ʻOku Ou Kau ki ha Fāmili

Taumuʻá

Ke tokoniʻi ʻa e fānaú taki taha ke nau ʻiloʻi naʻe palani ʻe he Tamai Hēvaní maʻatautolu taautaha ke tau kau ki ha fāmili ʻa ia ʻoku nau fiemaʻu mo ʻofaʻi kitautolú.

Teuteú

Ako ʻi he faʻa lotu ʻa e Luke 1:26–35.
Maheni mo e ngaahi fāmili taki taha ʻo e fānau ʻi hoʻo kalasí peá ke mateuteu ke fakahā ange ha meʻa lelei ʻoku hoko ʻiate kinautolu taki taha, ʻo hangē ko ha pēpē foʻou, ko ha tuongaʻane pe tuofefine ʻoku ngāue fakafaifekau, pe ko ha kemi fakafāmili.
Ngaahi nāunau ʻoku fiemaʻú:
1. Tohi Tapú
2. Sioka mo e meʻa tāmate palakipoe
3. Fakatātā 1–5, Ko e Fāmili mo ha Pēpē (62307); fakatātā 1–7, Ko ha Fāmili ʻOfa; fakatātā 1–16, Ko e ʻAloʻi ʻo Kalaisí (Ko e Ngaahi Fakatātā ʻo e Ongoongoleleí 201;62495); fakatātā 1–23, Ko e Pununga mo ha Fanga Kiʻi Manupuna; fakatātā 1—51, Ko ha Fāmili ʻoku Ngāue Fakataha (62313); fakatātā 1–53, Fakafiefia Fakafāmili (62384).
Fai mo ha ngaahi teuteu ki ha ʻekitivitī fakatupulaki te ke fie fakaʻaongaʻi.

Fakatokanga ki he faiakó: Tokanga makehe ki he tuʻunga ʻo e ngaahi fāmili ʻo e fānau ʻi hoʻo kalasí. Tokoniʻi ʻa e fānaú ke nau ʻiloʻi ʻoku ʻikai ko e tokolahi ʻo e fāmilí ʻa e meʻa mahuʻinga taha ʻi ha fāmili, ka ko e feʻofaʻaki mo e fetauhiʻaki ʻa e kau mēmipa ʻo e fāmilí.

Ngaahi ʻEkitivitī Ke Ako Mei Aí

Fakaafeʻi ha taha ʻo e fānaú ke ne fai e fua lotú

ʻEkitivitī ke taki- ʻakiʻi e tokangá

Fakaʻaliʻali e fakatātā 1–23, Ko e Pununga mo ha Fanga Kiʻi Manupuna. Tuku ange ke talanoa ʻa e fānaú fekauʻaki mo e fakatātaá pe ʻai ke nau tuhuʻi mai ʻa e punungá mo e fanga manupuná.

ʻEkitivitī ke taki- ʻakiʻi e tokangá

Ko hai naʻá ne langa ʻa e punungá maʻá e fanga kiʻi manupuná?
Ko e hā ʻoku fiemaʻu ai ʻe he fanga kiʻi manupuná ha faʻē mo ha tamai ke na tauhi kinautolú? (Ke fafanga kinautolu, fakamāfanaʻi kinautolu, mo maluʻi mei he fakatuʻutāmakí.)
ʻI he kiʻi matuʻotuʻa ange ʻa e fanga kiʻi manupuná, ko hai te ne akoʻi kinautolu ke nau puná?

Fakamatalaʻi ange ʻoku kau ʻa e fanga kiʻi manupuná ki ha fāmili ʻa ia te nau tokoni ke fakakakato ʻa ʻenau ngaahi fiemaʻú.

ʻOkú ou kau ki ha fāmili

ʻOku ʻi ai hao fāmili?
Ko e hā ʻokú ke toe fiemaʻu ai ha fāmili ke ne tokangaʻi koé?

Fakaʻaliʻali ʻa e fakatātā 1–5, Ko e Fāmili mo ha Pēpē. Toe fakamanatu ʻa e founga naʻe palani ʻe he Tamai Hēvaní maʻatautolu taki taha ke tau haʻu ki he māmaní ʻo hoko ko ha konga ʻo ha fāmili. Fakamatalaʻi ange ko e taimi ko ia ʻoku fanauʻi mai ai ha pēpē, he ʻikai lava ʻe he pēpeé ia ʻo tokangaʻi pē ia. He ʻikai lava ʻe he pēpeé ia ʻo fafangaʻi mo teuteuʻi pē ia. ʻOkú ne fiemaʻu ha fāmili ke tokangaʻi ia.

