1 Tan agawa a sikara so tinmonda tan inmarawi ra na sakey kutdang ed sikara. Tan si Moroni inkuan to ed si Zerahemnah: Nengneng mo, Zerahemnah, ya ag mi pilalek so manmaliw a totoo a manliket ed dala. Kabat mo a wala kayo la ed lima mi, balet ag mi pilalek a pateyen mi kayo.

2 Nia, ag kami linma dia pian mibakal ed sikayo pian paterteren mi so dala yo onkana ed pakapanyari; ni say pilalek mi ya awiten mi so siopaman ed pako na inkaaripen. Balet saya a gagala so iniakar yo dia sumpa ed sikami; on, tan mamapasnok kayo ed sikami lapu ed relihion mi.

3 Balet natan, anengneng yo a say Katawan so wala ed sikami; tan anengneng yo a sikayo so iniawat to ed saray lima mi. Tan natan labay ko a natalusan yo a saya so agawa ed sikami lapu ed relihion mi tan say pananisia mi ed Cristo. Tan natan anengneng yo ya ag yo nayarian a deralen so saya a pananisia mi.

4 Natan anengneng yo a saya so tua a pananisia ed Dios; on, anengneng yo a say Dios so ontulong, tan mañgiagel, tan pagnayonen to kami, dapot no sikami so matuor ed sikato, tan dia ed pananisia mi, tan say relihion mi; tan kapiganman say Katawan ag to nitepel a sikami so naderal likud no sikami so napelag ed kasalanan tan iburi mi so pananisia mi.

5 Tan natan, Zerahemnah, igangan ko ed sika, dia ed ñgaran na saman so makapanyari ed amin a Dios, a sikato so amabiskeg ed saray taklay mi kanian tinalo mi kayo, lapu ed pananisia mi, lapu ed relihion mi, tan lapu ed saray tutuntonen mi ed panagpikasi, tan lapu ed simbaan mi, tan lapu ed sagrado a tulong a saya so utang mi ed saray kaasawaan mi tan saray anak mi, makaseñgeg ed saman so kawayañgan ya amalor ed sikami ed saray dalin mi tan bansa mi; on, tan ontan met lapu ed gagawaen mi so sagrado a salita na Dios, a sikato so akautañgan mi na amin a liket mi; tan lapu ed amin a mabli ed sikami—

6 On, tan aliwa ni a saya ya amin; igangan ko ed sika ed amin a pilalek a wala ed sika lapu ed bilay, ya iawat mo ed sikami so amin ya agamil yo ed bakal, tan ag mi la panseetan ya anapen so dala yo, balet iligyas mi so bilay yo, no sikayo so onla ed dalan yo tan ag kayo la onla dia a mibakal ed sikami.

7 Tan natan, no saya so ag yo gawaen, nia, sikayo so wala ed lima mi, tan igangan ko so saray totook a dugpaan da kayo, tan sugatan da kayo na patey ed saray laman yo, pian sikayo so sigpot a naandi; tan dia ed saya nanengneng tayo no siopa kasi so nawalaan na pakapanyari ed saya a totoo; on, nanengneng tayo no siopa so naawit ed inkaaripen.

8 Tan natan agawa a sanen nadñgel nen Zerahemnah so saraya a salita sikato so dinmago tan iniawat to so espada to tan say melag a wasay to, tan say pabekang to dia ed lima nen Moroni, tan inkuan to ed sikato: Nengneng mo, nia ra so saray agamil mi ed bakal; iawat mi ra ya ed sika, balet ag kami onabuloy a mansamba ed sikayo, lapu ed kabat mi a saya so ag mi met lamlamang nasumpal, tan ontan met na saray anak mi; balet awat yo so saray agamil mi ed bakal, tan abuloyan yo kami la ya ontaynan ed kalawakan; odino andi ag mi iter so saray espada mi, tan sikami so ompatey odino ontaluna.

9 Nia, ag kami kabiañgan na pananisia yo; ag kami manisia a say Dios so añgiawat ed sikami ed saray lima yo; balet manisia kami a lapu ed kasiliban yo so añgiagel ed sikayo ed saray espada mi. Nia, saray salimbeng yo ed pagew tan saray salimbeng yo so añgiagel ed sikayo.

10 Tan natan sanen si Zerahemnah sinampotan to la so nansalita, si Moroni impawil to so espada tan saray agamil da ed bakal, a saya so inawat to, ed si Zerahemnah, a nankuan: Nia, sampotan tayo la so gotgutan.

