1 Tan natan agawa ed ingapo na komaduamplo tan lima a taon ya oley na saray okom ed saray totoo nen Nephi, lapu ed niletneg da so kareenan ed baetan na saray totoo na Lehi tan saray totoo na Morianton nipaakar ed saray dalin da, tan ingapo ra so komaduamplo tan lima a taon ed kareenan;

2 Manwari ya ontan, ag nambayag so impagnayon na nagnap a kareenan ed saman a dalin, tan wala so ginmapo a baliñgaan ed limog na saray totoo nipaakar ed say pañgulo ya okom a si Pahoran; tan nia, wala so kabiañgan na saray totoo a pilalek da a pigara a kabiañgan na gangan so nepeg a nauman.

3 Balet nia, si Pahoran ag to umanen ni say nitepel to a say gangan so nauman; dia ed ontan, ag to dineñgel so saray voces na kerew da nipaakar ed pañguman na gangan.

4 Dia ed ontan, saraman so mampilalek a say gangan so nauman so nampasnok ed sikato, tan nampilalek ira a sikato so ag la mampatuloy a pañgulo ya okom ed dalin; dia ed ontan linmesa so ampetang a baliñgaan nipaakar ed saya a pamaakaran, balet ag sinmabi ed pamaterter na dala.

5 Tan agawa a saraman so nampilalek a si Pahoran so naekal ed trono na yuroñgan na panañgokoman so atawag a totoo na ari, tan nampilalekan da a say gangan so nauman ed sakey a kanengneñgan pian natalo so bulos a panañgoley tan iletneg so sakey ya ari ed saman a dalin.

6 Tan saraman so nampilalek a si Pahoran so mansiansia a pañgulo ya okom ed dalin inala ra so ñgaran a bulos a totoo, tan onia so inkaapag ed limog da, tan saray bulos a totoo so nansamba odino akipaknaan ira a pagnayonen da so pankatunoñgan da tan saray pankanawnawa ra ed relihion da ed panamegley na bulos a panañgoley.

7 Tan agawa a saya a pamaakaran na baliñgaan da so naapiger da ed panamegley na voces na saray totoo. Tan agawa a say voces na saray totoo so pinmaway a miaabubon ed saray bulos a totoo, tan si Pahoran nansiansia ed yuroñgan na panañgokoman, a saya so señgegan na baleg a gayaga ed saray kaagian nen Pahoran tan ontan met ed dakel a totoo na kawayañgan, a saya met so amareen ed saray totoo na ari, ya ag la ra sinmumlang balet apasuot ira a pagnayonen da so pamaakaran na kawayañgan.

8 Natan saraman so malabay na ari so saraman so nianak ed atagey a galang, tan pampirawatan da so manmaliw ya ari; tan sikara so tinuloñgan na saraman so mampirawat na pakapanyari tan oley ed saray totoo.

9 Balet nia, saya so mairap a panaon onkana ed onia a baliñgaan ed limog na saray totoo nen Nephi; tan nia, si Amalickiah apagalaw to lamet so puso na saray Lamanite sumpa ed saray totoo a Nephite, tan titiponen to so saray ñgayew to ed amin a pasen na dalin to, tan sikara so inayuraan to, tan ipaparaan to ra ed bakal ed amin a seet; tan sinambaan to ya inomen so dala nen Moroni.

10 Balet nia, nanengneng tayo a saya a sipan a ginawa to so asiglatan to; manwari ya ontan, imparaan to so inkasikato tan saray ñgayew to ya onla a mibakal sumpa ed saray Nephite.

11 Natan saray ñgayew to so aliwa a dakel a siñga sanen saman, lapu ed dakel a nilibo so inatey ed silong na lima na saray Nephite; balet angaman ontan a dakel so saray atigway ed sikara, si Amalickiah so akatipon na makapakelaw ya ontan la a kabaleg na ñgayew, a makaseñgeg ed saya ag antakot ya onla ed dalin na Zarahemla.

