1 Tan natan agawa, ag abayag kayari ya agamoran nen Amalickiah so panarian ginapoan to a pabiskegen so puso na saray Lamanite sumpa ed saray totoo nen Nephi; on, sikato so anuro na saray totoo a mansalita ed saray Lamanite ed saray tori ra sumpa ed saray Nephite.

2 Tan dia ed onia pinabiskeg to so puso ra sumpa ed saray Nephite, kanian dia ed saguinunor a sampot na komalabinsiam a taon ya oley na saray okom, lapu ed asumpal to la so saray plano to, on, lapu ed sikato so ginawa ra ya ari ed saray Lamanite, nanseetan to met a mañgoley ed amin a lapag na dalin, on, tan amin a totoo a wala ed dalin, ed saray Nephite tan ontan met ed saray Lamanite.

3 Dia ed ontan asumpal to so gagala to, lapu ed apaawet to so puso na saray Lamanite tan abulag to so saray kanunotan da, tan sikara so pinagalaw to a mampasnok, a lapu ed saya atipon to so dakerakel a kabiañgan na ñgayew ya onla a mibakal sumpa ed saray Nephite.

4 Tan mabiskeg so gagala to, lapu ed kinarakel na bilang na saray totoo to, a sarag da a taloen so saray Nephite tan awiten da ra ed inkaaripen.

5 Tan dia ed onia sikato so anuro na saray pañgulo a kapitan ed saray Zoramite, lapu ed sikara so makapikabat a maong ed biskeg na saray Nephite, tan saray pasen a panagliwasan da, tan saray sankakapuyan a pasen ed saray ciudad da; dia ed ontan sikara so tinuro to a pañgulo a kapitan ed saray ñgayew to.

6 Tan agawa ya inawit da so campo ra, tan sikara so amaarap ed dalin na Zarahemla dia ed kalawakan.

7 Natan agawa legan ya aalaen nen Amalickiah so pakapanyari ed panamegley na panagluko tan silib, si Moroni, dia ed biek a dapag, ipaparaan to so kanunotan na saray totoo a sikara so manmaliw a matuor ed Katawan a Dios da.

8 On, tan pabibiskegen to so saray ñgayew na Nephite, tan nampapagawa na ankekelag a salimbeñgan, odino saray pasen a panagliwasan; a nampapagawa na pilapil a dalin ed kaliber-liber a pankulong to ed saray ñgayew to, tan ontan met nampapagawa na alar a bato a mampaliber ed sikara, ed kaliber-liber na saray ciudad da tan dia ed ketegan na dalin da; on, dia ed amin a kaliber-liber na dalin da.

9 Tan dia ed saray sankakapuyan a salimbeñgan da añgipasen na malaglaem a bilang na totoo; tan dia ed onia sinalimbeñgan to tan pinabiskeg to so dalin a kayarian na saray Nephite.

10 Tan dia ed onia sikato so namparaan pian natuloñgan to so kawayañgan da, saray dalin da, saray kaasawaan da, tan saray anak da, tan say kareenan da, tan pian sikara so mambilay ed Katawan a Dios da, tan pian nituloy da so saman so tatawagen na saray kabusol da a pamaakaran na saray Cristiano.

11 Tan si Moroni so mabiskeg tan makapanyari a too; sikato so sakey a too ya awalaan na nagnap a pakatalus; on, sakey a too ya ag to panliketan so pamaterter na dala; sakey a too a say kamarerua to so magayaga ed kawayañgan tan inkabulos na bansa to, tan saray kaagian to ed ag-inkabalor tan ag-inkaaripen;

12 On, sakey a too a say puso to so napno na pisasalamat ed Dios to, lapu ed say karakel a pankanawnawa tan bendicion ya initer to ed saray totoo to; sakey a too a mapalalo so impansagpot to onkana ed pankaabigan tan kiarawi ed sigen na saray totoo to.

13 On, sikato so sakey a too a say pananisia to so ag-nagiing ed si Cristo, tan sikato so nansamba ed sakey a samba ya iagel to so saray totoo to, tan say pankatunoñgan to, say bansa to, tan say relihion to, angan dia ed iterter na dala to.

