Galulue po o le Auauna Atu i le Ekalesia

Ia tatou galulue ma le faatuatua i o tatou valaauga i lalo o le taitaiga a le pule o le perisitua.

Mai le soifuaga o Iosefa F. Samita

Ao galue Peresitene Iosefa F. Samita o se Aposetolo mo le 44 tausaga ma se Peresitene o le Ekalesia mo le iva tausaga, sa ia tulai i le konafesi ia Oketopa 1910 ma faapea mai, “Ua ou lagona le fiafia, i lenei taeao, ina ua maua le avanoa ou te faapea atu ai ia te outou i le taimi o ou tamaitiiti ma uluai taimi o le talavou , sa ou tautino atu ai i le Atua ma ona tagata o le a ou faamaoni ia i latou.” Sa ia faamatala mai lena taimi sa ia auauna ai ma le faatuatua i valaauga uma sa tuuina atu ia te ia.

“Pe a vaai atu i aoaoga o lo’u olaga, ou te le iloa nei, ma ou te le manatua se mea na tupu, mai le amataga o lo’u iloa i le lalolagi, sa ou lagona ai, i se taimi, le faatuai poo le faalēāno i le tautinoga ma le folafolaga sa ou faia i le Atua ma tagata o le Au Paia, i lo’u talavou. … I le avea ai o se toeaina o Isaraelu sa ou taumafai ina ia faamaoni i lena valaauga; sa ou taumafai i le mea sili e faamamalu ma faalauteleina lena valaauga. Ina ua valaauina au o se fitugafulu, sa ou lagona i lo’u loto lo’u faamaoni i lena valaauga, ma sa ou taumafai, i le poto atoa ma le manao o lou loto, e faamaoni i ai. E leai so’u malamalama pe manatua i se amioga sa ou faia, poo se tulaga i lo’u olaga sa ou lē faamaoni ai pe le faatuatuaina i nei valaauga i le Perisitua o le Alo o le Atua. Mulimuli ane i lo’u olaga, ina ua valaauina a’u e galue ai o se aposetolo, ma faauuina o se aposetolo, ma faamanuiaina o se tasi o le Toasefululua, sa ou taumafai e faamamalu i lena valaauga, ia faamaoni i ai, ma o’u uso, ma le fale o le faatuatua, ma feagaiga ma tuutuuga e faatatau i le mauaina o lenei Perisitua paia e mulimuli i le faatulagaga o le Alo o le Atua. Ou te lē iloa sa ou solia se tasi o au folafolaga ma tautinoga i nei valaauga sa valaauina i ai au. Sa ou saili ina ia faamaoni ma faatuatua i nei mea uma.”¹

Sa apoapoai mai Peresitene Samita i le Au Paia ina ia tuuina atu i latou lava i le galuega a le Alii ma auauna atu ma le faamaoni—i valaauga o le perisitua, i ausilali o le Ekalesia, ma isi galuega auauna atu lē manatu faapito—ma faamamalu pea le pule o le perisitua ua valaauina ma taitaiina ai i latou.

Aoaoga a Iosefa F. Samita

Ua tuuina mai le perisitua mo le faia o galuega.

Ua lē tuuina mai le perisitua mo le mamalu poo viiga o le tagata, ae mo le faia o galuega mo i latou e i latou ua tuuina atu i ai lenei valaauga paia e galulue ai. Ae ao ina ia manatua e oo lava i lo tatou Alii ma le Matai, ina ua mavae le anapogi umi, ua vaivai le tino ona o le leai pea o se meaai, sa ia teena le faaosoosoga a Satani ina ia faaaoga lana pule ma le malosi faa-Mesia e faamalieina ai ona lava manaoga.

