1 Tan agawa a dia ed komalabinsakey a taon ya oley na saray okom ed saray totoo nen Nephi, dia ed komalima ya agew ed komadua a bulan, lapu ed wala so malaknab a kareenan ed dalin na Zarahemla, makaseñgeg angapo so saray bakal ni say baliñgaan ed pigara a taon, ya anga ed komalima ya agew na komadua a bulan ed komalabinsakey a taon, wala so dalamurom na bakal a nadñgel ed lapag na saman a dalin.

2 Tan nia, saray ñgayew na saray Lamanite dinmugpa ra a nanlapu ed gilig na kalawakan, dia ed saray ketegan na dalin, angan dia ed ciudad na Ammonihah, tan ginapoan da a pateyen so saray totoo tan deralen so ciudad.

3 Tan natan agawa, sakbay a saray Nephite so makapantipon na magenap a biskeg na saray ñgayew da a mansunson ed sikara ed paway na saman a dalin, dineral da la so saray totoo a wala ed ciudad na Ammonihah, tan ontan met saray arum a wala ed miketegan na dalin na Noah, tan inala ra so saray arum a dinakep ya inawit ed kalawakan.

4 Natan agawa a saray Nephite pilalek da a nasamsam so saraman so adakep ya inawit da ed kalawakan.

5 Dia ed ontan, saman so apili a pañgulo na saray kapitan ed ñgayew na saray Nephite, (tan say ñgaran to Zoram, tan wala so duara ya anak to a lalaki, si Lehi tan si Aha)—natan si Zoram tan saray duara ya anak to a lalaki, dia ed pikakabat da a si Alma so atagey a sacerdote na simbaan, tan lapu ed nadñgelan da a wala ed sikato so espiritu na profesiya, dia ed ontan sikara so linma ed sikato tan pilalek da ed sikato ya amtaen no say Katawan maabuloy a sikara so onla ed kalawakan a mananap ed saray kaagian da, a sikara so adakep ya inawit na saray Lamanite.

6 Tan agawa a si Alma intepet to ed Katawan nipaakar ed saya a pamaakaran. Tan si Alma pinmawil tan inkuan to ed sikara: Nia, saray Lamanite ombaliw ira ed ilog na Sidon ed kalawakan a wala ed abalaten, a paarawi ed saray ketegan na dalin na Manti. Tan nia, diman yo ra abeten, ed bokig na ilog na Sidon, tan diman say Katawan iawat to ed sikayo so saray kaagian yo a sikara so inala a dinakep na saray Lamanite.

7 Tan agawa a si Zoram tan saray anak to a lalaki so binmaliw ed ilog na Sidon, kaiba so saray ñgayew da, tan nankurang ira ed labas na ketegan na dalin na Manti anga ed abalaten a kalawakan, a saya so wala ed bokig na ilog na Sidon.

8 Tan sikara so akasabi ed kawalaan na ñgayew na saray Lamanite, tan saray Lamanite so ataytayak tan asunson da ra ed kalawakan; tan asamsam da so saray kaagian da a dinakep na saray Lamanite, tan angapo so angan sakey a kamarerua ed sikara so atigway ed saraman so adakep. Tan sikara so inawit na saray kaagian da pian kayarianen da so saman so sipor la a dalin da.

9 Tan onia so impansampot na komalabinsakey a taon na saray okom, a saray Lamanite so asunson ed paway na saman a dalin, tan saray totoo na Ammonihah so aderal; on, balang sakey a mambibilay a kamarerua ed saray Ammonihahite so aderal, tan ontan met ed say baleg a ciudad da, ya ibabaga ra ya ag nayarian a deralen na Dios, lapu ed kabaleg to.

10 Balet nengneng yo, dia ed loob na sakey ya agew saya so nataynanan ya angapo so manayam; tan saray bangkay so pinisay-pisay na saray aso tan monanakap na kalawakan.

11 Angaman ontan, kayari na dakel ya agew say laman na saray inaatey so inlusbo ed tapew na dalin, tan saraya so tinabonan na maimpis a tabon. Tan natan ontan la so makaruñgol ya añgob diman kanian saray totoo angapo so linma a mankayarian ed saman a dalin na Ammonihah ed dakel a taon. Tan saya so atawag na Apalis na Nehors; lapu ed sikara so kaiba nen Nehor ed pananisia, so saray inaatey; tan saray dalin da nansiansia ya angapo so manayam.

12 Tan saray Lamanite ag ira linma ya akibakal lamet sumpa ed saray Nephite anga ed komalabinapat a taon ya oley na saray okom ed saray totoo nen Nephi. Tan dia ed onia ed legan na talora a taon saray totoo nen Nephi so awalaan na nampatuloy a kareenan ed lapag na dalin.

13 Tan si Alma tan si Amulek so linma nampupulong na pambabawi ed saray totoo dia ed saray templo ra, tan dia ed saray pasen a panagpikasian da, tan ontan met ed saray sinagogas da, a saraya so impaalagey da unong ed inkaugali na saray Judio.

14 Tan no kaonoñgan karakel so saray ondeñgel ed saray salita ra, dia ed sikara ipasabi ra so salita na Dios, ya angapo so panañgibiig da ed inkatoo, a saya so andi-tonda.

15 Tan onia si Alma tan si Amulek so linma, tan ontan met ed saray dakerakel ni ya apili ya onkana ed kimey, a mañgipulong na salita ed amin a lapag na dalin. Tan say inkiletneg na simbaan so nanmaliw a lapag ed dalin, ed amin a pasen ed kaliber-liber, ed limog na amin ya totoo na Nephite.

16 Tan angapo so ag-pampapara ed limog da; say Katawan inkalbo to so Espiritu to ed amin a tapew na dalin ed pañgiparaan na kanunotan na saray anak na totoo, odino pian niparaan so saray puso ra a mañgawat ed salita a saya so ibañgat ed limog da ed panaon na isabi to—

17 Pian ag ira onawet sumpa ed salita, pian sikara so ag manmaliw ya ag-manisia, tan mampatuloy ira ed kadederal, balet pian awaten da so salita a katekep na gayaga, tan siñga sakey a sañga ya isuldong ed tua a wakal, pian sikara so onloob ed painawaan na Katawan a Dios da.

18 Natan saray sacerdote a linma a mampulong ed limog na saray totoo impulong da so sumpa ed amin a panagtila, tan panagpalikdo, tan ibeg, tan pambobusolan, tan kabandayan, tan panagbalaw, tan panagtakew, panagtulisan, panagpatey, pikakaloguran, tan amin a kanengneñgan na alak na laman, ya inkekelyaw da a saraya ya amin a beñgatla so ag-nepeg a nagawa—

19 Ya impakabat da so saray beñgatla a dia ed magano a panaon so onsabi; on, impakabat da so nipaakar ed isabi na Anak na Dios, saray irap to tan ipatey to, tan ontan met ed kioli ed bilay na saray inaatey.

20 Tan dakel ed saray totoo so nantepet nipaakar ed no iner a pasen so dateñgan na Anak na Dios; tan sikara so nibañgat a sikato so ompanengneng ed sikara kayari kioli to ed bilay; tan saya saray totoo dineñgel da katekep na baleg a gayaga tan liket.

21 Tan natan kayari a say simbaan so niletneg ed amin a lapag na saman a dalin—dia ed impantaluna ra ed demonyo, tan say salita na Dios so nipulong ed sikara ed inkadalisay to ed lapag na amin a dalin, tan say Katawan inkalbo to so saray bendicion to ed saray totoo—onia so impansampot na komalabinapat a taon ya oley na saray okom ed saray totoo nen Nephi.