1 Tan agawa no kaonoñgan so saray ag ondeñgel ed saray salita nen Helaman tan saray kaagian to sikara so atipon sumpa ed saray kaagian da.

2 Tan natan nia, sikara so awalaan na mapalalo a sanok, a saya so makaseñgeg na mabiskeg a gagala a pamatey da ed sikara.

3 Natan say pañgulo na saraman so mapalalo so sanok da sumpa ed saray kaagian da so sakey a baleg tan mabiskeg a too; tan say ñgaran to Amalickiah.

4 Tan si Amalickiah pilalek to so manmaliw ya ari; tan saraman a totoo ya awalaan na sanok pilalek da met a sikato so manmaliw ya ari ra; tan say karaklan ed sikara so saray abebbeba ya okom ed saman a dalin, tan panseseetan da so nawalaan na pakapanyari.

5 Tan sikara so nitunton na saray panagpasirayew nen Amalickiah, a no sikato so tuloñgan da tan ipasen da ya ari ra gawaen to ra a manoley ed saray totoo.

6 Dia ed onia sikara so intunton nen Amalickiah ya onsian, manwari ya ontan so saray impupulong nen Helaman tan saray kaagian to, on, manwari ya ontan so mapalalo a panagasikaso ra ed simbaan, lapu ed sikara so atagey a sacerdote na simbaan.

7 Tan dakel ed loob na simbaan so anisia ed saray mapasirayew a salita nen Amalickiah, dia ed ontan sikara so sinmian angan dia ed simbaan; tan dia ed onia say kipapasen na saray totoo nen Nephi so mapalalo a kibang-kibang tan makapataktakot, manwari ya ontan so kinabaleg na taluna ya agamoran da ed saray Lamanite; tan say agay la a gayaga ra lapu ed inkilaban da dia ed panamegley na lima na Katawan.

8 Dia ed onia anengneng tayo no panon so siglat na saray anak na totoo a makalingwan ed Katawan a Dios da, on, agay la so siglat da a mangawa na karelmeñgan, tan iarawi na sakey a mauges.

9 On, anengneng tayo met so baleg a kaugsan na sakey a mapalalo a mauges a too a saya so amaseñgeg na agawa ed limog na saray anak na totoo.

10 On, anengneng tayo a si Amalickiah, lapu ed sakey a too ya awalaan na plano na kasiliban tan too ya awalaan na dakel a mapasirayew a salita, iarawi to so puso na dakel a totoo a mangawa na kaugsan; on, tan inanap to a deralen so simbaan na Dios, tan pian deralen to so letnegan na kawayañgan ya initer na Dios ed sikara, odino say bendicion ya initer na Dios ed tapew na dalin ya onkana ed saray matunong.

11 Tan natan agawa a sanen si Moroni, lapu ed sikato so pañgulo na saray sankaatageyan a manañgoley ed saray ñgayew na Nephite, nadñgelan to so saya ya insisian, sikato so mamapasnok ed si Amalickiah.

12 Tan agawa a pinilat to so kawes to; tan inala to so melag a kabiañgan to nia, tan insulat to ed saya so—Dia ed pakanodnunotan ed Dios tayo, ed relihion tayo, tan kawayañgan tayo, tan kareenan tayo, saray kaasawaan tayo, tan saray anak tayo—tan saya so impeket to ed sampot na sakey a teken.

13 Tan insulong to so salimbeng na ulo to, tan salimbeng to ed pagew, tan say arum a salimbeng to, tan imbalkes to so kirlong to ed balambang; tan inala to so teken, a dia ed sampot to nia wala diman so pinilat a kawes to, (tan saya so tinawag to a laylay na kawayañgan) tan sikato so yinmuko ed dalin, tan nampikasi a sibibiskeg ed Dios to onkana ed saray bendicion na kawayañgan a komon onteen ed saray kaagian to, anga ed wala ni so olop na Cristiano a natitilak a mankayarian na dalin—

14 Tan onia so saray matua a mananisia ed si Cristo, a miembro na simbaan na Dios, so tawag na saraman so aliwa a miembro na simbaan.

15 Tan saraman so miembro na simbaan so matuor; on, amin a matua a mananisia ed Cristo inako ra ed inkasikara, a sililiket, so ñgaran nen Cristo, odino Cristiano so tawag ed sikara, lapu ed pananisia ra ed si Cristo a sikato so onsabi.

16 Tan dia ed ontan, ed saya a panaon, si Moroni so nampikasi pian say pankaabigan na saray Cristiano, tan say kawayañgan ed saman a dalin so napalaboan.

