1 Tan natan, anak ko, siñga wala so dakel ya ibagak ed sika nen say imbagak ed say agim a laki; tan nia, ag mo kasi naimatonan so ag-nagiing ya ugali na agim a laki, say inkamatuor to, tan say seet to ya añgonor ed saray gangan na Dios? Nia, ag kasi sikato so añgiter na maong a pañgaligan mo?

2 Lapu ed ag mo initer so dakel ya imano ed saray salitak a siñga say agim a laki, ed limog na saray totoo na Zoramite. Natan saya so wala ed siak sumpa ed sika; sika so linma a nampasirayew ed biskeg tan kakabatan mo.

3 Tan aliwa ni a saya ya amin, anak ko. Ginawam so saman so makapaermen ed siak; lapu ed pinaulyanan mo so panagpulong, tan linma ka ed dalin na Siron ed limog na saray ketegan na Lamanite, a tinumbok mo si balangkantis ya Isabel.

4 On, tinakew to ya iniarawi so puso na dakel; balet aliwa a saya so baraan ed sika, anak ko. Nepeg inasikasom so panagpulong a saya so nimatalek ed sika.

5 Ag mo kasi amta, anak ko, a saraya a beñgatla so karumsisan ed pakanengneng na Katawan; on, sankarumsisan nen say amin a kasalanan likud labat ed pamaterter na angapo so kasalanan a dala odino say pañgiburi na Espiritu Santo?

6 Tan nia, no iburim so Espiritu Santo a nen saman wala so pasen to ed sika, tan kabat mo a saya so imburim, nia, saya so sakey a kasalanan ya ag-napirdona; on, tan siopaman a mamatey sumpa ed liwawa tan pikakabat ed Dios, aliwa a mainomay ed sikato so pakagamor na pirdona; on, ikuan ko ed sika, anak ko, ya aliwa a mainomay ed sikato so pakagamor na pirdona.

7 Tan natan, anak ko, pirawat ko ed Dios ya ag ka komon akagawa na ontan la a kinabaleg a kasalanan. Ag ko la sagiren so saray kasalanan mo, pian panaburidoan na kamareruam, no ag makaseñgeg ed pankaabigan mo.

8 Balet nia, ag mo niamot so saray kasalanan mo ed Dios; tan likud no mambabawi ka saraya so onalagey a pamaneknek sumpa ed sika dia ed sampot ya agew.

9 Natan anak ko, pirawat ko a mambabawi ka tan ikaindan mo so saray kasalanan mo, tan ag mo la itotuloy a peneken so alak na laman na saray matam, balet iwaklit mo ed inkasika so saraya a beñgatla; tan likud no gawaen mo so saya ag mo nayari a tawiren so panarian na Dios. O, nunot mo, tan akom ed inkasika, tan iwaklit mo ed inkasika so saraya a beñgatla.

10 Tan igangan ko ed sika a gawam so mikonuan ed saray pañguloan ya agagim a lalaki ed saray gawaen mo; tan nia, sika so wala ni ed kalangweran, tan nakaukolan mo so bayuboan na saray agagim a lalaki. Tan mañgiter na imano ed saray simbawa ra.

11 Ag mo aabuloyan so inkasika a nipaarap ka ed andi-kakanaan odino makulang-kulang a beñgatla; ag mo aabuloyan so demonyo ya iwanwan to ya iarawi so pusom lamet ya ontumbok ed saraman so marelmeng a balangkantis. Nia, O anak ko, agay la a kinabaleg na karelmeñgan so inawit mo ed saray Zoramite; tan sanen anengneng da so saray kiwas mo ag la ra manisia ed saray salitak.

12 Tan natan say Espiritu na Katawan inkuan to ed siak: Igangan mo so saray anak mo a mangawa na maong, ag la piga a sikara so mañgiwanwan ed puso na dakel a totoo ed kadederal; dia ed ontan igangan ko ed sika, anak ko, dia ed takot ed Dios, ya itondam la so saray karelmeñgan mo;

13 A sika so ompawil ed Katawan ed amin a nunot mo, pakayarim, tan biskeg mo; tan ag mo la iwawanwan so saray puso ra a mangawa na mauges; balet sikara so pawil mo, tan birbir mo so saray kakulañgan mo tan saman so kaugsan a ginawam.

14 Ag mo aanapen so kayamanan ni saray beñgatla ya andi-kana ed saya a mundo; tan nia, saraya so ag mo naawit.

15 Tan natan, anak ko, wala ni labay ko ya ibaga ed sika nipaakar ed isabi nen Cristo. Nia, ikuan ko ed sika, tan sikato so onsabi ya andi-saew a mañgekal ed saray kasalanan na mundo; on, sikato so onsabi a mañgibawag na maliket a balita na kilalaban ed saray totoo to.

16 Tan natan, anak ko, saya so panagpulong a saya so akatawagan mo, say pañgibawag mo na maliket a balita ed saya a totoo, pian iparaan so saray kanunotan da; odino pian say kilalaban so onsabi ed sikara, pian iparaan da so kanunotan na saray anak da ya ondeñgel na salita ed panaon ya isabi to.

17 Tan natan painomayen ko so kanunotan mo nipaakar ed saya a tima. Nia, sika so mankelaw no akin saraya a beñgatla so nipakabat ed ontan la a kabayag na pamasakbay. Nia, ikuan ko ed sika, ag kasi say sakey a kamarerua ed saya a panaon so pinabli na Dios a siñga say sakey a kamarerua ed panaon na isabi to?

18 Ag kasi ontan met so pankaukolan ed say plano na pananundon so nipakabat ed saya a totoo a siñga say pankaukolan na saray anak da?

19 Ag kasi mainomay ed saya a panaon a say Katawan mañgibaki na sakey ya angel to a mañgibawag ed saraya a maliket a balita ed sikatayo a siñga ontan met ed saray anak tayo, odino siñga met dia ed kayari na panaon na isabi to?