Lēsoni 30

Te u Lava ʻo Fakamolemoleʻi ha Niʻihi Kehe

Taumuʻá

Ke fakalotolahiʻi ʻa e fānaú taki taha ke nau maʻu ha loto faʻa fakamolemole.

Teuteú

1. Ako ʻi he faʻa lotu ʻa e Sēnesi 37:12–28; 41:38–43; 42:1–8; 45:1–15; Mātiu 18:21–22; Luke 23:33–34.

2. Teuteuʻi ha ngaahi konga lauʻi pepa iiki pea ke tohiʻi ʻi he ngaahi lauʻi pepá taki taha ha foʻi sētesi ʻo hangē ko e taha ʻo kinautolu ʻoku hā atu ʻi laló:

   • Naʻe ʻi ai ha taha naʻá ne taaʻi mo tekelele koe ki lalo.

   • Naʻe ʻi ai ha taha naʻe ʻikai te ne tuku ange ke ke vaʻinga ʻi ha vaʻinga.

   • Naʻe ʻi ai ha taha naʻá ne maumauʻi haʻo meʻa.

   • Naʻe ʻi ai ha taha naʻá ne ui ʻaki koe ha hingoa kovi.

   • Naʻe ʻi ai ha taha naʻá ne faʻao ʻa e meʻa naʻá ke vaʻinga ʻakí pea ʻikai ke ne fie vahevahe ia mo koe.

   Teuteuʻi ha lauʻi pepa maʻá e fānau taki taha ʻi he kalasí (toe faʻu mo ha ngaahi meʻa ʻe ala hoko ʻo hangē ko ia ʻi ʻolungá ʻo kapau ʻe fiemaʻu). Faʻo ʻa e ngaahi lauʻi pepá ʻi ha kiʻi puha siʻisiʻi pea fakahingoa ia ko e “puha ʻo e fakamolemolé.”

3. Ngaahi nāunau ʻoku fiemaʻú:

   1. Tohi Tapú

   2. Fakatātā 1–47, Ko ha Fānau ʻOku Kē; fakatātā 1–57, Ko Siosefa ʻOku Fakatau ʻe Hono Ngaahi Tokouá (Ko e Ngaahi Fakatātā ʻo e Ongoongoleleí 109; 62525); fakatātā 1–58, Ko Hono Fakahā ʻe Siosefa ia ki Hono Ngaahi Tokouá; fakatātā 1–59, Ko e Tutuki ʻo e Fakamoʻuí (Ko e Ngaahi fakatātā ʻo e Ongoongoleleí 230; 62505).

4. Fai mo ha ngaahi teuteu ki ha ngaahi ʻEkitivitī Fakatupulaki te ke fie fakaʻaongaʻí.

Ngaahi ʻEkitivitī Ke Ako Mei Aí

Fakaafeʻi ha taha ʻo e fānaú ke ne fai ʻa e fua lotú.

ʻEkitivitī ke taki ʻaki e tokangá

Fakaʻaliʻali ʻa e fakatātā 1–47, Ko e Fānau ʻOku Nau Kē.

ʻEkitivitī ke taki ʻaki e tokangá

• Ko e hā ʻa e meʻa ʻoku fai ʻe he fānau ko ení?

• ʻOkú ke pehē ko e hā ʻa e meʻa ʻoku nau kē aí?

• ʻOkú ke pehē ʻoku nau ongoʻi fēfē?

• Ko e hā ha ngaahi lea ʻe ala leaʻaki ʻe he fānau ko ʻení ke fakangata ʻaki ʻenau keé pea mo ʻai kinautolu ke nau ongoʻi lelei ange?

Toe fakamanatu mei he lēsoni ki muʻá ʻa hono mahuʻinga ko ia ke te pehē “ʻOku ou kole fakamolemole atu.” Fakamatalaʻi ange ʻi ha hili ko ia ha pehē ʻe he fānaú ʻoku nau kole fakamolemolé, ʻoku totonu ke nau fefakamolemoleʻaki. ʻOku ʻuhinga ʻeni ke ʻoua te nau toe feʻitangaki kā ke nau hoko ko ha ngaahi kaungā- meʻa. Fakamanatu ki he fānaú ʻa e talanoa fekauʻaki mo Mati mo Tulāvisí ʻi he lēsoni ki muʻá. Naʻe fakamolemoleʻi ʻe Mati ʻa Tulāvisi ʻi heʻene ʻave ʻene ngaahi meʻa vaʻingá. Naʻá na kei hoko pē ko ha ongo kaungā-meʻa.

