1 Tan agawa a sikato lamet so nansulat ed gobernador na dalin, a si Pahoran, tan saraya so insulat to, a nankuan: Nia, ipugtak so saya a sulat ko ed si Pahoran, dia ed ciudad na Zarahemla, a sikato so pañgulo ya okom tan gobernador ed lapag na dalin, tan ontan met ed amin na saraman so pinili na saray totoo a mañgoley tan mantalima ed kurang na saya a bakal.

2 Tan nia, wala so siñga labay ko ya ibaga ed sikara ya idalan ko ed tetel; tan nia, sikayo a dili kabat yo a sikayo so aturo a mantipon na totoo, tan ayuraan yo ra na saray espada, tan saray panagtastas, tan amin a nengneng na agamil ed bakal, tan sikara so ibaki yo sumpa ed saray Lamanite, ed inerman a pasen a laen da ed dalin tayo.

3 Tan natan nia, ibagak ed sikayo a siak a dili, tan ontan met ed saray totook, tan ontan met nen Helaman tan saray totoo to, so nantepel na agay la ya irap; on, angan eras, inkapgaan, tan banal, tan amin a kanengneñgan na irap.

4 Balet nia, no saraya labat ya amin so nilikna mi ag kami la manñguroñguro odino mambalaw.

5 Balet nia, agay la so karakel na inaatey ed limog na saray totoo tayo; on, nilibo la so niparukol ed panamegley na espada, ya aliwa ya onia so agawa no saray ñgayew tayo so niiter na magenap a biskeg tan tulong ya onkana ed sikara. On, baleg so impamaolyan yo ed sikami.

6 Tan natan nia, pilalek mi a kabaten so señgegan na saya a mapalalo ya impampaulyan yo; on, pilalek mi a kabaten so señgegan na ag yo impannunot ed saya a kipapasen.

7 Nayarian yo kasi a nunoten a sikayo so manyodyurong ed saray trono yo ed kipapasen ya angapo la so pakanunot yo, legan balet a saray kabusol yo peles da ya itatayak so kimey na patey ed kaliber-liber yo? On, legan da a papateyen so nilibo ed saray kaagian yo—

8 On, angan saraman so nanilalo ed sikayo ya onkana ed pañgiagel ed sikara, on, ibibilang da kayo a mañgiter na tulong ed sikara, on, sikayo komon so añgibaki ed sikara na saray ñgayew, pian apabiskeg ira, tan niagel yo so nilibo ed sikara ed kiparukol da ed panamegley na espada.

9 Balet nia, aliwa ni a saya ya amin—ag yo initer so saray tagano ed sikara, a lapu ed saya dakel so saray akilaban tan inmagos so dala ed saray bilay da makaseñgeg ed baleg a pilalek da ya onkana ed pankaabigan na saya a totoo; on, tan saya so ginawa ra sanen sikara so ompapatey la ed eras, lapu ed mapalalo ya impampaulyan yo ed sikara.

10 Tan natan, inararok a kaagian—tan nepeg yo so aroen; on, tan sikayo so nepeg a ginmalaw a siseseet onkana ed pankaabigan tan kawayañgan na saya a totoo; balet nia, sikara so pinaulyan yo a lapu ed saya say dala na nilibo so onla ed saray ulo yo ed kibabales; on, lapu ed kabat na Dios so amin ya nañgis da, tan amin ya intetepel da—

11 Nia, nayarian yo kasi ya ipasen a legan yo a manyodyurong ed saray trono yo, tan lapu ed mapalalo a kaabigan na Dios ya angapo a kapiganman so gawaen yo tan sikayo so ilaban to? Nia, no onia so pañgipapasen yo saya a pañgipapasenan yo so andi-kakanaan.

12 Ipapasen yo kasi a lapu ed ontan la a kinarakel na saray kaagian yo so apatey saya so lapu ed karelmeñgan da? Ikuan ko ed sikayo, no onia so pañgipapasenan yo saya so pañgipapasen yo so andi-kakanaan; tan ikuan ko ed sikayo, dakel so saray niparukol ed panamegley na espada; tan nia saya so onkana ed kadusa yo;

13 Tan say Katawan itepel to so saray matunong a napatey pian say kaptekan to tan panañgokom to so onsabi ed saray marelmeng; dia ed ontan ag yo nepeg ya ipasen a saray matunong abalang la ra lapu ed sikara so pinatey da; balet nia, sikara so onloob ed painawaan na Katawan a Dios da.