O suafa ua tuuina mai e le Atua o le mamalu ma le tulaga e sili atu nai lo le maualuga faaletagata, faatasi ai ma tofi eseese ma le faatulagaga o le Perisitua Paia, e le tatau ona faaaogaina pe mafaufau i ai e faapei o suafa ua faia e tagata; ua lē mo ni teuteuga pe o le faaalia o le tomai faapitoa, ae o le valaauga mo se auaunaga ma le lotomaualalo i le galuega a le Matai e toatasi ua tatou folafola atu tatou te auauna i ai.²

Ou te iloa ia uso, i o latou soifuaga atoa, ua saunia e galulue; ua latou le faatali i se taimi e fesiligia le valaauga ua tuuina atu ia i latou, pe faatali foi e manatunatu i o latou tulaga faaletino, latou te o atu ma o mai ona o le talosaga a o latou taitai o loo i le galuega mo tagata ma le Alii. … Ua saunia i latou e faapei o le tagata leoleo ua saunia, e aunoa ma se faatali sei mafaufau mo i latou lava. … O lenei ua latou faia ma lo latou loto atoa, ma o a latou galuega sa le’i mafaufauina e mamafa; i le isi itu, ua latou maua ai le olioli, fiafia ma le lotomalie faifaipea. … O loo saunia pea i latou ma naunau e o atu pe o mai, poo le faia o soo se mea ua manaomia ai i latou, e tusa ai, i taimi uma lava, le taua o o latou tiute i le perisitua nai lo nisi lava manatu faaletagata.³

O fonotaga faale-vaiaso a korama o le perisitua… e le gata o le a faateleina ai le atoatoa o le galueaiina o le perisitua ona o mea ua aoaoina, ae o le tuufaatasia ai o uso uma faatasi i le vaiaso o le a latou maua ai le uiga o le galue faifaipea o ni auauna a le Alii.⁴

Le Atua e, ia faamanuia le Perisitua Paia, o alii taua, alii mama, alii o le mamalu, alii o le faamaoni, o alii ua o atu, o le toatele o i latou, mai atunuu o le lalolagi ona o le alolofa i le talalelei; ma o le toatele o i latou ua fananau mai i le feagaiga o le Perisitua Paia, ma ou te tatalo i le Atua e faamanuia ia te outou, ou uso e, i le tele o lona lelei, lona alofa tunoa ma le alofa agalelei, ina ia outou manuia ai i le laueleele, ina ia avea ai outou o ana auauna faamaoni.⁵

O faalapotopotoga a ausilali e mafai ai e tagata uma ona galulue auauna atu i lalo o le pule a le perisitua.

E tulai mai le Perisitua i le ulu. Latou te pulefaamalumalu i mea uma. O le tiute o i latou ua umia le perisitua o le vaavaaia lelei lea o faalapotopotoga uma o le Ekalesia; e le gata i le faalapotopotoga o le Perisitua, ae faapena foi i isi faalapotopotoga uma ua faatuina ina ia manuia ai tagata lautele—-o la tatou Aualofa, Mutuale [Alii Talavou ma Tamaitai Talavou], Peraimeri,… ma isi a tatou faalapotopotoga uma ua faatuina mo le atinaeina o tagata o le Atua ma le manuia o le upumoni ma le amiotonu i le nuu. O nei faalapotopotoga uma e ao ona i ai le tausiga ma le vaaiga faaletaitai ma le faaletama atoa ai ma le manatu loloto mo taitai o le Ekalesia, poo i totonu o le uarota poo i le pulega aoao a le Ekalesia, aua o le Perisitua ua manatu tasi i le manuia o tagata o le Atua ma le atinaeina ma le faatuina o Siona i le lalolagi. Ma o nei faalapotopotoga uma ua fuafuaina, faatuina ma faamanuiaina i le Atua e ao ona vaai atu i nei taitai pulefaamalumalu ma galulue ai i le loto gatasi ma i latou; ma faamamalu ia i latou i o latou tulaga.⁶