Ko hai naʻa ne tokangaʻi koe ʻi hono fanauʻi koé?
Ko e hā e ngaahi meʻa naʻe fai ʻe ho fāmilí maʻau ʻi hoʻo kei pēpeé?
Ko e hā e ngaahi meʻa ʻoku fai ʻe ho fāmilí maʻau ʻi he lolotonga ní?
Ko hai naʻá ne palani maʻau ke ke kau ki ha fāmilí?

Tokoniʻi e fānaú ke nau ʻiloʻi ʻa e fiefia naʻe maʻu ʻe honau ngaahi fāmilí ʻi honau fanauʻí. Fakamamafaʻi ʻa e lahi ʻo e ʻofa ʻa e mātuʻá mo e kau mēmipa kehe ʻo e fāmilí pea mo ʻenau fiemaʻu ke nau fiefiá.

Hivá

Tokoniʻi e fānaú ke nau hivaʻi pe lau ʻa e ngaahi lea ʻo e “Ko e Fānau Au ʻa e ʻOtuá” (Children’s Songbook).

Ko e fānau au ʻa e ʻOtuá
Naʻá Ne ʻomi au ki māmani
Ki ha ʻapi mo ha mātuʻa
Angalelei mo ʻofá

Tataki au, tauhi au, pea ta ō mo au
Ke u ʻilo ʻa e halá
Akoʻi au pea te u ʻilo pau
Te u nofo mo Ia ha ʻaho.

Fakaʻaliʻali ʻa e fakatātā 1–16, Ko e ʻAloʻi ʻo Kalaisí, mo fakamatalaʻi naʻe ʻaloʻi mai ʻa Sīsū ki ha fāmili ʻi heʻene haʻu ki he māmaní (vakai, Luke 1:26–35).

Hivá

Ko hai fua ʻa e kakai ʻi he fakatātaá ni?
Ko hai e faʻē ʻa Sīsuú?
Ko hai e tamai ʻa Sīsuú? (Fakamanatu ki he fānaú ko e tamai ʻa Sīsuú ko e Tamai Hēvaní; Ko e tangata lelei ʻa Siosefa naʻe fili ʻe he Tamai Hēvaní ke ne tokangaʻi ʻa Mele mo Sīsū.)
ʻOkú ke pehē ko e hā ʻa e faʻahinga ongo ʻa Mele mo Siosefa kia Sīsuú?
ʻOkú ke pehē ko e hā e meʻa naʻe fai ʻe Mele mo Siosefa ke tauhi ʻaki ʻa e pēpē ko Sīsuú?
Ko hai naʻá ne palani maʻa Sīsū ke ʻi ai hano fāmili ke nau tokangaʻi mo ʻofaʻi Iá?

ʻOku ʻofa ʻa e Tamai Hēvaní mo Sīsū ki he fāmili kotoa pē

Fakaʻaliʻali ʻa e fakatātā 11–7, Ko ha Fāmili ʻOfa. Fakamatalaʻi ange ko e ngaahi fāmili ʻe niʻihi ʻoku ʻi ai ha tamai mo ha faʻē, pea ʻi he ngaahi fāmili ʻe niʻihi ʻoku toko taha pē ʻa e mātuʻá. “i he ngaahi fāmili ʻe niʻihi ʻoku ʻi ai ha kui pe ko ha taha kehe ke ne tokoni ki hono tokangaʻi ʻo e fānaú. Ko e ngaahi fāmili ʻe niʻihi ʻoku tokolahi ai e fānaú, ka ʻi he ngaahi fāmili ʻe niʻihi ʻoku toko taha pē pea halaʻatā ʻa e niʻihi. Tokoniʻi ʻa e fānaú ke nau ʻiloʻi ko e fāmili kotoa pē ʻoku kehekehe pea ʻoku ʻofa ʻa e Tamai Hēvaní mo Sīsū ki he fāmili kotoa pē.

ʻEkitivitií

Fakaafeʻi tahataha ʻa e fānaú ke nau fakamatala ki honau ngaahi fāmilí. Tokoniʻi tahataha ʻa e fānaú ke nau tā ha ngaahi fakatātā ʻo ha tangata ʻakau ʻi he palakipoé ke nau fakafofongaʻi ʻa e kau mēmipa ʻi honau ngaahi fāmilí. ʻAi e fānaú ke nau puʻaki leʻo lahi e hingoa ʻo e mēmipa kotoa honau fāmilí peá ne lau honau tokolahí. ʻI he ʻosi ʻa e tokotaha kotoa pē, talanoa mo e kalasí ki ha ngaahi meʻa ne ke ʻiloʻi fekauʻaki mo e fāmili ʻo e taha ko iá.

