1 Tan natan, anak ko, naimanok a siñga wala ni arum a makakaaburido na kanunotan mo, ya ag mo natalusan—a saya so nipaakar ed kaptekan na Dios dia ed pandusa na makasalanan; lapu ed sasalien mo ya ipasen ya aliwa a kaptekan a say makasalanan so igetar ed pasen na kaermenan.

2 Natan nia, anak ko, ipaliwawak so saya a beñgatla ed sika. Tan nia, kayari a say Katawan a Dios pinapaway to so saray inmuna ya ateng tayo manlapu ed tanamanan na Eden, pian bokalkalen da so dalin, no iner diman so nanlapuan da—on, pinapaway to so too, tan impasen to ed bokig a sampot na tanamanan na Eden, so sakey a querubin, tan sakey a mandarlang ya espada a mantelek-telek ed amin a pasen, pian iagel to so kiew na bilay—

3 Natan, anengneng tayo a say too so nanmaliw a siñga Dios, a kabat to so maong tan mauges; tan ag la piga irandan to so lima to, tan mañgala met ed kiew na bilay, tan kanen to tan mambilay ya ando la ya ando, say Katawan a Dios añgipasen na querubin tan mandarlang ya espada, pian sikato so ag makapañgan ed buñga—

4 Tan dia ed onia nanengneng tayo, a wala so sakey a panaon a niiter ed too pian mambabawi, on, sakey a panaon na panagsubok, sakey a panaon a pambabawi tan manlingkor ed Dios.

5 Tan nia, no si Adan indandan to so lima to a tampol, tan añgan ed buñga na kiew na bilay, sikato komon so mambilay ya andi-angaan, unong ed salita na Dios, ya angapo la so panaon na pambabawi; on, tan say salita met na Dios angapo la so kakanaan to, tan say baleg a plano na kilalaban so ag la natuloy.

6 Balet nia, nigena la a say too so ompatey—dia ed ontan, sanen sikara so asebelan ed kiew na bilay sikara so ataksing ed tapew na dalin—tan say too nanmaliw la ya abalang ed ando la ya ando, on, sikara so nanmaliw la a nigapol a totoo.

7 Tan natan, anengneng mo ed saya a saray inmuna ya ateng tayo so ataksing mandapag ed inkalaman tan inkaespiritu manlapu ed arapan na Katawan; tan dia ed onia anengneng tayo a sikara so nanmaliw a naoleyan ya ontumbok ed dili a linawa ra.

8 Natan nia, ag manepeg a say too so bawien manlapu ed saya ya inkalaman a patey, lapu ed saya so manderal ed baleg a plano na liket.

9 Dia ed ontan, lapu ed say kamarerua ag kapiganman ompatey, tan say inkigapol so añgawit ed amin a katooan na inkaespiritu a patey tan ontan met ed inkalaman, salanti, sikara so ataksing ed kawalaan na Katawan, kanepegan a say katooan so nabawi manlapu ed saya ya inkaespiritu a patey.

10 Dia ed ontan, sanen nanmaliw ira a makamundo, maliket ed alak na laman, tan makademonyo, lapu ed inkapalsa ra, saya a kipapasen na panagsubok so nanmaliw a kipapasen na panagparaan ed sikara; tan nanmaliw a panagparaan a kipapasen.

11 Tan natan nunot mo, anak ko, tan no ag lapu ed plano na pananundon, (paulyan ni so saya) tampol sano sikara so inatey saray kamarerua ra so pakaskasi, lapu ed sikara so ataksing ed kawalaan na Katawan.

12 Tan natan, angapo so polaing a pamawi ed saray totoo manlapu ed saya a nigapol a kipapasen, a saya so inawit na too ed sikato a dili makaseñgeg ed ag to intoluk;

13 Dia ed ontan, unong ed kaptekan, say plano na pananundon so ag nayari a nagawa, likud labat ed pambabawi na saray totoo dia ed saya a kipapasen na panagsubok; on, ed saya a kipapasen na panagparaan; tan likud ed saraya a pamaakaran, angapo so kana na panañgasi likud ed deralen to so kimey na kaptekan. Natan say kimey na kaptekan so ag nayari a naderal; tan no onia, say Dios ontonda la a sikato so Dios.

14 Tan dia ed onia nanengneng tayo ya amin a katooan so nigapol, tan sikara so wala ed gemgem na kaptekan; on, say kaptekan na Dios, a saya so añgigena ed sikara ed andi-angaan a pakataksing manlapu ed kawalaan to.

15 Tan natan, say plano na panañgasi so ag nagawa likud no sakey a bagat a pamaandi na kasalanan so nagawa; dia ed onia say Dios a dili so mamaandi ed saray kasalanan na mundo, pian nagawa so plano na panañgasi, pian napenek so pankaukolan na kaptekan, pian say Dios manmaliw a nagnap, Dios a maptek, tan mapañgasi a Dios met.

