Lēsoni 28

Te u Lava ʻo Talangofua

Taumuʻá

Ke tanumaki ʻa e loto holi ʻa e fānaú taki taha ke talangofua ki he Tamai Hēvaní mo Sīsū Kalaisi pea ke nau talangofua ki heʻenau mātuʻá.

Teuteú

1. Ako ʻi he faʻa lotu ʻa e Taniela 3; Sione 14:15; ʻEfesō 6:1. Vakai foki ki he Ngaahi Tefitoʻi Moʻoni ʻo e Ongoongoleleí (31110) vahe 35.

2. Ko e ngaahi nāunau ʻoku fiemaʻú:

   1. Ko e ʻū Tohi Tapu ʻa e Siasí.

   2. Fakatātā 1–5, Ko ha Fāmili mo ha Pēpē (62307); fakatātā 1–8, Ko e Tufa ʻo e Sākalamēnití (62021); fakatātā 1–9, Ko e Lotu Pongipongí (62310); fakatātā 1–46, Ko e Fānaú ʻoku Nau ʻOatu ʻa e Ngaahi Matalaʻi ʻAkau ki Heʻenau Faʻeé; fakatātā 1—55, Ko e Malanga ʻi he Moʻungá (Ko e Ngaahi Fakatātā ʻo e Ongoongoleleí 212;62166); fakatātā 1–56, Ko e Kau Tangata ʻe Tolu ʻi he Fōnise Afí (Ko e Ngaahi Fakatātā ʻo e Ongoongoleleí 116; 62093).

3. Fai mo ha ngaahi teuteu ki ha ngaahi ʻEkitivitī Fakatupulaki te ke fie fakaʻaongaʻí.

Ngaahi ʻEkitivitī Ke Ako Mei Aí

Fakaafeʻi ha taha ʻo e fānaú ke ne fai ʻa e fua lotú

ʻEkitivitī ke taki ʻaki e tokangá

Kole ange ʻi he anga fakaʻapaʻapa ki he fānaú ke nau fai ʻa e ngaahi ngāue ko ʻení, hangē ko e tuʻu ki ʻolungá, tafoki takai, kakapa ki ʻolunga, ala ki honau louhiʻi vaʻé, pea tangutu ki lalo. Fakamālō kiate kinautolu ʻi heʻenau fai ʻa ia naʻá ke kole angé. Fakamatalaʻi ange naʻa nau talangofua ʻaupito. Naʻa nau talangofua ki hoʻo fakahinohinó.

ʻOku fiemaʻu ʻe he Tamai Hēvaní mo Sīsū Kalaisi kitautolu ke tau talangofua ki heʻetau ngaahi mātuʻá

Fakaʻaliʻali ʻa e fakatātā 1–5, Ko ha Fāmili mo ha Pēpē.

• Ko e hā ʻa e meʻa ʻoku fakahaaʻi ʻe he fakatātā ko ʻení?

Tuhu ki he kiʻi pēpē ʻi he fakatātaá peá ke talanoa fekauʻaki mo e anga ʻo ʻetau haʻu taki taha ki he māmaní ko ha ngaahi pēpē. Fakamanatu ki he fānaú, koeʻuhí ko e pēpeé ʻoku nau fuʻu iiki mo ʻikai lava ke nau tokoniʻi ʻa kinautolu pē, ʻoku nau fiemaʻu ha taha ʻoku matuʻotuʻa angé ke ne tokangaʻi kinautolu.

• Ko hai naʻá ne tokangaʻi koe ʻi he taimi naʻá ke kei pēpē aí?

• Ko hai ʻokú ne tokangaʻi koe ʻi he taimi ní?

Fakamatalaʻi ki he fānaú ko e kakai ko ia ʻokú ne tokangaʻi kinautolú, ʻo hangē ko ʻenau ngaahi mātuʻá mo e kau mēmipa kehe honau fāmilí, ʻoku nau ʻofa ʻiate kinautolu pea ʻoku nau fiemaʻu kinautolu ke nau malu mo fiefia.

