1 Nia, natan agawa a say ari na saray Lamanite nampabawag ed limog na saray totoo to, ya ag da lilimaan si Ammon, odino si Aaron, odino si Omner, odino si Himni, ni angan siopa ed saray kaagian da ya onla a mampulong na salita na Dios ed sikara, inerman a pasen so kawalaan da, ed angan dinan a sakop na dalin da.

2 On, sikato so añgipaakseb na gangan ed limog da, ya ag da ra limaan a baloren, odino ipisok da ra ed pañgawan; ni say sikara so lukdaan da, ni say sikara so bakbaken da, ni say papawayen da ra ed saray sinagogas da, odino pairapen da ra; ni say tupaken da ra na bato, balet initer ed sikara so pankanawnawa ya onloob ed saray kaaboñgan da, tan ontan met ed saray templo ra, tan saray pasen a panagpikasian da.

3 Tan dia ed onia sikara so onla a mañgipulong ed salita unong ed saray pilalek da, tan say ari so apasimbalo ed pananisia ed Katawan, tan say amin a kabubong to; dia ed ontan sikato so nampabawag ed lapag na amin a sakop na dalin na saray totoo to, pian say salita na Dios so ag nasebelan, balet saya so ontayak ed amin a sakop na dalin, pian saray totoo to so napanisia ra nipaakar ed marelmeng a sisia a tawir na kaamaan da, tan napanisia ra a sikara ya amin so sanaagi, tan nepeg ya ag ira mampapateyan, ni say mansasamsaman, ni say mangawa na pikakaloguran, ni say mangawa ra na antokaman a kanengneñgan na karelmeñgan.

4 Tan natan agawa a sanen say ari so nampabawag ed saya, si Aaron tan saray agagi to so linma ed sakey a ciudad ya onla ed sananey a ciudad, tan manlapu ed sakey ya abong a panagpikasian ya anga ed sananey, ya añgiletneg ira na saray simbaan, tan nampasanto ra na saray sacerdote tan managbañgat ed amin a lapag na saman a dalin ed limog na saray Lamanite, pian mampulong tan mambañgat na salita na Dios ed limog da; tan dia ed onia ginmapo a nawalaan ira na maong a nansumpalan.

5 Tan libu-libo so naawit ed pikakabat ed Katawan, on, nilibo so naawit ed pananisia ed saray sisia a tawir na saray Nephite; tan sikara so nibañgat ed saray kasulatan tan saray profesiya a saraya so nipalima ed saya a peles a panaon.

6 Tan unong a peteg a mabilay so Katawan, andi-saew a dakel so saray anisia, odino no panon karakel so saray naawit ed pikakabat ed katuaan, ed panamegley na pulong nen Ammon tan saray agagi to, unong ed espiritu na puyan tan profesiya, tan say pakapanyari na Dios so mankikimey na milagro ed sikara—on, ikuan ko ed sikayo, ya unong a mabilay so Katawan, no kaonoñgan ed saray Lamanite so anisia ed saray pulong da, tan sikara so apasimbalo ed pananisia ed Katawan, kapiganman ag ira onarawi.

7 Tan sikara so nanmaliw a matunong a totoo; ingaton da so saray agamil da ed bakal a panagsumpa ra, tan ag da la labanan so Dios, ni say sumpa ed siopaman a kaagian da.

8 Natan, saraya so apasimbalo ed pananisia ed Katawan:

9 Saray totoo a Lamanite a wala ed dalin na Ishmael;

10 Tan ontan met ed saray totoo a Lamanite a wala ed dalin na Middoni;

11 Tan ontan met ed saray totoo a Lamanite a wala ed ciudad na Nephi;

12 Tan ontan met ed saray totoo a Lamanite a wala ed dalin na Shilom, tan saraman so wala ed dalin na Shemlon, tan dia ed ciudad na Lemuel, tan dia ed ciudad na Shimnilom.

13 Tan saraya so ñgaran na saray ciudad na saray Lamanite ya apasimbalo ed pananisia ed Katawan; tan saraya so añgigaton na saray agamil da ed bakal a panagsumpa, on, amin ya agamil da ed bakal; tan sikara ya amin so Lamanite.

14 Tan saray Amalekite so ag apasimbalo ed pananisia, likud labat ed sakey; ni siopaman ed saray Amulonite; balet pinaawet da so saray puso ra, tan ontan met ed saray puso na saray Lamanite ed saman a kabiañgan na dalin ed inerman a pasen a panaayaman da, on, tan ed amin a bario ra tan amin a ciudad da.

15 Dia ed ontan, inñgaran mi ya amin a ciudad na saray Lamanite a nambabawi tan sinmabi ed pikakabat na katuaan, tan sikara so apasimbalo ed pananisia.

16 Tan natan agawa a say ari tan saraman so apasimbalo ed pananisia pilalek da a niiter ed sikara so ñgaran, pian dia ed ontan sikara so nibiig ed saray kaagian da; dia ed ontan say ari inkonu to ed si Aaron tan dakel ed saray sacerdote da, so nipaakar ed ñgaran ya alaen da ed inkasikara, pian sikara so nibiig.

17 Tan agawa a tinawag da so ñgaran ya Anti-Nephi-Lehies: tan sikara so atawag ed saya a ñgaran tan ag la ra atawag a Lamanite.

18 Tan ginapoan da so manmaliw a makuli a totoo; on, tan sikara so kaaro na saray Nephite; dia ed ontan, nilukasan da so pikakaaro ed sikara, tan say ayew na Dios ag la tinmumbok ed sikara.