1 Tan natan, agawa dia ed komaduamplo tan anem a taon ya oley na saray okom ed saray totoo nen Nephi, nia, sanen abañgon so saray Lamanite ed unaan a kabuasan na unaan a bulan, nia, nalmo ra ya inatey si Amalickiah ed dili ya abong-abong to ya abel; tan anengneng da met a si Teancum so akaparaan a mibakal ed sikara ed saman ya agew.

2 Tan natan, sanen saray Lamanite anengneng da so saya sikara so ataktakot; tan pinaulian da la so plano da ya onkurang a mamaarap ed dalin a mamabaybay, tan sikara so sinmener a kaiba ra so amin a ñgayew da ed ciudad na Mulek, tan inanap da so kiagel da ed saray pasen ya asalimbeñgan.

3 Tan agawa a say laki ya agi nen Amalickiah so aturo ya ari ed saray totoo; tan say ñgaran to Ammoron; dia ed onia si ari Ammoron, say laki ya agi nen ari Amalickiah, so aturo a manoley ed pasen to.

4 Tan agawa ya ingangan to ed saray totoo to a pagnayonen da so saray ciudad, a naala ra ed panamegley na impamaterter da na dala; lapu ed angapo so naala ra a ciudad likud ed interter na dakel a dala.

5 Tan natan, anengneng nen Teancum a saray Lamanite mabiskeg so linawa ra a pagnayonen so saray ciudad ya asamsam da, tan saray kabiañgan na dalin ya akayarian da; tan ontan met dia ed impakanengneng to ed kinarakel na bilang da, si Teancum anunotan to ya ag manepeg a salsalien da so ondugpa ed sikara ed saray salimbeñgan da.

6 Balet impanayam to so saray totoo to ed kaliber-liber, a siñga sikara so mangagawa na paraan onkana ed bakal; on, tan dia ed tua sikato so mampaparaan a mañgiagel na inkasikato sumpa ed sikara, dia ed panamegley na impampaalagey da na padir a mampaliber tan namparaan ira na pasen a panamotan da.

7 Tan agawa a sikato so nampatuloy a mampaparaan ed bakal anga ed si Moroni so añgibaki na baleg a bilang na totoo a mamabiskeg ed ñgayew to.

8 Tan si Moroni so añgipawit met na gangan ed sikato ya itilak to so saray adakep a naplag ed lima to; lapu ed saray Lamanite dakel so saray nala ra ya adakep, kanian itilak to so saray adakep to a Lamanite ya onkana a salat na saray adakep na saray Lamanite.

9 Tan añgipawit met na gangan ed sikato a salimbeñgan da so dalin na Bountiful, tan bantayan da so makisir a dalan a mamaarap ed dalin a mamabaybay, ag la piga naala na saray Lamanite so saman a pasen tan nawalaan ira na pakapanyari a sigen-sigenen ira ed amin a diking.

10 Tan si Moroni so añgipawit met ed sikato, a pilalek to a sikato so manmaliw a matuor a pagnayonen to so saman a biang na dalin, tan anapen to so balang sakey a pankanawnawa a pairapen so saray Lamanite ed saman a biang na dalin, ed angaan na pakapanyari a wala ed sikato, ag la piga dia ed panamegley na kasiliban odino arum a pamaakaran nabawi ra lamet so saraman a ciudad ya asamsam ed lima ra; tan nepeg to met a salimbeñgan tan pabiskegen so saray ciudad ed kaliber-liber, ya ag ni naplag ed lima na saray Lamanite.

11 Tan inkuan to met ed sikato; Onla ak ed sika, balet nia, saray Lamanite so wala ra dia ed kawalaan mi dia ed ketegan na dalin ed sagur na dayat; tan nia, siak so onla sumpa ed sikara, dia ed ontan ag ak makakar ed sika.

12 Natan, say ari (Ammoron) so tinmaynan ed paway na dalin na Zarahemla, tan impakabat to ed reyna so nipaakar ed impatey nen agi to, tan akatipon na dakel a bilang na lalaki, tan sikato so kinmurang sumpa ed saray Nephite ed ketegan na sagur a dayat.

13 Tan dia ed onia panseseetan to a sigen-sigenen so saray Nephite, tan ayaten to ya iarawi so kabiañgan na ñgayew da ed saman a biang na dalin, legan ya ingangan to ed saraman so intilak to a kayarianen da so saray ciudad a naala da, a sigen-sigenen da met so saray Nephite a wala ed ketegan na bokig a dayat, tan kayarianen da so saray dalin da unong ed pakapanyari a wala ed sikara, unong ed pakapanyari na saray ñgayew da.

