1 Natan si Alma, lapu ed anengneng to a saray salita nen Amulek apadeen to si Zeezrom, lapu ed naimatonan ed si Amulek a naerel to so pantitila to tan say panagpalikdo to a sikato so naderal, tan lapu ed sikato so anengneng da a ginmapo ya ongiwgiw ed pikakabat to ed saray kasalanan to, nilukasan to so sañgi to tan ginapoan to so mansalita ed sikato, tan pian pamintuan to so saray salita nen Amulek, tan ipaliwawa to so saray arum ni a beñgatla, odino pian ilukas to so saray masanto a kasulatan ya iyarum ed saray imbaga nen Amulek.

2 Natan saray salita nen Alma ya imbalikas to ed si Zeezrom nadñgel na saray totoo a wala ed kaliber-liber; lapu ed say karaklan so dakel, tan sikato so nansalita ed onia:

3 Natan Zeezrom, tan anengneng mo a sika so naerel ed panagtilam tan kasiliban mo, tan aliwa lambeñgat a nantila ka ed saray totoo balet sika so nantila ed Dios; tan nia, kabat to so amin a kanunotan mo, tan anengneng mo a saray nonunoten mo so niparungtal ed sikami dia ed panamegley na Espiritu to;

4 Tan anengneng mo a kabat mi a say getmam so sakey a plano a siñga tugtuwa, a siñga met tugtuwa a kasiliban na demonyo, pian tilaan tan palikdoen mo so saraya a totoo pian sugsogan mo ira ya onsumpa ed sikami, a busolen da kami tan ibantak da kami ed paway—

5 Natan saya so plano na dili a kabusol mo, tan inkana to so pakapanyari to ed sika. Natan pilalek ko a nepeg mo a nunoten a say ibagak ed sika ibagak ed amin.

6 Tan nia ibagak ed sikayo ya amin a saya so sakey a patit na kabusol, ya inlira to a pansingkat ed saya a totoo, pian awiten to kayo ed pakaoley to, pian sikayo so liktoben to ed gulonggulong to, pian sikayo so baloren to ed andi-angaan a kadederal, unong ed pakapanyari na panagdakep to.

7 Natan sanen kayari nen Alma ya imbalikas so saraya a salita, si Zeezrom ginmapo ya ongiwgiw a nagkalalo, lapu ed sikato so lalo ya apanisia ra ed pakapanyari na Dios; tan sikato met so anisia a si Alma tan si Amulek so awalaan ira na pikakabat ed sikato, tan sikato so anisia met a kabat da so saray kanunotan tan getma na puso to; lapu ed niiter ed sikara so pakapanyari pian nakabatan da so saraya a beñgatla unong ed espiritu na profesiya.

8 Tan si Zeezrom ginapoan to so mantepet ed sikara a napno na seet, pian nakabatan to a malaglaem so nipaakar ed panarian na Dios. Tan inkuan to ed si Alma: Anto so kabaliksan na sinalita nen Amulek nipaakar ed kioli ed bilay na saray inaatey, ya amin ombañgon manlapu ed patey, mandapag a saray matunong tan saray aliwa a matunong, tan sikara so naawit ya ontalindeg ed arap na Dios pian sikara so naokom unong ed saray kimey da?

9 Tan natan si Alma ginapoan to ya ipaliwawa so saraya a beñgatla ed sikato, a nankuan: Niiter ed dakel so pikakabat ed saray misterio na Dios; angaman ontan sikara so nipasen ed sakey a malet a gangan ya ag ira mañgibaga labat unong ed kabiañgan na salita to a niabuloy ya iter da ed saray anak na saray totoo, unong ed panmotektek tan seet a niiter ed sikato.

10 Tan dia ed ontan, saman so paaweten to so puso to, saman met lamlamang so akaawat na memelag a kabiañgan na salita; tan saman so ag to paaweten so puso to, dia ed sikato niiter so babaleg a kabiañgan na salita, anga ed niiter ed sikato so pakapikabat ed saray misterio na Dios anga ed saraya so nagnap ya amta to la.

11 Tan saraman so paaweten da so saray puso ra, dia ed sikara niiter so memelag a kabiañgan na salita anga ed angapo so amta ra nipaakar ed saray misterio to; tan dia ed ontan sikara so naala a dakepen na demonyo, tan sikara so tengteñgen to ed kaliktan to ed kaaraleman na kadederal. Natan saya so talus na gulonggulong na infierno.

12 Tan si Amulek so nansalita a malinlinew nipaakar ed patey, tan say kioli ed saya a patey ed sakey a kipapasen na ag-ipatey, tan say kaawit ed arap na panañgokoman na Dios, pian sikatayo so naokom unong ed saray kimey tayo.

