Lēsoni 6

ʻOku ʻOfa ʻa e Tamai Hēvaní mo Sīsū ʻIate Au

Taumuʻá

Ke tokoniʻi ʻa e fānaú taki taha ke ne ongoʻi ʻoku ʻofa fakatāutaha ʻa e Tamai Hēvaní mo Sīsū Kalaisi ʻiate kitautolu.

Teuteú

1. Ako ʻi he faʻa lotu ʻa e Maʻake 10:13–16; Sione 3:16; mo e 3 Nīfai 17:11–12, 21–24.

2. Ngaahi nāunau ʻoku fiemaʻú:

   1. Tohi Tapú mo e Tohi ʻa Molomoná

   2. Kiʻi sioʻata

   3. Fakatātā 1–1, Ko e Māmaní (62196); fakatātā 1–3, Ko Sīsū ko e Kalaisí (Ko e Ngaahi Fakatātā ʻo e Ongoongoleleí 403;62470); fakatātā 1–19, Ko Kalaisi mo e Fānaú (Ko e Ngaahi Fakatātā ʻo e Ongoongoleleí 216;62467); fakatātā 1–20, Ko Sīsū ʻi Heʻene Tāpuakiʻi ʻa e Fānau Nīfaí.

3. Fai mo ha ngaahi teuteu ʻe fiemaʻu ki ha ʻekitivitī fakatupulaki te ke fie fakaʻaongaʻí.

Ngaahi ʻekitivitʻí ke Ako Mei aʻí

Fakaafeʻi ha taha ʻo e fānaú ke ne fai ʻa e fua lotú

ʻEkitivitī ke taki ʻaki e tokangá

Lulululu nima mo e fānaú kotoa. Leaʻaki e hingoa ʻo e kiʻi tamasiʻi pe taʻahine kotoa pē peá ke fakahā ange kiate kinautolu fakatāutaha ha meʻa ʻokú ke saʻia ai fekauʻaki mo ia.

Kole ki he fānaú taki taha ke nau fakahā atu ha taha ʻoku ʻofa ʻiate ia pea ne fakahā atu foki mo e meʻa ʻokú ne fai ʻo makatuʻunga ai ʻa ʻene ongoʻi ʻoku ʻofaʻi iá.

Fakamatalaʻi ange ko e lēsoni ko ʻení ʻoku fekauʻaki ia mo ha ongo meʻa ʻe tokoua ʻokú na ʻofa ʻiate kitautolu hono kātoa. Kuó na ʻomai moʻo kitautolu ʻa e māmani fakaʻofoʻofá ni, Ongoongoleleí, pea mo e Siasí.

ʻEkitivitī ke taki ʻaki e tokangá

• Ko hai ʻa e ongo tangata ko ʻeni ʻokú na ʻofa ʻi he tokotaha kotoa peé? (Ko e Tamai Hēvaní pea mo Sīsū Kalaisi)

Talanoá

Fakaʻaliʻali ʻa e fakatātā 1–4, Ko e ʻUluaki Mata Meʻa Hā Maí. ʻAi ke tokoni atu ʻa e fānaú ʻi hono fai ʻo e talanoa fekauʻaki mo e meʻa ko ia ʻoku hā ʻi he fakatātaá.

Talanoá

• ʻOkú ke manatuʻi nai pe ko hai e kakai ko ʻeni ʻoku ʻasi he fakatātaá?

• Ko e hā ʻenau meʻa ʻoku faí?

ʻOku ʻomai ʻe he Tamai Hēvaní mo Sīsū Kalaisi ʻa e ngaahi tāpuakí kiate kitautolu

Fakamanatu ki he fānaú ko e ki muʻa ko ia ke tau omi ki he māmaní, naʻa tau nofo mo e Tamai Hēvaní pea mo Sīsū Kalaisi. Naʻá na palani maʻatautolu ke tau omi ki he māmaní koeʻuhí ke tau ako mo fakatupulaki ai. ʻOku na ʻafioʻi mo tokanga mai kiate kitautolu.

Fakaʻaliʻali ʻa e fakatātā 1–1, Ko e Māmaní.

