1 Natan agawa a sanen saraman so Lamanite ya akibakal sumpa ed saray Nephite nalmo ra, kayari na dakel ya impanirap da a panderal ed sikara, ya angapo so kakanaan na panaanap da ed kaderal da, sikara so amawil lamet ed dalin na Nephi.

2 Tan agawa a saray Amalekite, lapu ed saray atigway ed sikara, mapalalo so pasnok da. Tan sanen anengneng da ya ag ira makabales ed saray Nephite, ginapoan da a pagalawen so saray totoo a mampasnok sumpa ed saray kaagian da, a saray totoo na Anti-Nephi-Lehi; dia ed ontan ginapoan da ra lamet a deralen.

3 Natan saya a totoo lamet ag da labay ya alaen so saray agamil da ed bakal, tan intepel da ed inkasikara so papatey unong ed pilalek na saray kabusol da.

4 Natan sanen si Ammon tan saray kaagian to anengneng da so saya a kimey na panagderal ed limog na saray pinabpabli ya inararo ra, tan ed limog na saray mamapabli a mañgaaro ed sikara—lapu ed impasen da a siñga ra angeles a nibaki a nanlapu ed Dios a mañgilaban ed sikara ed andi-angaan a kadederal—dia ed ontan, sanen si Ammon tan saray kaagian to anengneng da so saya a baleg a kimey na panagderal, sikara so atenyeg na panañgasi, tan inkuan da ed ari:

5 Tiponen tayo so saya a totoo na Katawan, tan onla itayo ed dalin na Zarahemla ed saray kaagian tayo a Nephite, tan ontaynan tayo ed lima na saray kabusol tayo, pian sikatayo so ag naderal.

6 Balet say ari inkuan to ed sikara: Nia, saray Nephite deralen da itayo, lapu ed dakel a panagpatey tan kasalanan a ginawa tayo sumpa ed sikara.

7 Tan si Ammon inkuan to: Onla ak tan itepet ko ed Katawan, tan no ibaga to ed sikatayo, onla itayo ed saray kaagian tayo, onla itayo kasi?

8 Tan say ari inkuan to ed sikato: On, no say Katawan ibaga to ya onla itayo, sikatayo so onla ed saray kaagian tayo, tan sikatayo so manmaliw ya aripen da anga ed naapiger tayo ed sikara so saray dakel ya impampatey tan kasalanan a ginawa tayo sumpa ed sikara.

9 Balet si Ammon inkuan to ed sikato: Saya so sumpa ed gangan na saray kaagian tayo, a saya so inletneg nen amak, a wala so aripen ed limog da; dia ed ontan sikatayo so onla tan manmatalek itayo ed panañgasi na saray kaagian tayo.

10 Balet say ari inkuan to ed sikato: Itepet mo ed Katawan, tan no ikuan to ya onla itayo, sikatayo so onla; odino andi sikatayo so ompatey ed saya a dalin.

11 Tan agawa a si Ammon so linma tan tinmepet ed Katawan, tan say Katawan inkuan to ed sikato:

12 Alaen mo so saya a totoo ya ipaway ed saya a dalin, pian ag ira ompatey; lapu ed si Satanas baleg so bemben to ed saray puso na saray Amalekite, a sikara so amagalaw ed saray Lamanite a mampasnok sumpa ed saray kaagian da a pateyen da ra; dia ed ontan paway kayo ed saya a dalin; tan mapalar so saya a totoo ed saya a kailalakan, lapu ed sikara so iagel ko.

13 Tan natan agawa a si Ammon so linma tan imbaga to ed ari so amin a salita ya imbalikas na Katawan ed sikato.

14 Tan tinipon da ya amin so saray totoo ra, on, amin a totoo na Katawan, tan tinipon da so amin a karnero tan baka ra, tan sikara so sinmipot a pinmaway ed saman a dalin, tan akasabi ra ed kalawakan a saya so amaldua ed dalin na Nephi ed say dalin na Zarahemla, tan sikara so akasabi ed asinger na saray ketegan na dalin.

15 Tan agawa a si Ammon inkuan to ed sikara: Nia, siak tan saray kaagian ko so onla ed dalin na Zarahemla, tan sikayo so natilak dia anga ed ipawil mi; tan suboken mi so puso na saray kaagian tayo, no labay da a sikayo so onla ed dalin da.