14 Natan saray Nephite nibañgat ed sikara ya iagel da so inkasikara a dili sumpa ed saray kabusol da, angan dia ed iterter na dala no saya so kaukolan; on, tan sikara met so nibañgat a kapiganman ag ira mamabaing, on, tan kapiganman ag da itatagey so espada da likud no sumpa ed sakey a kabusol da, likud ed pañgiagel da ed bilay da.

15 Tan saya so pananisia ra, a dia ed pangawa ra ed saraya say Dios paaliguasen to ra ed dalin, odino dia ed sananey a salita, no sikara so matuor ya ononor ed saray gangan na Dios sikara so paaliguasen to ed dalin; on, sikara so pasakbayan to ya ombatik, odino mamparaan onkana ed bakal, unong ed kaatapan da;

16 Tan ontan met, say Dios ipakabat to ed sikara no iner so laen da pian naiagel da so inkasikara a dili sumpa ed saray kabusol da, tan dia ed pangawa ra ed saya, say Katawan ilaban to ra; tan saya so pananisia nen Moroni, tan say puso to so nangloria ed saya; aliwa a dia ed pamaterter na dala no ag dia ed pangawa na maong, dia ed pañgiagel to ed saray too to, on, dia ed pañgunor ed saray gangan na Dios, on, tan pañgamper ed karelmeñgan.

17 On, tua, tua ikuan ko ed sikayo, no amin a too nen imbeneg, tan nen saman, tan dia ed arapen, so siñga si Moroni, nia, say peteg a pakapanyari na infierno so ayegyeg la ed andi-angaan; on, say demonyo ag la kapiganman nawalaan na pakapanyari ed puso na saray anak na totoo.

18 Nia, sikato so sakey a too a siñga si Ammon, say laki ya anak nen Mosiah, on, tan angan saray arum a lalaki ya anak nen Mosiah, on, tan ontan met nen Alma tan saray anak to a lalaki, lapu ed sikara ya amin so totoo na Dios.

19 Natan nia, si Helaman tan saray kaagian to ag kinmulang ed panaglingkor ed saray totoo nen say si Moroni; lapu ed nampulong ira na salita na Dios, tan sikara so nambiniag onkana ed pambabawi na amin a totoo a siopaman so ondeñgel ed saray salita ra.

20 Tan dia ed onia sikara so linma, tan saray totoo so nampaabeba ra ed inkasikara a dili lapu ed saray salita ra, a dia ed saya sikara so awalaan na atagey a palabo na Katawan, tan dia ed onia sikara so ag-asigen-sigen na saray bakal tan baliñgaan ed inkasikara a dili, on, anga dia ed loob na apat taon.

21 Balet, unong ed asalitak la, dia ed saguinunor a sampot na komalabinsiam a taon, on, manwari ya ontan so kareenan ed limog da a dili, sikara so apasuotan a milaban ed saray kaagian da, saray Lamanite.

22 On, tan dia ed antikey a salita, say bakal da ag tinmonda a kapiganman ed loob na dakel a taon ed saray Lamanite, manwari ya ontan a sikara so apasuotan a maong.

23 Natan, maermen ira a mandemet na saray ayura ra sumpa ed saray Lamanite, lapu ed ag da panliketan so pamaterter na dala; on, tan aliwa ni a saya ya amin—sikara so maermen no sikara so makaseñgeg na kiakar na dakel ed saray kaagian da ed paway na saya a mundo dia ed andi-angaan a mundo, ya ag ira akaparaan a miarap ed Dios da.

24 Manwari ya ontan, ag da met nitepel ya igaton so bilay da, pian saray kaasawaan da tan saray anak da so pateyen da dia ed makamonanakap a karuksaan na saraman so kaagian da nen saman, on, tan sikara so sinmian ed simbaan da, tan sikara so tinaynan da tan linma ra a manderal ed sikara dia ed impiolop da ed saray Lamanite.

25 On, ag da nitepel a saray kaagian da so mangayaga ed dala na saray Nephite, legan a wala so angan saksakey a mañgoonor ed saray gangan na Dios, tan say insipan na Katawan, no onoren da so saray gangan to sikara so onaliguas ed dalin.