1 Natan agawa a si Alma ginapoan to so impañgiter to na salita na Dios ed saray totoo, inmuna dia ed dalin na Zarahemla, tan manlapu diman anga ed lapag na amin a dalin.

2 Tan saraya so salita ya imbaga to ed saray totoo a wala ed simbaan a niletneg ed ciudad na Zarahemla, unong ed saray kasulatan to a dili, a nankuan:

3 Siak, Alma, lapu ed pinasanto ak nen amak, a si Alma, a sakey ya atagey a sacerdote ed simbaan na Dios, a wala ed sikato so pakapanyari tan pakaoley a nanlapu ed Dios a mangawa ed saraya a beñgatla, nia, ikuan ko ed sikayo a ginapoan to ya iletneg so simbaan ed saya a dalin a wala ed ketegan na Nephi; on, say dalin a tinawag a dalin na Mormon; on, tan sikato so nambiniag ed saray kaagian to ed saray danum na Mormon.

4 Tan nia, ikuan ko ed sikayo, sikara so nilaban ed saray lima na totoo nen ari Noah, ed panamegley na panañgasi tan pakapanyari na Dios.

5 Tan nengneng yo, dia ed kayari to nia, sikara so niakar ed inkaaripen ed panamegley na lima na saray Lamanite dia ed kalawakan; on, ikuan ko ed sikayo, sikara so adakep, tan lamet say Katawan inlaban to ira a pinmapaway ed inkaaripen ed panamegley na pakapanyari na salita to; tan sikami so naawit ed saya a dalin, tan dia ingapo mi ya iletneg so simbaan na Dios ed lapag na saya a dalin met.

6 Tan natan nia, ikuan ko ed sikayo, kaagian ko, sikayo a miembro na saya a simbaan, a walaan kayo kasi na magenap a pakanodnunot nipaakar ed inkadakep na saray ama yo? On, tan awalaan kayo kasi na magenap a pakanodnunot ed saray panañgasi to tan andukey a panañgitepel ed sikara? Tan arum ni, awalaan kayo kasi na magenap a pakanodnunot ya inlaban to so saray kamarerua ra ed infierno?

7 Nengneng yo, inuman to so saray puso ra; on, sikara so niliing to ed malet ya ugip da, tan sikara so binmañgon ed Dios. Nia, sikara so wala ed otel na kabiluñgetan; angaman ontan, saray kamarerua da so aliwawaan ed panamegley na silew na andi-angaan a salita; on, sikara so aliktob na balor na patey, tan say gulonggulong na infierno, tan say andi-angaan a kadederal so manaalagar ed sikara.

8 Tan natan tepetan takayo, kaagian ko, sikara kasi so aderal? Nia, ibagak ed sikayo, Andi, sikara so ag aderal.

9 Tan lamet ontepet ak, saray balor na patey apaksot, tan say gulonggulong na infierno ya akaliktob ed sikara, naukbar ta? Ikuan ed sikayo, On, saraya so naukbaran, tan saray kamarerua ra so maliket, tan sikara so mancancion na makarundon ya aro. Tan ikuan ko ed sikayo a sikara so nilaban.

10 Tan natan itepet ko ed sikayo no anto so saray nigetar ed inkilaban da? On, anto so señgegan ya awalaan ira na ilalo ed kilalaban? Anto so akaseñgeg na inkaukbaran da ed saray balor na patey, on, tan ontan met ed gulonggulong na infierno?

11 Nia, nayarian ko ya ibaga ed sikayo—ag kasi si amak ya Alma anisia ed saray salita ya imbaga na sañgi nen Abinadi? Tan ag kasi sikato so sakey a masanto a profeta? Ag kasi sinalita to so saray salita na Dios, tan si amak ya Alma anisia ed saraya?

12 Tan unong ed pananisia to wala so baleg ya inkauman a sinmabi ed puso to. Nia ibagak ed sikayo a saya ya amin so tua.

13 Tan nia, impulong to so salita ed saray ama yo, tan baleg ya inkauman met so agawa ed saray puso ra, tan sikara so nampaabeba ed inkasikara a dili tan nanmatalek ira ed tua tan mabilay a Dios. Tan nengneng yo, sikara so nansiansia ya anga ed sampot; dia ed ontan sikara so nilaban.