14 Tan dia ed onia a maatap a kipapasen so kawalaan na saray Nephite ed kasampotan na komaduamplo tan anem a taon ya oley na saray okom ed saray totoo nen Nephi.

15 Balet nia, agawa ed komaduamplo tan pito a taon ya oley na saray okom, a si Teancum, dia ed gangan nen Moroni—a sikato so añgiletneg na saray ñgayew a mañgiagel ed abalaten tan sagur a ketegan na dalin, tan ingapo to so kurang to a mamaarap ed dalin na Bountiful, pian tuloñgan to si Teancum a kaiba to so saray totoo to ed pambawi na saray ciudad ya abalang da—

16 Tan agawa a si Teancum so akaawat na gangan a dugpaan to so ciudad na Mulek, tan saya so bawien to no nayari.

17 Tan agawa a si Teancum ginawa to so paraan pian ondugpa ed ciudad na Mulek, tan onkurang a kaiba to so ñgayew to sumpa ed saray Lamanite; balet anengneng to ya ag-nayari a kapiganman a taloen to ra legan a wala ni ra ed saray salimbeñgan da; dia ed ontan pinaulyan to so plano to tan sikato so amawil lamet ed ciudad na Bountiful, pian alagaren to so isabi nen Moroni, pian naawat to so biskeg na saray ñgayew to.

18 Tan agawa a sinmabi si Moroni a kaolop to so ñgayew to ed dalin na Bountiful, dia ed saguinunor a sampot na komaduamplo tan pito a taon ya oley na saray okom ed saray totoo nen Nephi.

19 Tan dia ed ingapo na komaduamplo tan walo a taon, si Moroni tan si Teancum tan dakel ed saray pañgulo a kapitan so nantatalusan ira nipaakar ed bakal—no anto so gawaen da pian napapaway da so saray Lamanite a mibakal sumpa ed sikara; odino dia ed antokaman a pamaakaran nasagyat da ra ya ompaway ed saray salimbeñgan da, pian makagamor ira na pankanawnawa ed sikara tan naala ra lamet so ciudad na Mulek.

20 Tan agawa ya añgibaki ra na totoo a mitalusan ed ñgayew na saray Lamanite, a mañgiagel ed ciudad na Mulek, ed pañgulo ra, a say ñgaran to Jacob, a pilalek da ed sikato so ompaway a kaiba to so saray ñgayew to ed patar a nambaetan na duara a ciudad. Balet nia, si Jacob, a sakey a Zoramite, ag to labay so ompaway a kaiba to so saray ñgayew to a miabet ed sikara dia ed patar.

21 Tan agawa a si Moroni, lapu ed angapo la so ilalo to a miarap ira ed matunong tan patas a kipapasen, dia ed ontan, nannunot na sakey a plano pian naayat to so saray Lamanite ya ompaway ed saray salimbeñgan da.

22 Dia ed ontan ingangan to ed si Teancum a mañgawit na daiset a bilang na totoo tan sikara so mankurang ed gilig na dayat; tan si Moroni tan saray ñgayew to, dia ed labi, so kinmurang ed kalawakan, dia ed sagur na ciudad na Mulek; tan dia ed onia, dia ed kaimbuasan, sanen saray bantay na saray Lamanite asukayan da si Teancum, sikara so binmatik tan imbaga ra ed si Jacob, a pañgulo ra.

23 Tan agawa a saray ñgayew na Lamanite so kinmurang ira sumpa ed si Teancum, lapu ed impasen da a dia ed bilang da taloen da si Teancum lapu ed kinamelag na bilang da. Tan sanen anengneng nen Teancum so saray ñgayew na Lamanite ya ompapaway sumpa ed sikato ginapoan to so onsener ya amaarap ed gilig na dayat, a mamabaybay.

24 Tan agawa a sanen anengneng na saray Lamanite a ginapoan to so ombatik, binmiskeg so linawa ra tan inosilan da ra ed ontan la a biskeg. Tan legan ya aayaten nen Teancum ira a makaarawi so saray Lamanite ya onoosil ed sikara ya andi-kana, nia, ingangan nen Moroni ed kabiañgan na ñgayew to a kaiba to a sikara so onkurang a paloob ed ciudad, tan saya so kayarianen da.

