1 Natan kayari nen Alma ya imbaga so saraya a salita, sikara so nampabaki ed sikato lapu ed pilalek da a kabaten no sikara so kaukolan a manisia ed saksakey a Dios, pian nagamoran da so saya a buñga a sinalita to, odino panon da ya itanem so bokel, odino say salita a saya so sinalita to, ya imbaga to a saya so itanem da ed saray puso ra; odino anto a pamaakaran so pañgigapo ra ya ikana so pananisia ra.

2 Tan si Alma inkuan to ed sikara: Nia, inkuan yo ya ag kayo makapañgigalang ed Dios yo lapu ed sikayo so pinapaway da ed saray sinagogas yo. Balet nia, ikuan ko ed sikayo, no ipapasen yo ya ag kayo makapañgigalang ed Dios, baleg so liñgo yo, tan nepeg yo a sukaiten so saray masanto a kasulatan; no ipapasen yo ya imbañgat da so saraya ed sikayo, ag yo atalusan so saraya.

3 Nanunotan yo kasi so abasa yo no anto so inkuan nen Zenos, sakey a profeta ed kadaanan, nipaakar ed pikakasi odino panañgigalang?

4 Tan inkuan to: Sika so mapañgasi, O Dios, lapu ed dineñgel mo so saray pikakasik, angan sanen wala ak ed kalawakan; on, sika so mapañgasi nen nampikasi ak onkana ed saraman so kabusol ko, tan sikara so iniarap mo ed siak.

5 On, O Dios, tan sika so mapañgasi ed siak sanen siak so tinmawag ed sika sanen wala ak ed kaumaan ko; sanen siak so nannañgis ed sika ed saray pikakasik, tan dineñgel mo ak.

6 Tan lamet, O Dios, sanen inmarap ak ed abong ko siak so dineñgel mo ed saray pikakasik.

7 Tan sanen inmarap ak ed silir ko, O Katawan, tan siak so nampikasi ed sika, dineñgel mo ak.

8 On, sika so mapañgasi ed saray anak mo sanen nannañgis ira ed sika, pian nareñgel mo ira tan aliwa a saray totoo, tan sikara so dineñgel mo.

9 On, O Dios, sika so mapañgasi ed siak, tan dineñgel mo so saray nañgis ko ed pegley na saray tipon mo.

10 On, tan dineñgel mo ak sanen siak so pinapaway da tan binalaw na saray kabusol ko, on, dineñgel mo so saray pikakasik, tan nampasnok ka ed saray kabusol ko, tan sikara so dinalaw mo ed pasnok mo ed panamegley na masiglat a kadederal.

11 Tan siak so dineñgel mo lapu ed saray irap ko tan inkamatuak; tan lapu ed Anak mo kanian sika so mapañgasi ed siak, dia ed ontan siak so onnañgis ed sika ed amin ya irap ko, lapu ed sika so kawalaan na gayagak; lapu ed iniarawim ed siak so panañgokom mo, lapu ed Anak mo.

12 Tan natan si Alma inkuan to ed sikara: Manisia kayo ed saraman so masanto a kasulatan a saraya so insulat na saray wala ed kadaanan?

13 Nia, no manisia kayo, sirin manisia kayo ed inkuan nen Zenos: tan, nia inkuan to: Iniarawim so panañgokom mo lapu ed Anak mo.

14 Natan nia, kaagian ko, ontepet ak no abasa yo la so saray masanto a kasulatan? No abasa yo la, panon so ag yo panisia ed Anak na Dios?

15 Lapu ed aliwa ya insulat nen Zenos labat so salita nipaakar ed saraya a beñgatla, balet si Zenock met sinalita to so saraya a beñgatla—

16 Tan nia, inkuan to: Sika so nampasnok, O Katawan, ed saya a totoo, lapu ed ag da talusan so panañgasim ya initer mo ed sikara lapu ed Anak mo.

17 Tan natan, kaagian ko, nanengneng yo so komadua a kadaanan a profeta a pinaneknekan to so nipaakar ed Anak na Dios, tan lapu ed saray totoo ag da tinalusan so saray salita to sikato so tinutopak da anga ed inatey.

18 Balet nia, aliwa ni a saya ya amin; aliwa a sikara labat so nansalita nipaakar ed Anak na Dios.

19 Nia, sikato so sinalita nen Moises; on, tan say kanengneñgan to so nipatalindeg ed kalawakan, a siopaman ya ontangwa ed saya so nabilay. Tan dakel so saray ninmengneng tan sikara so abilay.

20 Balet pigpigara so akatalus ed kabaliksan na saraman a beñgatla, tan saya lapu ed awet na saray puso ra. Balet wala so dakerakel ya inmawet ya ag ira ninmengneng, dia ed ontan sikara so inatey. Natan say makaseñgeg no akin ag ira ninmengneng lapu ed ag ira manisia a saya so makatambal ed sikara.

21 O kaagian ko, no sikayo so natambal ed pañgiwandag yo na mata yo labat pian sikayo so natambal, ag yo kasi nengneñgen a tampol, odino lablabayen yo ni a paaweten so saray puso yo ed ag-pananisia, tan sikayo so mañgiras, ya ag yo iwandag so saray mata yo, pian sikayo so ompatey?

22 No ontan, abagey so onsabi ed sikayo; balet no andi, sirin iwandag yo so saray mata yo tan gapoan yo so manisia ed Anak na Dios, a sikato so onsabi a manundon ed saray totoo to, tan sikato so manirap tan ompatey pian mamaandi na saray kasalanan yo; tan sikato so onoli ed bilay lamet a manlapu ed saray inaatey, a saya so nagawa na kioli ed bilay, pian amin a totoo so ontalindeg ed arap to, a naokom ed sampot tan agew na panañgokom, unong ed saray kimey da.

23 Tan natan, kaagian ko, pilalek ko ya itanem yo so saya a salita ed saray puso yo, tan sano ongapo la ya ombaleg iñgen bayuboan yo ed panamegley na pananisia yo. Tan nia, saya so manmaliw a sakey a kiew, a saya so onsubol ed sikayo ya onkana ed andi-angaan a bilay. Tan dia ed ontan komon say Dios iter to ed sikayo a saray sasakbaten yo so onlemew, ed panamegley na gayaga ed Anak to. Tan angan saya ya amin nayarian yo a gawaen no labay yo. Amen.