Lēsoni 19

ʻOku ou Fakafetaʻi Koeʻuhí ko Hoku Ongo Matá

Taumuʻá

Ke tokoniʻi ʻa e fānaú taki taha ke ne houngaʻia ʻi hono ongo matá pea mo e ngaahi meʻa ʻokú na lava ke faí.

Teuteú

1. Ako ʻi he faʻa lotu ʻa e Sione 9:1–7 mo e 3 Nīfai 11:1–17.

2. Ngaahi nāunau ʻoku fiemaʻú:

   1. Tohi Tapú mo ha Tohi ʻa Molomona

   2. Ko ha foʻi takainga ʻoku ʻi ai ha ava fōlahi ʻi loto mo ha tepi sū pe konga afo. (Kapau ʻoku tokolahi hoʻo kalasí, pea mahalo ʻe sai ke ke ʻomai ke taki taha ʻa e fānaú).

   3. Holoholo ki he ʻulú ke haʻi ʻaki ʻa e matá.

   4. Fakatātā 1–44, Ko Sīsū ʻi heʻene Faiako ʻi ʻAmelika (Ko e Ngaahi Fakatātā ʻo e Ongoongoleleí 316;62380).

3. Fai mo ha ngaahi teuteu ʻo ha ʻekitivitī fakatupulaki te ke fie fakaʻaongaʻi ʻi he lēsoní.

Fakatokanga ki he faiakó: Tokanga makehe ki he ongo ʻa e fānau ʻoku ʻi ai haʻanau faingataʻaʻia fakaesino. Taafataha pē ki he ngaahi meʻa ʻoku lava ʻe honau sinó, kae ʻikai ko ia ʻoku ʻikai te nau malavá.

Ngaahi ʻEkitivitī ke ako mei aí

Fakaafeʻi ha taha ʻo e fānaú ke ne fai ʻa e fua lotú

ʻEkitivitī ke taki ʻaki e tokangá

Fakaʻaliʻali ki he fānaú hono faingofua ke tui ʻa e tepi suú pe meʻi filó ʻi he ava o e tengaʻi filó ʻi he lolotonga ʻāʻā ho matá. Kuikui leva ho matá ʻo feinga ke ke tui ʻa e tepí ʻi he ava ʻo e tengaʻi filó. ʻOange ha faingamālie ʻo e fānaú taki taha ke nau ʻahiʻahi.

Ko e tāpuaki ʻa hotau matá kiate kitautolu

Fakamatala ange ʻoku ʻi ai hotau matá koeʻuhí ke tau lava ʻo laukonga mo ako, ngāue mo vaʻinga, mo mamata ki he fakaʻofoʻofa ʻo e māmaní.

Aleaʻi mo e fānaú ʻa e tuʻunga ʻe ʻi ai ʻa ʻenau moʻuí ʻo kapau naʻe ʻikai ke nau lava ʻo mamata pe sio.

• ʻE anga fēfē haʻo kai hoʻo meʻakaí?

• ʻE anga fēfē haʻo ʻilo ʻa e vala ke ke tuí?

• ʻE anga fēfē haʻo ʻiloʻi ho halá ʻi ho ʻapí?

Hivá

Tokoniʻi ʻa e fānaú ke nau lau ʻa e ngaahi lea ʻo e “Ko hoku ongo kiʻi Mata”(Children’s Songbook).

Ongo kiʻi mata ʻokú na kemo, kemo, kemo,

Ongo kiʻi mata ʻokú na sio;

ʻUlu, uma; tui mo e ʻuluʻuluvaʻe;

Mo ha ngaahi meʻa kehekehe ʻoku nau faʻu aú.

Tulālā lā lā lā lā

Ongo kiʻi mata ʻokú na kemo, kemo, kemo,

Mo ha ngaahi meʻa kehe lahi ʻoku nau faʻu aú.

(mei he Merrily We Sing, copyright © 1948, 1975 Pioneer Press, Inc. [a division of the Jackman Music]. ke toki fakaʻaongaʻi ʻi hano fakangofuaʻi.)

