1 Tan natan agawa a kayari a sinampotan nen Alma so pansasalita to ed saray totoo na simbaan, a saya so niletneg ed ciudad na Zarahemla, inordinan to so saray sacerdote tan elders, ed panamegley na pañgitapew na saray lima unong ed gangan na Dios, pian sikara so mañgipañgulo tan manasikaso ed simbaan.

2 Tan agawa a siopaman ya aliwan miembro na simbaan a nambabawi ed saray kasalanan da so abiniagan onkana ed pambabawi, tan sikara so naawat ed simbaan.

3 Tan agawa met a siopaman a miembro na simbaan ya ag nambabawi ed saray karelmeñgan da tan ag nampaabeba ed inkasikara ed arap na Dios—labay ko ya ibaga ed saraman so nampatagey ed kinon na saray puso ra—saraya met lamlamang so nipulisay, tan saray ñgaran da so aboral, pian saray ñgaran da so ag nibilang ed limog na saray matunong.

4 Tan dia ed onia ingapo ra ya iletneg so uksoy na simbaan ed ciudad na Zarahemla.

5 Natan pilalek ko pian natalusan yo a say salita na Dios so malubay ed amin, ya angapo so naandian na pankanawnawa ed pantitipon ed inkasikara ya ondeñgel ed salita na Dios.

6 Angaman ontan saray anak na Dios so nigangan a mandaragup ira a naynay, tan mikasakey ira ed panagayuno tan madaleyet a panagpikasi ya onkana ed pankaabigan na saray kamarerua na saray ag da kabat so Dios.

7 Tan natan agawa a sanen asumpal la nen Alma so saraya a tutuntonen sikato so tinmaynan ed sikara, on, manlapu ed simbaan a wala ed ciudad na Zarahemla, tan linma ed bokig na ilog na Sidon, dia ed patar na Gideon, tan wala diman so sakey a ciudad a niletneg, a saya so tatawagen na ciudad na Gideon, a saya so wala ed patar ya atawag na Gideon, a saya so intumbok ed ñgaran na too a pinatey na lima nen Nehor ed panamegley na espada.

8 Tan si Alma so linma tan ginapoan to ya ibawag so salita na Dios ed simbaan a saya so niletneg ed patar na Gideon, unong ed puyan na katuaan na salita ya imbalikas na kaamaan to, tan unong ed espiritu na profesiya a wala ed sikato, unong ed pamaneknek nen Jesu Cristo, say Anak na Dios, a sikato so onsabi a manundon ed saray totoo to manlapu ed saray kasalanan da, tan dia ed masanto a gangan a saya so akatawagan to. Tan onia so nisulat. Amen.