1 Tan natan agawa a si Alma pinmawil a nanlapu ed dalin na Gideon, kayari a binañgatan to so saray totoo ed Gideon na dakerakel a beñgatla ya ag la nisulat, lapu ed inletneg to so uksoy na simbaan, unong ed ginawa to ed dalin na Zarahemla, on, sikato so pinmawil ed dili ya abong to ed Zarahemla pian ipainawa to so laman ed saray kimey a ginawa to.

2 Tan onia so impansampot na komasiam a taon ya oley na saray okom ed saray totoo nen Nephi.

3 Tan agawa a dia ed gapo na komasamplo a taon ya oley na saray okom ed saray totoo nen Nephi, si Alma sinmipot a nanlapu ed diman tan sikato so nambaroy paarap ed dalin na Melek, dia ed sagur na ilog na Sidon, dia ed sagur a miketeg ed kalawakan.

4 Tan ginapoan to so mambañgat ed saray totoo ed dalin na Melek unong ed masanto a gangan na Dios, a saya so akatawagan to; tan ginapoan to a bañgatan so saray totoo ed amin a lapag na dalin na Melek.

5 Tan agawa a saray totoo so dinmago ed sikato a nanlapu ed amin a ketegan na dalin a wala ed gilig na kalawakan. Tan sikara ya amin ed saman a lapag na dalin so abiniagan;

6 Kanian sanen ayari to la so kimey to ed Melek sikato so tinmaynan diman, tan nambaroy ed loob na talora ya agew ya amaarap ed baybay a dalin na Melek; tan akasabi ed ciudad a saya so tatawagen na Ammonihah.

7 Natan say ugali na saray totoo nen Nephi tawagen da so saray dalin da, tan saray ciudad da, tan saray bario ra, on, angan amin ya ankekelag a bario ra, ed ñgaran na saman so sankaunaan a nankayarian ed saraya; tan onia so agawa ed dalin na Ammonihah.

8 Tan agawa a sanen sinmabi si Alma ed ciudad na Ammonihah ginapoan to ya impulong so salita na Dios ed sikara.

9 Natan si Satanas malet so bemben to ed puso na saray totoo ed ciudad na Ammonihah; dia ed onia ag da deñgelen so saray salita nen Alma.

10 Angaman ontan si Alma nankimey na dakel dia ed espiritu, ya akipoligesgesan ed Dios ed madaleyet a pikakasi, ya initer to so Espiritu to ed saray totoo a wala ed ciudad; pian abuloyan to met a biniagan to ra onkana ed pambabawi.

11 Angaman ontan, pinaawet da so saray puso ra, a kuan da ed sikato: Nia, kabat mi a sika si Alma; tan kabat mi met a sika so atagey a sacerdote na simbaan ya inletneg mo ed dakel a pasen na dalin, unong ed sisia a tawir mo; tan sikami so aliwa a miembro na simbaan mo, tan ag kami manisia ed ontan a makulang-kulang a sisia a tawir.

12 Tan natan kabat mi lapu ed ag kami miembro na simbaan kabat mi ya angapo so pakapanyarim ed sikami; tan iniawat mo so yuroñgan na panañgokom ed si Nephihah; dia ed ontan aliwa a sika so pañgulo ya okom ed sikami.

13 Natan sanen saray totoo inkuan da so saya, tan atalindegan da so saray amin a salita to, tan sikato so binusol da, tan sikato so nilukdaan da, tan sikato so impaibantak da ed paway na ciudad da, sikato so tinmaynan diman tan sikato so nambaroy ya amaarap ed ciudad a tatawagen na Aaron.

14 Tan agawa a sanen sikato so mambabaroy diman, lapu ed sikato so abelatan na ermen, a manyayakyak ed dakel a subok tan dageyem na kamarerua, lapu ed karelmeñgan na saray totoo a wala ed ciudad na Ammonihah, agawa legan a si Alma so abelatan na ermen, nia sakey ya angel na Katawan so nampanengneng ed sikato, a nankuan:

15 Mapalar ka, Alma, dia ed ontan, itangwam so ulom tan mangayaga ka, lapu ed wala so baleg a señgegan a pangayagaan mo; lapu ed sika so matuor ed pananumpal na saray gangan na Dios manlapu ed impañgawat mo ed unaan a bilin a nanlapu ed sikato. Nengneng mo, siak so saman so añgiawat ed sika.

