1 Tan agawa a saray Amalekite tan saray Amulonite tan saray Lamanite a wala ed dalin na Amulon, tan ontan met ed saray wala ed dalin na Helam, tan saraman so wala ed dalin na Jerusalem, tan dia ed antikey a salita, dia ed amin a dalin a wala ed kaliber-liber, a sikara so ag apasimbalo ed pananisia tan ag da inala ed inkasikara so ñgaran ya Anti-Nephi-Lehi, so kinewkew na saray Amalekite tan saray Amulonite a mampasnok ed saray kaagian da.

2 Tan say busol da so nanmaliw a mapalalo sumpa ed sikara, anga ed asabi a sikara so sinmaluñgat ed ari ra, ya asabisabi ya ag da labay a birbiren a sikato so ari ra; dia ed ontan, inala ra so saray ayura ra sumpa ed saray totoo ya Anti-Nephi-Lehi.

3 Natan say ari iniawat to so panarian ed anak to a laki, tan sikato so atawag ed ñgaran ya Anti-Nephi-Lehi.

4 Tan say ari so inatey ed saman lamlamang a taon a saray Lamanite ginapoan da so mangawa na paraan ed bakal sumpa ed saray totoo na Dios.

5 Natan sanen si Ammon tan saray kaagian to tan amin ya akiolop ed sikato anengneng da so pampaparaan na saray Lamanite a manderal ed saray kaagian da, sikara so linma ed dalin na Midian, tan diman si Ammon akapitungtong ed amin a kaagian to; tan nanlapu diman linma ra ed dalin na Ishmael pian tibukelen da so sakey a tugyop na konuan ed si Lamoni tan ontan met ed si agi to ya Anti-Nephi-Lehi, no anto so gawaen da a pañgiagel ed inkasikara sumpa ed saray Lamanite.

6 Natan angapo so angan sakey a kamarerua ed limog na saray totoo ya apasimbalo ed pananisia ed Katawan so mandemet na ayura sumpa ed saray kaagian da; andi, ag ira mangawa na antokaman a paraan ya onkana ed bakal; on, tan ontan met na ari ra ingangan to ed sikara ya ag da gawaen.

7 Natan, saraya so imbalikas to a salita ed saray totoo nipaakar ed saya a pamaakaran: Misalamat ak ed Dios ko, inararok a totook, lapu ed say baleg a Dios tayo dia ed kaabigan to imbaki to so saraya a kaagian tayo, saray Nephite, ed sikatayo a mampulong, tan mankuyong ed sikatayo nipaakar ed saray sisia a tawir na saray marelmeng ya ama tayo.

8 Tan nia, misalamat ak ed makapanyari a Dios ko a sikato so añgiter ed sikatayo na kabiañgan na Espiritu to a mamalemek ed saray puso tayo, lapu ed nilukasan tayo so pikakaaro ed saraya a kaagian tayo, a saray Nephite.

9 Tan nia, misalamat ak met ed Dios ko, lapu ed impañgilukas to ed saya a pankakaaro akuyong tayo ed saray kasalanan tayo, tan ed say dakel ya impampapatey a ginawa tayo.

10 Tan misalamat ak met ed Dios ko, on, say makapanyari a Dios ko, lapu ed initer to ed sikatayo pian napambabawian tayo so saraya a beñgatla, tan ontan met pinirdona to tayo ed saraman so dakel a kasalanan tayo tan impampapatey a ginawa tayo, tan inekal to so kasalanan ed saray puso tayo, dia ed panamegley na kaabigan na Anak to.

11 Tan natan nia, kaagian ko, lapu ed saya ya amin so nayarian tayo a gawaen (a sikatayo so abalang ed amin a katooan) say mambabawi ed saray kasalanan tayo tan say dakel ya impampapatey a ginawa tayo, tan onla tayo ed Dios pian ekalen to so saraya ed saray puso tayo, lapu ed saya labat so nayarian tayo a gawaen pian magenap so pambabawi tayo ed arap na Dios pian ekalen to so saray mansa tayo—

12 Natan, sankainaroan ko a kaagian, lapu ed say Dios inekal to so saray mansa tayo, tan saray espada tayo so nanmaliw a masileng, dia ed ontan ag tayo la mansaan so saray espada tayo ed dala na saray kaagian tayo.

13 Nia, ikuan ko ed sikayo, Andi, pagnayonen tayo so saray espada tayo pian ag namansaan na dala na saray kaagian tayo; ag la piga, no mansaan tayo lamet so saray espada tayo ag la naorasan a masileng ed panamegley na dala na Anak na baleg a Dios tayo, a saya so bagat a pamaandi na saray kasalanan tayo.

14 Tan say makapanyari a Dios wala so panañgasi to ed sikatayo, tan ginawa to so saraya a beñgatla so nipakabat ed sikatayo pian ag tayo nabalang; on, tan impakabat to ed sikatayo so saraya a beñgatla ya impasakbay, lapu ed inaro to so saray kamarerua tayo a siñga panañgaro to ed saray anak tayo; dia ed ontan, dia ed panañgasi to dadalawen to tayo ed panamegley na saray angeles to, pian say plano na kilalaban so nipakabat ed sikatayo tan ontan met ed saray mantumbok a kailalakan.

15 O agay la so panañgasi na Dios tayo! Tan natan nia, lapu ed saya labat so nayarian tayo a gawaen pian naekal ed sikatayo so saray mansa tayo, tan saray espada tayo so agawa a masileng, iamot tayo so saraya pian magnayon so sileng da, pian saya so sakey a paneknek ed Dios tayo ed sampot ya agew, odino dia ed saman ya agew no naawit itayo ya ontalindeg ed arap to pian naokom, ya ag tayo la minansaan so saray espada tayo ed dala na saray kaagian tayo nanlapu nen nipasabi to so saray salita ed sikatayo tan agawa tayo a malinis lapu ed saya.

