Lēsoni 9

ʻOku ou Fakafetaʻi koeʻuhí ko e Vaí

Taumuʻá

Ke tokoniʻi ʻa e fānaú taki taha ke nau ongoʻi houngaʻia ki he Tamai Hēvaní mo Sīsū Kalaisi koeʻuhí ko e vaí.

Teuteú

1. Ako ʻi he faʻa lotu ʻa e Sēnesi 1:9–10; ʻEkesōtosi 17:1–6 Mātiu 3:13–17.

2. Ngaahi nāunau ʻoku fiemaʻú:

   1. Tohi Tapú

   2. Kapau ʻe lava pea tānaki ha ngaahi fakatātā ʻo ha ngaahi vai ʻo hangē ko e ngaahi anovaí, ngaahi vaitafé, pea mo e ngaahi potu tahí.

   3. Fakatātā 1–8, Ko e Tufa ʻo e Sākalamēnití (62021); fakatātā 1–11, Ko e Kiʻi Tamasiʻi ʻoku Papitaiso (62018); fakatātā 1–18, Ko Sione Papitaiso ʻi heʻene papitaiso ʻa Sīsuú (Ko e Ngaahi Fakatātā ʻo e Ongoongoleleí 208;62133).

3. Fai mo ha ngaahi teuteu ʻe fie maʻu ki ha ʻekitivitī fakatupulaki te ke fie fakaʻaongaʻi.

Ngaahi ʻekitivitʻí ke Ako Mei aʻí

Fakaafeʻi ha taha ʻo e fānaú ke ne fai ʻa e fua lotú

ʻEkitivitī ke taki ʻaki e tokangá

Kole ange ki ha taha ʻo e fānaú ke haʻu ki muʻa ʻi he kalasí. Fanafana ange ki hono telingá ha faʻahinga ngāue ʻoku fakaʻaongaʻi ki ai ʻa e vaí, ʻo hangē ko e fufulu nifó, fanofano ʻo e nimá, pe fuʻifuʻi ʻo e ʻakaú. ʻAi e kiʻi tamasiʻí pe taʻahiné ke ne fakatātaaʻi ʻa e meʻa naʻá ke tala angé kae mateʻi ʻe he fānaú ʻa e ngāue ko iá. (Mahalo naʻa fiemaʻu ke ke fakahinohinoʻi ʻa e kiʻi tamasiʻí pe taʻahiné ʻi he founga fakatātaaʻi ʻo e faʻahinga ngāue ko iá.) Tuku ke maʻu ʻe he kiʻi tamasiʻi pe taʻahine taki taha ha faingamālie ke ne fakatātaaʻi ha kiʻi ngāue ʻoku fakaʻaongaʻi ki ai e vaí.

Fakamahinoʻi ange ko e kiʻi ngāue pe ʻekitivitī kotoa pē ʻoku fakatātaaʻi ʻoku fiemaʻu ki ai ʻa e vaí. Tala ange ki he fānaú ʻoku totonu ke tau fakafetaʻi ki he Tamai Hēvaní mo Sīsū koeʻuhí ko e vaí.

Ko e vaí ko ha konga mahuʻinga ia hono fakatupu ʻo e māmaní

Lau leʻo lahi mo fakamatalaʻi ʻa e Sēnesi 1:9–10.

• Ko e hā ʻoku fuʻu mahuʻinga ai ʻa e vaí kiate kitautolú?

• ʻOku anga fēfē ʻa ʻetau maʻu ʻetau vaí?

Tokoniʻi ʻa e fānaú ke nau ʻiloʻi ʻoku maʻu ʻa e vaí mei he ngaahi maʻuʻanga kehekehe, kau ai ʻa e ngaahi anovaí, ngaahi vaitafé, ngaahi potu tahí, ʻuhá, pea mo e sinoú. Fakamatalaʻi ange ko e sinoú mo e ʻaisí, ko e vai ia ʻoku fuʻu momoko pea fefeka. Fakaʻaliʻali ange ha ngaahi fakatātā ʻo e vaí ʻa ia naʻa ke ʻosi tānaki mo teuteu, pea mou fetalanoaʻaki pe ʻoku maʻu mei fē ʻa e vai ʻi homou feituʻú. Talaange ki he fānaú ʻoku ke fakafetaʻi koeʻuhí ko e vaí ko ha konga ia ʻo e palani ʻa e Tamai Hēvaní.

Hivá

Hivaʻi ʻa e “Fakakata ke faí” (Children’s Songbook). ʻI he ngaahi vēsí ni ʻai ʻa e fānaú ke nau talamai ʻa e ngaahi meʻa ʻoku nau fakaʻaongaʻi ki ai ʻa e vaí, ʻo hangē ko e fō ʻo e valá, kaukaú, pe fufulu honau nifó. Faʻu ha fanga kiʻi founga fakatātā ki he hivá ʻo fakatatau ki hono ngaahi leá.