17 Tan agawa a kayari ya initer to so linawa to ed Dios, binitla to ya amin so dalin a wala ed abalaten na dalin na Apalis, on, dia ed antikey a panañgibaga, amin a dalin, mandapag dia ed baybay tan abalaten—So sakey ya apili-pili a dalin, tan dalin na kawayañgan.

18 Tan inkuan to: Petepeteg a say Dios ag to itepel, a sikatayo ya abalaw lapu ed inako tayo so ñgaran nen Cristo, so gatin-gatinan da tan deralen da, anga ed awiten tayo ed inkasikatayo so saya ed dili a pankasalanan.

19 Tan sanen nibaga la nen Moroni so saraya a salita, sikato so linma ed limog na saray totoo, ya impayapay to so kabiañgan na pinilat a kawes to ed dagem, pian amin nanengneng da so insulat a sulat ed saman so pinilat to, tan dia ed maksil a voces, inkuan to:

20 Nia, siopaman a pagnayonen to so saya a paulo ed dalin, abuloyan yo ra ya ondago ed biskeg na Katawan, tan onloob ed sakey a paknaan a pagnayonen da so saray pankatunoñgan da, tan say relihion da, pian say Katawan a Dios bendicionan to ra.

21 Tan agawa a sanen impalapag nen Moroni so saraya a salita, nia, saray totoo so dinmago a mambaktik a sankaawit da so saray kirlong da ya akabalkes ed balambang da, a pinilat da met so saray kawes da a pakapatnagan, odino tanda na sakey a paknaan, ya ag da inkaindan so Katawan a Dios da; odino, dia ed sananey a salita, no sikara so mankasalanan ed saray gangan na Dios, odino sikara so napelag ed kasalanan, tan ibaing da ya akoen ed inkasikara so ñgaran nen Cristo, say Katawan pilaten to ra a siñga unong ed impampilat da ed saray kawes da.

22 Natan saya so paknaan a ginawa ra, tan imbantak da so saray kawes da ed saliyan nen Moroni, a kuan da: Sikami so mipaknaan ed Dios tayo, a sikami so naderal, angan siñga ed saray kaagian tayo a wala ed mamabaybay, no sikami so napelag ed kasalanan; on, sikami so ibantak to ed saliyan na saray kabusol mi, a siñga ed impañgibantak mi ed saray kawes mi ed saliyan mo a gatin-gatinan na sali, no sikami so napelag ed kasalanan.

23 Si Moroni inkuan to ed sikara: Nengneng yo, sikatayo so nakdaan ed boleg nen Jacob; on, sikatayo so nakdaan ed boleg nen Jose, a say kawes to so pinilat-pilat na saray agagi to ed nankakapiga a biang; on, tan natan nia, nunoten tayo a sumpalen so saray gangan na Dios, odino saray kawes tayo so pilat-pilaten na saray kaagian tayo, tan sikatayo so ipisok da ed pañgawan, odino ilako, odino sikatayo so pateyen da.

24 On, nepeg tayo a pagnayonen so kawayañgan tayo a nakdaan ed si Jose; on, nunoten tayo so saray salita nen Jacob, sakbay na impatey to, tan nia, anengneng to a sakey a biang ed say nakdaan a kawes nen Jose so nisinop tan saya so ag-abulok. Tan inkuan to—Angan saya a nakdaan ed kawes na anak ko a laki so nisinop, wala so nakeraan ed boleg na anak ko a magnayon ed panamegley na lima na Dios, tan saya so naawit ed inkasikato, legan a say nakdaan ed boleg nen Jose so ompatey, angan siñga say nakdaan ed kawes to.

25 Natan nia, saya so añgiter na ermen ed kamareruak; angaman ontan, say kamareruak so awalaan na gayaga ed anak ko a laki, lapu ed miembro na boleg to a naawit ed Dios.

26 Natan nia, saya so balikas nen Jacob.

27 Tan natan siopa so mikabat no ag saray nakdaan ed boleg nen Jose, a sikara so ompatey a siñga kawes to, so saraman so sinmisian ed sikatayo? On, tan angan pati sikatayo met no ag tayo ontalindeg ya ag-nagiing ed pananisia ed Cristo.

