Ko e Sāpaté ko e ʻAho ʻo e Lotu

Taumuʻá

Ke tokoniʻi ke mahino ki he fānaú taki taha ko e Sāpaté ko e ʻaho ʻo e lotu mo e mālōlō.

Teuteú

Ako ʻi he faʻa lotu ʻa e Sēnesi 2:1–3 mo e ʻEkesōtosi 16:11–31. Vakai foki ki he Ngaahi Tefitoʻi Moʻoni ʻo e Ongoongoleleí (31110), vahe 24.
Ngaahi nāunau ʻoku fiemaʻú:
1. Tohi Tapú
2. Fakatātā 1–6, Ko e Efiafi Fakafāmili ʻi ʻApí (62521); fakatātā 1–7, Ko ha Fāmili ʻOfa; fakatātā 1–8, Ko e Tufa ʻo e Sākalamēnití (62021); fakatātā 1–9, Ko e Lotu Pongipongí (62310); fakatātā 1–10, Ko e Lotu Fakafāmilí (62275); fakatātā 1–35, Ko e Tānaki ʻo e Maná; fakatātā 1–36, Ko ha Fānau mo ha Mātuʻa ʻoku nau Lau ha Talanoa mei he Folofolá.
Fai mo ha ngaahi teuteu ʻe fiemaʻu ki ha ʻekitivitī fakatupulaki te ke fie fakaʻaongaʻí.

Ngaahi Ekitivitī ke ako mei aí

Fakaafeʻi ha taha ʻo e fānaú ke ne fai ʻa e fua lotú

ʻEkitivitī ke taki ʻaki e tokangá.

Tokoniʻi ʻa e fānaú ke nau fakatātaaʻi ʻa e ʻaho taki taha ʻo e Fakatupú lolotonga ʻa hoʻo fakamanatuʻi ange ʻa e meʻa naʻe fakatupu ʻi he ʻaho takitaha (vakai, Sēnesi 1).

ʻAho 1	ʻAi ke hangē ʻokú ke mohé peá ke toki ʻā hake ke fakatātaaʻi ʻaki ʻa e poʻulí mo e ʻahó.
ʻAho 2	Tuʻu hake, sio ki ʻolunga, pea ke fakamafola ho ongo nimá ke fakatātaaʻi ʻa e langí.
ʻAho 3	Punou ʻo pakiʻi ha matalaʻi ʻakau peá ke fakananamu ʻa e matalaʻi ʻakaú.
ʻAho 4	Fakatātaaʻi ʻaki ho ongo nimá ha foʻi fuopotopoto fōlahi ke ne fakafo- fongaʻi ʻa e laʻaá, mo ha kiʻi fuopotopoto fōsiʻi ʻaki ho ongo nimá ki he māhiná, pea fakatetetete ho ʻuluʻulutuhú lolotonga hoʻo ʻai ho nimá ki he langí ke ne fakafofongaʻi ʻa e ngaahi fetuʻu ngingilá.
ʻAho 5	Pehē pē ko ha manupuna koe ʻokú ke puna holo ʻi he loto lokí pe ko ha ika ʻoku lele holo ʻi he loto tahí
ʻAho 6	Pehē ko ha manu koe. Luelue holo mo fakatātaaʻi ʻa e manu ko iá ʻi he loto lokí. Pea mou tuʻu laine taha ʻo lea tahataha, “Ko hoku hingoá ko (hingoa totonu ʻo e kiʻi tamasiʻi pe taʻahiné). Ko e fānau au ʻa e ʻOtuá.”

ʻAi e fānaú ke nau tangutu fakalongolongo ki lalo.

Talaange ki he fānaú, ʻi he ʻaho hono 7, naʻe mālōlō ai ʻa e Tamai Hēvaní mo Sīsū. Naʻa na ui ʻa e ʻaho mālōlō ko ʻení ko e Sāpate (ʻEkesōtosi 35:2)

ʻAi e fānaú ke nau toutou angimui atu ʻi hono puʻaki e foʻi lea ko e Sāpate.

