ʻOku ou Fakafetaʻi ʻi Heʻeku Lava ke Nāmuʻi mo ʻIloʻi ʻa e Ifó

Taumuʻá

Ke tokoniʻi ʻa e fānaú taki taha ke ne houngaʻia ʻi he ngaahi ongo ʻo e nāmuʻí mo e ʻiloʻi ʻo e ifó.

Teuteú

Ako ʻi he faʻa lotu ʻa e ʻEkesōtosi 16:11–15,31 mo e Tokāteline mo e Ngaahi Fuakavá 59:18—19.
Ngaahi nāunau ʻoku fiemaʻú:
1. Tohi Tapú mo e Tokāteline mo e Ngaahi Fuakavá.
2. Kiʻi konga meʻakai namu ifo ki he toko taha kotoa pē, (hangē ko ha fuaʻi ʻakau, mā, cookie, pe popi koane). Faʻo kātoa ʻa e ngaahi konga meʻakaí ni ʻi ha kato pe tangai. ʻUluaki vakaiʻi fakapapauʻi mo e mātuʻá ʻoku ʻikai ke ʻi ai ha taha ʻo e fānaú ʻe kovi ki ai ha faʻahinga ʻo e meʻakai ʻokú ke teuteú.
3. Konga meʻakai ʻoku mahi ʻo (hangē ko ha foʻi lēmani), konokona (hangē ko e māsimá), pe melie (hangē ko e suká) ke ʻahiʻahiʻi ʻe he fānaú. Tomuʻa fakapapauʻi mo e mātuʻá ʻoku ʻikai ke ʻi ai ha taha ʻe kovi ki ai ʻa e ngaahi meʻá ni.
4. Fakatātā 1–35, Ko e Tānaki ʻo e Maná.
Fai mo ha ngaahi teuteu ʻo ha ʻEkitivitī Fakatupulaki te ke fie fakaʻaongaʻi.

Fakatokanga ki he faiakó: Tokanga makehe ki he ongoʻi ʻa e niʻihi ʻi he kalasí ʻoku ʻi ai hanau ngaahi faingataʻaʻia fakaesino. Taafataha pē ki he ngaahi meʻa ʻe lava ʻe honau ngaahi sinó, kae ʻikai ko ia ʻoku ʻikai ke nau lava ʻo faí.

Ngaahi ʻEkitivitī ke ako mei aí

Fakaafeʻi ha taha ʻo e fānaú ke ne fai ʻa e fua lotú

ʻEkitivitī ke taki ʻaki e tokangá

Kole ange ki he fānaú ke kuikui honau matá. Tuku ki he taha taki taha ke ne fakananamu ʻa e meʻakai ʻi he loto kató pe tangaí pea mateʻi pe ko e hā ia. Lolotonga ʻa e kei kuikui honau matá, ʻoange ki he fānaú ha konga ʻo e meʻakai ko iá ke nau ʻahiʻahiʻi. ʻAi ke ʻāʻā hake ʻa e fānaú, peá ke fakaʻaliʻali ange pe talaange ʻa e meʻakai naʻa nau toki kaí pe ʻahiʻahiʻí.

ʻEkitivitī ke taki ʻaki e tokangá

Naʻe namu fēfē ʻa e meʻakai ko ʻení?
Naʻe ifo fēfē ʻa e meʻakai ko ʻení?

Fakahā ange ki he fānaú ʻe lava pē ke nau ifoʻia ʻi he meʻakaí ʻo tatau ai pē pe te nau lava ʻo sio ki ai. ʻOku nau lava ke fai ʻeni koeʻuhí naʻe tāpuakiʻi kinautolu ʻe he Tamai Hēvaní ʻaki ʻa e ongo ko ia ʻo e nāmuʻí mo e ifoʻiá.

ʻOku ʻi ai hotau ihú koeʻuhí ke tau lava ʻo nāmuʻi

ʻOku tau nāmuʻi fēfē ha faʻahinga meʻa?

Aleaʻi mo e fānaú ha niʻihi ʻo ha ngaahi meʻa ne nau nāmuʻi ʻi he lolotonga ʻo e uiké, ʻo hangē ko e meʻakai ʻoku lolotonga haká, ʻea maʻá ʻi he hili ʻa e ʻuhá, pe ngaahi matalaʻi ʻakaú. Tala ange ki he fānaú ʻoku totonu ke tau fakamālō ki he Tamai Hēvaní ʻi hotau ongo ko ia ke nāmuʻi ha meʻa.

Ko e hā ha ngaahi meʻa ʻokú ke saʻia ke nāmuʻi?