11 Natan ag ko nayarian a babawien so saray salita ya imbalikas ko, dia ed ontan unong a say Katawan so mabilay, ag kayo ontataynan likud no ontaynan kayo a wala so samba yo ya ag kayo la ompawil lamet sumpa ed sikami a mibakal. Natan lapu ed wala kayo ed saray lima mi paterteren mi so dala yo ed dalin, odino sikayo so onabuloy ed saray ingetar ko ed sikayo.

12 Tan natan sanen imbalikas nen Moroni so saraya a salita, si Zerahemnah inala to so espada to, tan sikato so mamapasnok ed si Moroni, tan sikato so dinmuklos pian pateyen to si Moroni; balet sanen intagey to so espada to, nia, sakey ed saray ñgayew nen Moroni so anigbat ed saya ya angan naplag ed dalin, tan saya so pinmuter ed putan; tan siningwat to met si Zerahemnah ya asapsap so baog na ulo to tan saya so naplag ed dalin. Tan si Zerahemnah so sinmener nanlapu ed arap da a linma ed pegley na saray sondalo to.

13 Tan agawa a saman so sondalo ya akatalindeg ed asinger, a sikato so anapsap ed baog na ulo nen Zerahemnah, intagey to so buek tan baog na ulo a nanlapu ed dalin, tan saya so intoruk to ed otok na espada to, tan saya so iniunat to ya impaarap ed sikara, ya inkuan to sikara ed ed maksil a voces:

14 Angan saya a baog na ulo so naplag ed dalin, a saya so baog na ulo na pañgulo yo, ontan met so kiparukol yo ed dalin likud no iawat yo so saray agamil yo ed bakal tan onalis kayo a wala so sakey a paknaan na kareenan.

15 Natan wala so dakel, sanen nadñgel da so saraya a salita tan anengneng da so baog na ulo a wala ed otok na espada, so asabian na takot; tan dakel so dinmago tan imbantak da so saray agamil da ed bakal ed salian nen Moroni, tan sikara so linmoob ed sakey a paknaan na kareenan. Tan no kaonoñgan kinarakel so linmoob ed paknaan sikara so inabuloyan da a tinmaynan ya amaarap ed kalawakan.

16 Natan agawa a si Zerahemnah mapalalo so sanok to, tan sinugsogan to so saray nakdaan ed ñgayew to a mampasnok met, a milaban ed ontan la a biskeg sumpa ed saray Nephite.

17 Tan natan si Moroni so akapasnok, lapu ed inkabosañgel na saray Lamanite; dia ed ontan ingangan to ed saray totoo to ya ondugpa ra ed sikara tan pateyen da ra. Tan agawa a ginapoan da ra a pateyen; on, tan saray Lamanite so akilaban ed panamegley na espada da tan ed amin a pakayari ra.

18 Balet nia, saray laman da a lakseb tan saray ulo ra ya angapo so salimbeng to so mapalaway ed makdem ya espada na saray Nephite; on, sikara so aduyok tan sinigbat da, on, tan sikara so niparukol ed mapalalo a peles ed espada na saray Nephite; tan sikara so ginmapo ya apanis, unong ed improfesiya na sondalo nen Moroni.

19 Natan si Zerahemnah, sanen anengneng to a sikara lawari ya amin so naderal, inmakis na maksil ed si Moroni, ya insipan to a sikato la so migawaan na paknaan tan ontan met ed saray totoo to ed sikara, no iligyas da so bilay na saray nakekeraan, tan ag la ra kapiganman onsalong a mibakal lamet sumpa ed sikara.

20 Tan agawa a si Moroni ingangan to a tondaan da lamet so kimey na patey ed limog na saray totoo. Tan inala to so saray agamil ed bakal ed saray Lamanite; tan kayari a sikara so linmoob ed sakey a paknaan na kareenan ed sikato sikara so inabuloyan da ya ontaynan ed kalawakan.

21 Natan say bilang na saray inaatey da so ag la abilang lapu ed kinarakel na bilang da; on, say bilang na saray inaatey da so mapalalo a dakel, mandapag ed saray Nephite tan ontan met ed saray Lamanite.

22 Tan agawa ya imbabantak da so saray bangkay ed danum na Sidon, tan sikara so nipaanor tan nitabon ed kaaraleman na dayat.

23 Tan saray ñgayew na Nephite, odino nen Moroni, so amawil la ra ed saray kaaboñgan da tan dia ed saray dalin da.

24 Tan onia so impansampot na komalabinwalo a taon ya oley na saray okom ed saray totoo nen Nephi. Tan dia ed onia so impansampot na kasulatan nen Alma, a saya so nisulat ed saray piligo nen Nephi.