ʻE Lava Ke Tau Lotu Ko Ha Fāmili

Taumuʻá

Ke tokoniʻi ʻa e fānaú taki taha ke mahino ko e lotu fakafāmili ʻoku fai maʻu peé ʻe tokoni ia ke pukepuke ʻa e fāmilí ke ofi ki he Tamai Hēvaní pea mo nau vāofi.

Teuteú

Ako ʻi he faʻa lotu ʻa e ʻAlamā 34:19–27 mo e 3 Nīfai 18: Vakai foki ki he Ko e Ngaahi Tefitoʻi Moʻoni ʻo e Ongoongoleleí (31110 900), vahe 8.
Ngaahi nāunau ʻoku fiemaʻú:
1. Tohi ʻa Molomona
2. Konga fakatātā 1–26, Ko ha Tamai; konga fakatātā 1–27, Ko ha Faʻē; konga fakatātā 1–28, Ko e Kiʻi Taʻahine; konga fakatātā 1–29, Ko ha Kiʻi Tamasiʻi Taʻu Ngāue Fakafaifekau; mo e ngaahi kongokonga fakatātā pehē ʻe ala maʻu mei he ngaahi nāunau tokoni fakafaiako ʻa e palaimelí. Fakatātā 1–10, Ko e Lotu Fakafāmilí (62275); fakatātā 1–15, Ko e Tāpuakiʻi ʻo e Meʻatokoní; fakatātā 1–44, Ko e Faiako ʻa Sīsū ʻI he Hemisifia Hihifó (Ko e Ngaahi Fakatātā ʻo e Ongoongoleleí 426; 62380).
Fai mo ha ngaahi teuteu ki ha ngaahi ʻEkitivitī Fakatupulaki te ke fie fakaʻaongaʻí.

Ngaahi ʻEkitivitī ke ako mei aí

Fakaafeʻi ha taha ʻo e fānaú ke ne fai ʻa e fua lotú

ʻEkitivitī ke taki ʻaki e tokangá

Kole ange ki he fānaú ke nau fakamatala fekauʻaki mo ha ngaahi meʻa ʻoku nau fai pea mo honau ngaahi fāmilí. Tuku ange ha faingamālie ki he fānaú taki taha ke ne tali ai. Peá ke toki fakaʻaliʻali ange ʻa e fakatātā 1–10, Ko e Lotu Fakafāmilí.

ʻEkitivitī ke taki ʻaki e tokangá

Ko e hā ʻa e meʻa ʻoku fai ʻe he kiʻi fāmili ko ʻení?

Fakamatalaʻi ko e taimi ko ia ʻoku tau lotu fakataha ai ko ha fāmilí, ʻoku tau fakahoko ai ha meʻa ʻoku fiemaʻu ʻe he Tamai Hēvaní mo Sīsū ke tau fai. Ko e lotu ko ia ʻoku tau fai fakataha fakafāmilí ʻoku ui ia ko e lotu fakafāmili.

ʻOku fiemaʻu ʻe he Tamai Hēvaní pea mo Sīsū kitautolu ke tau lotu fakataha mo hotau ngaahi fāmilí

Talanoá

Fakaʻaliʻali ʻa e fakatātā 1–44, Ko e Faiako ʻa Sīsū ʻi he Hemisifia Fakahihifó. Fakamatala ʻo fekauʻaki mo Sīsū ʻi heʻene ʻaʻahi ki he kau Nīfaí peá Ne folofola ange kiate kinautolu ke nau lotu, ʻo hangē ʻoku fakamatalaʻi ʻe he 3 Nīfai 18:17–21. Fakaʻaliʻali ange ki he fānaú ʻa e Tohi ʻa Molomoná pea lau leʻo-lahi mo e 3 Nīfai 18:21. Tokoniʻi ʻa e fānaú ke mahino ʻoku fiemaʻu ʻe Sīsū kitautolu ke tau lotu fakataha mo hotau ngaahi fāmilí. ʻO hangē ko ia ko e tāpuekina ko ia ʻo e fānaú ʻa e kau Nīfaí ʻi he lotu fakafāmilí, ʻe lava ke tāpuakiʻi foki mo kitautolu ʻi heʻetau ngaahi lotu fakafāmilí.