14 Tan natan nia, tepeten ko ed sikayo, kaagian ko ed simbaan, sikayo kasi so nianak a maespiritu ed Dios? Inawat yo kasi so indeñgan to ed saray kanengneñgan yo? Alikna yo la kasi so baleg ya inkauman ed saray puso yo?

15 Ikakana yo kasi so pananisia ed pananundon na saman so amalsa ed sikayo? Onnenengneng kayo kasi ed arapen ya awalaan na mata na pananisia, tan mumuriaen yo kasi a saya a laman ya ompatey so onoli ya ag ompatey, tan saya a nabulok a laman so onoli ya ag-nabulok, ya ontalindeg ed arap na Dios pian natutolan unong ed saray gawa a ginawa na laman ya ompatey?

16 Ikuan ko ed sikayo, nayarian yo kasi a motekteken ed inkasikayo a dili a nareñgel yo so voces na Katawan, a mankuan ed sikayo, ed saman ya agew: Ondago kayo ed siak sikayo a mapalar, tan nia, saray kimey yo so kimey na inkamatunong ed tapew na dalin?

17 Odino nonunoten yo ed inkasikayo a dili a nayarian yo so mantila ed Katawan ed saman ya agew, tan ikuan yo—Katawan, saray kimey mi so matunong a kimey ed tapew na dalin—tan ilaban to kayo?

18 Odino andi, nanenengneng yo kasi so inkasikayo a dili so naawit ed panagsalaysayan na Dios a saray kamarerua so napno na kasalanan tan pambabawi, lapu ed nanunotan yo so amin a kasalanan yo, on, nagnap a pakanunot ed amin a karelmeñgan yo, on, sakey ya pakanunotan a sikayo so ag añgikabkabilañgan ed saray gangan na Dios?

19 Ikuan ko ed sikayo, nayarian yo kasi so onnengneng ed Dios ed saman ya agew ya awalaan na dalisay a puso tan saray malinis a lima? Ikuan ko ed sikayo, nayarian yo kasi so ontangwa, a wala ed sikayo so indeñgan na Dios a nitatak ed saray kanengneñgan yo?

20 Ikuan ko ed sikayo, say nunot yo sikayo so nayari a nilaban bangbalet iniabuloy yo so inkasikayo ya oleyan na diablo?

21 Ikuan ko ed sikayo, naamtaan yo ed saman ya agew a sikayo so ag nilaban; lapu ed angapo so too a nilaban likud no saray kawes to so alinisan a pinmuti; on, saray kawes to so nakaukolan a napadalisay anga ed saray kaamaan so alinisan ed amin a mansa, ed panamegley na dala na saman so sinalita na kaamaan tayo, a sikato so onsabi a manundon ed saray totoo to manlapu ed saray kasalanan da.

22 Tan natan ontepet ak ed sikayo, kaagian ko, anto so liknaan na balang sakey ed sikayo, no sikayo so ontalindeg ed arap na panagsalaysayan na Dios, a saray kawes yo so amansaan na dala tan amin a kanengneñgan na karutakan? Nia, anto so ipaneknek na saraya a beñgatla sumpa ed sikayo?

23 Nia ag saraya kasi so mamaneknek a sikayo so managpatey, on, tan ontan met sikayo so nankasalanan na amin a nengneng na karelmeñgan?

24 Nia, kaagian ko, ipasen yo kasi a say sakey ya onia wala so pasen to ya onyurong ed panarian na Dios, a kaiba to ra di Abraham, si Isaac, tan si Jacob, tan ontan met ed amin a masanto a profeta, a saray kawes da so alinisan tan angapo so mansa, dalisay tan amputi?

25 Ikuan ko ed sikayo, Andi; likud no panmaliwen yo a say Manamalsa tayo so sakey a matila a nanlapu la ed gapo, odino ipasen yo a sikato so matila a nanlapu la ed gapo, ag yo nayarian ya ipasen a saray onia wala so pasen da ed panarian na tawen; balet sikara so nibantak ed paway lapu ed sikara so anak na panarian na demonyo.

26 Tan natan nia, ibagak ed sikayo, kaagian ko, no akalikna kayo na inkauman na puso, tan no alikna yo a labay yo so mancancion na cancion na makarundon ya aro, ontepet ak, onia kasi so nalilikna yo natan?

