Lesona 8, Tahirin-kevitra ho an’ny mpampianatra

Mikatsaka ny hahatakatra ny fifanintonana eo amin’ny samy lahy na eo amin’ny samy vavy sy mitia ireo rahalahy sy rahavavintsika LGBT

Amin’ny maha mpianatr’i Jesoa Kristy antsika dia asaina isika mba “ho lohalaharana amin’ny fanehoana fitiavana sy fangorahana ary fanoloran-tanana an-tsitrapo” an’ireo izay manana fifanintonana eo amin’ny samy lahy na eo amin’ny samy vavy na milaza ho gai na lesbienne, na bisexuel (Quentin L. Cook, “Let Us Be at the Forefront” [horonan-tsary], ChurchofJesusChrist.org). Ato amin’ity lesona ity ireo mpianatra dia hanana fahafahana hamantatra sy hifanakalo hevitra ary hampihatra ireo fahamarinana ao amin’ny filazantsara izay afaka manampy azy ireo hamaly am-pitiavana sy tsy manilika ary am-panajana ireo izay manana fifanintonana eo amin’ny samy lahy na eo amin’ny samy vavy na milaza ho LGBT.

Sosokevitra enti-mampianatra

Manatsara ny fampianarantsika sy ny fianarantsika

Mampianatra ao anatin’ny fahatakarana sy fangorahana. Rehefa miomana hampianatra ianao dia makà fotoana handinihana ny fahatakaranao ny fifanintonana eo amin’ny samy lahy na eo amin’ny samy vavy sy ny fihetsikao manoloana an’ireo izay milaza ho gai na lesbienne, na bisexuel. Ahoana no hanampianao ireo mpianatra mba hahatsapa fitiavana sy tsy fanilikilihana ary fanajana ny zanak’ Andriamanitra rehetra? Manaraka ny zavatra ampianarin’ireo mpitarika ato amin’ny Fiangonana mahakasika ny fifanintonana eo amin’ny samy lahy na eo amin’ny samy vavy ve ianao? Eo am-piomananao dia hevero ny hijery ny horonan-tsary “Is There a Place for Me?” (4:00), izay hiresahan’ny Loholona D. Todd Christofferson ny maha zava-dehibe ny manampy ny olona rehetra hahatsapa ho ilaina sy tsy voailikilika ato amin’ny Fiangonana.

Mandidy ny mpianany i Jesoa Kristy mba hifankatia tahaka ny itiavany antsika.

Asao ireo mpianatra mba haka sary an-tsaina hoe misy tanora iray antsoina hoe Rasoa manatrika ity kilasin’ny institiota ity. Rehefa fantatr’i Rasoa fa ny fifanintonana eo amin’ny samy lahy na eo amin’ny samy vavy no lohahevitra horesahina androany tonga dia nitebiteby izy ary te hiala, satria milaza ny tenany ho lesbienne izy. Ifanakalozy hevitra ny antony mahatonga an-dRasoa hitebiteby ary inona no azon’ireo mpiara-mianatra atao mba hanampiana azy sy ny hafa tsy hatahotra miresaka momba izany.

Asao ireo mpianatra hamaky ny Matio 22:37–39 sy ny Jaona 13:34–35, hitadiavana ny lanjan’ny fitiavana ny hafa eo imason’ny Ray any An-danitra sy i Jesoa Kristy. Soraty eny amin’ny solaitrabe izao fahamarinana manaraka izao: Didiana isika mba hifankatia tahaka ny itivan’i Jesoa Kristy antsika.

• Nahoana no zava-dehiba ho an’ny mpianatr’i Jesoa Kristy ny mitia ny hafa tahaka ny fitiavany?

• Amin’ny fomba ahoana no nanehoan’i Jesoa Kristy fitiavana tonga lafatra nandritra ny asa fanompoany teto an-tany? (Ao anatin’ny fifanakalozan-kevitra dia ampahatsiahivo ireo mpianatra fa ny fitiavana ny hafa dia tsy midika hoe tsy maintsy manaiky na manohana fitondran-tena izay mifanohitra amin’ireo didin’ Andriamanitra isika. Ny mpamonjy dia nampianatra am-pitiavana ny fotopampianaran’ny Rainy tamim-pahasahiana sy fahazavana.)

• Amin’ny fomba ahoana ny ohatry ny fitiavan’ny Mpamonjy no mitarika antsika mandritra ny firesahantsika momba ny fifanintonana eo amin’ny samy lahy na eo amin’ny samy vavy?

Afaka mamaly an’ireo izay manana fifanintonana eo amin’ny samy lahy na eo amin’ny samy vavy amin-katsaram-panahy sy tsy manilika ary am-panajana isika.

