1 Natan agawa dia ed komanem a taon ya oley na saray okom ed saray totoo nen Nephi, angapo so saray baliñgaan odino bakal ed dalin na Zarahemla;

2 Balet saray totoo so nanlikna na ansakit, on, baleg a sakit lapu ed inkaandi na saray kaagian da, tan ontan met ed inkaandi na saray karnero tan baka ra, tan ontan met ed inkabalang na saray alog da a tataneman na dawa, a ginatin-gatinan tan dineral na saray Lamanite.

3 Tan agay la so impanirap da kanian balang sakey a kamarerua wala so señgegan to ya onermen; tan sikara so anisia a saya la so panañgokom na Dios a nibaki ed sikara lapu ed saray karelmeñgan tan karumsisan da; dia ed ontan sikara so abañgon ed pakanunot na saray susumpalen da.

4 Tan ginapoan da ya ipaalagey so simbaan ed lalo ya inkagnap; on, tan dakel so saray abiniagan ed danum na Sidon tan sikara so nitipon ed simbaan na Dios; on, sikara so abiniagan ed panamegley na lima nen Alma, a sikato so apasanto ya atagey a sacerdote na saray totoo na simbaan, ed panamegley na lima nen ama to a si Alma.

5 Tan agawa a dia ed komapito a taon ya oley na saray okom wala so ñgalñgali talora a libo tan lima a lasus a kamarerua so intipon da so inkasikara ed simbaan na Dios tan sikara so abiniagan. Tan onia so impansampot na komapito a taon ya oley na saray okom ed saray totoo nen Nephi; tan wala so nampatuloy a kareenan ed loob na saman a panaon.

6 Tan agawa dia ed komawalo a taon ya oley na saray okom, a saray totoo na simbaan ginmapo ra ya onawet ed kinon, lapu ed saray mapalalo a kayamanan da, tan saray mabli ya abel da a seda, tan saray marakep ya inkaabel na lienso ra, tan lapu ed saray dakel a karnero tan baka ra, tan saray balitok tan pilak da, tan amin a kanengneñgan na ankabli a beñgatla, a saraya so agamoran da ed inkakuli ra; tan lapu ed saraya ya amin a beñgatla kanian nipaatagey so kinon na saray mata ra, lapu ed ginapoan da so mansulong na saray ankabli a kawes.

7 Natan saya so señgeg na baleg a gonigon ed si Alma, on, tan dia ed dakel a totoo a pinasanto nen Alma a manmaliw a managbañgat, tan sacerdote, tan lalaki ed simbaan; on, dakel ed sikara so apaermen lapu ed karelmeñgan ya anengneng da a ginmapo ed limog na saray totoo ra.

8 Tan anengneng da tan amuria ra ed baleg a kaermenan a saray totoo na simbaan ginapoan da so mampaatagey ed kinon na saray mata ra, tan inteen da so puso ra ed kayamanan tan dia ed saray andi-kakanaan a beñgatla na mundo, a ginapoan da so ag mañgitaltalek, ed sakey tan sakey, tan ginapoan da so mamasegsegang ed saray ag manisia unong ed saray dili a linawa ra tan kaliktan da.

9 Tan dia ed onia, ed komawalo a taon ya oley na saray okom, wala so ginmapo a baleg a baliñgaan ed limog na saray totoo na simbaan; on, wala so saray paniibegan, tan irap na linawa, tan panagluko, tan panamasegsegang, tan kinon, iñgen pinalabsanan to so kinon na saray aliwa a miembro na simbaan na Dios.

10 Tan onia so impansampot na komawalo a taon ya oley na saray okom; tan say karelmeñgan ed simbaan so baleg a katiloran na saray aliwa a miembro na simbaan; tan dia ed onia say simbaan ginmapo a napaer so aliguas to.

11 Tan agawa dia ed kagapo na komasiam a taon, si Alma anengneng to so karelmeñgan ed simbaan, tan anengneng to met a say pañgaligan ed simbaan so ginmapo ya idawat to so saray ag mananisia ed sakey a kaugsan ya onarap ed sananey, a dia ed onia saya so añgawit na kadederal ed saray totoo.

12 On, anengneng to so baleg ya ag-pampapara ed limog na saray totoo, saray arum paatageyen da so inkasikara ed panamegley na kinon da, a balbalawen da so saray arum, ya ibeneg-beneg da so saray mankakaukolan tan saray alakseban tan saraman so narasan, tan saraman so napgaan, tan saraman so mansasakit tan manlilikna na kairapan.

13 Natan saya so baleg a señgegan na ermen ed limog na saray totoo, legan a saray arum papaabebaen da so inkasikara, ya ontotulong ira ed saray mankakaukolan na tulong da, a siñga say pañgiapag da ed wala a pambibilay da ed saray duka tan saray mankakaukolan, papakanen da so saray narasan, tan manlilikna na amin a kanengneñgan na kairapan, lapu ed si Cristo, a sikato so onsabi unong ed espiritu na profesiya;

14 Ya mantatalaran ira ed saman ya agew, dia ed onia mansiansia so kapaandi na saray kasalanan da; tan sikara so napno na baleg a gayaga lapu ed kioli ed bilay na saray inaatey, unong ed linawa tan pakapanyari tan panañgilaban nen Jesu Cristo ed saray balor na patey.

15 Tan natan agawa a si Alma, lapu ed impakanengneng to ed saray kairapan na saray mapaabeba a mananumbok ed Dios, tan saray panagpasegsegang ya imbunton ed sikara na saray nakdaan ed saray totoo to, tan anengneng to so amin ya ag-pampapara, ginapoan to so onermen a mapalalo; angaman ontan say Espiritu na Katawan so ag añgikaindan ed sikato.

16 Tan sikato so nampili na sakey a too ed saray sacerdote na simbaan, tan initer to ed sikato so pakapanyari unong ed voces na saray totoo, pian nawalaan na pakapanyari a mangawa na saray gangan unong ed saray gangan a niiter, tan nakaukolan ya ipasumpal to so saraya unong ed karelmeñgan tan kasalanan na saray totoo.

17 Tan say ñgaran na saya a too so Nephihah, tan sikato so aturo a pañgulo ya okom; tan sikato so inmirong ed yuroñgan na panañgokoman a mañgokom tan mañgoley ed saray totoo.

18 Natan si Alma ag to initer ed sikato so kimey na atagey a sacerdote ed simbaan, balet inkera to so kimey na atagey a sacerdote ed inkasikato a dili; balet iniawat to so yuroñgan na panañgokoman ed si Nephihah.

19 Tan saya so ginawa to pian sikato a dili so onla ed limog na saray totoo to, odino dia ed limog na saray totoo nen Nephi, pian ipulong to dia ed ontan so salita na Dios ed sikara, pian pagalawen to ira ed pakanunot ed saray susumpalen da, tan dia ed ontan naguyor to, ed panamegley na salita na Dios, so amin a kinon tan kasiliban da tan amin a pansosumlañgan a wala ed limog na saray totoo to, tan ag to nanengneng so dalan a pamapawil ed sikara likud ed pañgibaga to ed sikara dia ed panamegley na dalisay a pamaneknek sumpa ed sikara.

20 Tan onia dia ed ingapo na komasiam a taon ya oley na saray okom ed saray totoo nen Nephi, si Alma iniawat to so yuroñgan na panañgokoman ed si Nephihah, tan inapasakey to so inkasikato ed atagey ya inkasacerdote ed masanto a gangan na Dios, nipaakar ed pamaneknek ed salita, unong ed espiritu na puyan tan profesiya.