Naʻe fakamolemoleʻi ʻe Siosefa ʻa hono ngaahi tokouá

Talanoá

Fakaʻaliʻali ʻa e fakatātā 1–57, Ko Hono Fakatau ʻa Siosefa ʻe Hono Ngaahi Tokouá. Fai ange ʻa e talanoa ʻo Siosefá ʻi hono fakatau ia ki ʻIsipité, ʻo hangē ko ia ʻoku hā ʻi he Sēnesi 37:12–28.

Talanoá

• Ko e hā haʻo fakakaukau ki he faʻahinga ongoʻi naʻe maʻu ʻe Siosefa ʻi hono fakatau atu ia ʻe hono ngaahi tokouá ke hoko ko ha pōpula ʻi ʻIsipité?

Fakamatalaʻi naʻe hoko ʻa Siosefa ko ha toko taha mahuʻinga ʻi ʻIsipite (vakai ki he Sēnesi 41:38–43). Hili ha ngaahi taʻu lahi, naʻe haʻu ʻa e ngaahi tokoua ʻo Siosefá ki ʻIsipite ke maʻu ha meʻatokoni koeʻuhí naʻe ʻikai ke nau maʻu ha meʻatokoni feʻunga ʻi honau fonuá. Naʻa nau ʻilo ai ʻoku kei moʻui ʻa Siosefa pea ʻoku hoko ia ko e tokotaha mahuʻinga ʻi ʻIsipite (vakai ki he Sēnesi 42:1–8; 45:1–15).

Fakaʻaliʻali ʻa e fakatātā 1–58, Ko Hono Fakahāaʻi ʻe Siosefa ia Ki Hono Ngaahi Tokouá.

Talanoá

• Ko e hā haʻo fakakaukau ki he faʻahinga ongoʻi naʻe maʻu ʻe Siosefa ʻi heʻene toe fakataha mo hono ngaahi tokouá? (Vakai ki he Sēnesi 45; 4–25.)

• Naʻe toe ʻita nai ʻa Siosefa ʻi hono ngaahi tokouá? (Vakai ki he Sēnesi 45:5.)

• Ko e hā haʻo fakakaukau ki he faʻahinga naʻe maʻu ʻe he ngaahi tokoua ʻo Siosefá fekauʻaki mo iá?

• Naʻe fakahaaʻi fēfē ʻe Siosefa kuó ne fakamolemolea ʻa hono ngaahi tokouá? (Vakai ki he Sēnesi 45:5–15.)

ʻEkitivitií

ʻAi ha taha ʻo e fānaú ke ne pehē ko Siosefa ia pea ko e toenga ʻo e fānaú ke nau fakatātaaʻi ko e ngaahi tokoua kinautolu ʻo Siosefá. Tokoniʻi ʻa e fānaú ke nau fakatātaaʻi ʻa e talanoa ʻo Siosefá ʻi heʻene toe fakataha mo hono ngaahi tokouá mo ʻene fakamolemoleʻi kinautolú.

Naʻe folofola mai ʻa Sīsū ke tau faʻa fakamolemole

Hiki hake ha Tohi Tapu. Fakamatalaʻi ange ʻoku folofola mai ʻa Sīsū kiate kitautolu ʻi he Tohi Tapú ke tau faʻa fakamolemole. Naʻe ʻeke ange ʻe ha taha ʻo e kau ʻaposetolo ʻa Sīsuú kiate Ia fekauʻaki mo e fakamolemoleʻi ʻa e niʻihi kehé (vakai ki he Mātiu 18:21–22). Naʻe folofola ange ʻa Sīsū kiate ia ʻoku totonu ke tau faʻa fakamolemole maʻu pē. Fakamatalaʻi ange ʻoku toe pehē mai ʻe he Tohi Tapú kiate kitautolu naʻe faʻa fakamolemole mo Sīsū foki.