• Ko e hā e meʻa naʻe kole ʻe heTamai Hēvaní kia Sīsū ke Ne ngaohi moʻo kitautolú?

Fakamatalaʻi ange naʻe tuku ʻe he Tamai Hēvaní ʻa Sīsū Kalaisi ke Ne ngaohi ʻa e māmaní pea mo e meʻa kotoa pē ʻoku ʻi aí. Tokoniʻi ʻa e fānaú ke nau ʻiloʻi naʻe hanga ʻe he Tamaí mo Sīsū Kalaisi ʻo palani ʻa e meʻa kotoa pē ke tau moʻui mo fiefia ai. ʻOku fakamanatu mai ʻe he ngaahi meʻa ko ʻení ʻa ʻena ʻofa ʻiate kitautolú.

• Ko e hā e ngaahi meʻa ʻokú ne fakamanatu mai ʻa e ʻofa ʻa e Tamai Hēvaní mo Sīsū Kalaisi ʻiate kitautolú? (Ko e ngaahi talí ʻe ala kau ai ʻa e ngaahi meʻa hangē ko e fāmilí, ngaahi kaungā-meʻá, ko e Siasí, ʻuluʻakaú, pea mo e fanga monumanú.)

Hivá

Hivaʻi pe lau ʻa e ngaahi lea ʻo e “ʻOku ʻOfa ʻIate Au ʻa e Tamai Hēvaní” (Children’s Songbook), pea mo fakaʻaongaʻi ʻa e ngaahi founga fakatātā ʻoku hā atu ʻi laló. Pea ke kole ange ki he fānaú ke nau tuʻu ʻo hiva fakataha ʻa e foʻi hivá mo koe .

Ne u ongó na (ʻAi e ongo nimá ki ho tuʻa telingá ʻo fakafanongo)

ʻA e hiva ʻa e manú (Toutou fakaava mo tāpuni ho louhiʻi nimá ʻo hangē ha muʻatosi ʻo ha manupuna)

Mamata atu (Sio hake ki ʻolunga)

He langí (Hiki hake e nimá ki he langí)

Tauafu ʻa e ʻuha hoku matá (Fakatātaaʻi e tō ʻa e ʻuhá ʻaki ho ʻuluʻulu tuhú)

Mo e matangi faʻaki maí (Fengāueʻaki ho ongo nimá ki muʻa mo mui ʻo hangē ko e fakalaka hake ʻa e matangí ki ho tuʻá)

ʻO u ala atu he vao losé (Fakatātaaʻi haʻo ala pe fakananamu ha matalaʻi lose)

Ngangatu fakavalé (ʻAlu tuʻu maʻu)

Kuó u fiefia kuó u ʻi he māmaní

Fungani ia ʻo e tāpuakí (Folahi atu ho ongo nimá ki he tafaʻakí)

Fakaʻaliʻali ʻa e fakatātā 1–3, Ko Sīsū ko e Kalaisí.

Hivá

• Ko hai ʻeni?

• Ko hai ʻa e tamai ʻa Sīsuú?

Lau ʻa e konga ʻuluaki ʻo e Sione 3:16 (ʻo aʻu ki he ʻAló) peá ke fakamatalaʻi ange ko e tāpuaki māʻolunga taha kuo foaki mai ʻe he Tamai Hēvaní kiate kitautolú ʻa hono tuku mai ko ia ʻa hono ʻAló ki he māmaní.

Naʻe fakahaaʻi ʻe Sīsū ʻa ʻene ʻofá ki he fānaú

Talanoá

Fakaʻaliʻali ʻa e fakatātā 1–19, Ko Kalaisi mo e Fānaú. Fai ʻa e talanoa ʻo Sīsuú ʻi heʻene tāpuakiʻi ʻa e fānau ʻi Selūsalemá, ʻo hangē ko ia ʻoku ʻi he Maʻake 10:13–16.

Fakamahinoʻi ange naʻe tukuange ʻe Sīsū ha taimi ke ne ʻofa mo tāpuakiʻi ai ʻa e fānau īkí neongo pē naʻe fakakaukau ʻa hono kau muimuí ʻoku ʻikai totonu ke tokanga ia ki he fānau īkí.

