1 Natan agawa a kayari nen Amulek a sinampotan to so saraya a salita, insian da so inkasikara ed karaklan tan linma ra ed dalin na Jershon.

2 On, tan say nakdaan ed saray kaagian da, kayari ra ya impulong so salita ed saray Zoramite, sikara met so linma ed dalin na Jershon.

3 Tan agawa kayari a saray seseleñgen a kabiañgan na saray Zoramite so nankokonuan nipaakar ed saray salita a nipulong ed sikara, sikara so nampasnok makaseñgeg ed salita, lapu ed aderal so kasiliban da; dia ed ontan ag da labay so ondeñgel ed saray salita.

4 Tan sikara so nampabaki tan tinipon da ed amin a sakop na dalin so amin a totoo, tan inkono ra ed sikara so nipaakar ed saray salita a nibalikas.

5 Natan saray manañgoley da tan saray sacerdote ra tan saray managbañgat da ag da impaamta ed saray totoo so saray pilalek da; dia ed ontan akabatan da a maamot no anto so wala ed kanunotan na amin a totoo.

6 Tan agawa kayari ra ya asukayan so wala ed kanunotan na amin a totoo, saray maabubon ed saray salita ya imbalikas nen Alma tan saray kaagian to so pinapaway da ed saman a dalin; tan sikara so dakerakel; tan sikara met so linma ed dalin na Jershon.

7 Tan agawa a si Alma tan saray kaagian to so nantalima ed sikara.

8 Natan saray totoo a Zoramite ampetang so ulo ra ed saray totoo nen Ammon a wala ed Jershon, tan say manunaan a manañgoley na saray Zoramite, lapu ed sikato so mapalalo a marelmeng a too, so nampabaki ed saray totoo nen Ammon a pilalek to ed sikara a papawayen da ed dalin da so amin a nanlapu ed sikara a linma ed dalin da.

9 Tan imbesñgaw to ed sikara so dakerakel a panagtaktakot sumpa ed sikara. Tan natan saray totoo nen Ammon ag ira tinmakot ed saray salita ra; dia ed ontan ag da ra pinapaway, balet inawat da ya amin so duka na saray Zoramite a linma ed sikara; tan sikara so tinagano ra, tan kinawesan da ra, tan initer da ed sikara so saray dalin a tawiren da; tan sikara so tinalima unong ed kaukolan da.

10 Natan saya so amagalaw ed saray Zoramite a mampasnok sumpa ed saray totoo nen Ammon, tan ginapoan da so milimog ed saray Lamanite tan pian pagalawen da ra met a mampasnok sumpa ed sikara.

11 Tan dia ed onia saray Zoramite tan saray Lamanite ginapoan da so mamparaan onkana ed bakal sumpa ed saray totoo nen Ammon, tan ontan met sumpa ed saray Nephite.

12 Tan dia ed onia so impansampot na komalabimpito a taon ya oley na saray okom ed saray totoo nen Nephi.

13 Tan saray totoo nen Ammon so tinmaynan a pinmaway ed dalin na Jershon, tan linma ra ed dalin na Melek, tan impalugar da so dalin na Jershon ed saray ñgayew na Nephite, pian sikara so mibaliñgaan ed saray ñgayew na Lamanite tan saray ñgayew na Zoramite; tan dia ed onia ginmapo so bakal na saray Lamanite sumpa ed saray Nephite, dia ed komalabinwalo a taon ya oley na saray okom; tan say kasulatan na saray bakal da so niiter ed mansaguinunor.

14 Tan si Alma, tan si Ammon, tan saray kaagian da, tan ontan met ed saray duara a lalaki ya anak nen Alma so pinmawil ed dalin na Zarahemla, kayari a sikara so nikana ed lima na Dios ed impañgawit na dakel a Zoramite ed pambabawi; tan no kaonoñgan karakel so saray naawit ed pambabawi sikara so asunson ed paway na dalin da; balet wala so dalin a tawir da ed dalin na Jershon, tan inala ra so saray ayura ra pian iagel da sa inkasikara, tan saray kaasawaan da, tan saray anak da, tan saray dalin da.

15 Natan si Alma, lapu ed sikato so nanermen lapu ed karelmeñgan na saray totoo to, on lapu ed saray bakal, tan panagpaterter na dala, tan saray baliñgaan a wala ed limog da; tan lapu ed sikato so añgibawag na salita, odino añgibaki na mañgibawag na salita, ed limog na amin a totoo ed balang sakey a ciudad; tan dia ed impakanengneng to na saray puso na totoo so ginmapo ya onawet, tan ginapoan da so nabaiñgan lapu ed mapalalo ya elet na salita, say puso to so mapalalo a maermen.

16 Dia ed ontan, kinaliktan to a saray anak to a lalaki so natipon, pian iter to ed balang sakey so betang da a sumpalen, ya akabiig, nipaakar ed saray beñgatla ed inkamatunong. Tan wala so kasulatan na saray gangan to, ya initer to ed sikara unong ed dili a kasulatan to.