• Ko e hā ʻa e meʻa ʻoku akoʻi kimoutolu ʻe hoʻomou mātuʻá ke ʻoua te mou faí?

Lave ʻo fekauʻaki mo e ngaahi meʻa ʻa ia ʻe lava ʻo fai ʻe he fānaú, ʻe fakatupu-lavea ia kiate kinautolu pe te ne hanga ʻo ʻai ke nau mamahi, ʻo hangē ko e vaʻinga ʻi he loto halá, ala ki ha sitou ʻoku vela, toʻo hake ʻo ha hele ʻoku māsila, lele hifo ʻi ha tahifo ʻoku fuʻu lahi, pe ko haʻanau fuhu mo honau ngaahi tokouá, tuofāfiné pe ngaahi tuongaʻané.

• Ko e hā e meʻa ʻoku ʻikai fiemaʻu ai kimoutolu ʻe hoʻomou ngaahi mātuʻá ke mou fai ʻa e ngaahi meʻa ko ʻení?

• Ko e hā ʻa e meʻa ʻoku totonu ai ke mou talangofua ki hoʻomou ngaahi mātuʻá?

Talanoa fekauʻaki mo e meʻa ʻa ia ʻoku lava ʻo fai lelei ʻe he fānaú ʻo nau fiefia aí, hangē ko e vaʻinga mo ʻenau ngaahi meʻa vaʻingá, ʻeva ki ha ngaahi feituʻu mo ʻenau ngaahi mātuʻá pea mo anga ʻofa ki homou ngaahi tokouá, tuofāfiné mo e ngaahi tuongaʻané.

• Ko e hā ʻa e meʻa ʻoku tukuange ai kimoutolu ʻe hoʻomou mātuʻá ke mou fai ʻení?

Fakamatalaʻi ange ʻoku ʻofa ʻa ʻetau ngaahi mātuʻá ʻiate kitautolu pea ʻoku nau fiemaʻu ke tau fai ʻa e ngaahi meʻa ʻa ia te tau malu mo fiefia aí.

ʻEkitivitií

ʻAi ʻa e fānaú ke nau tuʻu ki ʻolunga mo fakatātāʻí ʻa e ngaahi vēsí ni:

ʻOku fie lele ʻa hoku ongo vaʻé (lele tuʻu maʻu),

ʻOku fie vaʻinga hoku ongo nimá (ngaungaue ho ongo nimá),

Ka ʻi he taimi ʻoku pehē ai ʻe he faʻeé (tamai), “haʻu” (kamo ʻaki ho nimá),

ʻOku ou talangofua vave.

ʻEkitivitií

• Ko e hā ʻa e faʻahinga ongo ʻokú ke maʻu ʻi he taimi ʻokú ke talangofua ai ki hoʻo mātuʻá ʻo ke haʻu ʻi heʻenau ui koé?

• Ko e hā ʻa e faʻahinga ongo ʻokú ke maʻu ʻi he taimi ʻokú ke fai ai ha ngaahi meʻa kehe ʻa ia ʻoku kole atu ʻe hoʻo mātuʻá?

Fakamatalaʻi ange ko e taimi ko ia ʻoku tau talangofua ai ki he mātuʻá, ʻe lava ke tau fiefia. ʻOku fiefia foki mo ʻetau mātuʻá ʻi heʻetau talangofuá.

Tala ange ki he fānaú ʻoku fiemaʻu ʻe he Tamai Hēvaní mo Sīsū kitautolu ke tau talangofua ki heʻetau ngaahi mātuʻá. Lau pea fakamatalaʻi ki he fānaú ʻa e ʻEfesō 6:1.

Hivá

Hivaʻi pe lau ʻa e ngaahi lea ki he ngaahi veesi ʻe tolu ʻo e “Talangofuá” (Children’s Songbook, p.197).