ʻEkitivitií

Tokoniʻi ʻa e fānaú ke nau fakahoko ʻa e veesi ʻekitivitī ko ʻení:

ʻOku ou Maʻu ha Ihu

ʻOkú ne tuʻu ʻi he vaeuaʻanga mālie hoku matá (Ala ho ongo nimá ki ho ihú)
Ko e feituʻu lelei taha pē ʻeni ke tuʻu ai ʻa hoku ihú
ʻOku lava ke u fakananamu ʻaki (Tuku ki lalo ho ongo nimá peá ke ʻai ke na mālōlō)
ʻOku lava ke ne nāmuʻi (ʻAi haʻo mānava fakaʻaulolongo lolotonga ia hoʻo fakananamú)

ʻOkú ne matuʻaki ngāue lelei
Mālō ʻe Tamai Hēvaní (Kūnima)
Tuʻunga ʻi hoku ihú.

ʻOku ʻi ai hotau ʻeleló ke tau lava ʻo ʻahiʻahiʻi e ifó

Fakamatalaʻi ange kuo tāpuakiʻi kitautolu ʻe he Tamai Hēvaní ʻaki ha ʻelelo koeʻuhí ke tau lava ʻo ʻahiʻahiʻi ʻaki e ifó. ʻAi e fānaú ke nau ʻahiʻahiʻi ʻa e mahimahí, konokoná, mo e ngaahi meʻa melié ʻo kapau ʻoku nau fie fai ia.

Ko feʻia ʻoku mahimahí?
Ko feʻia ʻoku konokoná?
Ko feʻia ʻoku melié?
Ko feʻia ʻokú ke manako taha ke ke ʻahiʻahiʻí?

Fakaʻaliʻali ange ʻa e Tokāteline mo e Ngaahi Fuakavá (pe ko e peesi ko ia ʻoku hā ai ʻa e hingoa ʻo e Tokāteline mo e Ngaahi Fuakavá ʻo kapau ʻoku pulusi fakataha mo e ngaahi folofola kehé). Fakamatalaʻi ange kuo fakahā kiate kitau-tolu ʻe he tohi folofola ko ʻení, ko e ngaahi meʻa ko ia ʻoku namu lelei mo ifó ʻoku ʻatautolu ia ke tau fakaʻaongaʻi mo fiefia ai. (&T&F 59:18–19)

Talanoá

Talanoá Fakaʻaliʻali ʻa e fakatātā 1–35, Ko Hono Tānaki ʻo e Maná, ʻo hangē ko ia ʻi he Exodus 16:11–15, 31.

Talanoá

Naʻe ifo fēfē ʻa e maná? (Vakai, ʻEkesōtosi 16:31.)
Kuó ke ʻahiʻahiʻi tuʻo taha ʻa e huhuaʻi honé?
ʻOku ifo fēfē?

Fakamatalaʻi ange ʻoku lahi ʻa e ngaahi meʻa ia ʻoku ʻikai feʻunga ke ʻahiʻahiʻí: hangē ko e ngaahi fuaʻi fuamelie ʻe niʻihi, ngaahi koa fufulú, ngaahi meʻa ʻoku ʻikai ke tau ʻiloʻi pe ʻoku maʻu mei he ngaahi ngeʻesi kapá pe hiná, pe ko ha faitoʻo pe foʻi ʻakau ʻoku ʻikai fakangofuaʻi ʻe he mātuʻá. ʻE lava ke ʻai ʻe he ngaahi meʻá ni kitautolu ke tau puke lahi. Fakamamafaʻi ange ʻa e mahuʻinga ke ʻeke ki ha taha lahi kimuʻa pea toki ʻahiʻahiʻi pe kai ʻe he fānaú ha meʻa ʻoku nau ʻilo.

Fakamoʻoní

Fakahaaʻi ʻa hoʻo houngaʻia ʻi ha ihu ke ke nāmuʻi ai ʻa e ngaahi meʻá pea mo ha ʻelelo ke ke ʻahiʻahiʻi ʻa e ifó. Fakamanatuʻi ki he fānaú ke nau fakamālō ki he Tamai Hēvaní ʻi honau ngaahi ongo ko ia ʻo e nanamú pea mo e ʻahiʻahiʻi ʻo e ifo ʻo e meʻakaí.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitī ko ʻení ke ke fakaʻaongaʻi ʻi he lēsoní.