ʻEkitivitií

ʻAi e fānaú ke nau sio ki tuʻa he matapā sioʻatá (pe ko ha fakatātā fakaʻofoʻofa) pea nau ʻai ke pehē ko e toki fuofua taimi ʻeni ke nau mamata ai. Fakaafeʻi kinautolu ke nau fakamatala ʻo fekauʻaki mo e meʻa kuo nau mamata aí. Lave ʻo kau ki he lanú mo hono fōtungá. Tokoniʻi ʻa e fānaú ke nau fakatokangaʻi ko ha tāpuaki moʻoni ke te lava ʻo sio.

ʻEkitivitií

• Ko e hā ha ngaahi meʻa ʻoku tau manako ke mamata ki ai?

Fakamatalaʻi ange ko e mata ʻo e kakai ʻe niʻihi ʻoku ʻikai lava ʻo mamata lelei. ʻOku pau leva ke tui ʻe he kakai pehení ʻa e meʻa ko ia ʻoku ui ko e mata sioʻata, pe (contact–lense) ke tokoni ke nau lava ʻo mamata. ʻOku kui ʻa e niʻihi ia ʻo ʻikai ke nau lava ʻo mamata ki ha toe meʻa.

ʻEkitivitií

Aleaʻi ʻa e ngaahi founga ʻoku ako ai ʻa e kakai kuí ke nau ʻalu ki ha feituʻu ʻiate kinautolu pē ʻo fakaʻaongaʻi ha kulī ke ne taki kinautolu pe ko ha tokotoko. Haʻihaʻi ha mata ʻo ha taha ʻi he fānaú peá ke ʻai ke pehē ko e kulī koe ʻokú ke taki iá. ʻOange ho nimá ke puke ʻe he taha ko iá ʻo hangē ha afo pe maea ʻo e kulií. Taki holo ʻa e taha ko iá ʻi he loto lokí. ʻAi ke fetongitongi ʻa e fānaú kotoa ʻi he fakatātaaʻi ʻo e taha kuí pe ko e kulií ʻokú ne fai e takí.

Talanoá

Fakaʻaliʻali ʻa e fakatātā 1–43, Ko Sīsū ʻi heʻene Fakamoʻui ʻa e Kuí, pea fai mo e talanoa ʻo Sīsuú ʻi heʻene fakaʻaaki ʻa e tangata kuí, ʻo hangē ko ia ʻi he Sione 9:1–7.

Talanoá

• Ko e hā ʻa e meʻa naʻe fakaʻaongaʻi ʻaki ʻe Sīsū e kelekelé? (Vakai, Sione 9:6.)

• Ko e hā ne hoko ʻi he kaukau ʻa e tangata kuí ʻi he ano vaí? (Vakai, Sione 9:7.)

• ʻOku ke pehē naʻe ongoʻi fēfē ʻe he tangata kuí ʻi he taimi naʻe lava ai ʻo mamatá?

ʻOku ou fakafetaʻi ki he Tamai Hēvaní koeʻuhí ko hoku ongo matá

ʻEkitivitií

ʻAi e fānaú ke nau tuʻu ʻo angimui ʻa e ngaahi vēsí ni kiate koe, pea tuhu ki he konga ko ia ʻo e sinó ʻi he taimi ʻoku lau ai ki aí:

ʻOku ou fakafetaʻi ʻi hoku ongo matá

ʻOku ou fakafetaʻi ʻi hoku ongo matá,

Ki hoku ongo telingá, ngutú mo hoku ihú;

Fakafetaʻi ʻi hoku ongo nimá mo hoku ongo umá,

Hoku ongo alangá, vaʻé mo hoku ʻuluʻuluvaʻé.

(Toʻo mei he veesi naʻe faʻu ʻe Lucy Picco.)