Zarao ho vondrona kely vitsivitsy ny mpianatra. Hazavao fa afaka fotoana fohy dia hifanakalo hevitra ny vondrona tsirairay momba ny rafi-tantara iray ahitana olona manana fifanintonana eo amin’ny samy lahy na eo amin’ny samy vavy. Hazavao fa io rafi-tantara io dia mitovy amin’ny zavatra tena iainan’ny mpikambana sasany ao amin’ny Fiangonana. Mba hanampiana ny mpianatra hampifototra ny fifanakalozan-kevitra amin’ireo fitsipiky ny filazantsara dia azonao atao ny manasa ny vondrona tsirairay mba hijery aloha ny iray amin’ireo fizarana ao amin’ny tahirin-kevitra hoenti-manomana ny fotoam-pianarana.

Rehefa avy nanana fotoana hijerena ny fizarana tandrify azy ireo mpianatra dia omeo tahadikan’ny taratasy zaraina hita any amin’ny faran’ity lesona ity ny mpianatra tsirairay. Omeo toromarika ny mpianatra mba hamaky am-pahanginana ilay toe-javatra ary avy eo dia hifanakalo hevitra momba ireo fanontaniana manaraka izany miaraka amin’ny vondrona.

Rehefa avy nomena fotoana betsaka ireo mpianatra nifampiresahana ny rafi-tantara sy ireo fanontaniana dia asao izy ireo hizara izay nianarany na tsapany nandritra ny fifampiresahan’izy ireo. Eo am-pizaran’ireo mpianatra ny eritreriny, dia hevero ny hametraka fanontaniana fanaraha-maso izay manampy azy ireo hanana fahatakarana lalina kokoa momba ity lohahevitra ity. Ireto misy ohatra amin’ny fandrafetana fanontaniana fanaraha-maso:

• Tamin’ny fomba ahoana izany hevitra/fahamarinana/fitsipika izany no nisy fiantraikany teo amin’ny …

• Inona no tsapanao/hitanao/niainanao …

• Manomeza ohatra iray amin’ny …

• Ahoana no hanaovanao zavatra araka ny finoanao ny …

Aorian’ny fifanakalozan-kevitra dia anontanio ireo mpianatra raha toa ka manana fanontaniana na olana momba ny fifanintonana eo amin’ny samy lahy na eo amin’ny samy vavy izay tsy noresahina izy ireo.

Mba hanampiana ny mpianatra hampihatra ny zavatra nianarany dia hevero ny hampiseho ireto fanontaniana manaraka ireto ary hanasa azy ireo hisafidy iray na mihoatra amin’izany izay manan-danja amin’izy ireo. Amporisiho ireo mpianatra hisaintsaina ny fanontaniany ary hanoratra izay fahatsapana mety hananan’izy ireo.

• Inona no ilaiko ovaina momba ny fomba fieritreretako sy ny fanaovako zavatra mba handraisako ny olona rehetra, tafiditra amin’izany ireo izay manana fifanintonana eo amin’ny samy lahy na eo amin’ny samy vavy am-pitiavana kokoa sy tsy manilika ary am-panajana? Amin’ny fomba ahoana no ahafahako miantehitra amin’ny Mpamonjy rehefa manao ireo fiovana ireo?

• Amin’ny maha olona voasintona amin’ny mitovy fananahana amiko ahy dia amin’ny fomba ahoana ny fifantohana amin’ny Mpamonjy sy ny filazantsarany no manampy ahy hiaina ao anatin’ny fanantenana sy fifaliana lehibe kokoa? Rehefa tsy nizara ny zavatra niainako tamin’ny hafa aho dia iza no azoko atonina mba hanampy? (Fanamarihana: Raha toa ianao ka manapa-kevitra ny hiresaka ny fanananao fahatsapana fifanintonana eo amin’ny samy lahy na ny samy vavy dia eritrereto ombam-bavaka izay olona hiresahana izany sy ny fomba hizarana io lafin-javatra anankiray eo amin’ny fiainanao eto an-tany io.)

Tantaran’i Jackson

Ny fianakaviana mandrakizay: Tahirin-kevitra ho an’ny mpampianatra—Lesona 6

I Jackson dia nobeazina tao amina fianakaviana iray mahatoky ao amin’ Ny Fiangonan’i Jesoa Kristy ho an’ny Olomasin’ny Andro Farany. Manana ray aman-dreny be fitiavana izy ary mifanakaiky be amin’i Selena anabaviny.

Tia ny filazantsara i Jackson ary manana fijoroana ho vavolombelona momba an’i Jesoa Kristy sy ny Famerenana amin’ny laoniny. Malaza amin’ny toetrany falifaly sy sariaka izy. Vao tsy ela anefa dia niova ho alahelo ny fifaliany, ary nihanitokatokana izy. Manana tsiambarateo i Jackson ary tsy fantany izay atao momba izany.