14 Tan natan nia, ikuan ko ed sikayo, mapalalo so takot ko a say panañgokom na Dios so onsabi ed saya a totoo, lapu ed mapalalo ya inkañgiras da, on, angan say inkañgiras na manuoley tayo, tan say mapalalo ya impamaulyan da ed saray kaagian da, on, ed saraman so inaatey.

15 Tan no ag komon lapu ed karelmeñgan a ginmapo ed saray pañgulo tayo, atalindegan tayo komon so saray kabusol tayo pian ag da komon agamoran so pakapanyari ed sikatayo.

16 On, no ag lapu ed bakal a linmesa ed limog tayo; on, no ag lapu ed saray totoo na ari, a sikara so gapoan na interter na dala ed limog tayo a dili; on, ed panaon sanen sikatayo so nambabaliñgaan ed limog tayo a dili, no impankakasakey tayo so saray biskeg tayo a siñga nen unaan a ginawa tayo; on, no ag lapu ed pilalek da ed pakapanyari tan panoley a saya so pilalek na saray totoo na ari ed sikatayo; no matua ra ed pankaabigan na kawayañgan, tan akitipon ira ed sikatayo, tan sikara so linma sumpa ed saray kabusol tayo, nen say inala ra so saray espada da sumpa ed sikatayo, a saya so señgegan a dakel so tinmerter a dala ed limog tayo a dili; on, no linma tayo sumpa ed sikara dia ed panamegley na biskeg na Katawan, abuyak tayo so saray kabusol tayo, tan saya so agawa, unong ed kasumpal na saray salita to.

17 Balet nia, natan onsasalong so saray Lamanite ed sikatayo, a kakayarianen da so saray dalin tayo, tan papateyen da so saray totoo tayo ed panamegley na espada, on, saray bibii tan saray anak tayo, tan ontan met sikara so inaawit da ya adakep, a sikara so nantetepel na amin a nengneng na irap, tan saya so lapu ed baleg a karelmeñgan na saray manaanap na pakapanyari tan pakaoley, on, angan saraman so totoo na ari.

18 Balet akin dakerakel ni so ibabagak ed saya a pamaakaran? Tan ag mi amta no anto balet so panseseetan yo ya aanapen ed oley. Ag mi amta ompano traidor kayo met ed bansa yo.

19 Odino sikayo so nampaulyan ed sikami makaseñgeg wala kayo ed otel na bansa tayo tan sikayo so aliber-liber na manañgiagel, kanian pinaulyan yo so naakan ya ag nipawit ed sikami, tan ontan met ed totoo a mamabiskeg ed ñgayew tayo?

20 Alingwanan yo kasi la so saray gangan na Katawan a Dios yo? On, alingwanan yo kasi la so inkadakep na kaamaan tayo? Alingwanan yo kasi la so kinarakel na panaon a sikatayo so nilaban ed lima na saray kabusol tayo?

21 Odino ipapasen yo a say Katawan ilaban to tayo, legan a manyodyurong tayo ed saray trono tayo tan ag tayo ikana so saray pamaakaran ya initer na Katawan ed sikatayo?

22 On, sikayo kasi so onyurong a manmeneng legan a sikayo la so aliktob na saray nilibo na saraman, on, tan angan asamplora a nilibo, so akayurong met a manmemeneng, legan a wala so saray nilibo a wala ed kaliber-liber na ketegan na dalin a sikara so nipaparukol ed panamegley na espada, on, sugatan tan ondadala?

23 Ipapasen yo kasi a say Dios usdoñgan to kayo a siñga angapo so kasalanan yo legan ya akayurong kayo ya ag ongagalaw tan nengnengneñgen yo so saraya a beñgatla? Nia ikuan ko ed sikayo, Andi. Natan labay ko a nunoten yo a say Dios inkuan to a say loob na panañginan so unaan a linisan, tan dia ed saman say paway na panañginan so linisan met.

24 Tan natan, likud no mambabawi kayo ed saman a ginawa yo, tan gapoan yo so ontalindeg tan mankimey, tan mamatulor kayo na naakan tan totoo ed sikami, tan ontan met ed si Helaman, pian natuloñgan to so saraman so kabiañgan na bansa tayo a saraya so abawi to, tan pian nabawi mi met so saray nakekeraan ni ed saray kayarian tayo ed saraya a pasen, nia nakaukolan ya ag kami la milaban sumpa ed saray Lamanite anga ed ag tayo alinisan so loob na panañginan, on, angan say manunaan a pañgulo na oley tayo.

