1 Natan agawa a sanen naawat nen Moroni so saya a sulat naaruman so pasnok to, lapu ed kabat to a si Ammoron so awalaan na nagnap a pikakabat ed panagluko to; on, kabat to ya amta nen Ammoron ya aliwa a maptek a pamaakaran so señgegan na ingapo to a bakal sumpa ed saray totoo nen Nephi.

2 Tan sikato so nankuan: Nia, ag ak misalatan na saray adakep ed si Ammoron likud no babawien to so gagala to, unong ed imbagak ed sulat ko; lapu ed ag ko iabuloy ed sikato a naaruman ni so pakapanyari to nen say wala la ed sikato.

3 Nia, amtak no iner so kawalaan na saray Lamanite a mambabantay na saray totook a sikara so naala ra ya adakep; tan no si Ammoron ag to iter ed siak so unong ed sulat ko, nia, iter ko ed sikato so unong ed saray salitak; on, anapen ko so patey ed limog da anga ed sikara so onkerew na kareenan.

4 Tan natan agawa a sanen imbaga nen Moroni so saraya a salita, ingangan to ed saray totoo to a gawaen da so pananap ed limog na saray totoo to, ag la piga makaalmo ra na sakey a too a kapolian nen Laman ed limog da.

5 Tan agawa ya akarumog ira na sakey, a say ñgaran to Laman; tan sikato nen saman so sakey ed saray igagangan na ari a pinatey nen Amalickiah.

6 Natan ingangan nen Moroni ed si Laman tan daiset a bilang na saray totoo to ya onla ed saray bantay na saray Nephite.

7 Natan saray Nephite so babantayan da ed ciudad na Gid; dia ed ontan si Moroni tinuro to si Laman tan ingangan to so daiset a bilang na totoo to so miolop ed sikato.

8 Tan sanen labi la si Laman so linma ed saray bantay na saray Nephite, tan nia, sikato so anengneng da ya onsasabi tan sikato so pinatonda ra; balet inkuan to ed sikara: Ag kayo ontatakot; nia, sakey ak a Lamanite. Nia, sikami so akabulos ed saray Nephite, tan sikara so akaugip; tan nia inala mi so saray alak da tan saya so inawit mi.

9 Natan sanen nadñgel na saray Lamanite so saraya a salita sikato so inawat da a sililiket; tan inkuan da ed sikato: Iter mo ed sikami so alak mo, pian sikami so oninum; maliket kami ya añgawit ka na alak lapu ed sikami la so mabanal.

10 Balet si Laman inkuan to ed sikara: Isinop tayo ni so alak ya anga ed iakar tayo a mibakal sumpa ed saray Nephite. Balet ed saya a salita so lalo ra a nampilalek ya oninum na alak;

11 Tan, inkuan da: Sikami la so mabanal, dia ed ontan inumen tayo la so alak, tan ag mabayag naawat mi la so racion mi ya alak, a saya so mamabiskeg ed sikami ya onla sumpa ed saray Nephite.

12 Tan si Laman inkuan to ed sikara: Gawa yo so unong ed pilalek yo.

13 Tan agawa a sikara so naninum a bulos ed saman ya alak; tan saya so malamo-lamoy ed pakataway da, dia ed ontan saya so ininum da a bulos; tan saya so mabayani, tan saya so imparaan pian mabayani.

14 Tan agawa a sikara so naninum tan sikara so nanliket, tan ag abayag sikara so abuek la ya amin.

15 Tan natan sanen si Laman tan saray totoo to anengneng da a sikara la ya amin so abuek, tan wala ra ed malet ya ugip, sikara so amawil ed si Moroni tan imbaga ra ed sikato so amin a beñgatla ya agawa.

16 Tan natan saya so unong ed plano nen Moroni. Tan si Moroni imparaan to so saray totoo to ed saray agamil ed bakal; tan sikato so linma ed ciudad na Gid, legan a saray Lamanite so wala ed malet ya ugip tan abuek, tan imbuntok da so saray agamil ed bakal ed saray adakep, lapu ed saya sikara ya amin so naayuraan;

17 On, anga ed saray bibii ra, tan amin ya anak da, unong ed karakel na saray makasarag a mañgikana na agamil ed bakal, sanen naayuraan la nen Moroni ya amin so saray adakep; tan saraman ya amin a beñgatla so agawa ya angapo a balot so iñgal.