Ko e Sāpaté ko e ʻaho tapu

Lau leʻo lahi ʻa e Sēnesi 2:1–2 mo e veesi Sēnesi 2:3 ʻo aʻu ki he foʻi lea ko e ʻahó. Fakamatalaʻi ange ʻi he taimi ne ʻosi ai ʻa hono fakatupu ʻe he Tamai Hēvaní mo Sīsū ʻa e māmaní mo e meʻa kotoa pē ʻi aí, naʻá na tāpuakiʻi leva ʻa e ʻaho hono fitú. Ke hoko ia ko e ʻaho tapu, ʻo kehe ia mei he ngaahi ʻaho kehe ʻo e uiké. Ko e Sāpaté ko ha ʻaho ia moʻotautolu ke tau mālōlō ai mei he ngāué ka tau lotu ki he Tamai Hēvaní mo Sīsū Kalaisi.

Ko e ʻaho fē ʻo e uiké ʻa e Sāpaté?
Ko e hā e meʻa naʻe fai ʻe he Tamai Hēvaní mo Sīsū ʻi he ʻaho Sāpaté? (Vakai, Sēnesi 2:2.)

ʻEkitivitií

ʻAi ke fakahā hake ʻe he fānaú ha ngaahi foʻi tuhu ʻe fitu. Lau mo kinautolu ki he fitú mo peluki ʻa e foʻi tuhu takitaha ʻi he hili hono laú. Fakamatalaʻi ange ʻi he ʻaho ʻe ono (ueueʻi ʻa e ngaahi ʻuluaki foʻi tuhu ʻe onó), ʻoku tau fai ai ʻetau ngaahi ngāué. ʻI he ʻaho hono fitú (ueueʻi ʻa e foʻi tuhu hono fitú pē), ʻoku tau mālōlō ai mei heʻetau ngāué koeʻuhí he ko e ʻaho Sāpate ia.

Talanoá

Fakaʻaliʻali ʻa e fakatātā 1–35, Ko e Tānaki ʻo e Maná, pea fai ange mo e talanoa ʻo e kau ʻIsilelí mo e maná, ʻo hangē ko ia ʻi he ʻEkesōtosi 16:11–31.

Tokoniʻi ʻa e fānaú ke nau ʻiloʻi ʻa e fakaofo ʻo e maná. Fakamatalaʻi ange, ʻi he ʻaho takitaha, naʻe tānaki ai ʻe he kau ʻIsilelí ha mana feʻunga ki he ʻaho ko iá, ka ʻi he ʻaho hono onó naʻa nau tānaki ai ke feʻunga mo e ʻaho ʻe ua. Kapau ʻe tāna-ki ʻe he kau ʻIsilelí ʻo toe lahi ange ʻi he ʻaho ʻe tahá ʻo makehe mei he ʻaho hono onó, ʻe taʻe ʻaonga leva ia. ʻI he ʻaho hono fitú, ʻa ia ko e Sāpate ia, naʻe ʻikai ke ʻi ai ha mana ia ke tānaki. ʻI he ʻaho ko iá naʻe kai leva ʻe he kau ʻIsilelí ʻa e toenga mana naʻa nau tānaki ʻi he ʻaho hono onó.

Talanoá

Naʻe anga fēfē ʻa e maʻu ha meʻakai maʻá e kau ʻIsilelí?
Ko e hā naʻe ʻikai ke nau tānaki ai ha mana ʻi he ʻaho Sāpaté?

Lau leʻo lahi ʻa e ʻEkesōtosi 16:26. Fakamatalaʻi ange naʻe fakahinohinoʻi ʻa e kau ʻIsilelí ke ʻoua naʻa nau ngāue ʻi he ʻaho Sāpaté. ʻI he ʻaho Sāpaté ʻoku fiemaʻu ai ʻe he Tamai Hēvaní mo Sīsū ke tau fakakaukau ange kiate kinaua ʻo ʻikai ki he ngāué. Ko e Sāpaté ko ha ʻaho toputapu ia ki he Tamai Hēvaní mo Sīsū.

Fakamamafaʻi ange ko e Sāpaté ʻoku ʻikai ko ha ʻaho ia ke fai ai ha ngāue mo fai ʻa e ngaahi meʻa anga mahení, ka ko ha ʻaho ke lotu ai ki he Tamai Hēvaní mo Sīsū. Ko e lotú ʻoku ʻuhinga ia ke te fakakaukau ki he Tamai Hēvaní mo Sīsū pea mo fai ʻa e ngaahi meʻa te nau fakahaaʻi ʻa e lahi ʻo ʻetau ʻofa kiate kinauá.

