1 Tan natan, anak ko a Helaman, igangan ko ed sika ya alaen mo so saray kasulatan a nimatalek ed siak;

2 Tan igangan ko met ed sika a mañgisinop ka na kasulatan na saya a totoo, unong ed ginawak, dia ed saray piligo nen Nephi, tan isinop mo ya amin a beñgatla a masagrado a saraya so insinop ko, a siñga impañgisinop ko ed saraya; tan nigena ed sakey a maong a gagala so impañgisinop ed saraya.

3 Tan saraya so piligo a gansa, a kawalaan na saraya a tatak, a kawalaan na kasulatan na saray masanto a kasulatan, a kawalaan na awaran na saray inmouna a kaamaan tayo, a nanlapu ed gapo—

4 Nia, improfesiya na kaamaan tayo, a saraya so isinop tan ipalima ed sakey a kailalakan ya anga ed sananey, tan saraya so isinop tan iagel na lima na Katawan anga ed saraya so makasabi ed balang sakey a bansa, kakanayon, salita, tan totoo, pian nakabatan da so saray misterio a nilugan ed saraya.

5 Tan natan nia, no saraya so isinop nakaukolan a mansiansia so kirlap da; on, tan mansiansia so kirlap da; on, tan ontan met ed amin a piligo a dia nilugan so saray masanto a sulat.

6 Natan nayarian mo ya ipasen a saya so kaambagelan ed siak; balet nia ikuan ko ed sika, a dia ed melag tan simpli a beñgatla saray ankabaleg a beñgatla so nagawa; tan saray melag a pamaakaran ed dakel a pankanawnawa kewkewen to so saray makabat.

7 Tan say Katawan a Dios mankimey ed saray pamaakaran pian nagawaan to so saray baleg tan andi-angaan a gagala to; tan dia ed saray ankekelag a pamaakaran say Katawan kinewkew to so saray makabat tan awiten to so kilalaban na dakel a kamarerua.

8 Tan natan, sipor la a kakabatan ed Dios a saraya a beñgatla so nisinop; tan nia, saraya so amabaleg ed kanunotan na saya a totoo, on, tan apanisia so dakel ed liñgo na saray kakagawa ra, tan sikara so naawit ed pikakabat ed Dios da onkana ed kilalaban na saray kamarerua ra.

9 On, ikuan ko ed sika, no ag lapu ed saraya a beñgatla a lugan na saraya a kasulatan, a wala ed saraya a piligo, si Ammon tan saray kaagian to ag da apanisia so dakel a nilibo a Lamanite nipaakar ed aliwa a sisia a tawir na kaamaan da; on, saraya a kasulatan tan saray salita so añgawit ed sikara ed pambabawi; a saya, so añgawit ed sikara na pikakabat ed Katawan a Dios da, tan mangayaga ed Jesu Cristo a Mananundon da.

10 Tan siopa so makapikabat no anto a pamaakaran so pakapañgawit na dakel a nilibo ed sikara, on, tan ontan met ed dakel a nilibo ed saray matalker a beklew a kaagian tayo, a Nephite, a sikara natan so inmawet ed saray puso ra ed kasalanan tan karelmeñgan, dia ed pikakabat ed Mananundon da?

11 Natan saraya a misterio so ag ni naspot a nipakabat ed siak; dia ed ontan ag ko nibaga.

12 Tan magenap no ibagak labat a saraya so nisinop ya onkana ed maong a gagala, a saya a gagala say Dios so makapikabat; tan sikato so managsimbawa ed kakabatan ed tapew na amin a kimey to, tan saray basbas to so maptek, tan say dalan to so sakey ya andi-angaan a malimpek.

13 O nunot mo, nunot mo, anak ko Helaman, agay la so elet na saray gangan na Dios. Tan inkuan to: No onoren yo so saray gangan ko sikayo so onaliguas ed dalin—balet no ag yo onoren so saray gangan ko sikayo so nataksing ed arap ko.