ʻOku fiemaʻu ʻe he Tamai Hēvaní mo Sīsū ʻa e mēmipa kotoa ʻo e fāmilí ke nau fefakahāʻaki ʻa e ʻofá ʻiate kinautolu

Hivá

Tokoniʻi ʻa e fānaú ke nau hivaʻi pe lau ʻa e ngaahi lea ʻo e “Fāmili Fiefiá” (Children’s Songbook).

ʻOfa ki siʻi faʻē
Pea mo e Tamai maʻu pē
ʻOfa e fai tuʻungá
He fāmili fiefia.

Hivá

ʻOku fēfē hoʻo ʻiloʻi ʻoku ʻofa ho fāmilí ʻiate koe?
Ko e hā ʻokú ke fai ke fakahaaʻi ki he kau mēmipa ho fāmilí ʻa hoʻo ʻofa kiate kinautolú?

Fakaʻaliʻali ʻa e fakatātā 1–53, Ko e Fakafiefia Fakafāmilí.

Hivá

Ko ha fāmili fiefia nai ʻeni? ʻOku anga-fēfē hoʻo ʻiloʻí?
Ko e hā ʻokú ke manako ke fai mo ho fāmilí?
ʻI he taimi ʻoku feangaleleiʻaki ai ʻa e taha kotoa pē, ʻokú ke ongoʻi fēfē he taimi ko iá?

Fakaʻaliʻali ʻa e fakatātā 1–51, Ko ha Fāmili ʻoku Ngāue Fakataha.

Hivá

Ko e hā ʻoku fai ʻe he fāmili ko ʻení?
Ko e hā ʻokú ke fai ke tokoni ki ho fāmilí?
ʻOku ke ongoʻi fēfē ʻi hoʻo tokoni ki he kau mēmipa ʻo ho fāmilí?

ʻEkitivitií

ʻAi e fānaú ke nau fakakaukau ki he ngaahi meʻa kehekehe te nau lava ʻo tokoni ai ki honau fāmilí ʻi honau ʻapí, ʻo hangē ko hono tānaki ʻo e ngaahi meʻa vaʻingá, vaʻinga mo e pēpeé, pe tokoni ki he fufulu peletí. Tuku ange ki he fānaú ke nau fakatātaaʻi ʻa ʻenau ngaahi fakakaukaú. Fakaʻaiʻai e fānaú ke nau tokoni ki honau ngaahi fāmilí ʻi he lolotonga ʻo e uiké.

Fakamoʻoní

Fakahaaʻi ʻa hoʻo ongoʻi houngaʻia ki he Tamai Hēvaní ʻi he tāpuaki ʻo hoʻo hoko ko ha konga ʻo ha fāmilí.

Ngaahi Ekitivitií Fakatupulakí

Fili ha niʻihi ʻo e ngaahi ʻekitivitií ni ke fakaʻaongaʻi ʻi he lēsoní.

Hivaʻi ʻa e “ʻApi Fiefiá”. Fili ha fānau ʻe toko fā ke nau fakafofongaʻi ʻa e foʻi fāmilí ʻi he hivá. ʻAi ke nau puke ha ngaahi fakaʻilonga ke mahino pe ko hai ʻiate kinautolu ʻoku lau ki ai e ʻū kupu ʻo e hivá. Tuʻu ʻi mui ʻi he toko fā koʻení pea ke ala ki he ʻulu ʻo e taha totonu ʻoku lau ki ai e hivá ʻi he lolotonga hoʻo hivaʻi pe lau fakataha ʻa e ngaahi lea ʻo e hivá mo e fānaú. Toe hivaʻi pē e foʻi hivá, kae tuku ange ha faingamālie ki he fānau kehé ke nau kau he fāmilí. Hokohoko atu pē kae ʻoua kuo kakato kotoa e fānaú he kau ki he ʻekitivitií.
Talaange ki he fānaú ʻa e fakahinohino ʻa e Tuʻi ko Penisimaní ki he ngaahi fāmilí, ʻo hangē ko ia ʻi he tohi ʻa Mōsaia 4:14–15. Lau leʻo lahi ʻa e konga fakaʻosi ʻo e veesi 15. ʻAi e fānaú ke nau fokotuʻu mai ha ngaahi founga ʻe lava ai ʻe he ngaahi mēmipa ʻo ha fāmili ʻo feʻofaʻaki mo fetauhiʻaki.
Tokoniʻi e fānaú ke nau fai ʻa e vaʻinga fakatātā ko ʻení:

Ko hoku Fāmilí

Ko ʻeku faʻē fakaʻofoʻofá ʻeni. (Tuhu ki ho tuhu ʻuluakí)

Ko ʻeku tamai lōloá ʻeni (Tuhu ki ho tuhu fika uá)

Ko hoku tuofefine lahí ʻeni (Tuhu ki ho tuhu fika tolú)

Ka ʻoku ʻikai ko hono kotoá pē ia.