13 Dia ed ontan no saray puso tayo so anawet, on, no pinaawet tayo so saray puso tayo sumpa ed salita, a lapu ed saya ag narumog ed sikatayo, dia ed saya say kipapasen tayo so makapataktakot, tan dia ed onia sikatayo so nadusa.

14 Tan saray salita tayo so mandusa ed sikatayo; on, amin a kimey tayo so mandusa ed sikatayo; ya ag itayo narumog ya andi-dukit, tan saray kanunotan tayo so mandusa met ed sikatayo; tan dia ed saya a makapataktakot a kipapasen ag tayo nitepel so onseleng ed Dios tayo; tan lablabayen tayo ni a panliketan no nayarian tayo ya igangan so saray ankakabaleg a bato tan saray kapalandeyan ya ongeba ya ontabon ed sikatayo a mañgisanib ed sikatayo ed arap to.

15 Balet saya so ag nayari; nakaukolan a sikatayo so omparungtal tan onalagey ed arap to ed gloria to, tan dia ed pakapanyari to, tan dia ed biskeg, kagalañgan, tan pakaoley to, tan birbiren tayo ed andi-angaan a kababaiñgan tayo ya amin a panañgokom to so matunong; a sikato so matunong ed amin a kimey to, tan sikato so mapañgasi ed saray anak na totoo, tan wala ed sikato so amin a pakapanyari a mañgilaban ed balang sakey a too a manisia ed ñgaran to tan mañgiter na buñga ya ontukoy ed pambabawi.

16 Tan natan nia, ikuan ko ed sikayo onsabi so sakey a patey, iñgen say komadua a patey, a saya so ipatey na espiritu; dia ed saya so sakey a panaon a siopaman ya ompatey ed saray kasalanan to, dia ed ipatey na laman, sikato met so ompatey ed espiritu; on, sikato so ompatey ed saray beñgatla nipaakar ed inkamatunong.

17 Dia ed ontan say panaon sano saray paniñgel da so siñga sakey a louk na apoy tan azufre, a say dalang to mampaatagey ed ando la ya ando; tan saman la so panaon a sikara so nigulonggulong a paleksab ed andi-angaan a kadederal, unong ed pakapanyari tan impakadakep nen Satanas, lapu ed sikara so inoleyan to unong ed kaliktan to.

18 Dia ed ontan, ikuan ko ed sikayo, dia ed sikara siñga angapo so karundon ya agawa; lapu ed ag ira nayari a dundonen unong ed kaptekan na Dios; tan sikara so ag la ompatey, lapu ed angapo la so kabulok na laman.

19 Natan agawa a sanen si Alma sinampotan to la so pambabalikas to ed saraya a salita, saray totoo ginmapo ra a lalo ya onkelaw;

20 Balet wala so sakey ya Antionah, a sikato so pañgulo na saray manañgoley ed limog da, so dinmago tan inkuan to ed sikato: Anto so saya ya imbagam, a say too ombañgon manlapu ed saray inaatey tan nauman manlapu ed saya ya ompatey a paarap ed ag-ompatey a kipapasen, a say kamarerua ag la kapiganman ompatey?

21 Anto so kabaliksan na masanto a kasulatan, a nankuan a say Dios añgipasen na cherubim tan sakey a mandarlang a espada ed bokig na tanamanan na Eden, ag la piga a saray unaan ya atateng tayo so onloob tan mañgan ed buñga na kiew na bilay, tan mambilay ira ya andi-angaan? Tan dia ed onia nanengneng tayo ya angapo so pankanawnawa a sikara so mambilay ed andi-angaan.

22 Natan si Alma inkuan to ed sikato: Saya a beñgatla so ñgalñgalik la ipaliwawa. Natan anengneng tayo a si Adan so nigapol dia ed impañgan to na nisebel a buñga, unong ed salita na Dios; tan dia ed onia nanengneng tayo, a dia ed inkigapol to, amin a totoo so nanmaliw ya abalang tan nigapol a totoo.

23 Tan natan nia, ikuan ko ed sika a no nayari a si Adan so añgan ed buñga na kiew na bilay ed saman a panaon, angapo so patey, tan say salita angapo so kana to, a gawaen to so Dios a matila, lapu ed inkuan to: No mañgan kayo andi-saew ya ompatey kayo.

24 Tan anengneng tayo a say patey onsabi ed amin a katooan, on, saman so patey a sinalita nen Amulek, a saya so patey na laman, angaman ontan wala so dukey na panaon a niiter ed too a pankanawnawa to a mambabawi; dia ed onia saya a bilay so nanmaliw a sakey a panagsubok a kipapasen; sakey a panaon a pamparaan ed piabet ed Dios; sakey a panaon a pamparaan ed say andi-angaan a kipapasen a saya so sinalita mi, a saya dia ed kayari kioli ed bilay na saray inaatey.