ʻOmai ha ngaahi meʻa ʻoku ʻalaha mālohi ʻa ʻene namu leleí, ʻo hangē ko e koá, matalaʻi ʻakaú, pe foʻi lēmani, mo ha ngaahi meʻa ʻoku ʻikai ke ʻi ai hanau nanamu, ʻo hangē ko ha lauʻi pepa pe kiʻi tamapua. ʻAi e fānaú ke tala mai ʻa e meʻa ko ia ʻoku nau lava ke nāmuʻí. ʻAi ʻa e fānaú ke nau kuikui tahataha pea ne fakananamu ha taha ʻo e ngaahi meʻa naʻá ke ʻomí mo mateʻi atu pe ko e hā ia. Tuku ange ha faingamālie ki he tokotaha kotoa pē.
Tuku ke sio ʻa e fānaú ʻi he sioʻatá ki honau ʻeleló. Fakamatala ange ko hotau ʻeleló ʻoku fonu ia ʻi he fanga kiʻi meʻa ʻoku ne tala ʻa e ifó ʻa ia ʻoku nau tokoniʻi kitautolu ke tau ʻahiʻahiʻi ʻo ʻiloʻi ʻa e meʻa melié, mahimahí, mo e konokoná. ʻAi ke ʻahiʻahiʻi ʻe he fānaú ha vai. Fakamatalaʻi ange ko hotau ʻeleló te nau lava ke tokoniʻi kitautolu ke lava ʻo tala ha meʻa ʻoku viviku pe momoko.
Tuku ke tā fakatātaaʻi ʻe he fānaú taki taha ʻa e meʻakai ʻokú ne manako taha aí. ʻAi ke nau fakaʻaliʻali ʻa ʻenau fakatātaá mo fakahā pe ko e hā ʻa e meʻakai ko iá.
Tuku fakataha ha ongo kiʻi meʻa ʻe ua ʻokú na faitatau ka ʻokú na ifo kehekehe, ʻo hangē ko e māsimá mo e suka hiná pe ko ha mahoaʻa mei he uité mo ha mahoaʻa mei he koané. ʻOange ke kiʻi ʻahiʻahiʻi siʻisiʻi ʻe he fānaú taki taha ʻa e ngaahi meʻá ni taki taha. Pea ʻeke taha-taha ange ki he fānaú pe ʻoku ifo fēfē ʻa e ngaahi meʻa ní taki taha. Aleaʻi ʻa e ʻasi faitatau ʻa e ngaahi meʻa ʻe niʻihi ka ʻoku nau ifo kehekehe. (ʻUluaki vakaiʻi mo e mātuʻá ʻa e fānaú pe ʻoku ʻi ai ha niʻihi ʻo kinautolu ʻoku kovi ki ai ha taha ʻo e ngaahi meʻa te ke ʻomaí.)
Hivaʻi ʻa e “Fakamālō” (Children’s Songbook).

Ngaahi ʻEkitivitī Kehe Maʻá e Fānau Iiki Angé

Tā ha fakatātā fuopotopoto ʻi he palakipoé pe ha lauʻi pepa. Fakamatalaʻi ange ko e fuopotopoto ko ʻení ko ha fakatātā ia ʻo ha mata.
- Ko e hā e meʻa ʻoku puli mei hení?
  
  ʻI he talamai ko ia ʻe he fānaú ʻa e matá, telingá, ihú, mo e ngutú, hanga ʻo fokotuʻu kinautolu ki he fakatātaá. Peá ke toki fakamanatu leva ʻa e ngaahi fatongia ʻo e konga takitaha. Fakahaaʻi ʻa hoʻo houngaʻia ki he Tamai Hēvaní ʻi ho sinó.
Tuhu ki ho ngutú mo ke pehē, “Ko hoku ngutú ʻeni.” Pea ke ʻeke ange, “Te ke lava ʻo fakahā mai ho ngutú?” mo ke tokoniʻi ʻa e fānaú ke nau tuhu ki honau ngutú. Toe fai ʻa e meʻa tatau pē ki he matá, ihú, telingá, nimá, mo e vaʻé. Pea ke tuhu fakalongolongo ki he ngaahi kongokonga ʻo e sinó ka e tuku ki he fānaú ke nau fakahingoa atu ia. Kapau ʻe lava ʻe he fānaú ʻo tala kotoa atu ʻa e ngaahi hingoá, peá ke ʻeke ange leva ʻa e ngaahi konga ʻoku ʻikai te nau faʻa lava ke ʻiló ʻo hangē ko e tuiʻinimá, tuí, fasiʻanimá, mo e tungaʻivaʻé.
ʻAi e fānaú ke nau tuʻu ʻo lau ʻa e ngaahi vēsí ni, mo faʻifaʻitaki ʻo fakatatau ki hono ngaahi leá.

Ala ki ho Matá

Ala ki ho matá,

Ala ki ho ihú

Ala ki ho telingá

Ala ki ho ʻuluʻuluvaʻé.

Fakamafao ho nimá

Ke māʻolunga ki ʻolunga

Pea ke toe māʻolunga ange

Ki ʻolunga ki he langí.

ʻAi ho nimá

Ki ho louʻulú

Tangutu fakalongolongo ki lalo

ʻI ho seá.