E leai se pulega i le Ekalesia a Iesu Keriso e ese mai, pe o i luga poo i fafo o le Perisitua paia poo lana pule. Ua i ai a tatou Aualofa, Mutuale, Peraimeri ma Aoga Sa. … ae o nei faalapotopotoga e le o ni korama poo aufono a le Perisitua, ae o ausilali, ma i lalo ifo; ua faatulagaina i le pule o le Perisitua paia. E le i fafo atu, pe i luga ae, pe e mamao atu e le mafai ona au atu i ai. Latou te iloa le mataupu o le Perisitua. Poo fea lava e i ai i latou ua latou i ai ma le manatu o le faataunuuina o se lelei; o le faaolataga o nisi o agaga, faaletino ma le faaleagaga.⁷

Ou te fia fai atu e tatau i le Aualofa, aemaise lava i le au ofisa aoao o lena faalapotopotoga sili, e tatau ona i ai la latou vaaiga lelei i ana faalapotopotoga uma o tina o Siona. Latou te tulai mai le ulu o i latou uma; e tatau ona latou tulai mai le ulu, ma e ao ona latou faalauteleina o latou valaauga.⁸

E ala atu i faalapotopotoga a ausilali ua mafai ai ona tatou aapa atu ma lima taitaiina, ma ia faaoo atu se aafiaga mo le lelei i le tele o o tatou alii ma tamaitai talavou, se manu e faigata ona oo atu i ai le faalapotopotoga a le Perisitua. I le taimi nei, o nei faalapotopotoga ua latou faataunuuina ni galuega faavae silisili.⁹

Ou te tatalo i le Atua e faamanuia ia tatou faalapotopotoga o ausilali uma, mai le muamua seia oo i le mulimuli, ina ia latou faia o latou tiute, ina ia latou lē nofonofo paie ma lē galulue. … E saogalemu i tatou pe a tatou faia, pe a tatou galulue, pe a tatou naunau, pe a tatou galulue i le faia o o tatou tiute, ma pe a i ai lenei mea ia i tatou ua saogalemu i tatou, aua ua i ai i tatou i aao o le Atua ae lē o lima o le tiapolo.¹⁰

E ao ona tatou galulue uma mo le manuia ma le faaolataga o isi.

Afai ua tatou i ai i o tatou tiute, ua tatou auai i se faamoemoega sili ma le matagofie. E matua taua lava mo o tatou manuia taitoatasi aua o alii ma tamaitai uma lava ua osia nei feagaiga o le talalelei, e ala i le salamo ma le papatisoga, e tatau ona lagona i le avea ai o ni tagata taitoatasi o lo latou tiute tumau le faaaoga o lo latou poto, ma le filifiliga saoloto ua tuuina i ai e le Alii, mo le faalauiloaina o le manuia o Siona ma le faatuina o lona faamoemoega i le lalolagi.¹¹

E ao ona tatou naunautai uma e galulue mo le manuia ma le faaolataga o tagata—e ositaulagaina o tatou lava manaoga ma lagona mo le lelei o tagata uma, ia atoatoa le naunautaiga e faia le finagalo o le Silisiliese, e aunoa ma so tatou manao ae ia auauna mo le faamoemoega o le Alii. .

Ua tatou galulue mo le faaolataga o agaga, ma e ao ona tatou lagona o le tiute silisili lenei ua tuuina mai ia i tatou. O lea, e ao ona tatou lagona le naunautai e ositaulaga mea uma, pe a manaomia, mo le alofa i le Atua, le faaolataga o tagata, ma le manumalo o le malo o le Atua i luga o le fogaeleele.¹²