25 Tan onia so ginawa ra, tan pinatey da ya amin so saray atilak a mañgiagel ed ciudad, on, amin ya ag da isuko so saray agamil da ed bakal.

26 Tan dia ed onia agamoran nen Moroni so pankayarian na ciudad na Mulek a kaiba so kabiañgan na ñgayew to, legan a sikato so kinmurang a kaiba to so saray akeraan ya onabet ed saray Lamanite no sikara so ompawil ed pañgoosil da ed si Teancum.

27 Tan agawa a saray Lamanite inosilan da si Teancum anga ed akasabi ra ed asinger na ciudad na Bountiful, tan dia ed saya sikara so inabet nen Lehi tan sakey a melag a ñgayew, a sikara so atilak a mañgiagel ed ciudad na Bountiful.

28 Tan natan nia, sanen anengneng na saray pañgulo a kapitan na Lamanite si Lehi a kaiba to so saray ñgayew to ya onsasabi sumpa ed sikara, sikara so binmatik ya agulo-gulo, ag la piga ag da nagamoran so ciudad na Mulek sakbay a naabot ira nen Lehi; lapu ed sikara so abanalan lapu ed impankurang da, tan saray totoo nen Lehi so ag ni naksawan.

29 Natan ag amta na saray Lamanite a dia ed benegan da wala diman si Moroni a kaiba to so saray ñgayew to; tan say tatakotan da labat si Lehi tan saray totoo to.

30 Natan ag pilalek nen Lehi ya osilan to ra anga ed naabet da si Moroni tan saray ñgayew to.

31 Tan agawa sakbay a saray Lamanite so makasener a paarawi sikara so aliktob la na saray Nephite, na saray totoo nen Moroni ed sakey a dapag, tan saray totoo nen Lehi ed biek a dapag, a sikara ya amin so ag ni naksawan tan napno ni ra na biskeg; balet saray Lamanite mapalalo la so banal da lapu ed andukey ya impankurang da.

32 Tan ingangan nen Moroni so saray totoo to a dugpaan da ra anga ed isuko ra so saray agamil da ed bakal.

33 Tan agawa a si Jacob, lapu ed sikato so pañgulo ra, lapu ed sikato so sakey met a Zoramite, tan lapu ed sikato so awalaan na ag-nadaeg ya espiritu, impañgulo to so saray Lamanite a milaban ed mapalalo a sanok sumpa ed si Moroni.

34 Si Moroni lapu ed wala la ra ed dalan da, dia ed ontan maksil so linawa nen Jacob a mamatey ed sikara tan mangawa na dalan a mamaarap ed ciudad na Mulek. Balet nia, si Moroni tan saray totoo to so lalo a makapanyari; dia ed ontan ag ira añgiter na puñget ed saray Lamanite.

35 Tan agawa a sikara so akilaban ed duara a lima da ed mapalalo a sanok; tan dakel so saray inaatey ed nantupag a dapag; on, tan si Moroni asugatan tan si Jacob so apatey.

36 Tan si Lehi so dinmesdes ed beneg ed mapalalo a sanok a kaiba to so saray mabiskeg a totoo to, a lapu ed saya saray Lamanite a wala ed benegan insuko ra so saray agamil da ed bakal; tan saray atilak ed sikara, lapu ed agulo-gulo la ra, ag da la amta so arap-arapen da odino pañgabilan da.

37 Natan anengneng nen Moroni so gulo ra, inkuan to ed sikara: No awiten yo dia so saray agamil yo ed bakal tan saraya so isuko yo, nia itonda mi so pamaterter na saray dala yo.

38 Tan agawa sanen nadñgel na saray Lamanite so saraya a salita, saray pañgulo a kapitan da, amin na saraman so ag inatey, so dinmago tan imbuntok da so saray agamil da ed bakal ed saliyan nen Moroni, tan ingangan da met ed saray totoo ra ya ontan met so gawaen da.

39 Balet nia, dakel ed sikara so ag malabay; tan saraman so ag da labay ya isuko so saray espada da so inala ra tan binalor da, tan inekal da ed sikara so saray agamil da ed bakal, tan sikara so apasuot a manakar a kaiba ra so saray kaagian da a mamaarap ed dalin na Bountiful.

40 Natan say bilang na saray adakep a naala ra apalabsanan to so kinarakel na bilang na saray inaatey, on, dakel nen say bilang na saray apatey ed nantupag a dapag.