Talanoá

Paasi holo ʻa e fakatātā 1–44, Ko Sīsū ʻi heʻene Faiako ʻi ʻAmeliká, pea ke ʻeke ange ki he tokotaha taki taha ke nau tala atu ha meʻa ʻe taha ʻokú ne fakatokangaʻi ʻi he fakatātaá. Fai ange ʻa e talanoa ʻo Sīsū ʻi heʻene ʻaʻahi ki ʻAmeliká, ʻo hangē ko ia ʻi he 3 Nīfai 11:1–17.

Talanoá

• Ko hai naʻe mamata ki ai ʻa e kakaí?

• Naʻe ongoʻi fēfē ʻe he kakaí ʻi he taimi naʻa nau mamata ai kia Sīsuú? (Vakai, 3 Nīfai 11:16—17.)

• Ko e hā e lanu ʻo e pulupulu ʻo Sīsuú? (Vakai, 3 Nīfai 11:8.)

Fakamatala ange mahalo he ʻikai ke tau lava ʻo mamata fakahangatonu kia Sīsū ʻo hangē ko e kau Nīfaí, ka ʻi heʻetau mamata ki he foʻi māmani fakaʻofoʻofá ni, ʻe lava ke tau manatua ʻa ʻene ʻofa kiate kitautolú.

Fakamoʻoní

Fevahevaheʻaki mo e fānaú ʻa hoʻo houngaʻia ʻi ho ongo matá. Talanoa ange fekauʻaki mo hoʻo mamata ki he fakatupu fakaʻofoʻofa ʻokú ke mātaʻia ʻi he ʻaho kotoa pē ʻa ia ʻokú ne fakamanatu atu ʻa e ʻofa ʻa e Tamai Hēvaní mo Sīsū kiate koé. Fakamanatu ki he fānaú ke nau fakamālō ki he Tamai Hēvaní koeʻuhí ko honau matá.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitī ko ʻení ke fakaʻaongaʻi ʻi he lēsoní.

1. Fakaafeʻi ʻa e fānaú ke nau fevakaiʻaki fakalelei ki honau ngaahi matá, ngaahi laumatá, ngaahi kemó, fulufulu ʻo e laumatá. Fakamatalaʻi ange ʻoku tokoni ʻa hotau laumatá, ongo kemó, fulufulu ʻo e laumatá ke maluʻi ʻa hotau matá mei he ʻulí, efú mo e pupuhá.

2. Ki muʻa pea kamata ʻa e kalasí, fakaʻaongaʻi ha meʻa māsila ke avangi ʻaki ha ngaahi ava ʻi ha lauʻi pepa ʻi ha fōtunga ʻo ha tapafā mo ha fuopotopoto. Haʻi tahataha ʻa e mata ʻo e fānau ʻi he kalasí, pea talaange ke nau fakaongoongo ʻa e fanga kiʻi petepete ʻi he laʻi pepá pea tala atu pē ko e hā ʻa e fakatātā ʻoku tā ʻaki e fanga kiʻi ava ʻi he lauʻi pepá. Fakamatalaʻi ange ʻoku tatau tofu pē ʻeni mo e mataʻitohi maʻá e kau kuí, ʻa ia ko e founga ia ʻoku laukonga ai ʻa e kau kuí.

3. Fakaʻaongaʻi ha fanga kiʻi tangai pepa, ke ngaohi ha ngaahi mata ʻe lava ke kuikui mo ʻāʻā (vakai ki he fakahinohino ʻi he ngataʻanga ʻo e lēsoní) maʻá e taha kotoa pē. Tohiʻi ʻi he kiʻi tangai pepa kotoa pē ʻa e ʻOku ou fakafetaʻi ʻi hoku ongo matá. ʻAi e fānaú ke nau valivali ʻa e ngaahi fakatātā ʻo e matá mo tā ha fakatātā ʻo ha ngaahi fulufulu ʻi he tuʻa tangai pepá. Fakaʻaongaʻi ʻa e fanga kiʻi mata mei he tangai pepá ke fakatātaaʻi fakalongolongo mo e fānau ʻa e kuikuí mo e ʻāʻā ʻa e matá ʻo hangē ko ʻetau ʻā hake ʻi he pongipongí pe mohé, ʻi heʻetau lotú mo e taimi ʻoku tau ilifia aí.

