1 Tan natan agawa ya akaawat ak na sulat a nanlapu ed si Ammoron, ya ari, ya ibabaga to a no iawat ko so saraman so adakep ed bakal a naala mi so iawat to so ciudad na Antiparah ed sikami.

2 Balet añgipawit ak na sulat ed ari, a kabat mi a wala so saray magenap a ñgayew mi a mamawi ed ciudad na Antiparah ed panamegley na biskeg mi; tan no iawat mi so saray adakep mi ya onkan ed saman a ciudad ipasen mi a sikami so aliwa a makabat, tan iawat mi labat so saray adakep mi ed salatan.

3 Tan si Ammoron ag to inmabuloy ed sulat ko, lapu ed ag to labay so misalatan na saray adakep; dia ed ontan ginapoan mi so mangawa na paraan ya onla sumpa ed ciudad na Antiparah.

4 Balet saray totoo ed Antiparah tinaynan da so ciudad, tan binmatik ira ed saray arum a ciudad, a kayarian da, pian saraya so salimbeñgan da; tan dia ed onia say ciudad na Antiparah so naplag ed saray lima mi.

5 Tan onia so impansampot na komaduamplo tan walo a taon ya oley na saray okom.

6 Tan agawa a dia ed gapo na komaduamplo tan siam a taon, akaawat kami na saray tagano a nakaukolan mi, tan ontan met ed kaaruman na ñgayew mi, nanlapu ed dalin na Zarahemla, tan dia ed dalin a kaliber-liber, ed bilang ya anem a libo a totoo, likud ed anemaplo a lalaki ya anak na saray Ammonite a sikara so linma ya akitipon ed saray kaagian da, say melag ya olop ko a duara a libo. Tan natan nia, sikami so mabiskeg, on, tan dakel met so saray tagano ya inawit da ed sikami.

7 Tan agawa a pilalek mi so onla a mañgigapo na bakal ed saray ñgayew ya impasen da a mañgiagel ed ciudad na Cumeni.

8 Tan natan nia, ipanengneng ko ed sikayo ya agamoran mi so pilalek mi; on, kaiba so mabiskeg a ñgayew mi, odino say kabiañgan na mabiskeg a ñgayew mi, niliktob mi, dia ed labi, so ciudad na Cumeni, asasakbay na daiset sanen awaten da so saray tagano a nakaukolan da.

9 Tan agawa a nancampo kami ed asinger na ciudad ed dakel a labi; balet onougip kami a wala ed sikami so saray espada mi, tan wala so impasen mi a bantay, pian saray Lamanite ag ira makadugpa ed sikami ed labi tan pateyen da kami, a saya so amimpiga-piga a sinali ra; balet no panon karakel so impansali ra, say dala ra so tinmerter.

10 Ag abayag saray tagano ra so sinmabi, tan sikara lawari so onloob la ed ciudad ed labi. Tan sikami, imbes a saray Lamanite, a Nephite; dia ed ontan, inala mi ra tan saray tagano ra.

11 Tan angaman ontan a nasasabat so tagano na saray Lamanite ed saya a nengneng, mabiskeg ni so linawa ra a pagnayonen da so ciudad; dia ed ontan kaukolan ya alaen mi so saray tagano ra tan ipawit mi ed Judea, tan saray nala mi ya adakep ed dalin na Zarahemla.

12 Tan agawa ya aliwa a dakel ya agew so linmabas sakbay a saray Lamanite ginapoan da a nabalang so amin ya ilalo ra ed tulong; dia ed ontan insuko ra so ciudad ed saray lima mi; dia ed onia agamoran mi so plano mi ya alaen so ciudad na Cumeni.

13 Balet agawa a saray adakep mi mapalalo so karakel na bilang da ya, angaman ontan la so karakel na bilang mi, a kaukolan ya ikana mi so amin a ñgayew mi a manasikaso ed sikara odino sikara la so pateyen mi.

14 Tan nia, sikara so onsilib ya ompaway ed baleg a bilang, tan milaban ira ed panamegley na bato, tan pekpek, odino antokaman a nabembenan da, kanian sikami so akapatey na masulok a duara a libo ed sikara kayari impañgisuko ra so inkasikara ya adakep ed bakal.

15 Dia ed ontan nakaukolan a sikami, so mamasampot ed bilay da, odino bantayan mi ra, a say espada wala ed lima mi, anga ed dalin na Zarahemla; tan ontan met saray tagano mi so ag la makagenap ya onkana ed saray totoo mi, angaman wala so saray naala mi ed saray Lamanite.

16 Tan natan, dia ed saraman a mairap a kipapasen, nanmaliw a mapalalo so kipapasen no nipaakar ed saray adakep ed bakal; angaman ontan, anunotan mi ra ya iakar ed dalin na Zarahemla; dia ed ontan nampili kami ed kabiañgan na saray totoo mi, tan inmatalek mi ed sikara so saray adakep ya onla ed dalin na Zarahemla.

17 Balet agawa dia ed kaimbuasan sikara so amawil. Tan natan nia, ag kami la nantepet nipaakar ed saray adakep; tan nia, saray Lamanite so dinmugpa ed sikami, tan sikara so pinmawil a nipanaon pian nilaban da kami ed kapelag mi ed saray lima da. Tan nia, si Ammoron so añgipawit na onkana a tulong a balo a tagano tan ontan met na dakerakel a ñgayew a totoo.