Ka ui au ʻe he faʻeé

Talangofua pē

Te ne ʻilo ʻa e lelei

He ʻaho kotoa pē

Ka ui au ʻe he tamaí.

Vave pē ki ai

Te ne ʻilo ʻa e leleí

He ʻaho kotoa pē.

Tamai Hēvaní e.

Tāpuakiʻi au

Pea te u unga ai pē

Mo e anga taau.

ʻOku fiemaʻu ʻe he Tamai Hēvaní mo Sīsū kitautolu ke tau talangofua ki he ngaahi fekaú

Fakaʻaliʻali ʻa e fakatātā 1–55, Ko e Malanga ʻi he Moʻungá.

• Ko hai ʻoku hā ʻi he fakatātā ko ʻení?

Fakamatalaʻi ange ʻi he taimi naʻe ʻi he māmaní ai ʻa Sīsuú, naʻá Ne akoʻi ʻa e kakaí ʻi he ngaahi meʻa naʻe fiemaʻu ʻe he Tamai Hēvaní ke nau faí. ʻOku ui ʻa e ngaahi akonaki ko ʻení ko e ngaahi fono pe ko e ngaahi fekau. Hiki hake ʻa e ngaahi folofolá. Tala ange ki he fānaú ko e ngaahi fekaú pe ko e ngaahi fonó ʻoku tohi ia ʻi he ngaahi folofolá.

ʻEkitivitií

Fakaava hoʻo Tohi Tapú pea lau ʻa e Sione 14:15. Fakamatalaʻi ange naʻe folofola ʻaki ʻe Sīsū ʻa e ngaahi leá ni. Fakamatalaʻi ko e ʻuhinga ʻo e tauhí ko e talangofua. ʻAi ʻa e fānaú ke nau toe lau ʻa e potu folofolá ni pea mo koe.

ʻEkitivitií

• Ko e hā ha ngaahi fekau ʻa e Tamai Hēvaní mo Sīsū Kalaisi ʻokú na fiemaʻu ke tau talangofua ki ai?

I haʻo fakaʻaongaʻi ʻa e ngaahi fakatātā ko ʻení, lave ʻo kau ki ha ngaahi fekau ʻa ia ʻe lava ʻe he fānaú ʻo talangofua ki ai:

ʻEkitivitií

• Fakatātā 1–5, Ko ha Fāmili mo ha Pēpē —ʻOfa ʻa e Ngaahi Fāmilí.

• Fakatātā 1–8, Tufa ʻo e Sākalamēnití — Maʻu ʻo e ngaahi fakatahaʻanga lotú.

• Fakatātā 1–9, Ko e Lotu Pongipongí — Lotu ki he Tamai Hēvaní.

• Fakatātā 1–46, Ko ha Fānau ʻOku Nau ʻOange ʻa e Ngaahi Matalaʻi ʻAkaú Ki heʻenau Faʻeé — Ke ke ʻofa ki he niʻihi kehé.

ʻEkitivitií

• Ko e hā ʻoku fai ʻe he Tamai Hēvaní ʻi he taimi ʻoku tau talangofua ai ki Heʻene ngaahi fekaú?

ʻOku tāpuakiʻi kitautolu ʻe he Tamai Hēvaní ʻi heʻetau talangofuá

Talanoá

Fakamatalaʻi mahino ange ʻa e talanoa ʻo Sitaleki, Mēsake, mo ʻApitenikoó, ʻo hangē ko ia ʻoku hā ʻi he Taniela vahe 3. Fakaʻaliʻaliʻa e fakatātā 1–56, Ko e Kau Tangata ʻe Tolu ʻi he Fōnise Afí, fai ia ʻi hono taimi totonú. Fakamatalaʻi ange ko e taha ʻo e ngaahi finangalo ʻo e Tamai Hēvaní ke tau lotu ʻataʻatā pē kiate Ia. ʻOku ʻikai ke tau lotu ki he kakai kehé pe ki he ngaahi ʻīmisi, ʻa ia ʻoku nau hangē ha ngaahi tamapuá. Fakamatalaʻi ange ko Sitaleki, Mēsake, mo ʻApitenikoó naʻa nau ʻiloʻi ʻa e ngaahi fekau pe ko e finangalo ʻo e Tamai Hēvaní mo loto pe fiemaʻu ke talangofua ki ai. Naʻe maluʻi ʻe he Tamai Hēvaní ʻa e kau tangatá ni mei he afí koeʻuhí naʻa nau talangofua kiate Ia. Naʻe ʻikai te nau vela ʻi he afí.