12 On, angan si Amalickiah sikato a dili so linma, ya añgipañgulo ed saray Lamanite. Tan saya nen komaduamplo tan lima a taon ya oley na saray okom; tan dia ed saya a panaon met so ingapo na impakaapiger da na saray baliñgaan nipaakar ed pañgulo ya okom, si Pahoran.

13 Tan agawa a sanen saray totoo a tatawagen a totoo na ari nadñgel da a saray Lamanite so onsabi a mibakal sumpa ed sikara, manliket ira ed saray puso ra; tan ag da labay ya alaen so saray ayura ra, lapu ed mapalalo so sanok da ed pañgulo ya okom, tan ontan met ed saray totoo na kawayañgan, kanian ag da labay ya alaen so saray ayura ra pian iagel da so bansa ra.

14 Tan agawa sanen anengneng nen Moroni so onia, tan anengneng to met a saray Lamanite so onsasabi ed ketegan na dalin, mapalalo so sanok to lapu ed inkabosañgel na saray totoo a nansagpotan to ed baleg a seet pian sikara so niagel; on, mapalalo so sanok to; say kamarerua to napno na pasnok sumpa ed sikara.

15 Tan agawa ya añgipawit na sakey a kerew, a kaiba so voces na saray totoo, ed gobernador na saman a dalin, a pilalek to a saya so basaen to, tan iter to ed sikato (Moroni) so pakapanyari a mamasuot ed saray sinmisian a mañgiagel ed dalin da odino sikara so pateyen.

16 Tan saya so manunaan ya inasikaso to say pamasampot ed saray baliñgaan tan isian ed limog na saray totoo; tan nia, saya so makaseñgeg ed amin a kadederal da. Tan agawa a saya so niiter unong ed voces na saray totoo.

17 Tan agawa a si Moroni ingangan to a saray ñgayew to so onla ya onsumpa ed saray totoo na ari, pian iguyor da paabebaen so kinon da tan saray atagey ya uri na inkianak da tan pian sikara so mipara ed dalin, odino alaen da so saray ayura ra tan tuloñgan da so pankaabigan na kawayañgan.

18 Tan agawa a saray ñgayew so kinmurang sumpa ed sikara; tan inguyor da a pinaabeba so saray kinon da tan say atagey ya uri na inkianak da, a dia ed saya ya impañgala ra ed saray agamil da ed bakal sumpa ed saray totoo nen Moroni sikara so inatey tan nipara ed dalin.

19 Tan agawa a wala so apat a libo ed saraman so sinmisian so inatey ed panamegley na espada; tan saray pañgulo ra ya ag inatey ed laban so inala ra tan impisok da ed pañgawan, lapu ed angapo so panaon a pansalaysay da ed sikara ed saya a panaon.

20 Tan saray nakdaan ed saraman so sinmisian, nen say sikara so sigbaten da ed dalin ed panamegley na espada, so simmuko ed laylay na kawayañgan, tan sikara so apasuotan a mañgitagey na laylay na kawayañgan ed saray tori ra, tan dia ed saray ciudad da, tan alaen da so saray ayura ra a mañgiagel ed bansa ra.

21 Tan dia ed onia sinampotan nen Moroni so saray totoo na ari, kanian angapo la so akabkabatan ya añgako ed ñgaran a totoo na ari; tan dia ed onia sinampotan to so inkabosañgel tan kinon na saraman a totoo ya ibibilang da so dala da ya atagey ya uri na inkianak; balet sikara so naawit a nampaabeba ed inkasikara a dili a siñga saray kaagian da, tan sikara so milaban a mabayani onkana ed kawayañgan da manlapu ed inkaaripen.

22 Nia, agawa legan a peles nen Moroni a buboyaken so saray bakal tan baliñgaan ed limog na saray dili a totoo to, tan sikara so uoleyan to ed kareenan tan kipapasen a wala so dunong, tan mangagawa na saray tutuntonen onkana ed panagparaan ed bakal sumpa ed saray Lamanite, nia, saray Lamanite so sinmabi ed dalin na Moroni, a saya so wala ed ketegan a gilig na dayat.