Raha ny fahatsiarovany lavitra indrindra, dia voasintona kokoa amin’ny lehilahy i Jackson noho ny vehivavy. Nandritra ny taona maro dia niezaka tsy niraharaha izany fahatsapana izany izy, na lazainy ho tsy misy izany. Satria tsy mbola noresahina tao an-tranony io lohahevitra io dia tsapany ho resaka tsy azo atao izany. Indraindray ny namany dia manao fanehoan-kevitra manaratsy momba ny gai. Ny zavatra tsaroany avy amin’ireo mpampianatra sy mpitarika ao amin’ny Fiangonana dia hoe fahotana goavana ny fiarahan’olon-droa mitovy fananahana.

Talohan’ny nandehanany nanao asa fitoriana dia nitalaho ombieny ombieny tamin’ Andriamanitra izy mba hanaisotra ny fitiavany lehilahy. Natoky tena izy fa raha nandeha nitory ny filazantsara dia hiova ny fahatsapany. Kanefa hatry ny nahavitan’i Jackson asa fitoriana dia tsy nitsahatra ny fitiavany lehilahy. Naniry mafy ny hiresaka tamin’olona i Jackson, saingy nampangina azy ny tahotra.

Nahatsikaritra ny fialany ara-pihetseham-po tamin’ny fianakaviany i Selena. Hitany ny fanaintainana eo amin’ny masony. Nivavaka ho an’i Jackson izy ary nivavaka mba hahalalany ny fomba hanampiana azy.

Io maraina io dia nanontany an’i Jackson i Selena raha afaka mandehandeha miaraka izy ireo. Nanaiky tsy sazoka izy. Raha nandeha izy ireo dia niresaka momba ny zavatra miseho andavan’andro. Vitan’i Selena mihitsy aza ny nampitsiky an’i Jackson. Farany dia niteny i Selena hoe: “Jackson, fantatro fa misy zavatra tsy milamina. Hitako ao amin’ny masonao izany. Lazao amiko azafady. Tena manahy ny aminao aho.”

Tsy nihetsika naharitra i Jackson. Nanomboka niraraka ny ranomasony. Farany, nipoitra avy tao anaty lalina ny fihetseham-po feno, ary tamin’ny feo mangovitra no nilazany hoe: “Selena, gai aho ary efa ela araka izay fitadidiako. Tsy hitako izay hatao. Matahotra amin’izay holazain’i Dada sy i Neny aho raha mahafantatra izany izy ireo. Ho menatra ny amiko ve ny olona ao amin’ny fianakaviantsika? Mbola te hiaraka hivoaka amiko ve ireo namako raha fantany fa gai aho? Inona no hitranga amin’ny maha mpikambana ahy ao amin’ny Fiangonana raha lazaiko amin’ny eveka izany? Tsy hitako izay hahasambatra ahy sy hananako fianakaviana. Tsapako toa nilaozan’ Andriamanitra aho.”

Niondrika i Jackson ary nijery tamin’ny tany. Rehefa avy nangina elaela dia nilaza moramora izy hoe: “Selena, azafady raha nandiso fanantenana anao aho. Aza tenenina an’iza na iza izany. Mahatsapa ho very sady sahiran-tsaina aho.”

Fanontaniana ifanakalozan-kevitra

1. Inona no fahatsapana anananao momba ny zavatra iainan’i Jackson? Nahoana no mety ho sarotra ny miresaka momba ny fananana fahatsapana fifanintonana eo amin’ny samy lahy na eo amin’ny samy vavy amin’ny havana iray na namana akaiky iray na mpitarika ao amin’ny Fiangonana?

2. Ahoana no mety ho fahatsapanao raha teo amin’ny toeran’i Selena ianao? Inona no azon’i Selena atao mba hamaliana ao anatin’ny fahatakarana sy fangorahana?

3. Amin’ny fomba ahoana no ahafahan’ny fahatakarana marina ireo fampianaran’ny Tompo momba ny fifanintonana eo amin’ny samy lahy na eo amin’ny samy vavy manampy an’i Selena sy i Jackson? Nahoana ireo fampianarana ireo no mety ho zavatra sarotra ekena?

4. Amin’ny fomba ahoana no ahafahan’i Selena sy i Jackson mijery ny fifanintonana eo amin’ny samy lahy na eo amin’ny samy vavy amin’ny fomba fijery mibanjina ny mandrakizay?

5. Aiza no tokony hitodihan’i Jackson mba hahazoana fitarihana sy fampaherezana ary fanampiana fanampiny?

© 2022 an’ny Intellectual Reserve, Inc. All rights reserved.

Tantaran’i Jackson

Ho an’ny lesona manaraka

Asao ireo mpianatra rehefa mandalina ny tahirin-kevitra hoenti-manomana ny fotoam-pianarana ho an’ny lesona 9 mba hanokana fotoana kely ihany koa hianarana momba ireo razambeny ao amin’ny FamilySearch.org na ny application Arbre familial. Amporisiho izy ireo hieritreritra ireo fitahiana nampanantenaina ho an’ireo izay manampy ny razambeny hahazo ireo ôrdônansin’ny famonjena any amin’ny tempoly.