Talanoá

• Ko e hā ʻa e meʻa naʻe ʻikai ke vela ai ʻa Sitaleki, Mēsake, mo ʻApitenikō ʻi he afí?

• Ko e hā nai hoʻomou fakakaukau ki he faʻahinga ongo naʻe maʻu ʻe Sitaleki, Mēsake, mo ʻApitenikō ʻi he taimi naʻe maluʻi ai kinautolu ʻe he Tamai Hēvaní mei he afí?

Fakamoʻoní

Fakahaaʻi ʻa e ngaahi ongo ʻokú ke maʻu fekauʻaki mo e mahuʻinga ʻo e talangofua ki he ngaahi mātuʻá mo e Tamai Hēvaní pea mo Sīsuú. Fakahā ange ki he fānaú ʻa e founga ʻoku tokoniʻi ai koe ʻe hoʻo talangofua ki he ngaahi fonó pe ngaahi fekaú ke ke fiefia aí.

Ekitivitií Fakatupulakí

Fili ha niʻihi ʻo e ngaahi ʻekitivitií ni ke fakaʻaongaʻi he lolotonga ʻa e lēsoní.

1. Hivaʻi pe lau ʻa e ngaahi lea ʻi he veesi 1 ʻo e “Tauhi ʻa e Ngaahi Fekaú” (Children’s Songbook, p.146) pe ko e veesi hono ua ʻo e “Ko Hoku Kiʻi Nima ʻe Ua” (Children’s Songbook, p.272).

2. Tuku ki he fānau taki taha ha faingamālie ke nau fai ai ha ngaahi tuʻutuʻuni ki he kalasí, hangē ko e “tuʻu ki ʻolunga” mo e “hili ho ongo nimá ʻi ho ʻulú.” ʻAi ʻa e fānau kehé ke nau talangofua ki he ngaahi tuʻutuʻuni ʻoku fai angé.

3. ʻI haʻo fakaʻaongaʻi ʻa e ʻakau taumātaʻu mei he lēsoni 11 pea mo haʻo teuteu ha fanga kiʻi ika pepa ʻa ia kuo tohi ai ha fanga kiʻi fakahinohino mahino ngofua, ʻo hangē ko e “kūnimá,” toe pehē “Naʻe folofola ʻa Sīsū, kapau ʻokú ke ʻofa ʻiate Au, fai ʻeku ngaahi fekaú,” “luelue fakalongolongo takai ʻi he lokí” “malimali ki he fānau kehé,” mo e “tokoni ki he kalasí ke nau hivaʻi ʻa e Ko e Fānau Au ʻa e ʻOtuá.” Tuku ange ki he fānaú taki taha ha faingamālie ke nau taumātaʻu ai ha kiʻi ika pepa pea ke nau talangofua pe fai pau ki he fakahinohino kuo ʻosi hiki ʻi he kiʻi iká.

4. Toe fakamanatu ange ʻa e talanoa ʻo Noá, pea fakamamafaʻi ko Noa mo hono fāmilí naʻe fakahaofi mei he lōmakí koeʻuhí he naʻa nau talangofua ki he ngaahi fekaú.

5. Tufa ki he fānaú taki taha ha laʻi pepa ʻa ia kuó ke ʻosi tā ai ha mata ʻoku fiefia mo tohi ai ʻa e ngaahi leá ni ʻOku ou fiefia ʻi he taimi ʻoku ou talangofua aí. Tuku ke valivali ʻe he fānaú ʻa e ngaahi mata ʻoku hā ʻi he laʻi pepá.

