hā ʻe hoko ʻo kapau ʻe ʻikai te ke tokanga ki hono fakaʻaongaʻi ʻo e ngaahi meʻa māsilá ʻo hangē ko e ngaahi helé mo e helekosí?
Ko e hā ʻoku tau fakamaʻu ai ʻa e leta maluʻi ʻo e meʻalelé ʻi he taimi ʻoku tau heka ai ʻi ha meʻalele?

Fakamatalaʻi ange ʻoku fiemaʻu ke tau maluʻi hotau sinó. ʻOku ʻikai totonu ke tau fai ʻa e ngaahi meʻa ʻoku fakatuʻutāmaki ki hotau sinó ʻo fakalaveaʻi. Fakamatala ange ʻoku fiemaʻu ʻe he Tamai Hēvaní mo Sīsū ke tau ongoʻi malu mo fiefia. ʻOkú na fiemaʻu kitautolu ke tau tokangaʻi hotau sinó koeʻuhí ke tau moʻui lelei.

Fakamoʻoní

Fevahevaheʻaki hoʻo ongoʻi houngaʻia ʻi ho sinó. Fakahaaʻi ʻa hoʻo houngaʻia ʻi he tokangaʻi ʻe he fānaú ʻa honau sinó koeʻuhí ke nau moʻui lelei mo mālohi.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitī ko ʻení ke ke fakaʻaongaʻi ʻi he lēsoní.

Hivaʻi ʻa e “Ko e Ngaahi Hokotanga” (Children’s Songbook) fai mo hono ngaahifakatātāʻí ʻo hangē ko hono fokotuʻu mai ʻe hono ngaahi leá. Tala ange ki he fānaú ʻa hoʻo fakamālō ʻi ha sino ʻoku ne malava ke fai ha ngaahi meʻa lahi.
ʻOmai ha ngaahi fakatātā ʻo ha ngaahi faʻahinga inu mo e faʻahinga meʻakai kehekehe. Tuku ke fakakaukauʻi ʻe he fānaú pe ko e ngaahi meʻa ko iá ʻoku sai pe kovi ki he sinó. Fakamatala ange ʻoku lelei ʻa e ngaahi meʻa ʻe niʻihi, kā ʻe kovi ʻo kapau ʻe fuʻu lahi. Hangē ko ʻení, ʻoku ifo ʻa e lolé, ka ʻi heʻene fuʻu lahí te ne ʻai ke tau puke. Fakaʻaliʻali ʻa e ngaahi fakatātā ʻo e ngaahi meʻakai leleí ke mamata ki ai e fānaú.
ʻOmai ha ngaahi meʻa ʻoku nau tokoniʻi kitautolu ke tau tokangaʻi hotau sinó ʻi ha kiʻi puha pe kofukofu. Fakakau mai ai ha meʻa ʻoku ne tokoni ke tauhi kitautolu ke tau maʻa, ʻo hangē ko e koá, konga tupenu pe tauveli kaukau, pe ko ha polosi fufulu-nifo. ʻOmai ai mo ha meʻakai lelei, ha kiʻi sipi kafu ke ne fakafofongaʻi ʻa e mohé, pea mo ha meʻa ke ne fakafofongaʻi ʻa e fakamālohi sinó, ʻo hangē ko ha kiʻi foʻi pulu. Tala ange ki he fānaú ha kiʻi fakamatala fakatupu fakakaukau fekauʻaki mo ha meʻa pea tuku ke nau mateʻi pe ko e hā ia. Fakahā ange ʻa e meʻa ko iá kiate kinautolu ʻi he taimi ʻoku nau mateʻi tonu aí. Toutou fai pē kae ʻoua kuo nau mateʻi kotoa ʻa e ʻu meʻá.
ʻAi e fānaú ke nau tuʻu ʻo fakatātaaʻi fakalongolongo ʻa hono tauhi honau sinó ke maau mo maʻá. ʻAi ke nau fakatātaaʻi ʻa ʻenau fanofano ʻa honau nimá, fufulu honau nifó, mo e helu honau ʻulú. Pea ʻai ke nau fakatātaaʻi fakalongolongo ʻa e founga fakamālohi sino ʻoku nau saʻia taha aí, ʻo hangē ko e puná, hopohopó, tāfué, pe ko hano tolongi ha foʻi pulu.
Talanoa mo e fānaú fekauʻaki mo e kakai ʻe niʻihi ʻoku fehālaaki ha ngaahi meʻa ʻi honau sinó. ʻOku ʻikai totonu ke tau fakakata ʻaki ʻa e kakai ko ʻení pe tuhu pe kataʻi kinautolu. Talanoa ʻo kau ki he founga ʻoku totonu ke tau feohi ai mo e kakai ʻoku faingataʻaʻia fakasinó. (talanoa mo kinautolu, hoko ko hanau kaumeʻa, ʻai kinautolu ke hangē pē ʻoku ʻikai ke nau faingataʻaʻia fakasinó, tokoni kiate kinautolu ʻo ka nau ka fiemaʻu ha tokoni).
ʻAi ke taki taha tā ʻe he fānaú ʻa honau fakatātaá pe ʻīmisí. Fakaʻilongaʻi ʻa e ngaahi fakatātaá ni ʻaki ʻa e ʻOku ou fakamālō koeʻuhí ko hoku sinó.