23 Tan agawa a saray Nephite aliwa a magenap so biskeg da ed ciudad na Moroni; dia ed ontan asunson ira nen Amalickiah, a dakel so inatey. Tan agawa a kinayarian nen Amalickiah so ciudad, on, kinayarian to ya amin so pasen ya asalimbeñgan.

24 Tan saraman so binmatik a pinmaway ed ciudad na Moroni linma ra ed ciudad na Nephihah; tan ontan met saray totoo ed ciudad na Lehi tinipon da so inkasikara, tan ginawa ra so paraan tan akaparaan ira a mañgawat ed saray Lamanite a mibakal.

25 Balet agawa a si Amalickiah ag to natepelan a saray Lamanite so onla sumpa ed ciudad na Nephihah a mibakal, balet pinatonda to ra ed gilig na dayat, ya añgitilak na saray totoo ed balang sakey a ciudad a mañgituloy tan mañgiagel ed saya.

26 Tan dia ed onia sikato so nampatuloy, a nankayarian ed dakel a ciudad, say ciudad na Nephihah, tan say ciudad na Lehi, tan say ciudad na Morianton, tan say ciudad na Omner, tan say ciudad na Gid, tan say ciudad na Mulek, a saraya ya amin so wala ed bokig a ketegan ed gilig na dayat.

27 Tan dia ed onia saray Lamanite agamoran da, dia ed kasiliban nen Amalickiah, so dakel a ciudad, lapu ed ag-nabilang so totoo to ra, a sikara ya amin so mabiskeg ya asalimbeñgan unong ed saray ginawa a panagsalimbeng nen Moroni; a saraya ya amin so añgiter na mabiskeg a pasen ed saray Lamanite.

28 Tan agawa a sikara so kinmurang ya anga ed ketegan na dalin na Bountiful, a sinunson da so saray Nephite ed arapan da tan dakel so saray pinatey da.

29 Balet agawa a sikara so naabet nen Teancum, a sikato so amatey ed si Morianton tan sinakbayan to so saray totoo to dia ed ibatik to.

30 Tan agawa a sinakbayan to met si Amalickiah, sanen sikato so mankokurang a kaiba to so amayamay a ñgayew to pian kayarianen to so dalin na Bountiful, tan ontan met ed say dalin a mamabaybay.

31 Balet nia sinmakit so linawa to nen sikato so apasener nen Teancum tan saray totoo to, lapu ed sikara so maong a managbakal; tan balang sakey a too nen Teancum apalabsanan to so saray Lamanite ed biskeg da tan inkamaong da ed pibabakal, a makaseñgeg ed saya agamoran da so taluna ed saray Lamanite.

32 Tan agawa a sikara so pinagit da, a makaseñgeg ed saya sikara so pinapatey da anga ed insabi na biluñget. Tan agawa a si Teancum tan saray totoo to impaalagey da so saray abong-abong da ya abel ed ketegan na dalin na Bountiful; tan si Amalickiah impaalagey to met so saray abong-abong to ya abel ed ketegan dia ed gilig na dayat, tan dia ed onia a kanengneñgan sikara so asunson.

33 Tan agawa a sanen sinmabi so labi, si Teancum tan say igagangan to nankalkalna ra a pinmaway ed labi, tan linma ra ed campo nen Amalickiah; tan nia, sikara so tinalo na ugip lapu ed mapalalo a banal da, a saya so lapu ed saray kimey da tan petang na agew.

34 Tan agawa a si Teancum so nankalkalna a linmoob ed abong-abong ya abel na ari, tan intoruk to so gayang ed puso; saya so makaseñgeg na tampol ya impatey na ari kanian ag to la ra abañgon so saray igagangan to.

35 Tan sikato so pinmawil lamet a nankalkalna ed dili a campo to, tan nia, saray totoo to malet so ugip da, tan sikara so binañgon to tan tinungtong to ya amin so beñgatla a ginawa to.

36 Tan ingangan to a saray ñgayew to so mamparaan, ag la piga saray Lamanite so naliing tan sikara so onla ed sikara.

37 Tan dia ed onia nansampot so komaduamplo tan lima a taon ya oley na saray okom ed saray totoo nen Nephi; tan dia ed onia nansampot so saray agew nen Amalickiah.