27 Sikayo kasi so nankurang, ya inagamil yo ed sikayo a dili ya angapo so pakatetelan ed arap na Dios? Nayarian yo kasi ya ikuan, no sikayo so natawag ya ompatey ed saya a panaon, ed inkasikayo, a sikayo so nagnap nampaabeba? A saray kawes yo so alinisan tan apaputi ed panamegley na dala nen Cristo, a sikato so onsabi a manundon ed saray totoo to manlapu ed saray kasalanan da?

28 Nia, inekal yo la kasi so kinon? Inkuan ko ed sikayo, no andi sikayo so ag ni akaparaan a miabet ed Dios. Nia nepeg yo so mamparaan a masiglat; lapu ed say panarian na tawen asinger la ya onsabi, tan say sakey ya onia ag nawalaan na andi-angaan a bilay.

29 Nia, ikuan ko, wala kasi so sakey ed sikayo ya ag naekalan na ibeg? Ibagak ed sikayo a say onia so ag akaparaan; tan pilalek ko a sikayo so mamparaan a masiglat, lapu ed say oras asinger la ya onsabi, tan ag to amta no kapigan so isabi na panaon; tan say sakey ya onia so ag narumog ya angapo so kasalanan.

30 Tan lamet ikuan ko ed sikayo, wala kasi so sakey ed limog yo a manlodlurey ed agi to a laki, odino ibubonton to ed sikato so panamasegsegang?

31 Abagey so ontan a sakey, lapu ed sikato so ag akaparaan, tan say panaon so natan la a sikato so nakaukolan a mambabawi, odino andi sikato so ag nilaban!

32 On, iñgen abagey kayo ya amin a managkimey na kaugsan; mambabawi kayo, mambabawi kayo, lapu ed say Katawan a Dios so añgibaga ed saya!

33 Nia, ipapasabi to so sakey a panbaga ed amin a totoo, tan say taklay na panañgasi so akaunat ed sikara, tan inkuan to: Mambabawi kayo, tan awaten takayo.

34 On, inkuan to: Ondago kayo ed siak tan sikayo so mibiang ed buñga na kiew na bilay; on, sikayo so mañgan tan oninum ed tinapay tan danum na bilay a bulos;

35 On, ondago kayo ed siak tan awit yo so saray kimey na inkamatunong, tan sikayo so ag nabatang tan nibantak ed apoy—

36 Tan nia, say panaon asinger la tan siopaman ya ag mañgiter na maong a buñga, odino siopaman ya ag mangawa na kimey na inkamatunong, wala ed sikato met lamlamang so señgegan a mandageyem tan manermen.

37 O sikayo a managkimey na karelmeñgan; sikayo a pinasibok na saray andi-kakanaan a beñgatla na mundo, sikayo a mankonkonwari a kabat yo so saray dalan na inkamatunong angaman sikayo so abalang, a siñga sakey a karnero ya angapo so managpastol to, angaman wala so sakey a managpastol ya anawag ed sikayo tan sikato ni a siansia so ontatawag ed sikayo, balet ag yo dedeñgelen so voces to!

38 Nia, ikuan ko ed sikayo, a say maong a managpastol so mantawag ed sikayo; on, tan dia ed ñgaran to a dili tatawagen to kayo, a saya a ñgaran so Cristo; tan no ag yo deñgelen so voces na maong a managpastol, dia ed ñgaran ya akatawagan yo, nia, aliwa kayo a karnero na maong a managpastol.

39 Tan natan no sikayo so aliwa a karnero na maong a managpastol, anto sirin so olop a kawalaan yo? Nia, ikuan ko ed sikayo, a say demonyo so managpastol yo, tan sikayo so kabiañgan na saray olop to; tan natan, siopa so makapañgiburi ed saya? Nia, ikuan ko ed sikayo, siopaman so mañgiburi ed saya so sakey a matila tan anak na demonyo.

