1 Nia, natan agawa a saray totoo nen Nephi nanliket ira a mapalalo, lapu ed inlaban ira lamet na Katawan ed lima na saray kabusol da; dia ed ontan initer da so pisasalamat ed Katawan a Dios da; on, tan sikara so nanayuno a dakel tan nampikasi a mabetbet, tan sikara so añgigalang ed Dios ed agay la a gayaga.

2 Tan agawa a dia ed komalabinsiam a taon ya oley na saray okom ed saray totoo nen Nephi, si Alma linma ed anak to a laki a si Helaman tan inkuan to ed sikato: Manisia ka kasi ed saray salita ya asalitak la ed sika nipaakar ed saray kasulatan a saraya so nisinop?

3 Tan si Helaman inkuan to ed sikato: On, manisia ak.

4 Tan si Alma inkuan to lamet: Manisia ka ed si Jesu Cristo, a sikato so onsabi?

5 Tan inkuan to: On, manisia ak ed amin a salita ya imbalikas mo.

6 Tan si Alma inkuan to lamet ed sikato: Sumpalen mo kasi so amin a gangan ko?

7 Tan inkuan to: On, sumpalen ko so saray gangan mo ed amin a pusok.

8 Dia ed saman inkuan nen Alma ed sikato: Mapalar ka; tan say Katawan paaliguasen to ka ed saya a dalin.

9 Balet nia, wala so siñga labay ko ya iprofesiya ed sika; balet say iprofesiyak ed sika ag mo ipapakabat; on, say iprofesiyak ed sika so ag nakabatan, anga ed say profesiya so nasumpal; dia ed ontan isulat mo so saray salita ya ibagak.

10 Tan saraya so salita: Nia, amuriak a saya lamlamang a totoo, saraya so Nephite, unong ed espiritu na puyan a wala ed siak, dia ed loob na apat a lasus a taon manlapu ed panaon a si Jesu Cristo ipanengneng to so inkasikato ed sikara, onlasay ira ed ag-pananisia.

11 On, tan dia ed ontan nanengneng da so saray bakal tan saray salot, on, eras tan iterter na dala, anga ed saray totoo nen Nephi so sigpot a naupot.

12 On, tan saya so nagawa lapu ed sikara so onlasay ed ag-pananisia tan sikara so napelag ed kimey na kabiluñgetan, tan alak na laman, tan amin a nengneng na karelmeñgan; on, ikuan ko ed sika, lapu ed sikara so mankasalanan sumpa ed ontan la a kabaleg na liwawa tan pikakabat, on, ikuan ko ed sika, manlapu ed saman ya agew, anga ed say komapat a kailalakan ag ira ompatey ya amin sakbay na isabi na saya a baleg a karelmeñgan.

13 Tan sano saman a makabaliksan ya agew so onsabi, nia, say panaon ag la mambayag so isabi a saraman so wala dia natan, odino say boleg na saray nibilang la natan ed limog na saray totoo nen Nephi, so ag la nibilang ed limog na saray totoo nen Nephi.

14 Balet siopaman a natilak, tan ag naderal ed saman a makabaliksan tan makapataktakot ya agew, so nibilang ed limog na saray Lamanite, tan manmaliw ira a siñga sikara, amin, likud ed pigara a natawag a disipulos na Katawan; tan sikara so osilan na saray Lamanite ya anga ed sikara so sigpot a naupot. Tan natan, lapu ed karelmeñgan, saya a profesiya so nasumpal.

15 Tan natan agawa a kayari nen Alma ya imbalikas so saraya a beñgatla ed si Helaman, sikato so binendicionan to, tan ontan met ed saray arum ya anak to a lalaki; tan binendicionan to met so dalin onkana ed saray matunong.

16 Tan inkuan to: Onia so inkuan na Dios a Katawan—Naayew so dalin, on, saya a dalin, ed balang sakey a bansa, sankakanayon, salita, tan totoo, dia ed kaderal, sikara so managgawa na karelmeñgan, no sikara la so nagnap ed inkauges; tan unong ed sinalitak saya so nagawa; lapu ed saya so ayew tan pamapalar na Dios ed saya a dalin, tan say Katawan ag to onnengneng ed kasalanan a wala so angan sankamelagan a palugar.

17 Tan natan, sanen si Alma nibaga to la so saraya a salita binendicionan to so simbaan, on, amin ya ontalindeg ya ag nagiing ed pananisia manlapu ed saman a panaon ya anga ed arapen.

18 Tan sanen ayari la nen Alma a ginawa so saya sikato so tinmaynan ed dalin na Zarahemla, a siñga sikato so onla ed dalin na Melek. Tan agawa a sikato so ag la nadnadñgelan a kapiganman; no nipaakar ed impatey to odino inkipumpon to saya ag mi la akabatan.

19 Nia, saya so amta mi, sikato so sakey a too a matunong; tan say balita a nitayak ed simbaan a sikato so inala na Espiritu, odino sikato so nipumpon ed panamegley na lima na Katawan a siñga si Moises. Balet nia, saray masanto a kasulatan so añgikuan a say Katawan inala to si Moises ed inkasikato; tan ipapasen mi a sikato met so añgawat ed si Alma ed espiritu, dia ed inkasikato; dia ed ontan, dia ed saya a pamaakaran angapo so amta mi nipaakar ed impatey tan inkipumpon to.

20 Tan natan agawa dia ed ingapo na komalabinsiam a taon ya oley na saray okom ed saray totoo nen Nephi, si Helaman so linma ed limog na saray totoo pian ibawag to so salita ed sikara.

21 Tan nia, lapu ed saray bakal da ed saray Lamanite tan dakel ed saray ankekelag a baliñgaan tan gulo a wala ed limog na saray totoo, nakaukolan a say salita na Dios so ibawag ed limog da, on, tan sakey a pananontunan so nagawa ed lapag na simbaan.

22 Dia ed ontan, si Helaman tan saray kaagian to so linma a mañgiletneg na simbaan lamet ed amin a dalin, on, dia ed balang sakey a ciudad ed lapag na amin a dalin a kayarian na saray totoo nen Nephi. Tan agawa a sikara so anuro na saray sacerdote tan managbañgat ed lapag na amin a dalin, tan anuro dia ed amin a simbaan.

23 Tan natan agawa a kayari nen Helaman tan saray kaagian to so anuro na saray sacerdote tan managbañgat ed amin a simbaan wala so sakey a baliñgaan a linmetaw ed limog da, tan ag da labay so mañgiter na imano ed saray salita nen Helaman tan saray kaagian to;

24 Balet sikara so binmaleg ed kinon, tan sikara so nipaatagey ed saray puso ra, lapu ed saray alablabas a kayamanan da; dia ed ontan sikara so nanmaliw a mayaman ed dili a mata ra, tan ag da labay ya imanoen so saray salita ra, pian mankurang ira a maptek ed imaton na Dios.