ʻOku ifo ʻa e foó

Ifo ʻa e foó, ʻa e foó

ʻOku ifo ʻa e foó

ʻA e foó, ʻa e foó, ʻa e foó

(© 1963 by D.C. Heath and Company. Reprinted by permission.)

ʻOku tau fiemaʻu ʻa e vaí ki he ngaahi meʻa lahi

• Ko e hā ʻoku tau fiemaʻu ai ʻa e vaí? ʻOku tau fakaʻaongaʻi ia ki he hā?

Fakamatalaʻi ange ko e meʻa moʻui kotoa pē, kau ai ʻa e kakaí, fanga monumanú, ʻakaú, ʻoku nau fiemaʻu ʻa e vaí ke nau moʻui. Kapau ʻe lava, pea ʻoange ki he kiʻi tokotaha kotoa pē ʻi he fānaú ha kiʻi ipu vai ke ne inu. Fakamatala ʻo kau ki hotau sinó, ʻe ʻikai lava ke moʻui ai pē ʻo kapau ʻe ʻikai ke ʻi ai ha vai ke inu.

• ʻOku anga fēfē hono maʻu ʻe he ʻakaú mo e fanga monumanú ʻa e vai ʻoku nau fiemaʻú?

Fakamatalaʻi ange ʻoku tau fiemaʻu foki mo e vaí ki ha ngaahi meʻa kehé, hangē ko e foó mo e feimeʻatokoní.

Naʻe foaki ʻe Sīsū ha vai maʻa Mōsese mo e fānau ʻa ʻIsilelí ʻi he toafá.

Talanoá

Fai ʻa e talanoa ʻo Mōsesé ʻi heʻene maʻu ʻa e vaí mei he maká, ʻo hangē ko ia ʻi he ʻEkesōtosi 17:1–6. Fakamatalaʻi ange ko e kakaí naʻa nau ʻi ha toafa vela mo mōmoa foki. Naʻe ʻikai ke ʻi ai ha vai ia ai.

Talanoá

• Ko e hā ne mei hoko ʻo kapau naʻe ʻikai ke maʻu ʻe he fānau ʻIsilelí ha vai?

• Kuo ke fuʻu fieinua lahi ʻi ha taimi? Ko e hā haʻo faʻahinga ongo ʻokú ke maʻu ʻi hoʻo inuʻi hifo ha inu vai mokomoko ʻi hoʻo fieinuá?

ʻOku mahuʻinga ʻa e vaí ʻi he Siasí

Talanoá

Fakaʻaliʻali ʻa e fakatātā 1–18, Ko Sione Papitaiso ʻi heʻene papitaiso ʻa Sīsuú. Fai ʻa e talanoa ʻo e papitaiso ʻo Sīsuú ʻo hangē ko ia ʻi he Mātiu 3:13–17.

Talanoá

• Naʻe papitaiso ʻa Sīsū ʻi fē?

• Naʻe anga fēfē hono papitaiso ʻo Sīsuú?

Fakaʻaliʻali ʻa e fakatātā 1–11, Ko e kiʻi Tamasiʻi ʻoku Papitaiso.

Talanoá

• ʻOku papitaiso kitautolu ʻi fē ʻi heʻetau taʻu valú?

• Kuó ke mamata nai ʻi hano papitaiso ʻo ha taha?

Tuku ha faingamālie ki he fānaú ke nau fetalanoaʻaki ʻo fekauʻaki mo ha taha ne nau mamata ʻi hono papitaisó. Fakamatalaʻi ange kuo pau ke ʻi ai ha vai ka e lava ke tau papitaiso.

Fakaʻaliʻali ʻa e fakatātā 1–8, Ko e Tufa ʻo e Sākalamēnití.

Talanoá

• ʻOku tau fakaʻaongaʻi fēfē ʻa e vaí ʻi he houa sākalamēnití?

Fakahā ʻa hoʻo houngaʻia ʻi he vaí, koeʻuhí ke tau lava ʻo papitaiso mo maʻu ʻa e sākalamēnití.

Fakamoʻoní

Fakahā ʻa hoʻo fakamoʻoni ki he palani ʻa e Tamai Hēvaní pea mo ʻene ʻofa ʻo foaki mai ʻa e vaí. Tala ange ki he fānaú ʻokú ke fakafetaʻi ki he Tamai Hēvaní pea mo Sīsū ʻi he meʻa ʻofa maʻongoʻonga ko ʻení.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitī ko ʻení ke fakaʻaongaʻi ʻi he lolotonga ʻa e lēsoní.

1. Lau fakataha ʻa e veesi ko ʻení mo e fānaú, mo fakahoko ʻa hono fakatātāʻí ʻo hangē ko e fakahinohinó:

   Ko e ʻUhá

   ʻI he fieinua ʻa e matalaʻiʻakaú

   Pea mōmoa mo e louʻakaú (Folahi ho ongo nimá, peá ke hiki hake ki ʻolunga.)