16 Natan, say pambabawi ag onsabi ed saray totoo likud no wala so dusa, a saya met so andi-angaan a siñga say bilay na kamarerua, a kasombaliwan na plano na liket, a saya so andi-angaan a siñga met say bilay na kamarerua.

17 Natan, panon a say sakey a too mambabawi likud no sikato so mankasalanan? Panon so mankasalanan no angapo so gangan? Panon a wala so gangan likud no wala so dusa?

18 Natan, wala so sakey a dusa a nitekep, tan sakey a maptek a gangan so niiter, a saya so mañgawit na pakagonigon na consiensia ed too.

19 Natan, no angapo so gangan a niiter—no say sakey a too so amatey sikato so pateyen—ag kasi sikato so antakot ya ompatey no sikato so mamatey?

20 Tan ontan met, no angapo so gangan a niiter sumpa ed kasalanan saray totoo ag ira antakot a mankasalanan.

21 Tan no angapo so gangan a niiter, no nankasalanan so saray totoo anto so nagawaan na kaptekan, odino say panañgasi, lapu ed angapo so pankayarian da ed pinalsa?

22 Balet wala so gangan a niiter, tan dusa a nipeket, tan say pambabawi so niabuloy; a dia ed saya a pambabawi, wala so pankayarian na panañgasi; odino andi, say kaptekan kayarianen to so pinalsa tan sumpalen to so gangan, tan say gangan idetdet to so dusa; tan no aliwa a onia, saray kimey na kaptekan so naderal, tan say Dios ontonda la a sikato so Dios.

23 Balet say Dios ag ontonda a sikato so Dios, tan say panañgasi kayarianen to so saray peteg a mambabawi, tan say panañgasi so onsabi lapu ed bagat a pamaandi na kasalanan; tan say bagat a pamaandi na kasalanan awiten to so kagawa na kioli ed bilay na saray inaatey; tan say kioli ed bilay na saray inaatey awiten to ya ipawil so saray totoo ed kawalaan na Dios; tan dia ed onia sikara so nipawil ed kawalaan to, pian naokom ira unong ed saray kimey da, unong ed gangan tan kaptekan.

24 Tan nia, say kaptekan ikana to so amin a pankaukolan to, tan ontan met say panañgasi kayarianen to so amin a kayarian to; tan dia ed onia, angapo no ag saray petepeteg a nambabawi so nilaban.

25 Anto, ipapasen mo kasi a say panañgasi nayarian to a takewan so kaptekan? Ikuan ko ed sika, Andi; angan sakey a tulnek. Tan no ontan, say Dios ontonda la a sikato so Dios.

26 Tan dia ed onia say Dios awiten to so saray makana tan andi-angaan a gagala to, a saraya so niparaan nanlapu ed inletneg na mundo. Tan dia ed onia onsabi so kilalaban tan pananundon ed saray totoo, tan ontan met ed kaderal tan kasegsegañgan da.

27 Dia ed ontan, O anak ko, siopaman ya ondago sikara so ondago tan minabang ed saray danum na bilay a mabulos; tan siopaman ya ag ondago sikato met lamlamang so ag pasuoten ya ondago; balet dia ed sampot ya agew nipawil ed sikato so unong ed saray gawa to.

28 No nampilalekan to so mangawa na mauges, tan sikato so ag nambabawi legan na saray agew to, nia, say mauges so nagawa ed sikato, unong ed panañgipawil na Dios.

29 Tan natan, anak ko, pilalek ko a saraya a beñgatla so ag mo la panaburidoan, tan saray kasalanan mo labat so panaburidoan mo, ed saman a panaburido a mañgawit ed sika ed silong na pambabawi.

30 O anak ko, pilalek ko ya ag mo la iboburi so kaptekan na Dios. Ag mo seseetan so mambaraan ed inkasika ed angan sankamelagan a kipapasen lapu ed saray kasalanan mo, dia ed pañgiburim na kaptekan na Dios; balet abuloyan mo so kaptekan na Dios, tan say panañgasi to, tan andukey a panagtepel to so nawalaan na naspot a tanguyor ed pusom; tan abuloyan mo a sika so awiten to ed silong na sapok na panagpaabeba.

31 Tan natan, O anak ko, sika so tinawag na Dios a mañgipulong na salita to ed saya a totoo. Tan natan, anak ko, onla ka la ed dalan mo, ibawag mo so salita ed katuaan tan dia ed kaolimekan, pian komon awiten mo so saray kamarerua ed pambabawi, pian say makana a plano na panañgasi wala so pankayarian to ed sikara. Tan komon say Dios iter to ed sika so angan unong ed saray salitak. Amen.