Ngaahi ʻEkitivitī Kehe Maʻá e Fānau Iiki Angé

Fakaʻaliʻali ʻa e fakatātā 1–5, Ko ha Fāmili mo e Kiʻi Pēpē, pea tuku ke talanoa ʻa e fānaú fekauʻaki mo ia.
- Naʻa ke hoko nai ko ha pēpē ʻi ha taimi?
- ʻE lava ʻa e fanga kiʻi pēpeé ʻo luelue mo talanoa?
Fakamanatuʻi ange ki he fānaú naʻe ʻi ai e taimi naʻa nau hoko ai ko e fanga kiʻi pēpē, ka ʻi he taimí ni kuo tupu honau sinó pea nau lava ke fai ha ngaahi meʻa ʻoku lahi angé. ʻI he tupu lahi ange ko ia honau sinó, te nau lava ke toe fai mo ha ngaahi meʻa lahi ange.

Fakaʻaliʻali ʻa e fakatātā 1–16, Ko e ʻAlo ʻo e Fakamoʻuí, pea fakamanatu ange ki he fānaú ʻoku aʻu pē kia Sīsū naʻá ne hoko ia ko ha pēpē ʻi he taimi ʻe taha.
Tuhu ki ho ngutú peá ke pehē, “Ko hoku ngutú ʻeni.” Peá ke ʻeke ange “Te ke lava ʻo fakahā mai kiate au ho ngutú?” peá ke tokoniʻi ʻa e fānaú ke nau taki taha tuhu ki honau ngutú. Fai ʻa e meʻa tatau pe ki he matá, ihú, ongo telingá, ongo nimá, mo e ongo vaʻé. Tuhu tahataha leva ki he ngaahi kongokonga ʻo e sinó kae ʻoua naʻá ke leaʻaki hono hingoá pea tuku ki he fānaú ke nau fakahingoa atu ia. Kapau ʻe lava ʻe he fānaú ke fakahingoa kotoa, pea mahalo te ke fie ʻeke ange ki he fānaú ʻa e ngaahi konga ʻoku ʻikai faʻa ʻiloʻi ʻe he fānaú, ʻo hangē ko e tuiʻi nimá, tuí, fasiʻanimá, mo e ongo tungaʻi vaʻé.
Faʻu ha kiʻi talanoa faingofua fekauʻaki mo ha kiʻi tamasiʻi mei homou feituʻú. Tala ange ʻa e ʻā hake ʻa e kiʻi tamasiʻí ʻi he pongipongí, teuteu mo tui hono valá, kai pongipongí, ʻo hokohoko pehē atu ai pē ʻi he toenga ʻo e ʻahó. Lolotonga hoʻo lave fekauʻaki mo e ngaahi ngāue naʻe fai ʻe he kiʻi tamasiʻí, ʻeke ange ki he fānaú ʻa e kupu ʻo e sinó ʻoku fakaʻaongaʻi ʻe he kiʻi tamasiʻí.
ʻAi ke tuʻu ʻa e fānaú ki ʻolunga ʻo hivaʻi ʻa e hiva ko ʻení ʻi he fasi ʻo e “Ko ha Tangata Sinou” (Children’s Songbook). Fakaʻaongaʻi ʻa e tuʻusiké ʻi he ʻuluaki vēsí pea tuʻu hangatonu ʻi he veesi hono uá.

Ne u hoko ko ha pēpē,

pēpē, Ko ha kiʻi pēpē valevale, valevale, valevale,

ʻOi, peá u tupu hake, tupu hake,

tupu hake, tupu hake, ʻOi, kuó u lōloa ange, lōloa ange, lōloa ange.