1 Natan sanen si Ammon tan saray agagi to so nansisian la ra ed ketegan na dalin na saray Lamanite, nia si Aaron nambaroy ya amaarap ed dalin a tatawagen na saray Lamanite na, Jerusalem, a saya so imboloy da ed nianakan na kaamaan da; tan saya so niarawi a misaip ed dalin na Mormon.

2 Natan saray Lamanite tan saray Amalekite tan saray totoo na Amulon so añgipaalagey na baleg a ciudad, a saya so tinawag da na Jerusalem.

3 Natan saray Lamanite dia ed sikara a dili nagnap la so awet da, balet saray Amalekite tan Amulonite lalo ni so awet da; dia ed ontan imbañgat da so saray Lamanite a paaweten da so saray puso ra, kanian sikara so inmawet a maong ed karelmeñgan tan karumsisan da.

4 Tan agawa a si Aaron so linma ed ciudad na Jerusalem, tan inuna to a ginapoan so pampulong ed saray Amalekite. Tan ginapoan to so mampulong ed sikara ed loob na saray sinagogas da, lapu ed sikara so añgipaalagey na saray sinagogas da unong ed bañgat na saray Nehor; lapu ed dakel ed saray Amalekite tan Amulonite so mananumbok ed bañgat na saray Nehor.

5 Dia ed ontan, sanen si Aaron so linmoob ed sakey ed saray sinagogas da pian mampulong ed saray totoo, tan sanen sikato so mansasalita ed sikara, nia tinmalindeg so sakey ya Amalekite tan ginapoan to so mibaliñgaan ed sikato, a nankuan: Anto so saman so pinaneknekan mo? Akanengneng ka na angel? Akin kasi saray angeles ag ira ompanengneng ed sikami? Nia ag kasi saya a totoo so maong a siñga saray totoom?

6 Inkuan mo met, likud no sikami so mambabawi sikami so nabalang. Panon so pakapikabat mo ed nunot tan gagala na saray puso mi? Panon so pakapikabat mo a wala so makaseñgeg na pambabawian mi? Panon so pakaamtam a sikami so aliwa a totoo a matunong? Nia, añgipaalagey kami na saray pasen a panagpikasian, tan sikami so mantitipon a mañgigalang ed Dios. Manisia kami a say Dios ilaban to so amin a totoo.

7 Natan si Aaron inkuan to ed sikato: Manisia ka kasi a say Anak na Dios so onsabi a manundon ed amin a totoo manlapu ed saray kasalanan da?

8 Tan saman a too inkuan to ed sikato: Ag kami manisia ya amtam so ontan a beñgatla. Ag kami manisia ed saraya a makulang-kulang a sisia a tawir. Ag kami manisia ya amtam so beñgatla ya onsabi, ni say manisia kami a say kaamaan yo tan say kaamaan mi kabat da so nipaakar ed saray beñgatla a sinalita ra, ed saman so onsabi.

9 Natan si Aaron ginapoan to a linukasan so saray masanto a kasulatan ed sikara nipaakar ed isabi nen Cristo, tan ontan met say nipaakar ed kioli ed bilay na saray inaatey, tan angapo so pakadundon na totoo likud no dia ed panamegley na ipatey tan panirap nen Cristo, tan say bagat to a pamaandi na kasalanan ed panamegley na dala to.

10 Tan agawa a sanen ginapoan to ya ipaliwawa so saraya a beñgatla ed sikara nampasnok ira ed sikato, tan sikato so ginapoan da a sutilen; tan ag da deñgelen so saray salita ya ibabalikas to.

11 Dia ed ontan, sanen anengneng to ya ag da deñgelen so saray salita to, sikato so tinmaynan ed sinagogas da, tan linma ed sakey a bario a tatawagen na Ani-Anti, tan diman to arumog si Muloki ya ipopulong to so salita ed sikara, tan ontan met ed si Ammah tan saray kaagian to. Tan sikara so akibaliñgaan ed dakel nipaakar ed salita.

12 Tan agawa ya anengneng da a saray totoo papaaweten da so saray puso ra, dia ed ontan sikara so tinmaynan tan akasabi ra ed dalin na Middoni. Tan sikara so nampulong na salita ed dakel, tan pigpigara so anisia ed saray salita ya imbañgat da.

13 Manwari ya ontan, si Aaron tan say pigara a bilang ed saray kaagian to so inala ra tan impisok da ed pañgawan, tan say nakdaan ed sikara so binmatik a pinmaway ed Middoni a linma ed saray pasen a kaliber-liber.

14 Tan saraman so impisok da ed pañgawan nantepel ira na nambabañgil a beñgatla, tan sikara so nilaban dia ed panamegley na lima nen Lamoni tan si Ammon, tan sikara so pinakan da tan kinawesan da.

15 Tan sikara lamet so linma a mañgibawag na salita, tan dia ed onia sikara so nilaban ed unaan a panaon manlapu ed loob na pañgawan; tan onia so impanlikna ra na kairapan.

16 Tan sikara so linma ed inerman a pasen a pañgiwanwanan na Espiritu na Katawan, a mampulong na salita na Dios ed balang sakey a sinagogas na saray Amalekite, odino dia ed balang sakey a tipon na saray Lamanite no iner sikara so awaten da.

17 Tan agawa a say Katawan ginapoan to ra a bendicionan, kanian dakel so saray naawit da ed pikakabat ed katuaan; on, dakel so saray akuyong da ed saray kasalanan da, tan ed sisia a tawir na saray ama ra, a saraya so aliwa a duga.

18 Tan agawa a si Ammon tan si Lamoni so pinmawil a nanlapu ed dalin na Middoni ya amaarap ed dalin na Ishmael, a saya so dalin a tinawir da.

19 Tan si ari Lamoni ag to nitepel a si Ammon so manlingkor ed sikato, odino manmaliw ya igagangan to.

20 Balet kinaliktan to so pañgipaalagey na saray sinagogas ed dalin na Ishmael; tan ingangan to so saray totoo to, odino saray totoo a wala ed silong na oley to so mantitipon ira.

21 Tan sikato so manliket lapu ed sikara, tan imbabañgat to ra nipaakar ed dakel a beñgatla. Tan imbawag to met ed sikara a saraman so totoo a wala ed silong to, tan sikara so bulos a totoo, tan sikara la so bulos ed saray panagpairap na ari, ya ama to; lapu ed si ama to añgiabuloy a sikato to la so manoley ed saray totoo a wala ed dalin na Ishmael, tan amin a dalin a wala ed kaliber-liber.

22 Tan imbawag to met ed sikara ya awalaan la ra na kawayañgan a mampikasi ed Katawan a Dios da unong ed saray pilalek da, ed inerman a pasen a kawalaan da, no saya so wala ed sakop na dalin a wala ed silong na oley nen ari Lamoni.

23 Tan si Ammon so nampulong ed saray totoo nen ari Lamoni; tan agawa ya imbañgat to ed sikara so amin a beñgatla nipaakar ed inkamatunong. Tan pinuloñgan to ra ya inagew-agew, ed amin a seet; tan dineñgel da so saray salita to, tan sikara so matuor a manumpal ed saray gangan na Dios.