28 Tan natan agawa a sanen nibalikas la nen Moroni so saraya a salita sikato so linma la, tan ontan met nampabaki ed amin a nasasakopan na saman a dalin a kawalaan na saray sinmisian, tan tinipon to ya amin so saray totoo a wala so pilalek da a pagnayonen so kawayañgan da, ya ontalindeg sumpa ed si Amalickiah tan saraman so sinmisian, ya atawag ya Amalickiahite.

29 Tan agawa sanen anengneng nen Amalickiah a saray totoo nen Moroni a dakerakel so bilang da nen saray Amalickiahite—tan anengneng to met a saray totoo to so manduarua ra nipaakar ed kaptekan na ikokurang da a saya so gegetmaen da—dia ed ontan, dia ed takot to ya ag to naala so pilalek to, inala to so saray totoo to a siaabubon ed sikato tan sikara so tinmaynan ya amaarap ed dalin na Nephi.

30 Natan si Moroni anunotan to ya ag kanepegan a saray Lamanite naaruman ni so biskeg da; dia ed ontan anunotan to a sakbayan so saray totoo nen Amalickiah, odino sikara so alaen to tan ipawil to ra, tan papatey to si Amalickiah; on, lapu ed kabat to a sikato so mamagalaw ed saray Lamanite a mampasnok sumpa ed sikara, tan señgeg na isalong da a mibakal sumpa ed sikara; tan saya so amta to a gawaen nen Amalickiah pian nagamoran to so saray getma to.

31 Dia ed ontan si Moroni anunotan to a nakaukolan ya alaen to so saray ñgayew to, a sikara so nantitipon ed inkasikara a dili, tan inayuraan da so inkasikara, tan linmoob ira ed sakey a paknaan a pagnayonen da so kareenan—tan agawa ya inala to so ñgayew to tan sikara so kinmurang ya awit da so saray abong-abong da ya abel ya amaarap ed kalawakan, pian sakbayan da so aarapen nen Amalickiah ed kalawakan.

32 Tan agawa a ginawa to so unong ed pilalek to, tan kinmurang ira ya amaarap ed kalawakan, tan sinakbayan da so saray ñgayew nen Amalickiah.

33 Tan agawa a si Amalickiah so binmatik a kaolop to so melag a bilang na saray totoo to, tan saray nakdaan so iniawat da ed saray lima nen Moroni tan sikara so inawit da ya impawil ed dalin na Zarahemla.

34 Natan, si Moroni lapu ed sikato so too ya aturo a pañgulo ya okom tan say voces na saray totoo, dia ed ontan niiter ed sikato so pakapanyari unong ed linawa to nipaakar ed saray ñgayew na Nephite, pian iletneg to tan sikara so oleyan to.

35 Tan agawa a siopaman ed saray Amalickiahite ya ag onloob ed paknaan pian tuloñgan da so señgeg na kawayañgan, pian nituloy da so bulos a gobierno, sikara so impapatey to; tan pigpigara so ag inmabubon ed paknaan nipaakar ed kawayañgan.

36 Tan agawa met, ya ingangan to a say laylay na kawayañgan so itagey da ed balang sakey a tori a wala ed nasasakopan na saman a dalin, a kayarian na saray Nephite; tan dia ed onia si Moroni impaalagey to so laylay na kawayañgan ed limog na saray Nephite.

37 Tan sikara so ginmapo lamet ya awalaan ira na kareenan ed saman a dalin; tan dia ed onia apagnayon da so kareenan ed saman a dalin anga ed ñgalñgali mansampot la so komalabinsiam a taon ya oley na saray okom.

38 Tan si Helaman tan saray atagey a sacerdote apagnayon da so uksoy ed simbaan; on, angan dia ed loob na apat taon awalaan ira na baleg a kareenan tan gayaga ed simbaan.

39 Tan agawa a dakel la so saray inaatey, ya ag-nagiing so pananisia ra a kamarerua ra so dinundon na Katawan Jesu Cristo; dia ed onia sikara so pinmaway ed saya a mundo a sigagayaga.

40 Tan wala ra met so pigara ya inaatey ed sakit a petang, a dia ed arum a panaon na taon saya so mabetbet ed saman a dalin—balet aliwa ya unong so karakel ed sakit a petang, lapu ed kinarakel na saray tanaman ya awalaan na atagey ya uri tan saray lamut a makatambal ya imparaan na Dios a mañgekal ed panseseñgegan na saray sakit, a saray totoo so wala ra ed silong na inkapalsa na panaon—

41 Balet dakel so saray inaatey ed inkatakken; tan saraman so inaatey ed pananisia ed Cristo so maliket ed sikato, a nakaukolan dia ed sikatayo so wala met.