Fakaʻaliʻali ʻa e fakatātā 1–59, Ko e Tutuki ʻo e Fakamoʻuí. Fakamatalaʻi ange naʻe fuʻu ʻiteʻita ʻaupito ʻa e kau sōtiá ʻia Sīsū. Naʻa nau taaʻi mo ʻanuhi Ia. Naʻe tuki ʻe he kau sōtiá ha ngaahi faʻo ʻi he toʻukupú pea mo e toʻukupu kelekele ʻo e Fakamoʻuí pea nau tautau ia ʻi he kolosí ʻo Ne pekia. Fakamatalaʻi ange naʻe fakamolemoleʻi ʻe Sīsū ʻa e kau sōtiá. Naʻe ʻikai te Ne houhau ia ki he kau sōtiá ʻi he meʻa naʻa nau fai kiate Iá. (Tokanga ke ʻoua ʻe fuʻu tōtuʻa hoʻo fakatātaaʻi mo tala ʻa e talanoa ko ʻení. ʻE ʻi ai ha fānau te nau fuʻu ongoʻi mamahi lahi fekauʻaki mo e fakakaukau ko ia ʻo ha hanga ʻe ha niʻihi kehe ʻo fakamamahiʻi ʻa Sīsuú.)

Huke ki he tohi ʻa Luke 23:34 peá ke fakahā ange ki he fānaú ʻa e meʻa naʻe folofolaʻaki ʻe Sīsū ʻi he taimi naʻá Ne lotu ai ki he Tamai Hēvaní kimuʻa pea Ne pekiá: “ʻE Tamai, fakamolemolea ʻa kinautolu.” ʻAi ʻa e fānaú ke nau toe lau leʻo lahi ʻa e konga sētesi ko ení.

• Neongo pē naʻe fakamamahiʻi ʻe he kau sōtiá ʻa Sīsū, ko e ha ʻa e meʻa naʻá ne faí?

• Ko e hā ʻa e meʻa ʻoku fiemaʻu ʻe Sīsū kitautolu ke tau fai ʻi he taimi ʻe hanga ai ʻe ha taha ʻo ʻai kitautolu ke tau ongoʻi ʻita pe loto mamahí?

ʻEkitivitií

Kole ange ki he fānaú ke nau fai ʻa e meʻa kotoa pē ʻokú ke faí. ʻAi ke nau muimui atu kiate koe ʻi he taimi ʻokú ke tuʻu aí, faofao, malimali, tangutu ki lalo, pea kūnima. Fakamatalaʻi ange koeʻuhí ko ʻenau fai ʻa e meʻa kotoa pē naʻa ke toki faí, ʻoku nau muimui ai kiate koe. Kapau te ke muimui ki ha taha, ʻoku ke fai ai ʻa e meʻa tatau ʻoku fakahoko ʻe he tokotaha ko iá. ʻI he taimi ʻoku tau fakamolemoleʻi ai ʻa e niʻihi kehé ʻoku tau muimui ai kia Sīsū. ʻOku tau fai ai ʻa ia naʻá ne fakahokó. ʻOku fiemaʻu ʻe Sīsū kitautolu ke tau fakamolemoleʻi kinautolu ʻoku nau ʻai ke tau ʻita pe loto mamahí.

ʻE lava ke tau fakamolemoleʻi ʻa e niʻihi kehé

ʻEkitivitií

Fakaʻaliʻali ʻa e “puha ʻo e fakamolemolé” pea ke fakaafeʻi tahataha ʻa e fānaú ke nau toʻo ha kiʻi lauʻi pepa mei he puhá. Lau ʻa e foʻi sētesi takitaha pea ke fai ange ʻa e ngaahi fehuʻi ʻo hangē ko ení:

ʻEkitivitií

• Kuo hoko nai kiate koe ʻa e meʻá ni?

• Te ke ongoʻi fēfē nai?

• Ko e hā ʻa e meʻa ʻoku totonu ke lea atu ʻaki ʻe he tokotaha naʻá ne ʻai koe ke ke loto mamahi pe ʻitá?

• Ko e hā ʻa e meʻa ʻoku totonu ke ke leaʻaki pe te ke fai ki he tokotaha naʻe anga taʻe ʻofa atu kiate koé pe ko ia naʻá ne ʻai koe ke ke loto mamahi pe ʻitá?

Fakamatala ange fekauʻaki mo ha taimi ʻa ia naʻá ke fakamolemoleʻi ai ha taha pea mo e faʻahinga ongo naʻá ke maʻú. Tokoniʻi ʻa e fānaú ke mahino ʻoku fiemaʻu kitautolu ʻe he Tamai Hēvaní mo Sīsū ke tau faʻa fakamolemole.

