1 Anak ko, italineng mo so saray layag mo ed salitak; tan sambaan ko ed sika, ya unong ya onoren mo so saray gangan na Dios sika so onaliguas ed dalin.

2 Pirawat ko a gawaen mo so siñga say ginawak, ed pannunot mo ed inkadakep na kaamaan tayo; lapu ed sikara so wala ed inkaaripen, tan angapo so makapañgilaban ed sikara likud ed say Dios nen Abraham, tan say Dios nen Isaac, tan say Dios nen Jacob; tan sikato so petepeteg ya añgilaban ed sikara ed saray kairapan da.

3 Tan natan, O anak ko a Helaman, nia, wala ka ed kalangweran mo; tan dia ed ontan, kerewen ko ed sika a deñgelen mo so saray salitak tan siak so panaralan mo; lapu ed kabat ko a siopaman ya iter to so talek to ed Dios so naampaya ed saray subok da, tan saray gutgot da, tan saray irap da, tan sikara so nitanduro ed sampot ya agew.

4 Tan ag ko labay a nunoten mo a kabat ko so inkasiak—aliwa a lapu ed inkalaman balet dia ed inkaespiritu, aliwa a dia ed minomundo a kanunotan balet dia ed Dios.

5 Natan, nia, ikuan ko ed sika, no ag ak nianak ed Dios ag ko akabatan so saraya a beñgatla; balet say Dios initer to, ed panamegley na sañgi na masanto ya angel to, impakabat to so saraya a beñgatla ed siak, aliwa a lapu ed pankanepegan ko a dili;

6 Lapu ed siak so nanliber-liber a kaibak so saray lalaki ya anak nen Mosiah, ya aanapen mi a deralen so simbaan na Dios; balet nia, say Dios imbaki to so masanto ya angel to ya amatonda ed sikami ed dalan.

7 Tan nia, sikato so nansalita ed sikami, a siñga tanol na karul, tan say tibukel a dalin so ginmiwgiw ed leksab na saray sali mi; tan sikami ya amin so niparukol ed dalin, lapu ed say takot ed Katawan so sinmabi ed sikami.

8 Balet nia, say voces inkuan to ed siak: Bañgon ka. Tan binmañgon ak tan tinmalindeg ak, tan anengneng ko so angel.

9 Tan inkuan to ed siak: No dia ed inkasika a dili so naderal, ag mo la seseetan a deralen so simbaan na Dios.

10 Tan agawa a niparukol ak ed dalin; tan saya dia ed loob na talora ya agew tan talora a labi ya ag ko nabiswat so sañgik, ni say nikanak so saray salik tan taklay ko.

11 Tan say angel nansalita na dakel ni a beñgatla ed siak, a saraya so nadñgel na saray kaagian ko, balet ag ko ra nadñgel; tan sanen nadñgel ko so saray salita—No sika so naderal ed inkasika a dili, ag mo la seseetan a deralen so simbaan na Dios—abakbak ak na ontan la a kabaleg na takot tan pankelaw ag la piga siak so naderal, kanian siak so niparukol ed dalin tan angapo la so nadñgel ko.

12 Balet siak so minmayegmeg ed andi-angaan a dusa, lapu ed say kamareruak so inmaburido ya anga ed sankabalegan ya irap tan mayegmeg katekep to ya amin so kasalanan ko.

13 On, anunotan ko ya amin so kasalanan tan karelmeñgan ko, a saraya so nandusa ed siak na irap na infierno; on, anengneng ko a sinmaluñgat ak sumpa ed Dios ko, tan ag ko inonor so saray masanto a gangan to.

14 On, tan dakel so pinatey ko ed saray anak to, odino intunton ko ra ed kadederal; on, tan dia ed sananey a salita agay la so kabaleg na karelmeñgan ko, a dia labat ed pakanunot ko a siak so ondago ed arapan na Dios ko saya so anagentagen ed kamareruak ed ag-nibaga a takot.

15 O, kuan ko ed nunot ko, nayari ak a napanis tan naandi mandapag dia ed kamarerua tan laman, pian ag ak la naawit ya ontalindeg ed arapan na Dios ko, a naokom ed saray ginagawak.

16 Tan natan, dia ed loob na talora ya agew tan talora a labi siak so atagentagen, angan dia ed saray irap na sakey a naayew a kamarerua.