18 Balet no abañgon da so saray Lamanite, nia sikara so abuek tan saray Nephite, nayarian da ra a pateyen.

19 Balet nia, aliwa ya onia so pilalek nen Moroni; ag to panliketan so mamatey odino mamaterter na dala, balet panliketan to so kilaban na saray totoo to ed kadederal; tan lapu ed saya ag to naawit ed sikato so aliwa a kaptekan, ag to labay a dugpaen so saray Lamanite tan deralen to ra ed inkabuek da.

20 Balet agamoran to so saray pilalek to; tan naayuraan to so saraman so adakep a Nephite a wala ed dalem na padir na ciudad, tan niiter to ed sikara so pakapanyari a kayarianen da so kabiañgan a wala ed nasasakopan na padir.

21 Tan dia ed saya ingangan to ed saray totoo a kaiba to ya onsener ira na daiset ed sikara, tan liktoben da so saray ñgayew na Lamanite.

22 Natan nia saya so ginawa ra ed panaon na labi, kanian sanen abañgon so saray Lamanite ed kaimbuasan anengneng da a sikara so aliktob la na saray Nephite ed paway, tan akaayura so saray adakep da a wala ed dalem.

23 Tan dia ed onia anengneng da a saray Nephite wala so pakapanyari ra ed sikara; tan dia ed saya a kipapasen arumog da ya aliwa a manepeg a milaban ni ra ed saray Nephite; dia ed ontan saray pañgulo ra a kapitan kinaukolan da so saray agamil da ed bakal, tan saraya so inawit da ya imbuntok ed saliyan na saray Nephite, ya onkekerew ira na panañgasi.

24 Natan nia, saya so pilalek nen Moroni. Sikara so inala to ya adakep ed bakal, tan kinayarian to so ciudad, tan ingangan to ya amin ya adakep so ibulos, a saraya so Nephite; tan sikara so akitekep ed ñgayew nen Moroni, tan sikara so añgiter na baleg a biskeg ed ñgayew to.

25 Tan agawa ya ingangan to ed saray Lamanite, sikara ya inala to ya adakep, a gapoan da so mankimey ed pamabiskeg na saray salimbeñgan ed kaliber-liber na ciudad Gid.

26 Tan agawa a sanen asalimbeñgan to so ciudad na Gid, unong ed pilalek to, ingangan to a saray adakep so iakar da ra ed ciudad na Bountiful; tan impabantayan to met so saman a ciudad ed mapalalo a mabiskeg ñgayew.

27 Tan agawa a ginawa ra, manwari ed amin a panagsilib na saray Lamanite, sinimpitan tan iniagel da so amin ya adakep a nala ra, tan impagnayon da met so amin a dalin tan say taluna ya abawi ra.

28 Tan agawa a saray Nephite ginapoan da lamet so ontaluna, tan pakabawi ra ed saray pankatunoñgan da tan pankanawnawa ra.

29 Dakel a panaon sinali na saray Lamanite a liktoben ira ed labi, balet dia ed saraya ya impansali ra dakel so naandi ed saray adakep da.

30 Tan amimpiga-piga a panaon so impansali ra a mañgiter na alak da ed saray Nephite, pian sikara so deralen da ed samal odino inkabuek.

31 Balet nia, saray Nephite ag ira matantan a mannunot ed Katawan a Dios da ed saya a panaon na kairapan da. Ag da ra nasiliban ed saray pasiklong da; on, ag ira oninum ed saray alak da, likud no paunaen da ni ya unaan so saray adakep a Lamanite.

32 Tan sikara so maalwar ya angapo so samal a niiter ed limog da; tan no say alak da samalan to so sakey a Lamanite nasamalan to met so sakey a Nephite, tan dia ed onia sinubok da ya amin so saray mabayani ya iinumen da.

33 Tan natan agawa a kinaukolan nen Moroni so mangawa na paraan ya ondugpa ed ciudad na Morianton; tan nia, saray Lamanite, dia ed sagpot da, sinalimbeñgan da so ciudad Morianton anga a saya so nanmaliw a mapalalo a mabiskeg a ciudad.

34 Tan andi-tonda so pañgaawit da na balo a ñgayew ed saman a ciudad, tan ontan met ed balo a tagano a nakaukolan.

35 Tan dia ed onia so impansampot na komaduamplo tan siam a taon ya oley na saray okom ed saray totoo nen Nephi.