40 Tan ikuan ko ed sikayo ya antokaman a maong so manlalapu ed Dios, tan antokaman a mauges so manlalapu ed demonyo.

41 Dia ed ontan, no say sakey a too so mañgaawit na maong a kimey sikato so ondedeñgel ed voces na maong a managpastol, tan sikato so ontutumbok; balet siopaman a mañgaawit na mauges a kimey, sikato met lamlamang so manmaliw ya anak na demonyo, lapu ed sikato so ondedeñgel ed voces to, tan sikato so tutumboken to.

42 Tan siopaman so mangagawa ed saya nakaukolan ya awaten to so tumang a manlapu ed sikato; dia ed ontan, say awaten to a tumang to patey, unong ed saray beñgatla a nipaakar ed inkamatunong, lapu ed sikato so inatey ed amin a maong a kimey.

43 Tan natan, kaagian ko, pilalek ko ya ondeñgel kayo ed siak, lapu ed mansasalita ak ed amin a biskeg na kamareruak; tan nia, nansalita ak ed sikayo a malinlinew pian ag kayo naliñgo, odino nansalita ak unong ed saray gangan na Dios.

44 Lapu ed atawag ak a mansalita ed onia a kanengneñgan, unong ed masanto a gangan na Dios, a wala ed Cristo Jesus; on, nigangan ak ya ontalindeg tan mampaneknek ed saya a totoo ed saray beñgatla a sinalita na kaamaan tayo nipaakar ed saray beñgatla ya onsabi.

45 Tan aliwa a saya ya amin. Ag yo kasi pankelawan a kabat ko so saraya ya amin a beñgatla ed inkasiak? Nia, paneknekan ko ed sikayo a saraya a beñgatla a sinalitak so tua. Tan panon ya ipasen yo a kabat ko a petepeteg so katuaan da?

46 Nia, ibagak ed sikayo a saraya so impakabat ed siak ed panamegley na Masanto ya Espiritu na Dios. Nia, siak so nanayuno tan nampikasi ed dakel ya agew pian saraya so nakabatan ko ed inkasiak a dili. Tan natan kabat ko ed siak a dili a saraya so tua; lapu ed say Katawan a Dios so imparungtal to ed siak ed panamegley na Masanto ya Espiritu; tan saya so espiritu na puyan a wala ed siak.

47 Tan nagkalalo ni, ikuan ko ed sikayo a saya so nipuyan ed siak, a saray salita ya imbalikas na kaamaan tayo so tua, iñgen angan unong ed espiritu na profesiya a wala ed siak, a saya so unong met ed panañgipalikna na Espiritu na Dios.

48 Ikuan ko ed sikayo, a kabat ko ed inkasiak a dili ya antokaman ya ibagak ed sikayo, nipaakar ed saray onsabi, so tua; tan ikuan ko ed sikayo, a kabat ko a si Jesu Cristo so onsabi, on, say Bugbugtong ya Anak na Ama, a napno na gracia, tan panañgasi, tan katuaan. Tan nengneng yo, sikato so onsabi a mamaandi ed saray kasalanan na mundo, on, say kasalanan na balang sakey a too a walaan na ag-nagiing a pananisia ed ñgaran to.

49 Tan natan ikuan ko ed sikayo a saya so gangan ya inkatawagan ko, on, say mampulong ed saray inararok a kaagian, on, tan ed balang sakey a manaayam ed dalin; on, say mampulong ed amin, mandapag a matakken tan malangwer, mandapag ya aripen tan bulos; on, ikuan ko ed sikayo a mamatakken, tan ontan met ed saray katayatdang, tan saray ontatayatdang a kailalakan; on, ibelyaw ko ed sikara a nakaukolan da so mambabawi tan nianak lamet.

50 On, onia so imbaga na Espiritu: Mambabawi kayo, sikayo ya amin a kasampotan na dalin, lapu ed say panarian na tawen so asinger la; on, say Anak na Dios onsabi la ed gloria to, ed biskeg, kagalañgan, pakapanyari tan pakaoley to. On, inararok a kaagian, ikuan ko ed sikayo, lapu ed say Espiritu inkuan to: Nia, say gloria na Ari ed amin a dalin; tan say Ari met na tawen so ag la mabayag onsinag ed limog na amin ya anak na totoo.

51 Tan ontan met say Espiritu inkuan to ed siak, on, a mannañgis ed maksil a voces, a mankuan: Onla ka tan ibagam ed saraya a totoo—Mambabawi kayo, tan likud no sikayo so mambabawi ag yo nayarian a tawiren so panarian na tawen.