Ko e Sāpaté ko e ʻaho ia ʻo e Lotu

Tokoniʻi ʻa e fānaú ke nau ʻiloʻi ko e ʻaho Sāpaté ko e ʻaho ʻo e fiefia koeʻuhí te tau lava ke lotu ki he Tamai Hēvaní mo Sīsū ʻi he ngaahi founga kehekehe mo lahi.

Ko e hā kuo ke fai ʻi he ʻahó ni ke fakahaaʻi ki he Tamai Hēvaní mo Sīsū ʻoku ke ʻofa kiate kinaua?

Fakamatalaʻi ange ko e taha ʻo e ngaahi founga mahuʻinga te tau lava ʻo lotu ai ki he Tamai Hēvaní mo Sīsū, pe ko hano fakahaaʻi kiate kinaua ʻoku tau ʻofa angé, ko ʻete haʻu ki he lotú pea maʻu ʻa e sākalamēnití. Fakaʻaliʻali ʻa e fakatātā 1–8, Ko e Tufa ʻo e Sākalamēnití. ʻOku fiefia ʻa e Tamai Hēvaní mo Sīsū ʻi he taimi ʻoku tau hiva ai mo fakafanongó pea mo e taimi ʻoku tau fakalongolongo ai mo anga leleí koeʻuhí ke tau lava ʻo fanongo ki he kau faiakó pea ongoʻi ʻa e ʻofa ʻa e Tamai Hēvaní mo Sīsū kiate kitautolú.

ʻEkitivitií

Tokoniʻi e fānaú ke nau fai ʻa e kiʻi faiva ko ʻení ʻaki honau ʻuluʻulutuhú:

ʻOku ou fiefia ke u haʻu ki he lotú he ʻahó ni.

ʻOku ou fiefia ke haʻu ki he lotú he ʻahó ni. (Fakatātaaʻi ha taua fale lotu ʻaki ho ngaahi muʻa tuhú)
ʻO u ako ai ke fakafanongo (ʻAi ho ongo nimá ki he tuʻa telingá ʻo fakafanongo)
Pea mo lotu (Kūnima pea punou)
ʻO u ako ai kia Sīsū ʻi ʻolungá (Tuhu ki ʻolunga)
ʻOku ou fakakaukau kia Sīsū mo ʻene ʻofá (Fakafehauaki ho ongo nimá ʻi ho fatafata).

ʻOku tau toe fakahā foki ki he Tamai Hēvaní mo Sīsū ʻa ʻetau ʻofa ʻiate kinauá ʻaki ʻa ʻetau maʻa mo maau ʻi heʻetau haʻu ki he lotú. ʻOku tonu ke tau fufulu hotau matá mo hotau ʻulú pea tui mo hotau vala lelei tahá .

ʻEkitivitií

ʻAi ʻa e fānaú ke nau fakatātaaʻi ʻa e teuteu ke ʻalu ki he lotú.

ʻEkitivitií

Ko e hā e meʻa ʻoku tau fai ke tau lotu pe hū ai ki he Tamai Hēvaní mo Sīsū ʻi he taimi ʻoku tau ʻi he lotú aí?
Ko e hā e meʻa ʻoku tau fai ke tau lotu pe hū ai ki he Tamai Hēvaní mo Sīsū ʻi he taimi ʻoku tau ʻi ʻapi aí?

Tokoniʻi ʻa e fānaú ke nau ʻiloʻi ʻoku ʻikai totonu ke tau fakamole ha paʻanga pe fakatau ʻi he Sāpaté. ʻOku ʻikai totonu ke tau ō ki he ngaahi sipotí pe ngaahi ʻek-itivitī fakafiefia ʻi he Sāpaté. ʻOku ʻikai totonu ke tau ngāue ʻi hotau loto ʻataʻataá pe ngaahi ngoueʻangá pe taumātaʻu mo tuli manu ʻi he ʻaho Sāpaté.