14 Tan natan nunot mo, anak ko, a say Dios inmatalek to ed sika so saraya a beñgatla, a saraya so sagrado, ya insinop to a masagrado, tan ontan met saya so insinop to tan pagnayonen onkana ed makana a gagala ed sikato, pian ipanengneng to so pakapanyari to ed saray arapen a kailalakan.

15 Tan natan nia, ibagak ed sika ed panamegley na espiritu na profesiya, a no sumlañgen mo so saray gangan na Dios, nia, saraya a beñgatla a sagrado so naekal ed sika dia ed pakapanyari na Dios, tan sika so naiawat ed si Satanas, pian sika so nipalir a siñga taep ed dagem.

16 Balet no onoren mo so saray gangan na Dios, tan gawaen mo so saraya a beñgatla a masagrado unong ed ingangan na Katawan ed sika, (tan sika so mikasi ed Katawan nipaakar ed amin a beñgatla ya antokaman a gawaen mo ed saraya) nia, angapo so pakapanyari ed dalin odino infierno so makaala ed saraya manlapu ed sika, lapu ed say Dios so makapanyari ed panumpal to na amin a salita to.

17 Tan sumpalen to so amin a sipan to a gawaen to ed sika, tan sinumpal to la so saray sipan to a ginawa to ed kaamaan tayo.

18 Tan insipan to ed sikara a pagnayonen to so saraya a beñgatla onkana ed maong a gagala ed sikato, pian ipanengneng to so pakapanyari to ed saray arapen a kailalakan.

19 Tan natan nia, sakey a gagala so sinumpal to la, angan say inkipawil na dakel a nilibo a Lamanite ed pikakabat na katuaan; tan impanengneng to so pakapanyari to ed sikara, tan ipanengneng to met so pakapanyari to ed sikara ed saraman so arapen ni a kailalakan; dia ed ontan saraya so magnayon.

20 Dia ed ontan igangan ko ed sika, anak ko a Helaman, a seetan mo a sumpalen so amin a salitak, tan seetan mo ya onoren so saray gangan na Dios unong a saraya so nisulat.

21 Tan natan, mansalita ak ed sika nipaakar ed saraman so duamplo tan apat a piligo, a saraya so isinop mo, pian saray misterio tan saray kimey na kabiluñgetan, tan saray maamot a kimey da, odino say maamot a kimey na saraman a totoo a sikara so aderal, so komon niparungtal ed saraya a totoo; on, amin a panagpatey da, tan saray panagtakew da, tan saray panagsamsam da, tan amin a karelmeñgan tan karumsisan da, so niparungtal ed saya a totoo; on, tan isinop mo so saraya a panañgipatalus.

22 Tan nia, say Katawan anengneng to a saray totoo to ginapoan da so mankimey ed kabiluñgetan, on, nankikimey ira ed maamot a panagpatey tan karumsisan; dia ed ontan say Katawan inkuan to, no ag ira mambabawi sikara so naderal ed tapew na dalin.

23 Tan say Katawan inkuan to: Iparaan ko onkana ed si aripen ko a Gazelem, so sakey a bato, a saya so onsinag ed biluñget ya onkana a liwawa, pian nasukayan ko ed saray totook a manlilingkor ed siak, pian nasukayan ko ed sikara so kimey na saray kaagian da, on, saray maamot a kimey da, saray kimey da ed kabiluñgetan, tan saray karelmeñgan tan karumsisan da.

24 Tan natan, anak ko, saraya a panañgipatalus so niparaan pian say salita na Dios so nasumpal, a saraya so sinalita to, a nankuan:

25 Papawayen ko manlapu ed kabiluñgetan ya onarap ed liwawa so amin a maamot a kimey da tan karumsisan da; tan likud no sikara so mambabawi sikara so deralen ko manlapu ed tapew na dalin; tan awiten ko ed liwawa so amin ya iyaamot da tan saray karumsisan da, ed balang sakey a bansa a dia ed kaunoran sikara so mankayarian na dalin.