25 Tan likud no abuloyan yo so kekerewen ko ed sulat ko, tan sikayo so ompaway tan ipanengneng yo ed siak so tua ya espiritu na kawayañgan, tan panseetan yo a pabiskegen tan salimbeñgan yo so saray ñgayew tayo, tan iter yo ed sikara so naakan a nakaukolan da, nia mañgitilak ak na kabiañgan na saray totoo a wala ed kawayañgan pian pagnayonen da so kabiañgan na saya a dalin tayo, tan itilak ko so biskeg tan bendicion na Dios ed sikara, pian angapo so arum a pakapanyari a makapagalaw sumpa ed sikara—

26 Tan saya so lapu ed mapalalo a pananisia ra, tan say anos da ed saray subok ed sikara—

27 Tan siak so onla ed sikayo, tan no wala so siopaman ed limog yo a wala so pilalek to ed kawayañgan, on, no wala so angan melag a kidiam na kawayañgan a nakekeraan, nia pagalawen ko so gulo ed limog yo, anga ed saraman so mampilalek a manamsam na pakapanyari tan pakaoley so naandi ra a sigpot.

28 On, nia ag ak antakot ed pakapanyari yo ni say pakaoley yo, balet say Dios ko labat so tatakotan ko; tan unong ed saray gangan to kanian alaen ko so espada to pian iagel ko so pankaabigan na bansak, tan lapu ed saray karelmeñgan yo kanian sikami so nantepel na dakerakel ya inkabalang.

29 Nia panaon la, on, say panaon natan la, likud no sikayo so ongalaw ed inkasikayo ed pañgiagel bansa yo tan saray anak yo ya ankekelag, say espada na kaptekan so akasabit ed petek yo; on, tan saya so ondapo ed sikayo tan dalawen to kayo angan dia ed nagnap a kadederal yo.

30 Nia, alagaren ko so tulong a manlapu ed sikayo; tan, likud no asikasoen yo so pakainawaan mi, nia, siak so onla ed sikayo, angan dia ed dalin na Zarahemla, tan sikayo so bakbaken ko na espada, ya anga ed naandi so pakapanyari yo a manamben ed aliguas na saya a totoo onkana ed pamaakaran na kawayañgan tayo.

31 Tan nia, ag nitepel na Katawan a sikayo so mambilay tan ombiskeg ed karelmeñgan yo pian manderal ed saray matunong a totoo to.

32 Nia, nayarian yo kasi ya ipasen a say Katawan iligyas to kayo tan ompaway a mañgokom sumpa ed saray Lamanite, balet lapu ed sisia a tawir na kaamaan da so gapoan na onia a pambusol da, on, tan saya so adublian na saray sinmisian a nanlapu ed sikatayo, legan a say karelmeñgan yo so onkana ed panañgaro yo ed gloria tan saray andi-kakanaan a beñgatla ed mundo?

33 Kabat yo a mankakasalanan kayo ed saray gangan na Dios, tan kabat yo ya ingatin-gatin yo so saraya ed silong na saray sali yo. Nia, say Katawan inkuan to ed siak: No saray tinuturo yo a gobernador yo ag ira mambabawi ed saray kasalanan tan karelmeñgan da, sikayo so onla ed bakal sumpa ed sikara.

34 Tan natan nia, siak, Moroni, so naamper, unong ed paknaan a ginawak ya onoren ko so saray gangan na Dios ko; dia ed ontan pilalek ko a sikayo so ompeket ed salita na Dios, tan masiglat ya ipawit yo ed siak so saray tagano a wala ed sikayo tan saray totoo yo, tan ontan met ed si Helaman.

35 Tan nia, no saya so ag yo gawaen siak so onla ed sikayo a masiglat; tan nia, say Dios ag to nitepel a sikami so ompatey ed eras; dia ed ontan iter to ed sikami so saray kanen yo, angan dia ed panamegley na espada. Natan manseet kayo a sumpalen yo so salita na Dios.

36 Nia, siak si Moroni, a pañgulo a kapitan yo. Ag ko aanapen so pakapanyari, balet saya so iguyor ko ed leksab. Ag ko aanapen so kagalañgan na mundo, balet onkana ed gloria na Dios ko, tan say kawayañgan tan kaabigan na bansak. Tan dia ed onia sampotan ko la so sulat ko.