   Fanga kiʻi ʻuha fiefia

   ʻOku tō hifo mei he langí (Fakahanga hifo ho motuʻa-tuhu ki lalo peá ke hanga ʻo ueueʻi.)

   Tō hifo mei ai (Hanga ʻo ueueʻi ho ngaahi foʻi tuhú mei he tafaʻaki ʻe tahá ki he tafaʻaki ʻe tahá.)

   ʻI heʻenau vaʻinga ʻoku faí

   Ulo mai ha laʻā māfana (ʻAi ho ongo nimá ki ho funga ʻulú.)

   ʻO tuli pea nau puli ai. (Fufuuʻi ho ngaahi foʻi tuhú ki ho tuʻá.)

2. Tokoniʻi ʻa e fānaú ke nau hivaʻi pe lau ʻa e ngaahi lea ʻo e “Ko e ʻUha Kuo Tō Takai” (Children’s Songbook) pe “Ke Foaki, Tala ʻe he Kiʻi Vai” (Children’s Songbook).

3. ʻAi ke tā ʻe he kiʻi tamasiʻi pe taʻahine taki taha ha fakatātā ʻo ha vai, ʻo hangē ko ha anovai, vaitafe, pe ʻuha ʻoku tō. Tohiʻi ʻi he laʻi pepa ʻa e fānaú taki taha ʻa e ʻOku ou fakafetaʻi koeʻuhí ko e Vaí.

4. ʻAi ke tala pe fakatātaaʻi fakalongolongo ʻe he fānaú ʻa e ngaahi founga te nau lava ʻo vaʻinga ai ʻi he loto vaí, ʻo hangē ko e kakaú, fakapaheke ʻi he loto ʻaisí, langa ha tangata ʻaki e sinoú, pe fakapatū ʻi ha ngaahi taanoano.

5. Tokoniʻi e fānaú ke nau ʻiloʻi ʻoku tokoni ʻa e vaí kiate kitautolu ke fakamaʻa ai ha ngaahi meʻa. ʻAi ke nau fakatātaaʻi fakalongolongo ha ngaahi ngāue ʻoku fakaʻaongaʻi ai e vaí ki he fakamaʻá pe fufulú, ʻo hangē ko e foó, fufulu pe fanofano ʻo e nimá.

Ngaahi ʻEkitivitī kehe Maʻá e Fānau iiki angé

1. Fai ha niʻihi pe hono kotoa ʻo e ngaahi ʻekitivitī ko ʻení ke tokoni ki he fānaú ke nau ʻiloʻi ʻa e ngaahi founga kehekehe ʻoku tau fakaʻaongaʻi ki ai ʻa e vaí.

   1. ʻOange ha kiʻi inu siʻisiʻi pē ki he fānaú taki taha. ʻI he taimi ʻoku inu ai ʻa e fānaú, fakamatala ange ko e vaí ko e konga pē ia ʻo e palani ʻa e Tamai Hēvaní ki he māmaní. Te tau lava ʻo inu ʻa e vaí ʻi he taimi ʻoku tau fieinua aí.

   2. ʻAi ha kiʻi meʻi vai ki ha foʻi poulu pea tokoniʻi ʻa e fānaú taki taha ke nau fufulu ai honau nimá. Fakamanatu ki he fānaú naʻe palani ʻa e Tamai Hēvaní mo Sīsū ke tau maʻu ha vai. Fakamatalaʻi ange te tau lava ʻo fakaʻaongaʻi ʻa e vaí ke fufulu pe fakamaʻa ʻaki ha ngaahi meʻa.

   3. Kapau ʻe lava, ʻave ʻa e fānaú ki tuʻa pea tuku ki he fānaú ke nau fuʻifuʻi ha fuʻu ʻakau. Pe ko hano ʻomai ha fuʻu ʻakau ki he kalasí pea tuku ki he fānaú taki taha ke nau ʻai ha meʻi vai ke fuʻifuʻi ʻaki e fuʻu ʻakaú. Fakamatalaʻi ange ʻoku fiemaʻu foki ʻe he ʻakaú ʻa e vaí ke tupu mo moʻui.

2. Fai ʻa e ngaahi fakatātā ko ʻení ʻi hono fakatātaaʻi ʻe he fānaú ʻo hangē ʻoku ʻuha– kamata maʻamaʻa, pea toki fakalalahi ke lahi.

   1. Tātaaʻi maʻamaʻa ho ngaahi ʻuluʻulu tuhú.

   2. Pasiʻi fakataha ʻa e ongo nimá

   3. Tātaaʻi ʻa e ongo tuí, ʻo fetongitongi ʻa e ongo nimá ki he ongo tuí

   4. Fakapatū ʻa e ongo vaʻé.