26 Tan natan, anak ko, anengneng tayo a sikara so ag nambabawi: dia ed ontan sikara so aderal, tan dia ed onia say salita na Dios so asumpal; on, saray maamot a karumsisan da so pinmaway nanlapu ed kabiluñgetan tan nipakabat ed sikatayo.

27 Tan natan, anak ko, igangan ko ed sika ya itilak mo so saray samba ra tan saray paknaan da, tan saray nanaabubonan da ed saray maamot a karumsisan da; on, tan amin a tanda ra tan saray pakelaw da saraya so iamot mo ed saya a totoo, pian ag da nakabatan so saraya, ag la piga sikara so napelag ed kabiluñgetan met tan sikara so naderal.

28 Tan nia, wala so sakey ya ayew ed tapew na amin na saya a dalin, a say kadederal so onsabi ed amin a managkimey ed kabiluñgetan, unong ed pakapanyari na Dios, sano sikara la so nagnap ed inkauges; dia ed ontan pilalek ko a saya a totoo so ag naderal.

29 Dia ed ontan isinop mo so saraya a maamot a plano na saray samba ra tan saray paknaan da ed saya a totoo, tan saray karelmeñgan da tan saray panagpatey da tan saray karumsisan da labat so ipakabat mo ed sikara; tan ibañgat mo ira a busolen da so karelmeñgan tan karumsisan tan panagpatey; tan ibañgat mo met ed sikara a saraya a totoo so aderal makaseñgeg ed saray karelmeñgan da tan saray karumsisan da tan saray panagpatey da.

30 Tan nia, pinatey da ya amin so profeta na Katawan a linma ed limog da ya añgibawag ed sikara nipaakar ed saray karelmeñgan da; tan say dala na saray pinatey da so inmakis ed Katawan a Dios da ed ibales to ed saray nampapatey ed sikara; tan dia ed onia say panañgokom na Dios so sinmabi ed saraya a managkimey ed kabiluñgetan tan maamot a pannununoñgan.

31 On, tan naayew so dalin ya anga ed anga ed saraman so managkimey ed kabiluñgetan tan maamot a pannununoñgan, anga ed kadederal, likud no sikara so mambabawi sakbay a sikara so nagnap ed inkauges.

32 Tan natan, anak ko, nunot mo so saray salita ya imbalikas ko ed sika; ag mo imamatalek so saray maamot a plano ed saya a totoo, balet ibañgat mo ed sikara so andi-angaan a pambusol sumpa ed kasalanan tan karelmeñgan.

33 Ipulong mo ed sikara so pambabawi, tan pananisia ed Katawan a Jesu Cristo; ibañgat mo a mampaabeba ra ed inkasikara a dili tan manmaliw ira a maoyamo tan mapaabeba ed puso; ibañgat mo ed sikara ya agwantaan da so pananukso na demonyo, dia ed pananisia ra ed Katawan a Jesu Cristo.

34 Ibañgat mo ed sikara ya ag ira onkesaw ed saray maong a kimey, balet sikara so manmaliw a maoyamo tan mapaabeba ed puso; tan dia ed saraya naalmo so painawa ed saray kamarerua ra.

35 O, nunot mo, anak ko, tan aral mo so kakabatan ed kalangweran mo; on, aral mo ed kalangweran mo so pañgonor ed saray gangan na Dios.

36 On, tan tawag ka ed Dios onkana ed amin a pankaukolan mo; on, amin a gawaen mo so onkana ed Katawan, tan inerman so laen mo so dia ed Katawan; on, amin a kanunotan mo so iarap mo ed Katawan; on, say amin a panañgaro na pusom so ipasen mo ed Katawan ed ando la ya ando.