18 Tan agawa a saraman so totoo ya añgitulor ed saray adakep so sinmabi a nipanaon a mañgamper ed sikara, sanen ñgalñgali kami la natalo.

19 Balet nia, say melag ya olop ko a duara a libo tan anemaplo so akilaban ya angapo so takot; on, sikara so ag-nagiing ed arap na saray Lamanite, tan initer da so patey ed siopaman ya onsumpa ed sikara.

20 Tan sanen saray atilak a ñgayew mi so ñgalñgali la ra onsuko ed saray Lamanite, nia, saraman so duara a libo tan anemaplo so ag-nagiing tan ag ira naekalan na ilalo.

21 On, tan inonor da tan ginawa ra so balang sakey a salita na gangan ya angapo so kulang; on, tan angan unong ed pananisia ra saya so agawa ed sikara; tan anunotan ko so saray salita ya inkuan da ed siak ya imbañgat na saray ina ra.

22 Tan natan nia, saraya ya anak ko a lalaki, tan saraman so apili a lalaki a mañgulop ed saray adakep, so akautañgan mi na baleg ed saya ya impantaluna; lapu ed sikara so akatalo ed saray Lamanite; dia ed ontan sikara so asunson a papawil ed ciudad na Manti.

23 Tan apagnayon mi so ciudad na Cumeni, tan ag kami aderal ya amin ed espada; manwari ya ontan, nantepel kami na dakel ya inkabalang.

24 Tan agawa kayari a saray Lamanite so binmatik la, tampol ya añgipaakseb ak na gangan a saray totook ya asugatan so alaen da ra ed limog na saray inaatey, tan ingangan ko a saray sugat da so tambalen.

25 Tan agawa a wala so duara a lasus, ed saraman so duara a libo tan anemaplo, so naandian na liknaan lapu ed interter na dala ra; angaman ontan, unong ed kaabigan na Dios, tan dia ed baleg a pankelaw mi, tan ontan met ed gayaga na amin a ñgayew mi, angapo so angan sakey a kamarerua ed sikara so inatey; on, tan angapo met so angan sakey a kamarerua ed limog da so ag asugatan na dakel.

26 Tan natan, say inkiagel da so makapakelaw ed amin a ñgayew mi; on, a sikara so niligyas angaman wala so sanlibo ed saray kaagian mi so inaatey. Tan malet so pananisia mi a saya so nanlapu ed makapakelaw a pakapanyari na Dios, lapu ed mapalalo a pananisia ra ed saman so nibañgat a sinisia ra—a wala so maptek a Dios, tan siopaman ya ag-manduarua, sikara so ilaban na makapakelaw a pakapanyari to.

27 Natan saya so pananisia na saraya ya asalitak; sikara so wala ed kalangweran, tan saray kanunotan da so ag-nagiing, tan initer da so talek da ed Dios ya andi-tonda.

28 Tan natan agawa a kayari mi ya inasikaso so saray totoo mi ya asugatan, tan nikutkot so saray inaatey mi tan ontan met ed saray inaatey na saray Lamanite, a sikara so dakerakel, nia, intepet mi ed si Gid so nipaakar ed saray adakep ya inolop da ya onla ed dalin na Zarahemla.

29 Natan si Gid so nipasen a pañgulo a kapitan ed olop ya aturo a mambantay ed sikara ya onla ed saman a dalin.

30 Tan natan, saraya so salita nen Gid ya inkuan to ed siak: Nia, sikami so ginmapo ya onla ed dalin na Zarahemla a kaiba so saray adakep tayo. Tan agawa a naabet mi so saray espiya na saray ñgayew tayo, a sikara so nibaki a mambantay ed campo na saray Lamanite.

31 Tan sikara so kinmelyaw ed sikami a nankuan—Nia, saray ñgayew na Lamanite so mankokurang a mamapaarap ed ciudad na Cumeni; tan nia, sikara so dugpaan da, on, tan deralen da so saray totoo tayo.

32 Tan agawa a saray adakep mi nadñgel da so kelyaw da, a saya so añgiter ed sikara na biskeg na linawa; tan sikara so inmalsa sumpa ed sikami.

33 Tan agawa lapu ed saya ya impanalsa ra ginawa mi a saray espada mi so nikana ed sikara. Tan agawa ya amimpinsan ira a dinmugpa ed saray espada mi, a dia ed saya babaleg ed bilang da so apatey mi; tan saray atilak so akapaway tan sikara so binmatik ya inmarawi ed sikami.

34 Tan nia, sanen sikara so akabatik tan ag mi la ra naabot, sikami so nankurang na maples ya amaarap ed ciudad na Cumeni; tan nia, sikami so sinmabi a nipanaon pian makatulong kami ed saray kaagian ed pañgiagel na ciudad.

35 Tan nia, sikami lamet so niligias ed lima na saray kabusol tayo. Tan nagalang so ñgaran na Dios tayo; nengneng yo, sikato so añgilaban ed sikatayo; on, sikato so nangawa ed saya a baleg a beñgatla ed sikatayo.

36 Natan agawa a sanen siak, Helaman, nadñgel ko so saraya a salita nen Gid, siak so napno na mapalalo a gayaga lapu ed kaabigan na Dios ed impañgiagel to ed sikatayo, pian sikatayo ya amin so ag ompatey; on, tan sitatalek ak a saray kamarerua na saray apatey so linmoob ed painawaan na Dios da.