16 Tan nia, siak so nibaki a mañgigangan ed sika ya ompawil ka ed ciudad na Ammonihah, tan mampulong ka lamet ed saray totoo na ciudad; on, puloñgan mo ra. On, ibagam ed sikara, likud no sikara so mambabawi say Katawan a Dios so manderal ed sikara.

17 Tan nengneng mo, sikara so mannununot ed saya a panaon a deralen da so kawayañgan na saray totoo, (tan onia so imbaga na Katawan) a saya so sumpa ed saray pananontunan, tan panañgokom, tan saray gangan ya initer to ed saray totoo to.

18 Natan agawa a sanen naawat la nen Alma so balita a nanlapu ed angel na Katawan sikato so amawil a maganat ed dalin na Ammonihah. Tan sikato so linmoob ed ciudad ed sananey a dalan, on, dia ed panamegley na dalan a wala ed abalaten na ciudad na Ammonihah.

19 Tan sanen sikato so linmoob la ed ciudad alikna to a sikato so narasan, tan inkuan to ed sakey a too: Nayari a mañgiter ka na antokaman a naakan ed sakey a mapaabeba ya igagangan na Dios?

20 Tan say too inkuan to ed sikato: Sakey ak a Nephite, tan kabat ko a sakey ka a masanto a profeta na Dios, lapu ed sika so saman so too ya imbaga na angel ed panamegley na sakey a payawar: Sika so makaawat. Dia ed ontan, mila ka ed siak ed abong ko tan iapag taka ed kakanen ko; tan kabat ko a sakey ka a bendicion ed siak tan dia ed abong ko.

21 Tan agawa a sikato so inawat na saman a too ed abong to; tan saman a too so atawag na Amulek; tan sikato so añgawit na tinapay tan karne tan insaklang to ed arap to.

22 Tan agawa a si Alma kinan to so tinapay tan sikato so naksel; tan binendicionan to si Amulek tan saray kabubong to, tan sikato so añgiter na pisasalamat ed Dios.

23 Tan kayari to ya añgan tan sikato so naksel inkuan to ed si Amulek; Siak si Alma, tan siak so atagey a sacerdote na simbaan na Dios ed lapag na saya a dalin.

24 Tan nia, siak so atawag a mañgipulong na salita na Dios ed limog na saya ya amin a totoo, unong ed espiritu na puyan tan profesiya; tan linma ak nen saman ed saya a dalin tan siak so ag da inawat, balet pinapaway da ak tan ñgalñgalik la ibeneg so saya a dalin ya anga la ed anga.

25 Balet nia, siak so nigangan ya ompawil dia lamet tan mamprofesiya ed saya a totoo, on, tan mampaneknek sumpa ed sikara nipaakar ed saray kaugsan da.

26 Tan natan, Amulek, lapu ed pinakan mo ak tan pinatuloy mo ak, sika so mapalar; lapu ed naerasan ak, lapu ed nanayuno ak ed dakel ya agew.

27 Tan si Alma akiayam ed si Amulek ed dakel ya agew sakbay a ginapoan to so pampulong ed saray totoo.

28 Tan agawa a saray totoo pinmalalo so kaugsan da.

29 Tan say salita so sinmabi ed si Alma, a nankuan: Onla ka; tan ontan met ibagam ed igagangan ko a si Amulek, onla ka tan mamprofesiya ka ed saya a totoo, ya ikuan mo—Mambabawi kayo, tan onia so ikuan na Katawan, likud no sikayo so mambabawi dalawen ko so saya a totoo ed pasnok ko; on, tan ag ko iarawi so masebeg a pasnok ko.

30 Tan si Alma so linma, tan ontan met nen Amulek, ed limog na saray totoo, tan ibawag da so saray salita na Dios ed sikara; tan sikara so napno na Espiritu Santo.

31 Tan niiter so pakapanyari ed sikara, kanian ag ira nayari ya ikulong ed saray pañgawan; ni say wala so too a makapatey ed sikara; angaman ontan ag da inkana so pakapanyari ra anga ed sikara so binalor tan impisok da ed pañgawan. Natan, saya so agawa pian say Katawan nipatnag to so pakapanyari to ed sikara.

32 Tan agawa a sikara so linma tan ginapoan da so mampulong tan mamprofesiya ed saray totoo, unong ed espiritu tan pakapanyari ya initer na Katawan ed sikara.