Hivá

Tokoniʻi ʻa e fānaú ke nau hivaʻi pe lau ʻa e ngaahi lea ki he “Tokoni Mai ʻe Tamai” (Children’s Songbook, p.99).

Tokoni mai ʻe Tamai, Ke u moʻui fiefia

Neongo ʻa e hulu ʻa e filí.

Tokoni mai ke u nofo;

Ofi ai pē kiate Koe.

Fakamoʻonií

Fai hoʻo fakamoʻoni ki hono fiemaʻu ʻe he Tamai Hēvaní mo Sīsū kitautolu ke tau faʻa fakamolemolé. Fakalotolahiʻi ʻa e fānaú ke nau lotu mo kole ki he Tamai Hēvaní ke tokoniʻi kinautolu ke nau faʻa fakamolemole.

Ngaahi Ekitivitií Fakatupulakí

Fili ha niʻihi ʻo e ngaahi ʻekitivitī ko ení ke fakaʻaongaʻi ʻi he lolotonga ʻa e lēsoní.

1. Toe fakamanatu ʻa e talanoa ʻo e foha maumau koloá, ʻo hangē ko ia ʻoku ʻi he Luke 15:11–32l. Fakaʻaongaʻi ʻa e fakatātā 1–49, Ko e Foha Maumau Koloá. Tokoniʻi ʻa e fānaú ke mahino naʻe ʻofa ʻa e Tamai ki hono fohá ʻo ne fakamolemoleʻi ia.

2. Fai ʻa e kiʻi vaʻinga ko ʻení mo e ʻuluʻulutuhú. Fakaafeʻi ʻa e fānaú ke nau fai hono fakatātāʻí fakataha mo koe.

   Ko ha ongo kaungā-meʻa, taha ʻi hema pea taha ʻi mataʻu (hiki hake ho ongo nimá kuo ʻosi kuku),

   Ne na kamata kē mo fuhu (fetukitukiʻi e ongo nimá)

   Ne ʻikai ke na fiefia he ʻaho ko ʻení,

   He naʻe ʻosi akoʻi ange e founga vaʻinga totonú.

   Pea punou e tahá ʻi heʻene maá

   Pea pehē ange ʻa e ʻuluakí, “ʻOku ou ʻilo ʻa ia te u faí.”

   Ke mahino ʻeku fakameʻapangoʻiá, “ʻoku ou kole ke ke fakamolemoleʻi au.”

   “ʻOku ou fakamolemole atu foki mo au”, ko e fika uá ange ia.

   “Ta vaʻinga ke ta fiefia ʻi he toenga ʻo e ʻahó” (kūnima ʻo tangutu ki lalo).

3. Faʻu ha kiʻi foʻi pine maʻá e fānaú taki taha ke nau tui ki honau ʻapí. Tohiʻi ʻi he foʻi pine ko iá ʻE lava ke u faʻa fakamolemole.

Ngaahi Ekitivitií Kehe Maʻá e Fānau Iiki Angē

1. Toe fakamanatu ʻa e talanoa mei he lēsoní 29 fekauʻaki mo e ongo kiʻi tamaiki naʻá na vaʻingá (Vakai ki he ngaahi ʻekitivitī kehe maʻá e fānau iiki angé, ʻekitivitī 4). Fakahā ange mo e founga naʻe hanga ai ʻe he kiʻi tamasiʻi naʻe mamahí ʻo fakamolemoleʻi ʻa e kiʻi tamasiʻi kehé.

2. Hivaʻi pe lau ʻa e ngaahi lea ʻo e “Sīsū Kuó ne Pehē Mai Feʻofaʻaki” (Children’s Songbook, p.61) pe “ʻOku Fiemaʻu ʻe Sīsū” (Children’s Songbook, p.60).

3. Hivaʻi pe lau ʻa e ngaahi lea ʻo e “Kapau ʻOkú ke Ongoʻi Fiefia” (Children’s Songbook, p.266). Fakamatalaʻi ange ki he fānaú ko e taimi ko ia ʻoku tau fakamolemoleʻi ai kinautolu ʻoku nau anga taʻe ʻofa maí, te tau ongoʻi fiefia ange ai.