25 Natan, no ag lapu ed plano na karundon, a saya so agawa nanlapu la ed inletneg na mundo, angapo so kioli ed bilay na saray inaatey; balet wala so plano na karundon a niletneg, a saya so mañgawit ed kagawa na kioli ed bilay na saray inaatey, a saya so asalita la.

26 Tan natan nia, no komon nen saman saray unaan ya atateng tayo so ag linma ed kiew na bilay ya añgan na buñga sikara so pakaskasi ya andi-angaan, lapu ed angapo so pamparaan da a kipapasen; tan dia ed onia say plano na karundon so ag natuloy, tan say salita na Dios nanmaliw ya angapo so kana, lapu ed angapo so kakanaan to.

27 Balet nia, saya so aliwa ya onia; balet nigena ed saray totoo a sikara so ompatey; tan dia ed kayari patey, sikara so nakaukolan ya onla ed kaokom, saman lamlamang a kaokom a sinalita mi, a saya la so sampot.

28 Tan kayari a say Dios ingena to so saraya a beñgatla ya onsabi ed too, nia, dia ed saya anengneng to a nepeg a say too nakabatan to so nipaakar ed saray beñgatla ya ingena to ed sikara.

29 Dia ed ontan imbaki to so saray angeles a misalita ed sikara, a saya so akaseñgeg a saray totoo anengneng da so gloria to.

30 Tan ginapoan da nanlapu la ed saman a panaon so ontawag ed ñgaran to; dia ed ontan say Dios so akisalita ed saray totoo, tan impakabat to ed sikara so plano na karundon, a saya so niparaan la nanlapu ed inletneg na mundo; tan saya so impakabat to ed sikara unong ed pananisia ra tan pambabawi ra tan saray masanto a kimey da.

31 Dia ed ontan, initer to so saray gangan ed saray totoo, lapu ed unaan ya insumlang da ed unaan a gangan unong ed saray beñgatla a nipaakar ed inkalaman, tan lapu ed nanmaliw ira a siñga Dios, lapu ed kabat da so maong tan mauges, ya impasen da so inkasikara a dili ed kipapasen a makakimey, odino niiyan ira ed sakey a kipapasen a makagawa ira na unong ed linawa ra tan panliketan da, balang la ed pangawa ra na mauges odino maong—

32 Dia ed ontan say Dios initer to ed sikara so saray gangan, kayari ya impakabat to ed sikara so plano na karundon, ya ag ira mangawa na mauges, tan say dusa to nia komadua a patey, a saman a patey so andi-angaan unong ed saray beñgatla nipaakar ed inkamatunong; tan dia ed saman say plano na karundon angapo so pakapanyari to, lapu ed saray kimey na kaptekan ag nayari a naderal, unong ed inkanaspot a kaabigan na Dios.

33 Balet say Dios tinawagan to so saray totoo, dia ed ñgaran na Anak to, (saya so plano na karundon a niletneg) a nankuan: No sikayo so mambabawi, tan ag yo paaweten so saray puso yo, dia ed saya nawalaan ak na panañgasi ed sikayo, dia ed panamegley na Bugbugtong ya Anak ko;

34 Dia ed ontan, siopaman so mambabawi, tan ag to paaweten so puso to, sikato so nawalaan na pankatunoñgan ed panañgasi ed panamegley na Bugbugtong ya Anak ko, onkana ed pamaandi na saray kasalanan; tan sikara so onloob ed painawaan ko.

35 Tan siopaman a paaweten to so puso to tan mangawa na karelmeñgan, nia, isambak ed sanok ko a sikato so ag makaloob ed painawaan ko.

36 Tan natan, kaagian ko, nia ibagak ed sikayo, no paaweten yo so saray puso yo ag kayo makaloob ed painawaan na Katawan; dia ed ontan say karelmeñgan yo so manugsog ed sikato pian palasuren to so sanok to ed sikayo a siñga dia ed inmuna ya inkapasnokan to, on, unong ed salita to ed sampot ya impakapasnok to a siñga nen inmuna, onkana ed andi-angaan a kaderal na saray kamarerua yo; dia ed ontan, unong ed salita to, onkana ed sampot a patey, a siñga met say unaan.

37 Tan natan, kaagian ko, dia ed pakanengneng ko kabat tayo so saraya a beñgatla, tan saraya so tua, mambabawi itayo, tan ag tayo paaaweten so saray puso tayo, pian ag tayo napampasnok so Katawan a Dios tayo a saya so mañgiguyor ed sikatayo na sanok to ed say komadua a gangan to ya initer to ed sikatayo; balet sikatayo so onloob ed painawaan na Dios, a saya so niparaan unong ed salita to.