Talanoá

• Ko e hā ne fai ʻe Sīsū ʻi he haʻu kiate Ia ʻa e fānaú?

• Ko e hā hoʻo fakakaukau ki he faʻahinga ongo naʻe maʻu ʻe he fānaú fekauʻaki mo Sīsuú?

Hivá

Lau fakataha mo e fānaú ʻa e ngaahi lea ʻo e “ʻOku ʻofa ʻa Sīsū” (Children’s Songbook).

ʻOku ʻofa ʻa Sīsū ki he fānau kotoa pē,

Ko e fanga kiʻi fānau ʻoku kei īkí,

Ko e kiʻi pēpē ʻi he mohenga pēpeé,

Ko e fānau ko ia ʻoku nau kiʻi lalahi mo loloá.

Talanoá

Fakaʻaliʻali ʻa e fakatātā 1–20, Ko hono Tāpuakiʻi ʻe Sīsū ʻa e fānau Nīfai īkí.

Fakamatalaʻi ange ʻi he hili ko ia ʻa e pekia ʻa Sīsuú, naʻá ne ʻaʻahi ki he kakai ʻi ʻAmeliká. Ko ʻAmeliká naʻe fuʻu mamaʻo ia mei he feituʻu naʻe nofo ai ʻa Sīsū ʻi he māmaní.

Fai ange ʻa e talanoa ʻo hono tāpuakiʻi ʻe Sīsū ʻa e fānau ʻa e kau Nīfai, ʻo hangē ko ia ʻoku hā he 3 Nīfai 17:11–12, 21–24. Fakamatalaʻi ange naʻe tāpuakiʻi fakatāutaha ʻe Sīsū ʻa e fānaú.

Talanoá

• Naʻe anga fēfē hono fakahaaʻi ʻe Sīsū ʻa ʻene ʻofa ki he fānaú?

• ʻOku anga fēfē hoʻo ʻiloʻi ʻoku ʻofa ʻa Sīsū kiate koé?

ʻEkitivitií

Toutou lau fakataha mo e fānaú ʻa e veesi ko ʻení, mo fakahoko ʻa hono fakatātāʻí ʻo hangē ko ʻene hā atú:

ʻOku ʻOfa ʻa Sīsū ki he Fānau Kotoa pē

ʻOku ʻofa ʻa Sīsū ki he fānau kotoa pē, (folahi ho ongo nimá ki he tafaʻakí)

Ko e longaʻi fānau īkí. (Ngāueʻaki ʻa e nimá ke ne fakahaaʻi ʻa e longaʻi fānau īkí ʻo ngata pe ʻi hotau tuí)

Ko e kiʻi pēpē ʻi he mohenga pēpeé, (Hanga ʻo fakatātaaʻi ʻaki ho ongo nimá ha kiʻi mohenga pēpē)

Ko e fānau ko ia ʻoku nau kiʻi lalahi mo loloá. (Hiki ho nimá ke māʻolunga ʻi ho ʻulú.)

(From Finger Fun for Little Folk by Thea Cannon. Copyright © 1949 by the Standard Publishing Company, Cincinnati, Ohio. Fakaʻaongaʻi ʻi hano fakangofua).

ʻOku ʻOfa ʻa e Tamai Hēvaní mo Sīsū Kalaisi ʻiate kitautolu fakatāutaha

Tokoniʻi ʻa e fānaú ke mahino ʻa honau mahuʻinga fakatāutaha ki he Tamai Hēvaní pea mo Sīsuú. Fakamatalaʻi ange ʻoku ʻofa ʻa e Tamai Hēvaní mo Sīsū ʻiate kitautolu fakatāutaha pea ʻokú na ʻafioʻi ʻa hotau hingoá.

ʻEkitivitií

Puke ha sioʻata pea ʻai ke haʻu tahataha ʻa e fānaú. ʻI he haʻu ko ia ʻa e fānaú taki taha ʻo sio ki he sioʻatá, pehē ange, “Ko (hingoa ʻo e tamasiʻí pe taʻahiné), pea ʻoku ʻofa lahi ʻa e Tamai Hēvaní mo Sīsū ʻia (hingoa ʻo e tamasiʻí pe taʻahiné).”

