1 Tan natan, anak ko, wala so labay ko ya ibaga nipaakar ed kipawil a saya so asalita la; tan nia, saray arum niyesyes da so talus na saray masanto a kasulatan, tan sikara so niarawi la ya abalang lapu ed saya a beñgatla. Tan amuriak a say kanunotan mo so naaburido met nipaakar ed saya a beñgatla. Balet nia, ipaliwawak so saya ed sika.

2 Ikuan ko ed sika, anak ko, a say plano na kipawil so nakaukolan ed kaptekan na Dios; tan nakaukolan ya amin a beñgatla so nipawil ed gendat ya uksoy da. Nia, nakaukolan tan makatunoñgan unong ed pakapanyari tan kioli nen Cristo ed bilay, a say kamarerua na too kaukolan a nipawil ed laman to, tan amin a kabiañgan na laman kaukolan a nipawil ed inkasikato.

3 Tan kaukolan ed kaptekan na Dios a saray totoo nepeg sikara so naokom unong ed saray kimey da; tan no saray kimey da so maong ed saya a bilay, tan saray pilalek na saray puso ra so maong, nepeg sikara met, dia ed sampot ya agew, so nipawil ed saman so maong.

4 Tan no saray kimey da so mauges sikara so nipawil ed mauges. Dia ed ontan, amin a beñgatla so nipawil ed nepeg ya uksoy da, balang sakey a beñgatla ed gendat ya uksoy to—say ompatey ombañgon ed ag-ompatey, say kabulok na laman ed ag-kabulok na laman—ya ombañgon ed andi-angaan a liket a manawir ed panarian na Dios, odino dia ed andi-angaan ya ermen pian tawiren da so panarian na demonyo, say sakey dia ed sakey a lima, tan say sananey dia ed biek—

5 Saman so binmañgon ed liket unong ed saray pilalek to a liket, odino maong unong ed pilalek to a maong; tan say sananey dia ed mauges unong ed saray pilalek to a mauges; tan unong a say pilalek to a mangawa na mauges legan na sanagew angan ontan met sikato so nawalaan na tumang to a mauges sano say labi so onsabi.

6 Tan ontan met ed saman so wala ed sananey a dapag. No sikato so nambabawi ed saray kasalanan to, tan nampilalekan to so inkamatunong anga ed sampot na saray agew to, angan ontan met sikato so natumañgan na inkamatunong.

7 Sikara so saraman so dinundon na Katawan; on, sikara so saray nipaway, a nilaban nanlapu ed andi-angaan a labi na kabiluñgetan; tan dia ed onia sikara so ontalindeg odino nigapol; tan nia, sikara so dili ya okom da, no bilang gawaen da so maong odino gawaen da so mauges.

8 Natan, saray gangan na Dios so ag-nauman; dia ed ontan, say dalan so imparaan to pian siopaman a malabay a mankurang ed saya tan nilaban.

9 Tan natan nia, anak ko, ag mo la ipapalaran so angan sakey ni a pankasalanan sumpa ed Dios mo ed saraya a kabiañgan na doctrina, a saya so añgipalaranan mo a mangawa na kasalanan.

10 Ag mo ipapasen, lapu ed asalita la so kipawil, a sika so nipawil manlapu ed kasalanan ya onla ed liket. Nia, ikuan ko ed sika, say karelmeñgan kapiganman aliwa a kaliketan.

11 Tan natan, anak ko, amin a totoo a wala ed nigapol a kipapasen, odino ikuan ko, wala ed minomundo a kipapasen, so wala ed apgo na sankapaitan tan dia ed saray balor na kaugsan; angapo so Dios da ed mundo, tan sikara so linma a sinmumpa ed inkaugali na Dios; dia ed ontan, sikara so wala ed kipapasen a sumpa ed inkapalsa na liket.

12 Tan natan nia, say kabaliksan na salita a kipawil say pañgala na sakey a beñgatla ed gendat a kipapasen tan ipasen to ed aliwa a gendat a kipapasen, odino ipasen to ed kipapasen a sumlang ed inkapalsa to?

13 O, anak ko, aliwa ya onia so kipapasen to; balet say kabaliksan na salita a kipawil so say pañgawit to ya ipawil lamet so mauges ed mauges, odino minomundo ed minomundo, odino makademonyo ed makademonyo—maong onkana ed saman so maong; inkamatunong ed saman so inkamatunong; maptek ed saman so maptek; mapañgasi ed saman so mapañgasi.

14 Dia ed ontan, anak ko, seetan mo a mapañgasi ka ed saray kaagian mo; mitoo ka a maptek, mañgokom ka ed inkamatunong, tan mangawa ka na maong ya andi-tonda; tan no saraya ya amin a beñgatla so gawaen mo dia ed ontan awaten mo so tumang mo; on, say panañgasi so nipawil ed sika lamet; say kaptekan so nipawil ed sika lamet; say matunong a panañgokom so nipawil ed sika lamet; tan nawalaan ka na maong a tumang lamet.

15 Tan no anto so initer mo saman so ompawil ed sika lamet, tan saya so nipawil; dia ed ontan, say salita a kipawil nagnap a dusaen to so makasalanan, tan sikato so ag to patunoñgen.