Ngaahi Ekitivitií Kehe Maʻá e Fānau Iiki Angē

1. Tokoniʻi ʻa e fānaú ke nau fai hano fakatātāʻí ʻo e kiʻi vaʻingá ni ʻaki honau louhiʻi nimá:

   Louhiʻi nima moʻumoʻuá (fakaʻaliʻali ho ongo nimá kuo ʻosi kuku)

   Ko hai ʻe tokoni ke talangofuá?

   “Ko au.” “Ko au.” “Ko au te u tokoní.” (ʻai hake foʻi tuhu ʻe taha he taimi kotoa pē ʻokú ke pehē ai “Ko au” kae ʻoua kuo fokotuʻu kotoa ki ʻolunga e louhiʻi nimá.)

   Ko e tali ia ʻa e ngaahi louhiʻi nima moʻumoʻuá.

2. ʻOmai mo ha ngaahi meʻa ʻa ia ʻokú ne fai ha maluʻi, hangē ko e ngaahi sū, ngaahi tatā, mo e ngaahi kofu nima. Fehuʻi ange ki he fānaú pe ko e hā ha faʻahinga maluʻi ʻoku fai ʻe he ngaahi meʻá ni taki taha (Ko e kiʻi fakatātā, ʻoku maluʻi ʻe he ngaahi suú hotau vaʻé; ʻoku maluʻi ʻe he ngaahi tataá hotau ngaahi ʻulú mei he momokó pe ko hotau matá mei he laʻaá). Tala ange ki he fānaú ko e taimi ko ia ʻoku tau talangofua ai ki heʻetau mātuʻá, ʻoku maluʻi ai foki kitautolu. Fetalanoaʻaki fekauʻaki mo ha ngaahi lao pea mo e ngaahi meʻa ʻoku hanga ai ʻe he ngaahi lao ko iá ʻo maluʻi kitautolu.

3. Hiki hake ho ongo nimá pea ke fakaʻaliʻali ange ki he fānaú ʻa e founga ʻokú ke lava ai ʻo ueueʻi ho ngaahi louhiʻi nimá. ʻAi ke hiki hake ʻe he fānaú honau ngaahi nimá, ueʻi honau louhiʻi nimá, kuku pea mo tukuange honau louhiʻi nimá. Fakamatalaʻi ange te tau lava ʻo ueʻi hotau ngaahi nimá mo hotau louhiʻi nimá, ka ʻoku ʻikai ko e nima mo e louhiʻi nima ʻo e niʻihi kehé. Fakamatalaʻi ange te tau lava pē ʻo tala ki hotau ngaahi nimá ke nau talangofua ʻi he taimi ʻoku kole mai ai ha taha kehe ke tau fai ha meʻa. ʻI heʻetau fai ʻení ʻokú ne ngaohi kitautolu ke tau ongoʻi fiefia ʻi hotau lotó.

4. Tokoniʻi ʻa e fānaú ke nau fai hono fakatātaaʻi ʻo e veesi ʻekitivitī ko ʻení lolotonga hoʻo lau atu hono ngaahi leá:

   ʻOku ou saiʻia ʻi hoku ongo nimá;

   Ko hoku ongo kaumeʻa kinaua (Hiki hake ho ongo nimá ʻi muʻa ʻiate koe ʻo ke mamata ki ai).

   ʻOkú na femoʻuekina mo faʻa tokoni kae ʻoua kuo ʻosi ʻa e ʻahó (fakatātaaʻi fakalongolongo ha ngāue ʻoku fai ʻaki ho ongo nimá).

   ʻE lava pē ke na kūnima fakalongolongo (kūnima)

   Pe pasi leʻo lahi (pasi)!

   Pea ʻi heʻena fai ʻa ia ʻoku totonú,

   ʻOkú na ʻai au ke u fiefia!