16 Tan natan, kaagian ko, no saray kaagian tayo anapen da tayo a deralen, nia, iamot tayo so saray espada tayo, on, angan ikutkot tayo so saraya ed kaaraleman na dalin, pian saraya so magnayon a masileng, a paneknek a saraya so kapiganman ag tayo la ikana, dia ed sampot ya agew; tan no saray kaagian tayo deralen da itayo, nia, sikatayo so onla ed Dios tayo tan sikatayo so nilaban.

17 Tan agawa a sanen say ari sinampotan to so saraya ya imbaga to, tan amin a totoo so nantitipon, inala ra so saray espada ra, tan amin ya ayura ya ikakana ed panagpaterter na dala na too, tan saraya so inkutkot da ed kaaraleman na dalin.

18 Tan saya so ginawa ra, lapu ed pakanengneng da saya so sakey a paneknek ed Dios, tan ontan met ed saray totoo, a kapiganman ag da la ikana so saray ayura lamet a pamaterter na dala na too; tan saya so ginawa ra, a papaneknekan tan mipapaknaan ira ed Dios, nen say paterteren da so dala na saray kaagian da iter da so bilay da a dili; tan nen say alaen da ed sakey ya agi ra sikara so mañgiter ed sikato; tan nen say palabasen da so saray agew da ed panagmeneng sikara so mansagpot na dakel ed panamegley na saray lima da.

19 Tan dia ed onia anengneng tayo, sanen saraya a Lamanite so naawit ya anisia tan akapikabat ed katuaan, sikara so ag-nagiing, tan lablabayen da ni so mantepel angan dia ed patey nen say mangawa ira na kasalanan; tan onia so anengneng tayo ya inkutkot da so saray ayura ra ed kareenan, odino inkutkot da so saray agamil da ed bakal, onkana ed kareenan.

20 Tan agawa a saray kaagian da, saray Lamanite, so namparaan onkana ed bakal, tan linma ra ed dalin na Nephi ed getma a deralen da so ari, tan mañgipasen ira na sananey ed sikato, tan ontan met deralen da so saray totoo na Anti-Nephi-Lehi a manlapu ed saman a dalin.

21 Natan sanen saray totoo anengneng da a sikara so onsasabi sumpa ed sikara so pinmaway ya inmabet ed sikara, tan sikara so tinmikleb dia ed dalin, tan ginapoan da so ontawag ed ñgaran na Katawan; tan onia so nengneng da sanen saray Lamanite ginapoan da ra a dugpaen, tan ginapoan da ra a pateyen ed panamegley na espada.

22 Tan dia ed onia angapo so inmabet a sinmumpa, pinatey da so sanlibo tan lima ed sikara; tan amta mi a sikara so mapalar, lapu ed sikara so linma a miayam ed Dios da.

23 Natan sanen saray Lamanite anengneng da a saray kaagian da so ag ira ombatik ed espada, ni say oniwas ira ed kawanan odino dia ed kawigi, balet sikara so ondukol ed dalin tan ompatey, tan idadayew da so Dios anga ed bekta ya ipapatey da ed espada—

24 Natan sanen onia so anengneng na saray Lamanite sikara so tinmonda a mampapatey; tan dakel ed sikara so awalaan na panañgasi ed puso ra ed saray kaagian da ya inaatey ed espada, tan sikara so nambabawi ed saray beñgatla a ginawa ra.

25 Tan agawa ya imbantak da so saray agamil da ed bakal, tan ag da la labay a demeten so saraya lamet, lapu ed sikara so apaermen ed saray impampapatey a ginawa ra; tan sikara met so dinmukol a siñga saray kaagian da, ya aalagaren da labat so panañgasi na saray akaatagey so taklay da a mamatey ed sikara.

26 Tan agawa a saray totoo na Dios so naaruman ed saman ya agew na dakerakel ni nen saray inatey; tan saraman so inatey so matunong a totoo, dia ed ontan angapo so pankatunoñgan mi a manduarua a sikara so nilaban.

27 Tan angapo so angan sakey a marelmeng a too so inatey ed limog da; balet wala so masulok a sanlibo a naawit ed pikakabat na katuaan; dia ed onia anengneng tayo a say Katawan so nankimey ed amayamay a pamaakaran onkana ed kilalaban na saray totoo to.

28 Natan say karaklan a bilang na saray Lamanite a nampapatey na dakel ed saray kaagian da so Amalekite tan Amulonite, a say karaklan ed sikara so wala ed inkabañgat na saray Nehor.

29 Natan, dia ed limog na saray tinmipon ed totoo na Katawan, angapo ed sikara so Amalekite odino Amulonite, odino saraman so wala ed inkabañgat na saray Nehor, balet sikara so peteg a kailalakan nen Laman tan si Lemuel.

30 Tan dia ed onia malinlinew so pakamuria tayo, kayari a saray totoo so aminsan aliwawaan ed panamegley na Espiritu na Dios, tan awalaan ira na baleg a pikakabat ed beñgatla nipaakar ed inkamatunong, tan sikara so onarawi lapu ed kasalanan tan karelmeñgan, sikara so nanmaliw a mapalalo ya anawet, tan dia ed onia say kipapasen da so nanmaliw a lalo a mauges a siñga ag da kapiganman akabatan so saraya a beñgatla.