1 Tan nia, natan agawa a saraman so Lamanite lalo ira a mamapasnok lapu ed impampatey da ed saray kaagian da; dia ed onia sinambaan da so ibales da ed saray Nephite; tan ag da la ginetma so pampatey ed saray totoo na Anti-Nephi-Lehi ed saman a panaon.

2 Balet inala ra so saray ñgayew da tan linma ira ed ketegan na dalin na Zarahemla, tan dinugpa ra so saray totoo a wala ed dalin na Ammonihah tan sikara so dineral da.

3 Tan dia ed kayari to nia, sikara so awalaan na dakel a bakal ed saray Nephite, a dia ed saya sikara so asunson tan apatey.

4 Tan dia ed limog na saray Lamanite ya apatey say karaklan ed sikara so boleg nen Amulon tan saray kaagian to, a sikara so sacerdote nen Noah, tan sikara so inatey ed panamegley na lima na saray Nephite;

5 Tan saray nakdaan, lapu ed batik ira ed bokig a kalawakan, tan lapu ed asamsam da so pakapanyari tan pakaoley ed saray Lamanite, so amaseñgeg a dakel ed saray Lamanite so ompatey ed panamegley na apoy lapu ed pananisia ra—

6 Dakel ed sikara, lapu ed impantepel da ed saray dakel ya abalang tan dakel a segsegang, ginapoan da ya anunotan so saray salita ya impulong nen Aaron tan saray kaagian to ed sikara ed dalin da; dia ed ontan ginapoan da so ag manisia ed saray sisia a tawir na kaamaan da, tan manisia la ra ed Katawan, tan initer to so baleg a pakapanyari ed saray Nephite, tan dia ed onia dakel ed sikara so apasimbalo ed pananisia dia ed kalawakan.

7 Tan agawa a saraman so manuoley a sikara so nakdaan ed saray anak nen Amulon ginetma ra a sikara so pateyen da, on, amin na saray manisia ed saraya a beñgatla.

8 Natan say impatey na saray angapo so kasalanan so akaseñgeg ed dakel a kaagian da so ginmalaw ed pasnok; tan wala so ginmapo a baliñgaan ed kalawakan; tan saray Lamanite ginapoan da ya anapen so saray boleg nen Amulon tan saray kaagian to tan ginapoan da ra a pateyen; tan sikara so binmatik ed bokig a kalawakan.

9 Tan nia sikara ni so aanapen da anga ed saraya ya agew na saray Lamanite. Dia ed onia saray sinalita nen Abinadi so asumpal, a sinalita to nipaakar ed boleg na saray sacerdote a sikara so añgigangan a sikato so mantepel na patey ed panamegley na apoy.

10 Tan inkuan to ed sikara: No anto so gawaen yo ed siak ontan met so kanengneñgan na beñgatla ya onsabi.

11 Tan natan si Abinadi so sankaunaan a nantepel na patey ed panamegley na apoy lapu ed pananisia to ed Dios; natan saya so labay to ya ibaga, a dakel so saray mantepel na patey ed panamegley na apoy, unong ed impanirap to.

12 Tan inkuan to ed saray sacerdote nen Noah a saray boleg da so panseñgegan na dakel ya ompatey, ed kanengneñgan unong ed inkagawa to, tan sikara so nataytayak ed arum a bansa tan pateyen da ira, a siñga karnero ya angapo so managpastol da so osil-osilan tan pateyen na saray atap a monanakap; tan natan nia, saraya a salita so apasekderan, lapu ed sikara so inosil-osilan na saray Lamanite, tan sikara so inanopan, tan sikara so pinairap da.

13 Tan agawa a sanen saray Lamanite anengneng da ya ag da natalo so saray Nephite sikara so pinmawil lamet ed dili a dalin da; tan dakel ed sikara so linma a nanayam ed dalin na Ishmael tan dalin na Nephi, tan intipon da so inkasikara ed saray totoo na Dios, a sikara so totoo na Anti-Nephi-Lehi.

14 Tan inkutkot da met so saray agamil da ed bakal, unong ed ginawa na saray kaagian da, tan ginapoan da so manmaliw a matunong a totoo; tan sikara so nankurang ed basbas na Katawan, tan sinumpal da so saray gangan to tan saray pananontunan to.

15 On, tan sinumpal da so saray gangan nen Moises; lapu ed nakaukolan a sumpalen da ni so gangan nen Moises, tan wala ni so ag asumpal. Balet nilikud ed saray gangan nen Moises, sikara mantatalaran ed isabi nen Cristo, lapu ed saray gangan nen Moises so kanengneñgan na isabi to, tan manisia ira a sumpalen da ni so saray mapalaway a susumpalen anga ed panaon a sikato so nipuyan ed sikara.

16 Natan ag da ibibilang a say kilalaban so manlapu ed gangan nen Moises; balet say gangan nen Moises so mamapabiskeg ed pananisia ra ed Cristo; tan dia ed onia impagnayon da so ilalo ed panamegley na pananisia, onkana ed andi-angaan a kilalaban, a manmamatalek ira ed espiritu na profesiya, a saya so añgisalita ed saraman a beñgatla ya onsabi.

17 Tan natan nia, si Ammon, tan si Aaron, tan si Omner, tan si Himni, tan saray kaagian da so mapalalo so gayaga ra, ed maong a nansumpalan da ed limog na saray Lamanite, ya anengneng da a say Katawan initer to ed sikara so unong ed saray pikakasi ra, tan ontan met apaneknekan so saray salita to ed sikara ed balang sakey a kipapasen.