Fakamatalaʻi ange ʻoku lahi ʻa e ngaahi meʻa ʻi ʻapi ke fai ke tauhi ai e Sāpaté ke māʻoniʻoni. Fakaʻaliʻali ʻa e ngaahi fakatātā mei he konga ʻo e “TEUTEÚ” ʻi he taimi totonu he lolotonga hoʻomou fealēleaʻakí. Te tau lava ʻo fai e ngaahi vaʻin-ga fakalongolongó mo hotau ngaahi fāmilí, lau mo ha ngaahi talanoa mei he folofolá kiate kitautolu, faʻu ha ngaahi tohi fakatātā fakafāmili, ʻaʻahi ki hotau ngaahi kāingá pe ko kinautolu ʻoku mahamahakí, tā ha ngaahi fakatātā ʻo ha ngaahi meʻa ʻoku tau houngaʻia ai, kiʻi luelue mo ha mēmipa ʻo e fāmilí, lotu, hiva ha ngaahi hiva, pea mo fanongo ki he ngaahi hiva leleí.

ʻEkitivitií

ʻAi ke fetongitongi ʻa e fānaú ʻi hono fakatātaaʻi fakalongolongo ʻa e ngaahi meʻa ʻoku nau manako ke fai ʻi ʻapi, ke tauhi ai e Sāpaté ke māʻoniʻoni.

Fakamoʻoní

Tala ange ki he fānaú ko e Tamai Hēvaní mo Sīsū ʻokú Na fiefia ʻi heʻetau haʻu ki he lotú ʻi he Sāpaté mo e taimi ʻoku tau hiva, lotu, mo fakafanongo ai ki he kau faiakó. ʻOkú Na toe fiefia foki ʻi he taimi ʻoku tau fai lelei ai ʻi ʻapi he Sāpaté. Tala ange fekauʻaki mo ha ngaahi meʻa toputapu ʻokú ke fai ʻi ʻapi he Sāpaté, pea ke fakahaaʻi ʻa e lahi hoʻo fiefia ʻi he ʻaho Sāpaté. Fakalotolahiʻi ʻa e fānaú ke nau talanoa mo honau ngaahi fāmilí fekauʻaki mo e meʻa naʻa nau ako ʻi he kalasí he ʻaho ní.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitī ko ʻení ke ke fakaʻaongaʻi ʻi he lolotonga ʻo e lēsoní.

Fai ʻa e ngaahi ʻekitivitī ko ʻení, peá ke faʻu ha foʻi veesi ki he tamasiʻi pe taʻahine taki taha ʻi hoʻo kalasí. Fakaafeʻi ʻa e fānaú ke nau fakatātaaʻi fakataha mo koe.

Koeʻuhí Ko e ʻAho Sāpaté ʻEni

Tuhu ki ha taha ʻo e fānaú peá ke leaʻaki hono hingoá ʻi he lolotonga hoʻo lau ʻa e vēsí mo fakatātāʻí:

Ko (Hingoa ʻo e taha ko iá) naʻá ne fanongo ki he folofolá he ʻahó ni (ʻAi e ongo nimá ki he tuʻa telingá ʻo fakafanongo)

Ko (Hingoa ʻo e taha ko iá) naʻá ne fanongo ki he folofolá ʻi he ʻahó ni, koeʻuhí he ko e ʻaho Sāpaté ʻeni.

Lau ha veesi ki he tokotaha taki taha, ʻo fakaʻaongaʻi ʻa e ngaahi fakakaukau tatau ʻo hangē ko e fōtunga ʻi ʻolungá.

Ko (hingoa ʻo e taha ko iá) naʻá ne lotu ʻi he Palaimelí he ʻahó ni (kūnima, punou ho ʻulú, pea kuikui)

Ko (hingoa ʻo e taha ko iá) naʻá ne tā ha fakatātā ʻi he ʻahó ni (fakangalingali ʻoku ke tā ha fakatātā)

Ko (hingoa ʻo e taha ko iá) naʻá ne ʻaʻahi ki ha taha tukuhāusia ʻi he ʻahó ni (Lulululu mo e tokotaha ʻoku fakaʻaongaʻi hono hingoá)

Ko (hingoa ʻo e taha ko iá) naʻá ne ako fekauʻaki mo e hisitōlia fakaefāmilí ʻi he ʻahó ni. (fakangalingali ʻoku ke huke ha tohi mo mata fakatātā)

Ko (hingoa ʻo e taha ko iá) naʻá ne tohi ki heʻene kui tangatá mo ʻene kui fefiné ʻi he ʻahó ni. (Ueʻi ho nimá ʻo hangē ʻokú ke fai tohí)