4. Kapau ʻe lava, ʻave ʻa e fānaú ke mou ʻeva ki tuʻa ʻo mamata ʻi natula ʻi homou ʻātakaí. Kole ange ke nau kūnima mo fakalongolongo ʻaupito ʻi he lolotonga ʻenau luelué, koeʻuhí ke nau tokanga taha pē ki hono fakaʻaongaʻi honau ngaahi matá. ʻI heʻenau foki mai ki he kalasí, fakaafeʻi ʻa e fānaú ke nau taufetongi ʻi hono fakahā ʻa e meʻa naʻa nau mamata aí.

Ngaahi ʻEkitivitī Kehe Maʻá e Fānau Iiki Angé

1. Hivaʻi pe lau ʻa e ngaahi lea ʻo e“Popikoané” (Children’s Songbook). Fakamatalaʻi ange ko e ngaahi fisi ko ia ʻi he fuʻu ʻakau ko e ʻepilikoti ʻoku ʻasi hangē ha popikoané.

   • Kapau te ke sio ki tuʻa he matapā sioʻatá, ʻo hangē ko e lau ʻa e hivá, ʻokú ke sio nai ki ha popikoane ʻoku mapunopuna ʻi he fuʻu ʻepilikoti? Ko e hā ʻoku ke mamata ki ai ʻi hoʻo mamata ki tuʻa he matapā sioʻatá?

   Tuku ke sio e fānaú ki tuʻa he matapā sioʻatá, pe ʻave kinautolu ki tuʻa ʻi ha kiʻi taimi nounou. Foki ki he lokí pea fakamanatu ʻa e ngaahi meʻa ne nau mamata aí.

   • Ko e hā naʻá ke fakaʻaongaʻi ke ke mamata ʻaki ki he ngaahi meʻa ko ʻení?

   Fakamatalaʻi ange ʻoku tonu ke tau fakafetaʻi ki he Tamai Hēvaní koeʻuhí ko hotau ongo matá.

2. ʻAi ke tuʻu ʻa e fānaú ʻi ha fuopotopoto ʻo lau ʻa e “Ala ki ho ongo Matá”, pea fakatātaaʻi ʻo hangē ko e fakahinohinó:

   Ala ki ho ongo matá,

   Ala ki ho ihú,

   Ala ki ho ongo telingá,

   Ala ki ho ʻuluʻuluvaʻé.

   Fakamafao ho ongo nimá

   Ke māʻolunga ki ʻolunga,

   Pea ke toe māʻolunga ange,

   Ki he Langí.

   ʻAi ho ongo nimá

   Ki ho louʻulú,

   Tangutu fakalongolongo ki lalo

   Ki ho seá.

3. Fakaʻaliʻali ki he fānaú ha kiʻi meʻa siʻisiʻi. Tala ange te ke tuku ia ʻi ha feituʻu ʻi he lokí, pea ke nau fakaʻaongaʻi honau matá ke kumi ia. ʻAi ke kuikui e mata ʻo e fānaú, pea tuku leva ʻa e kiʻi meʻa ko iá ʻi ha feituʻu te nau lava pē ke sio ki ai kae ʻikai fuʻu ʻasi lahi. ʻAi ke ʻāʻā e mata ʻo e fānaú ʻo kumi ʻa e meʻa ko iá kae ʻikai ngaʻunu holo pe longoaʻa. Tala ange ke kūnima ʻi he taimi ʻoku nau ʻiloʻi ai ʻa e meʻá. Fakamanatuʻi ki he fānaú kuo pau ke nau mātuʻaki fakalongolongo kae tuku ange ki he niʻihi kehé ke nau kumi mo ʻilo ʻa e meʻá ʻaki honau matá. Toutou fai ia ʻo fakatatau mo hono fiemaʻú.