Fakamoʻoní

Fai hoʻo fakamoʻoní ko e Tamai Hēvaní mo Sīsū Kalaisi ʻokú na moʻui, pea ʻokú na ʻofa ʻiate kitautolu taūtaha. Fevahevaheʻaki hoʻo ongoʻi houngaʻia ʻi he ngaahi tāpuaki kuo foaki atu ʻe he Tamai Hēvaní mo Sīsū Kalaisí.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitī ko ʻení ke ke fakaʻaongaʻi ʻi he lolotonga hoʻo lēsoní.

1. Hivaʻi pe lau ʻa e ngaahi lea ʻo e hiva ko e “Sīsū Hotau Kaumeʻá”. (Children’s Songbook). Tufa ki he kiʻi tamasiʻi pe taʻahine taki taha ʻa e tatau ʻo e kiʻi meʻa ne pākí “Sīsū Hotau Kaumeʻa” (ʻi he hili ʻa e lēsoní), pea tukuange ki he fānaú ke nau valivali ʻa e fakatātā he lauʻi pepá.

2. Hivaʻi pe lau ʻa e ngaahi lea ʻo e, “ʻOku Moʻui ʻa e Tamaí” (Children’s Songbook) pe ko e “ʻOku ou Ongoʻi e ʻOfa ʻa e Fakamoʻuí” (Children’s Songbook).

3. Fakaʻaliʻali ha ngaahi fakatātā ʻo ha ngaahi meʻa kuo foaki mai ʻe he Tamai Hēvaní mo Sīsū, ʻo hangē ko e temipalé, fanga monumanú, ngaahi matalaʻi ʻakaú, ngaahi fāmilí, meʻatokoní, ngaahi kaungā-meʻá, ngaahi ʻapí, ko ha fale lotu, pe ko e ngaahi folofolá. (Ko e ngaahi fakatātā ʻe lava ʻo maʻu ia mei he laipeli ʻi he fale lotú, ko e Ngaahi Fakatātā ʻo e Ongoongoleleí, pe ngaahi makasini ʻa e Siasí.) Tokoniʻi ʻa e fānaú taūtaha ke ne ʻiloʻi kuo foaki mai ʻe he Tamai Hēvaní mo Sīsū ʻa e ngaahi meʻá ni koeʻuhí ko ʻena ʻofa ʻiate kitautolú.

4. ʻOmai ha meʻa, hangē ko ha foʻi ngeʻesi hina kava mālohi, ʻa ia ʻe lava ke vilo ʻo ne tuhu ki ha taha pe feituʻu. Fakanofonofo ʻa e fānaú ʻi he falikí ʻi ha foʻi siakale pe fuopotopoto pea tuku ʻa e foʻi ngeʻesi hiná ʻi lotomālie ʻiate kinautolu. Vilohi ʻa e foʻi hiná ʻi he falikí. ʻI he taimi pē ʻe tuʻu aí ʻoku tuhu ki ha taha, kuo pau ke tala mai ʻe he taha ko iá ha hingoa ʻo ha meʻa ʻe taha kuo foaki mai ʻe he Tamai Hēvaní mo Sīsū ʻa ia ʻokú ne fakahaaʻi mai ʻa ʻena ʻofa kiate kitautolú. Tokoniʻi ʻa e kiʻi tamasiʻí pe taʻahiné taki taha ke ne fakakaukauʻi haʻane tali ʻi he taimi ʻoku hoko mai ai kiate iá. ʻI he hili pē ha tali ʻa ha taha pea tuku ange ki ai ke ne vilohi ʻa e foʻi hiná koeʻuhí ke tuhu ia ki ha taha kehe.