ʻE lava ke tau fakahoko ha lotu fakafāmili ʻi he ʻaho kotoa pē

Fakamatalaʻi ange ʻoku fiemaʻu ʻe he Tamai Hēvaní mo Sīsū kitautolu ke tau lotu fakataha mo hotau ngaahi fāmilí ʻi he pongipongi pea mo e efiafi kotoa pē. ʻI he anga mahení ko e tamaí pe ko e tokotaha ʻokú ne tokangaʻi ʻa e fāmilí ʻokú ne kole ha taha ke ne fai ʻa e lotú. ʻE lava ʻe ha toko taha pē ʻi he fāmilí ke ne fai ʻa e lotu fakafāmilí.

Ko e taimi fē ʻoku totonu ai ke tau lotu fakataha ai mo hotau ngaahi fāmilí?
Ko hai te ne lava ʻo fai ha lotu fakafāmilí?

Hivá

Hivaʻi pe lau ʻa e ngaahi lea ʻo e hiva “Lotu fakafāmilí” (Children’s Songbook, p.189).

Tau fakataha ʻEiki,
ʻO fakafāmilí,
Ki he Tamai Hēvaní
He ngaahi tāpuakí.

Hivá

Ko e hā ʻa e meʻa ʻoku tau leaʻaki ʻi he ngaahi lotu fakafāmilí?

Fakamatalaʻi ange ʻoku tau leaʻaki ʻa e ngaahi meʻa tatau pē ʻi heʻetau ngaahi lotu fakafāmilí ʻo hangē ko ia ʻoku tau leaʻaki ʻi heʻetau ngaahi lotu ʻi he pongipongí mo e efiafí. Ka ʻi he lotu fakafāmilí ʻoku tau lave ai fekauʻaki mo e ngaahi meʻa ʻoku kau tonu ki he fāmilí fakakātoa, ʻo ʻikai kiate kitautolu fakafoʻituituí pē.

Fakamanatu ʻa e ngaahi meʻa ʻoku tau leaʻaki ʻi he taimi ʻoku tau lotu aí ʻaki haʻo lau ʻa e ngaahi kupuʻi lea ki he foʻi hiva ko e “ʻOku ou lotu ʻi he tui” (Children’s Songbook, p.14).

Te u kamata leva “ʻAlā Tamai,”
Fakamālō he ngaahi tāpuakí;
Ne u kolea atu ʻi he fiemaʻú,
Tuʻunga he huafa ʻo Sīsuú.

Ko e hā ha meʻa ʻoku tau leaʻaki ʻi ha kamataʻanga ʻo ha lotu?
Ko e hā ha meʻa ʻoku tau leaʻaki ʻi ha fakaʻosinga ʻo ha lotu?
Ko e hā ʻa e meʻa ʻoku totonu ke fai ʻe he tokotaha kotoa pē ʻi he taimi ʻoku fai ai ʻa e lotú?

Fakamatalaʻi ange ko ʻetau pehē ko ia “ʻĒmení” ʻi he fakaʻosinga ʻo e lotú ʻoku ʻuhinga ia ʻoku tau loto ki he ngaahi meʻa kotoa pē ʻoku leaʻaki ʻi he lotú.

Fakaʻaliʻali ʻa e fakatātā 1–15, Ko e Tāpuakiʻi ʻo e Meʻatokoní. Fakamatalaʻi ʻoku tau toe lotu fakataha foki ko ha fāmili ʻi he taimi ʻoku tau kole ai ke tāpuakiʻi ʻa ʻetau meʻatokoní.

Ko e hā ʻa e meʻa ʻoku tau leaʻaki ʻi he taimi ʻoku tau kole ai ke tāpuakiʻi ʻa e meʻatokoní? (ʻOku tau fakamālō ki he Tamai Hēvaní koeʻuhí ko e meʻa tokoní pea tau kole ai ke Ne hanga ʻo tāpuakiʻi ia.)
Ko hai te ne lava ke kole ki he Tamai Hēvaní ke tāpuekina ʻa e meʻatokoní?

Toe lau ʻa e ngaahi lea ʻo e “ʻOku ou lotu ʻi he Tuí”.