37 Mikonuan ka ed Katawan ed amin a gawaen mo, tan sika so itunton to ed maabig; on, no sika so ondukol ed labi sika so ondukol ed Katawan, pian sika so bantayan to ed ugip mo; tan sano sika so ombañgon ed kabuasan panom so pusom na pisasalamat ed Dios; tan no gawaen mo so saraya a beñgatla, sika so nitanduro ed sampot ya agew.

38 Tan natan, anak ko, wala so labay ko ya ibaga ed sika nipaakar ed sakey a beñgatla a tatawagen na kaamaan tayo a bola, odino manañgiwanwan—odino saya so tinawag na kaamaan tayo a Liahona, a saya, no ipatalus, sakey ya agohon; tan say Katawan so añgiparaan ed saya.

39 Tan nia, angapo so siopaman a too a makagawa na onia a nidumaduma ya inkagawa. Tan nia, saya so niparaan a mañgipanengneng ed kaamaan tayo na basbas a dalanen da dia ed kalawakan.

40 Tan saya so kinmana ed sikara unong ed pananisia ra ed Dios; dia ed ontan, no wala so pananisia ra say Dios nayarian to a pagalawen so saraman so manañgituro ituro to so pasen na laen da, nia, saya so nagawa; dia ed ontan wala ed sikara so saya a milagro, tan ontan met ed dakel ya arum ni a milagro so agawa dia ed pakapanyari na Dios, ed inagew-agew.

41 Angaman ontan, lapu ed saraman a milagro so kimey na saray melag a pamaakaran impanengneng to ed sikara so saray makapakelaw a kimey. Sikara so mañgiras, tan nilingwanan da ya inkana so pananisia ra tan seet tan dia ed saman saraman so makapakelaw a kimey so tinmonda, tan ag ira inmaliguas ed baroy da.

42 Dia ed ontan, sikara so tinmonda ed kalawakan, odino ag ira nambaroy ed maptek a dalan, tan sikara so nantepel na eras tan inkapgaan, lapu ed saray kasalanan da.

43 Tan natan, anak ko, pilalek ko a natalusan mo a saraya a beñgatla so ag awalaan na kanengneñgan; lapu ed kaamaan tayo so mañgiras a manisia ed saya ya agohon (natan saraya a beñgatla so inkalaman) sikara so ag inmaliguas; ya angan ontan met ed saray beñgatla a maespiritu.

44 Tan nia, mainomay so mañgiter na imano ed salita nen Cristo, a saya so mañgituro ed sikayo na maptek a dalan a mamaarap ed andi-angaan ya inawa, a siñga unong ed kaamaan tayo ed impañgiter da na imano ed saya ya agohon, a saya so mañgituro ed sikara na maptek a dalan ya onarap ed dalin a sipan.

45 Tan natan ikuan ko, angapo kasi so kanengneñgan na saya a beñgatla? Tan peteg unong a saya a manañgiwanwan inawit to so kaamaan tayo, dia ed panumbok da ed dalan, dia ed dalin a sipan, ontan met ed saray salita nen Cristo, no tumboken tayo so saray dalan da, awiten to itayo ed labas na saya a patar na kaermenan ya onarap ed lalo a maong a dalin na sipan.

46 O anak ko, ag mo aabuloyan a sikatayo so manñgiras lapu ed inomay na dalan; tan ontan met nen saman ed kaamaan tayo; tan saya so niparaan ed sikara, a no sikara so onnengneng sikara so nabilay; iñgen ontan met ed sikatayo. Say dalan so niparaan, tan no sikatayo so onnengneng nayari a sikatayo so mambilay ed ando la ya ando.

47 Tan natan, anak ko, seetan mo ya asikasoen mo so saraya a masagrado a beñgatla, on, manseet ka a manmatalek ed Dios tan mambilay ka. Onla ka ed saya a totoo tan ibawag so salita, tan sika so mandangka. Anak ko, mampatanir ak la.