Ko (hingoa ʻo e taha ko iá) naʻá ne fanongo ki ha talanoa ʻi he ʻahó ni. (ʻAi e ongo nimá ki he tuʻa telingá ʻo fakafanongo)
Fai ange ʻa e talanoa ko ʻení ki he fānaú ʻi hoʻo lea pē ʻaʻaú:

Naʻe fononga ʻa e kau paioniá ʻi ha ngaahi lau maile ke nofo ʻi he Teleʻa Sōlekí. Naʻa nau aʻu ki ai ʻi ha ngaahi ʻaho siʻi kimuʻa pea hoko e Sāpaté. Neongo pē naʻe ʻi ai e ngaahi fale ke langa mo e ngoue ke tō, naʻa nau pehē ke ʻoua naʻa nau ngāue ʻi he Sāpaté. Naʻa nau ngāue mālohi mo vave ke keli e kelekelé ke mateuteu ki he toó. Naʻe fuʻu fefeka ʻa e kelekelé ko ia naʻe pau ai ke nau fuʻifuʻi ia ke molū feʻunga ke lava ʻa e palaú ʻo ngāue ki ai. ʻI he pō Tokonakí, naʻe lava ki ai hano tō ʻo ha fuʻu ngoue vesitapolo. ʻI he pongipongi Sāpaté, naʻa nau fakataha leva ki heʻenau ngaahi fakataha lotu ʻo e Sāpaté ʻo fakamālō ki he Tamai Hēvaní ʻi hono ʻomi kinautolu ki ha fonua foʻou ke nau nofo ai.
ʻAi ke taki taha tā ʻe he tamasiʻi pe taʻahine taki taha ʻa hono fakatātaá ʻi haʻane fai ha ngāue ʻo e ʻaho Sāpaté. Tuku ange ke nau fefakamatala ʻaki ʻa ʻenau ngaahi fakatātaá. Fakaʻilongaʻi ʻa e fakatātā taki taha ʻaki e hingoa ʻo e kiʻi tamasiʻí pe taʻahiné pea mo ʻene ngāue ʻoku faí, ʻo hangē ko ʻení: ʻOku hiva ʻe Tēvita ʻa e ngaahi hiva palaimelí ʻi he Sāpaté.

Ngaahi ʻEkitivitī Kehe Maʻá e Fānau Iiki Angé

Tokoniʻi e fānaú ke nau fakatātaaʻi ʻa e ʻekitivitī ko ʻení ʻi he lolotonga hoʻo lau ʻa hono ngaahi leá:

Ko e Fakatupú

Naʻe folofola ʻa Sīsū ko e laʻaá kuo pau ke ne huhulu (Fakatātaaʻi ha fuopo-topoto ʻi ʻolunga ʻaki ho ongo nimá)

Ko e ʻuhá kuo pau ke tō (ʻOhifo māmālie ho ongo nimá mei ʻolunga pea ngaungaue ho ʻuluʻulu tuhú ʻo hangē ʻoku uhá)

Ko e ngaahi matalaʻi ʻakaú kuo pau ke tupu (ʻAi ho ongo nimá ʻo hangē ha ipú pea hanga ki ʻolunga)

Naʻe folofola ʻa Sīsū ko e fanga manupuná kuo pau ke nau hiva (Fakaava mo tāpuni ho nimá ʻo hangē ha muʻatosí)

Pea naʻe hoko ʻo pehē, ʻo pehē (Kūnima)

(Johnie B. Wood, mei he Sing, Look, Do, Action, Songs for Children, ed. Dorothy M. Peterson. Cincinnati: Standard Publishing Co., 1965.)

Fakamatalaʻi ange ʻi he hili hono fakatupu ʻa e māmaní, naʻe mālōlō leva ʻa e Tamai Hēvaní mo Sīsū. Ko e Sāpaté ko e ʻaho ia ke tau mālōlō mo manatu ai ki he Tamai Hēvaní mo Sīsū.
Tala ange ki he fānaú ʻi heʻetau fai ʻetau ngaahi ngāué ʻi he Tokonakí ʻe faingofua ange ai ke tau manatua ʻa e Tamai Hēvaní mo Sīsū ʻi he Sāpaté. Hivaʻi ʻa e “ʻAho Tokonakí” (Children’s Songbook), mo fakatātaaʻi ʻo hangē ko ia ʻoku fokotuʻu mai ʻe hono ngaahi leá.