1 Tan agawa dia ed gapo na komatalumplo tan anem a taon ya oley na saray okom ed saray totoo nen Nephi, si Shiblon so nankayarian ed saray sagrado a beñgatla a saraya so iniawat nen Alma ed si Helaman.

2 Tan sikato so matunong a too, tan nankurang a maptek ed arap na Dios; tan sikato so nangawa na maong ya andi-tonda, ya inonor to so saray gangan na Katawan a Dios to; tan ontan met na agi to a laki.

3 Tan agawa ya inatey met si Moroni. Tan dia ed onia nansampot so komatalumplo tan anem a taon ya oley na saray okom.

4 Tan agawa a dia ed komatalumplo tan pito a taon ya oley na saray okom, wala so baleg ya olop na saray totoo, angan say bilang da so lima a libo tan apat a lasus a lalaki, kaiba ra so saray kaasawaan da tan saray anak da, so tinmaynan ed dalin na Zarahemla a paarap ed dalin a wala ed mamabaybay.

5 Tan agawa a si Hagoth, lapu ed sikato so sakey a too a mapalalo so panagnunot to, dia ed ontan sikato so linma tan nangawa na mapalalo a baleg a bapor, dia ed ketegan na dalin na Bountiful, diman ed dalin na Apalis, tan saya so iniakar to ed sagur a dayat, dia ed makisir a pasen a mamaarap ed dalin a mamabaybay.

6 Tan nia, dakel a Nephite so linmugan tan sikara so nanlayag ya awit da so dakel a tagano, tan ontan met dakel so bibii tan ugogaw; tan sikara so amaarap ed mamabaybay. Tan onia so impansampot na komatalumplo tan pito a taon.

7 Tan dia ed komatalumplo tan walo a taon, saya a too so nangawa ni na arum a bapor. Tan saman so inmuna a bapor so pinmawil met, tan dakel ni a totoo so linmugan ed saya; tan añgawit ira met na dakel a tagano, tan sikara lamet so amaarap ed dalin a mamabaybay.

8 Tan agawa ya angapo la so nadñgelan nipaakar ed sikara. Tan impasen mi a sikara so nalner la ed kaaraleman na dayat. Tan agawa a sakey ni a bapor so sinmipot a nanlayag; tan no iner so nila to so ag mi amtak.

9 Tan agawa ed saya met lamlamang a taon dakel a totoo so linma ed dalin a mamabaybay. Tan dia ed onia so impansampot na komatalumplo tan walo a taon.

10 Tan agawa a dia ed komatalumplo tan siam a taon ya oley na saray okom, si Shiblon so inatey met, tan si Corianton so linma met ed dalin a mamabaybay ed sakey a bapor, ya añgawit na tagano ed saray totoo a linma ed saman a dalin.

11 Dia ed ontan nakaukolan ed si Shiblon ya ipalima to so saraman a sagrado a beñgatla, sakbay na impatey to, ed laki ya anak nen Helaman, ya atawag na Helaman, lapu ed sikato so imboloy da ed ñgaran nen ama to.

12 Natan nia, amin na saraman so nitatak a wala ed panagasikaso nen Helaman so nisulat tan niiter ed saray anak na saray totoo ed amin a lapag na dalin, likud labat ed saray kabiañgan ya ingangan nen Alma a saraya so ag iter.

13 Manwari ya ontan, saraya a beñgatla so isinop a sagrado, tan saraya so iawat manlapu ed sakey a kailalakan ya onla ed sananey; dia ed ontan, dia ed saya a taon, saraya so nipalima ed si Helaman, sakbay na impatey nen Shiblon.

14 Tan agawa ed saya met a taon wala so saray sinmisian a linma ed saray Lamanite; tan sikara lamet so ginmalaw a nampasnok sumpa ed saray Nephite.

15 Tan ontan met ed saya lamlamang a taon sikara so sinmabi a kaiba ra so dakerakel a ñgayew da a mibakal sumpa ed saray totoo nen Moronihah, odino sumpa ed ñgayew nen Moronihah, a dia ed saya sikara so atalo tan adagdag ira lamet a papawil ed dili a dalin da, a dakerakel so saray atigway ed sikara.

16 Tan dia ed onia so impansampot so komatalumplo tan siam a taon ya oley na saray okom ed saray totoo nen Nephi.

17 Tan dia ed onia nansampot so saray kasulatan nen Alma, tan si Helaman ya anak to, tan si Shiblon met, ya anak to.