Tatou te tulimatai i le aso… o le a malamalama ai aufono uma o le Perisitua o le Ekalesia a Iesu Keriso o le Au Paia o Aso e Gata Ai i o latou tiute; o le a faataunuuina o latou matafaioi, o le a faalautele o latou valaauga, ma faatumu lona avanoa i le Ekalesia, i le mea silisili, e tusa ai ma le poto ma le tomai ua i ai. … Sa fuafuaina ma faamalamalamaina e le Alii lenei mea mai le amataga, ma ua ia faia le avanoa i le Ekalesia ina ia mafai ai ona faamalieina manaoga uma e ala i le faalapotopotoga o le Perisitua. Ua faamaonia le faapea mai o le Ekalesia ua atoatoa lona faatulagaina. Pau le faaletonu o nei faalapotopotoga ua le manatu atoatoa i le valaauga ua i o latou luga. Afai o le a latou magafagafa i ai i tulaga moomia mo i latou, o le a latou faataunuuina o latou tiute ma le faatuatua, ma o le a sili ona malosi le galuega a le Alii ma sili le mamana ma faatosinaloto i le lalolagi.¹³

E ao i tagata taitoatasi ona lagona i lona loto le taua o le faia o lana vaega i le galuega tele i aso e gata ai. E ao i tagata uma ona saili ina ia avea o ni mea faigaluega i lona faalualuina i luma. E sili atu i lo lena, o le tiute o tagata taitoatasi o loo maua se vaega o le pule o le perisitua paia, le faalauteleina ma faamamalu i lena valaauga, ae leai se isi mea e sili atu ona tatou amata ai nai lo iinei lava, i totonu ia i tatou pe a tatou faamama ia i tatou lava, faamama o tatou lava loto, faatonu o tatou olaga, faaleleia o tatou mafaufau i le faia o o tatou tiute atoatoa i le Atua ma le tagata, o le a tatou saunia e tuuina atu se aafiaga mo le lelei i le li’o o le aiga, i le nuu, ma soo se mea lava o i ai.¹⁴

O alii ma tamaitai ua faamaoni i luma o le Atua, o e ua agai i luma ma le lotomaualalo, ua faia o latou tiute, totogi a latou sefuluai, ma ola ai i lena talitonuga mama ma le lē pona i luma o le Atua ma le Tama, o le asiasi i e ua matuaoti ma e ua oti a latou tane i o latou puapuaga ma tausia le tagata ia mama mai le lalolagi [tagai Iakopo 1:27], ma e ua fesoasoani e tausi e ua matitiva; ma e ua faamamalu i le perisitua paia, ma ua le faatamala, o e tatalo i o latou aiga, ma e ua faafetai i le Alii i o latou loto, o le a latou fausia se faavae e le mafai e faitotoa o seoli ona faaumatia, ma afai e oo mai lologa ma afatia o latou fale, o le a le pauu, aua ua faavaeina i luga o le papa o le upumoni e faavavau [tagai Mataio 7:24–27].¹⁵

Fautuaga mo Suesuega

O le a le aoaoga mo i tatou e faatatau i le faaaogaina o le pule o le perisitua mai le faataitaiga a Iesu Keriso?
E faapefea ona avea le faauuga i le perisitua o se “valaauga i le auaunaga ma le lotomaualalo”?
O a faamoemoega o faalapotopotoga o ausilali a le Ekalesia? E faapefea ona latou faamanuia i tagata o le Ekalesia? Aisea e taua ai le iloa o ausilali o loo galulue i lalo o le taitaiga a le perisitua?
O a faamanuiaga o le lagolagoina ma le faamamaluina o le tasi i le isi i o tatou valaauga ma tofiga i le Ekalesia?
O a o tatou lagona e uiga i le “galulue mo le faaolataga o agaga”? O a nisi o ositaulaga ua faia e nisi e galulue ai mo lo outou faaolataga? O a mea ua outou naunau e ositaulaga ai mo le manuia o isi?
O le a le uiga o le “manatu mamafa” i o outou valaauga? O le a le iuga pe a faia lenei mea?
O le a le uiga o le “agai i luma ma le lotomaualalo”? O a faamanuiaga e oo mai ia i latou e faia lea mea?