ʻOku tau maʻu ʻa e ngaahi tāpuaki lahi ʻi heʻetau lotu fakataha ko ha fāmilí

Talanoá

Toe fakaʻaongaʻi ʻa e konga fakatātā 1–26 ʻo aʻu ki he 1–29, ke fai ange ʻaki ʻa e talanoa fekauʻaki mo e lotu fakafāmili fakataha ʻa ha fāmili ki ha taha ʻo honau mēmipá ʻoku lolotonga ngāue fakafaifekau. Mahalo te ke fie fakaʻaongaʻi ʻa e fakakaukau ko ʻení:

Ko Kataliná ko ha kiʻi taʻahine kei siʻi. Naʻá ne ʻofa ʻi hono fāmilí pea naʻá ne ʻiloʻi naʻa nau ʻofa ʻiate ia. ʻI he taimi ʻe niʻihi naʻe hanga ʻe Paula ʻa ia ko hono tuongaʻane lahí ʻo fakahā ange ki ai ha fanga kiʻi talanoa mei he Tohi Tapú mo e Tohi ʻa Molomoná. Naʻe ako ʻe Paula ʻa e ngaahi tohi ko ʻení koeʻuhí naʻá ne fiemaʻu ke ʻalu ʻo ngāue fakafaifekau ʻo fakahā ki he kakaí fekauʻaki mo e ngaahi talanoá ni.

ʻI ha ʻaho ʻe taha, naʻe maʻu ai ʻe Paula ha tohi. ʻI he taimi naʻá ne fakaava ai ʻa e tohí, naʻá ne fuʻu fiefia. “Te u ʻalu ʻo ngāue fakafaifekau!” ko ʻene leá ia. ʻI ha ngaahi uike ki mui angé, naʻe mateuteu ai ʻa Paula ke ʻalu. Ki muʻa peá ne mavahé, naʻe tūʻulutui fakataha ʻa e fāmilí ʻi haʻanau lotu fakafāmili. Naʻe fakafetaʻi ʻa e tamai ʻa Kataliná ʻi ha ngaahi tāpuaki kuo maʻu ʻe honau fāmilí pea mo ha faingamālie kia Paula ke ne ʻalu ʻo ngāue fakafaifekau. Naʻá ne kole ai ki he Tamai Hēvaní ke Ne tāpuakiʻi ʻa Paula, ke maluʻi ia, pea ke tokoniʻi ia ke ne hoko ko ha faifekau lelei. Naʻe hanga ʻe he lotu ko ʻení ʻo tokoniʻi ʻa Katalina ke ne ongoʻi fiefia ʻi hono lotó. Naʻá ne ʻiloʻi ʻe tokoni ʻa e Tamai Hēvaní kia Paula ʻi heʻene ngāue fakafaifekaú. Naʻe lotu ʻa Katalina mo hono fāmilí maʻa Paula ʻi he ʻaho kotoa pē ʻi he lolotonga ʻo ʻene ʻi he malaʻe ʻo e ngāue fakafaifekaú.

Fakamatalaʻi ange ʻe lava ʻo lotu fakataha ʻa e ngaahi fāmilí maʻa ha taha ʻoku puke, ke maʻu ha tokoni ʻi he palōpalema fakafāmilí, pe maʻa ha faifekau ʻokú ne fiemaʻu ha tokoni ʻa e Tamai Hēvaní, pe ki ha ngaahi toe ʻuhinga kehe ange. Fakamatalaʻi ange ʻe lava ke tau lotu fekauʻaki mo ha ngaahi meʻa mahuʻinga kehe kiate kitautolu. Fakaʻaongaʻi ʻa e ʻAlamā 14:27 ke tokoni ki he fānaú ʻi he taimi ke tau lotu aí.

Lau leʻo lahi ʻa e 3 Nīfai 3:21. Fakamanatu ange ki he fānaú naʻe talaʻofa mai ʻa Sīsū ʻe tāpuekina kitautolu ʻo kapau te tau lotu fakafāmili.

Fakamoʻoní

Fakahaaʻi ʻa hoʻo fakamoʻoni fekauʻaki mo e lotu fakafāmilí. Mahalo te ke fie talanoa fekauʻaki mo e taimi ne hanga ai ʻe he lotu fakafāmilí ʻo fakamālohia ai ʻa ho kiʻi fāmilí.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitií ni ke ke fakaʻaongaʻi he lolotonga ʻa e lēsoní.