Ko hoku tokoua siʻisiʻí ʻeni. (Tuhu ki he foʻi tuhu siʻisiʻi tahá)

ʻOku fuʻu siʻisiʻi ia ʻo siʻi ange fau.

Ko hai ʻa e tokotaha kehe ko ʻení (Tuhu ki ho motuʻa tuhú)

ʻOkú ke ʻosi ʻiloʻi ko au ia.

Taha, ua, tolu, fā, nima, ʻokú ke vakai ange (Ala ki he foʻi tuhu kotoa pē ʻi hoʻo laú)

ʻOku nau faʻu ha fāmili lelei!

Tokoniʻi e fānaú ke nau ʻai hake ʻa e ngaahi foʻi tuhu te ne fakafofongaʻi ʻa e tokolahi ʻo e kakai ʻi honau ngaahi fāmilí (kapau ʻoku ʻi ai ha fāmili ʻo ha taha ʻoku laka hake ia ʻi he hongofulú, pea ʻai ke tokoni atu ki ai mo ha taha kehe). Tokoniʻi ʻa e fānaú ke nau toe lau ʻa e ongo laine fakamuimui ʻo e vēsí ʻaki hono lau kae ʻoua kuo aʻu ki he tokolahi ʻo hono fāmilí ki muʻa pea nau toki pehē “ʻoku nau faʻu ha fāmili lelei!”

Ngaahi Ekitivitií Kehe Maʻá e Fānau Iiki Angē

Fakaʻaliʻali ʻa e fakatātā 1–23, Ko e Pununga mo ha Fanga kiʻi Manupuna. Tokoniʻi e fānaú ke nau fakatātaaʻi ʻa e foʻi hivá “Fanga Manupuna ʻi he fuʻu ʻAkaú” (Children’s Songbook) ʻi he lolotonga hoʻo hivaʻi pe lau atu ʻa hono ngaahi leá:

Te tau maʻu ha kiʻi pununga (Fakatahaʻi e ongo nimá ke hangē ha ipú)

He vaʻa ʻo e fuʻu ʻakaú (Fepikitaki ho ongo nimá ʻi ʻolunga ho funga ʻulú)

Ke tau lau hono fuá

ʻOku taha, ua, tolu (Lau tahataha hake ʻa e foʻi tuhu ʻe tolu)

Ne tangutu e faʻeé (ʻAi e nima hemá ke hangē ha ipú pea hili ai e nima mataʻú)

Ke fofoa hono fuá (Hiki hake e foʻi tuhu ʻe tolu)

Ka e puna pē ʻa e tamaí (Ngaue ho ongo nimá ʻo hangē ʻoku ke puná)

Ke leʻohi hono fāmilí
Tokoniʻi e fānaú ke nau fai hono fakatātaaʻi ʻo e ngaahi vēsí ni ʻi he lolotonga hoʻo lau ʻa hono ngaahi leá:

Ko Hoku Fāmilí

ʻO hangē ko e fanga manupuna ʻi he funga ʻakaú (Kapatā ho ongo nimá)

ʻOku ʻi ai hoku fāmili ʻoʻoku (Tuhu kiate koe pē)

ʻOku nau ʻomai haʻaku meʻakai (ʻAi ke hangē ʻoku ke kaí)

Mo akoʻi au ke u vaʻinga (puna)

Koeʻuhí ke u malu mo fiefia he ʻahó kotoa (Malimali)
Lau ʻa e ngaahi kupuʻi leá ni pe hivaʻi ia ki ha faʻahinga tuʻunga fasi.

ʻOku ʻofa ʻa e faʻeé ʻiate koe, ʻokú ne ʻofa ʻiate koe

Pea mo e tamaí mo e tamaí foki

Mo e kotoa ho fāmilí, kotoa ho fāmilí

ʻOku ʻofa moʻoni ʻiate koe, ʻiate koe