17 Tan agawa ya atagentagen ak na dusa, legan a siak so naawit ed pakanunot ed saray dakerakel a kasalanan ko, nia, anunotan ko met a nadñgel ko si amak a namprofesiya ed saray totoo nipaakar ed isabi na sakey a Jesu Cristo, a sakey ya Anak na Dios, pian mamaandi ed saray kasalanan na mundo.

18 Natan, legan a say kanunotan ko so asanga ed saya a kanunotan, inyakis ko ed dalem na pusok: O Jesus, sika ya Anak na Dios, kasian mo ak, lapu ed wala ak ed kapaitan na ermen, tan siak so aliktob na andi-angaan a gulonggulong na patey.

19 Tan natan, nia, sanen anunotan ko so saya, ag ko la nanunotan so saray irap ko; on, ag ak la naawit ed pakanunot ed saray kasalanan ko.

20 Tan o, anto a gayaga, tan anto a makapakelaw a liwawa so anengneng ko; on, say kamareruak so napno na gayaga a mapalalo nen say irap a niliknak!

21 On, ikuan ko ed sika, anak ko, ya angapo la so ontan a mapalalo tan agay la a pait a siñga saray irap ko. On, tan lamet ikuan ko ed sika, anak ko, tan dia ed sananey a dapag to nia, angapo so beñgatla ya onia a karakep tan samit a siñga say gayagak.

22 On, dia ed nunot ko anengneng ko, so siñga anengneng nen ama tayo a Lehi, say Dios so manyodyurong ed trono to, ya aliber na ag-nabilang ya olop na saray angeles, ed awawey a mancacancion tan mandadayew ed Dios da; on, tan say kamareruak nampirpirawatan to a wala ak met diman.

23 Balet nia, saray salik inaawat da so gendat a biskeg da lamet, tan siak so tinmalindeg ed salik, tan impanengneng ko ed saray totoo a siak so nianak ed Dios.

24 On, tan nanlapu ed saman a panaon ya anga ed natan, nankimey ak ya andi-tonda, pian naawit ko so saray kamarerua ed pambabawi; pian naawit ko ra a natawayan da so mapalalo a gayaga ya atawayan ko; pian sikara met so nianak ed Dios, tan napano ra na Espiritu Santo.

25 On, tan natan nengneng mo, O anak ko, a say Katawan initer to ed siak so alablabas a kabaleg na gayaga a buñga na saray sagpot ko;

26 Tan lapu ed salita ya initer to ed siak, nia, dakel so saray nianak ed Dios, tan atawayan da so atawayan ko, tan anengneng da ed mata tan mata so siñga anengneng ko; dia ed ontan kabat da so saraya a beñgatla a sinalitak, unong ed pakapikabat ko; tan say kakabatan a wala ed siak so kayarian na Dios.

27 Tan siak so tinuloñgan to ed saray subok tan gutgot ed amin a nengneng, on, tan dia ed amin a nengneng na kairapan; on, siak so inlaban na Dios ed pañgawan, tan dia ed inkabalor, tan dia ed patey; on, tan iter ko so talek ko ed sikato, tan siak ni a siansia so iagel to.

28 Tan kabat ko a siak so ibañgon to ed sampot ya agew, a miayam ed sikato ed gloria; on, tan sikato so idayew ko ed ando la ya ando, lapu ed impaway to so kaamaan tayo ed Egipto, tan inakmon to so saray taga-Egipto ed Ambalañga a Dayat; tan sikara so intunton to ed silong na pakapanyari to ed dalin a sipan; on, tan sikara so inlaban to ed inkaaripen tan inkadakep ed sakey a panaon ya anga ed sananey.

29 On, tan sikato met so añgipaway ed kaamaan tayo ed dalin na Jerusalem; tan sikato met, ed panamegley na andi-angaan a pakapanyari to, inlaban to ra ed inkaaripen tan inkadakep, ed sakey a panaon ya anga ed sananey ya anga ed saya ya agew; tan lawas nitilak ed kanunotan ko so inkadakep da; on, tan nepeg a nitilak met ed kanunotan mo, a siñga ginawak, so inkadakep da.

30 Balet nia, anak ko, aliwa ni a saya ya amin; tan nepeg mo a kabaten a siñga say pakapikabat ko, ya unong ya onoren mo so saray gangan na Dios sika so onaliguas ed dalin; tan nepeg mo met a kabaten ya unong ya ag mo onoren so saray gangan na Dios sika so nataksing ed arap to. Natan saya so unong ed salita to.