Fai ʻa e ngaahi veesi ʻekitivitī ko ʻení pea mo e fānaú:

Ko ʻeku faʻeé ʻeni,

ʻOkú ne tokoni kiate au he vaʻingá (hiki hake ʻa e foʻi tuhu ʻe taha)

“Ko ʻeku tamaí ʻeni ʻokú ne ngāue ʻi he ʻahó kotoa” (hiki hake ʻa e foʻi tuhu hono uá).

Ko hoku tokuá ʻeni, ʻOkú ne mālohi mo lōloa (hiki hake ʻa e foʻi tuhu hono tolú):

Ko hoku tuofefiné ʻeni, ʻokú ne manako ke vaʻinga ʻaki ha foʻi pulu (hiki hake ʻa e foʻi tuhu hono faá).

Pea ko au ʻeni; ʻoku ou fiefia ke pehē (fokotuʻu hake ʻa e motuʻa tuhú)

ʻOku tūʻulutui fakataha homau fāmilí ke lotu (kuku ho nimá).
Lī pe ʻoatu ha kiʻi meʻa molū hangē ko ha kiʻi tangai piini pe ko ha foʻi pulu ki ha kiʻi tamasiʻi, lī tahataha pē kiate kinautolu. ʻI he hapo tahataha ʻe he fānaú ʻa e kiʻi meʻa ko iá, kole ange ke nau hanga ʻo talamai ha faʻahinga meʻa te nau lava ʻo fakamālō ai ki he Tamai Hēvaní ʻi he taimi ʻoku nau fai ʻa e lotu fakafāmilí. ʻI he maʻu ʻe he fānaú taki taha ha faingamālie ke leá, toe fai pē ʻa e ʻekitivitī ko iá, mo tukuange ki he fānaú ke nau fakahā mai ʻa e meʻa te nau fakahā ki he Tamai Hēvaní ʻi he taimi te nau fai ai ha lotu fakafāmilí.
Tufa ange ki he fānaú taki taha ha ngaahi laʻi pepa mo e kala valivali pe peni vahevahe. Tuku ange ki he fānaú ke nau tā ha ngaahi fakatātā ho nau ngaahi fāmilí. Fakahingoa ʻa e ngaahi fakatātaá ʻaki ʻa e ʻOku ou fiefia ʻi he taimi ʻoku lotu fakafāmili fakataha ai hoku fāmilí.

Ngaahi ʻEkitivitī ke ako mei aí

Tokoniʻi e fānaú ke nau angimui he foʻi veesi ko ʻení, ʻi he ʻotu lea ki he ʻotu lea:

ʻOku mau ʻofa ʻi he Tamai Hēvaní;

ʻOku mau fakafetaʻi kiate Ia ʻi he ʻemau lotú.

ʻOku ʻofa ʻa e Tamai Hēvaní ʻiate kimautolu;

ʻOku mau fanongo ki he ngaahi meʻa ʻokú Ne folofola ʻakí.
Fai ange ha talanoa ʻo ha lotu fakafāmili fakataha ʻa ia ne maʻu ai ʻa e ngaahi meʻa naʻa nau kolé. Hangē ko ʻení, ʻe lava pē ke hē ʻa e fāmilí pea nau toe ʻilo honau halá; ʻe lava pē ke mole haʻanau meʻa pea nau toe ʻilo ia; pe ʻe ʻi ai ha taha ʻi he fāmilí ʻe puke pea toe sai. Fokotuʻu ange ʻoku ʻikai ngata pē ʻi he lotu ke maʻu ha tokoní, ʻoku totonu foki ke manatuʻi ʻe he fāmilí ke fai ha lotu ʻo fakafetaʻi pe fakamālō ʻi he hili ʻenau maʻu ʻa e tokoni ko iá. Fakamanatuʻi ki he fānaú, ʻoku hōifua ʻa e Tamai Hēvaní ʻi heʻetau fakafetaʻi ange ki he ngaahi tāpuaki ʻokú ne foaki maí.
Hivaʻi pe lau ʻa e ngaahi lea ʻo e veesi ʻuluakí mo e veesi hono tolu ʻo e “ʻOku Mau Fakamālō Atu ʻe Tamai” (Children’s Songbook, p.20).