5. Teuteu ha kiʻi puha pe ko ha tangai ʻa ia ʻoku ʻi loto ai ʻa e ngaahi meʻa ʻe niʻihi ʻoku ʻaonga kiate kitautolu ke tau moʻui ai ʻi he māmaní, ʻo hangē ko e meʻatokoní, vaí, pe ko e ngaahi valá. Fakamatalaʻi ange naʻe palaniʻi ʻe he Tamai Hēvaní mo Sīsū ʻa e foʻi māmaní moʻotautolu ke tau moʻui ai. Kiʻi fakaofiofi ange ha kamataʻanga ʻo ha hingoa ʻo ha meʻa ke ne lava ai ʻo mateʻi pe ko e hā ʻa e meʻa ko iá. ʻI he taimi ʻoku nau mateʻi aí, toʻo leva ki tuʻa ʻa e meʻa ko iá mei he tangaí pe puhá. Hokohoko atu pē ʻi he kiʻi vaʻingá ni kae ʻoua kuo mateʻi kotoa ʻe he fānaú ʻa e ʻu meʻá hono kātoa.

6. ʻAi ha kiʻi foʻi pine pe fakaʻilonga maʻá e kiʻi tamasiʻi pe taʻahine kotoa pē ke ne ʻalu mo ia ki ʻapi ʻoku tohiʻi ai ʻa e ʻOku ʻofa ʻa e Tamai Hēvaní mo Sīsū ʻiate au. ʻE lava pē ke ke fakapipiki ʻa e foʻi piné pe fakaʻilongá ki he kiʻi tamasiʻí pe taʻahiné pe haʻihaʻi ha kiʻi afo ʻo fakakahoa ʻaki e kiʻi tamasiʻí pe taʻahiné ʻi hono kiá. ʻE lava pē ke ke fufuuʻi ʻa e kiʻi foʻi piné pe fakaʻilongá ʻi he lalo sea ʻo e fānaú taki taha ki muʻa pea toki kamata ʻa e kalasí pea toki tuku ke kumi ʻe he fānaú.

Ngaahi ʻEkitivitī kehe Maʻá e Fānau iiki angé

1. Lau fakataha ʻa e ngaahi veesi ko ʻení mo e fānaú, pea mo fakatātaaʻi ʻo hangē ko e fakahinohinó:

   Kapau ʻokú ke fuʻu lōloa (fakamafao pea kakapa hake ho ongo nimá ki ʻolunga),

   ʻOku ʻi ai ha feituʻu ʻi he Siasí moʻou.

   Kapau ʻoku ke fuʻu nounou (tuʻusike hifo ki lalo),

   ʻOku ʻi ai ha feituʻu ʻi he Siasí moʻou.

   Lōloa (kakapa ki ʻolunga)

   Nounou (tuʻusike hifo)

   Lōloa (kakapa ki ʻolunga)

   Nounou (tuʻusike hifo)

   ʻOku ʻofaʻi kātoa kitautolu ʻe he Tamai Hēvaní.

2. Lau ʻa e ngaahi veesi ko ʻení pea tokoniʻi ʻa e fānaú ke nau fakatātaaʻi ʻo hangē ko e fakahinohinó:

   ʻOku ʻafioʻi au ʻe he Tamai Hēvaní

   ʻOku ʻafioʻi au ʻe he Tamai Hēvaní (tuhu pe kiate koe)

   Pea mo ia ʻoku ou fie faí.

   ʻOkú ne ʻafioʻi hoku hingoá mo e feituʻu ʻoku ou nofo aí (fakafalefale ho ongo nimá ʻi ʻolunga ʻaki hano ʻai ke fetaulaki e ʻuluʻulu-tuhú).

   ʻOku ou ʻiloʻi ʻokú ne ʻofa foki ʻiate au (fakafehauaki ho ongo nimá ki ho ongo umá).

   ʻOkú Ne ʻafioʻi e meʻa ʻokú ne ʻai au ke u fiefiá (tuhu ki ho mata malimalí).

   ʻOkú Ne ʻafioʻi e meʻa ʻokú ne ʻai au ke u mamahí (tuhu ki ho mata fakafulofulá pe mamahí).

   ʻOku ou ʻiloʻi ʻokú Ne fie tokoniʻi au (tuhu pē kiate koe),

   Pea ko e meʻa ia ʻokú Ne ngaohi au ke u fiefiá!