52 Tan lamet ikuan ko ed sikayo, say Espiritu inkuan to: Nia, say wasay so akagaton ed lamut na kiew; dia ed ontan balang sakey a kiew ya ag mañgiter na maong a buñga so nabatang tan ibantak ed apoy, on, sakey ya apoy ya ag naopot, iñgen sakey ya apoy ya ag naerep. Nia, nunot yo, a say Masanto a Bugtong so nansalita ed saya.

53 Tan natan inararok a kaagian, ikuan ko ed sikayo, nayarian yo kasi ya itepel so saraya a balikas; on, nayarian yo kasi ya ipulisay so saraya a beñgatla, tan gatinan so Masanto a Bugtong ed silong na saray sali yo; on, nayarian yo kasi so onsibuk ed kinon na saray puso yo; on, nayarian yo kasi ya ipasuot so pansulong yo ed saray ankabli a kawes tan iyapasakey yo so saray puso yo ed saray andi-kakanaan a beñgatla na mundo, dia ed saray kayamanan yo?

54 On, ipasuot yo kasi ni ya ipasen a magmaong kayo nen say arum; on, ipasuot yo kasi ni so panagpasegsegang ed saray kaagian yo, a nampaabeba ed inkasikara a dili tan sikara so mankokurang ed masanto a gangan na Dios, no iner saya so makaseñgeg na inkaawit da ed saya a simbaan, lapu ed sikara so pinasanto na Masanto ya Espiritu, tan añgawit ira na saray kimey a manepeg ed pambabawi—

55 On, tan ipasuot yo kasi ni so pañgibeneg ed saray duka, tan saray mankakaukolan, tan pañgisiblet ed saray tagano yo ed sikara?

56 Tan kasampotan, amin yo a mañgipasuot ed saray karelmeñgan yo, ikuan ko a sikayo so nabatang tan nibantak ed apoy likud no masiglat kayo a mambabawi.

57 Tan natan ikuan ko ed sikayo, sikayo ya amin a mampilalek ya ontumbok ed voces na maong a managpastol, ondago kayo ya ompaway ed saray marelmeng, tan sikayo so onsian, tan ag yo didiwiten so saray marutak a beñgatla; tan nia, saray ñgaran da so nabural, pian say ñgaran na saray marelmeng so ag nibilang ed saray ñgaran na matunong, pian say salita na Dios so nasumpal, ya inkuan to: Saray ñgaran na saray marelmeng ag nilaok ed ñgaran na saray totook;

58 Tan say kañgaranan na saray matunong so nisulat ed libro na bilay, tan dia ed sikara iter ko so tawir ed nikawanan a limak. Tan natan, kaagian ko, anto so nayarian yo ya ibaga sumpa ed saya? Ikuan ko ed sikayo, no mansalita kayo na sumpa ed saya, andi bali, lapu ed say salita na Dios nakaukolan a nasumpal.

59 Tan anto a managpastol so wala ed limog yo ya awalaan na dakel a karnero no ag to ra bantayan, pian saray lubo ag makaloob tan mañgan ed saray karnero to? Tan nengneng yo, no say lubo so onloob ed koral na saray karnero to ag to ra kasi abolen a papawayen? On, tan dia ed kaunoran, no nayarian to, saya so pateyen to.

60 Tan natan ikuan ko ed sikayo a say maong a managpastol tawagen to kayo; tan no deñgelen yo so voces to awiten to kayo ed olop na papastolan to, tan sikayo so karnero to; tan ibaga to ed sikayo ya ag yo aabuloyan so saray masisiba a lubo ya onloob ed limog yo, pian sikayo so ag naderal.

61 Tan natan siak, Alma, igangan takayo ed salita na saman so añgigangan ed siak, a sumpalen yo so saray salita ya imbalikas ko ed sikayo.

62 Mansalita ak ed panamegley na sakey a gangan ed sikayo a miembro na simbaan; tan dia ed saray aliwa a miembro na simbaan mansalita ak ed panamegley na sakey a panbaga, a mankuan: Dago kayo tan mampabiniag kayo onkana ed pambabawi, pian sikayo met so minabang ed buñga na kiew na bilay.