16 Tan agawa a sanen si Ammon so mamapaarap la ed saman a dalin, sikato tan saray kaagian to naabet da si Alma, ed sakey a pasen ya asalita la; tan nia, saya so magayaga ya impandorumog.

17 Natan say gayaga nen Ammon so mapalalo a baleg angan sikato so nanmaliw a nagnap; on, sikato so napno na gayaga ed Dios to, anga ed sikato so naupotan na biskeg; tan sikato lamet so niparukol ed dalin.

18 Natan aliwa kasi a saya so mapalalo a gayaga? Nia, saya so gayaga ya angapo ni so akaawat likud labat ed peteg a nambabawi tan mapaabeba a managanap na liket.

19 Natan say gayaga nen Alma ed impakarumog to ed kaagian to so matua a baleg, tan ontan met ed gayaga nen Aaron, nen Omner tan si Himni; balet nia say gayaga ra ag to apalabsanan so biskeg da.

20 Tan natan agawa a si Alma inolop to so saray kaagian to a pinmawil ed dalin na Zarahemla; angan dia ed dili ya abong to. Tan sikara so linma tan imbaga ra ed pañgulo ya okom so amin a beñgatla ya agawa ed sikara ed dalin na Nephi, dia ed limog na kaagian da, saray Lamanite.

21 Tan agawa a say pañgulo ya okom añgipaakseb na palapag ed amin a dalin, lapu ed pilalek to so voces na saray totoo nipaakar ed pañgawat da ed saray kaagian da, a sikara so totoo na Anti-Nephi-Lehi.

22 Tan agawa a say voces na saray totoo so sinmabi, a nankuan: Nia, iter tayo so dalin na Jershon, a wala ed bokig ya asinger ed dayat, a kasolduñgan na dalin na Bountiful, a saya so wala ed abalaten na dalin na Bountiful; tan saya a dalin na Jershon so iter tayo ed saray kaagian tayo ya ipatawir.

23 Tan nia, ilira tayo so saray ñgayew tayo ed baetan na dalin na Jershon tan dalin na Nephi, pian niagel tayo so saray kaagian tayo ed dalin na Jershon; tan saya so gawaen tayo lapu ed saray kaagian tayo, lapu ed takot da ya alaen so saray agamil da ed bakal sumpa ed saray kaagian da ag la piga sikara so makagawa na kasalanan; tan saya so baleg a takot da so sinmabi lapu ed ansakit a panagbabawi a ginawa ra, niseñgeg ed saray dakel ya impampapatey da tan makapataktakot a karelmeñgan da.

24 Tan natan nia, saya so gawaen tayo ed saray kaagian tayo, pian tawiren da so dalin na Jershon; tan sikara so bantayan tayo manlapu ed saray kabusol da ed panamegley na saray ñgayew tayo, dapot no mañgiter ira ed sikatayo na kabiañgan na saray tagano ra ya itulong da ed sikatayo a pantagano ed saray ñgayew tayo.

25 Natan, agawa a sanen si Ammon nadñgel to so saya, sikato so pinmawil ed saray totoo na Anti-Nephi-Lehi, tan kaolop to met si Alma, ed kalawakan, a diman da impaalagey so saray abong-abong da ya abel, tan impakabat da ed sikara so saraya ya amin a beñgatla. Tan si Alma tinungtong to met ed sikara so impakapasimbalo to ed pananisia, a kaiba to ra di Ammon tan Aaron, tan saray kaagian to.

26 Tan agawa a saman so akaseñgeg na baleg a gayaga ed limog da. Tan sikara so linma ed dalin na Jershon, tan kinayarian da so dalin na Jershon; tan sikara so tinawag na saray Nephite a totoo nen Ammon; dia ed ontan sikara so abirbir ed saman a ñgaran nanlapu ed saman.

27 Tan sikara so kabiañgan ed limog na saray totoo nen Nephi, tan nibilang met ira ed limog na totoo a wala ed simbaan na Dios. Tan sikara met so binirbir lapu ed seet da ya onkana ed Dios, tan ontan met ed saray totoo; lapu ed nagnap so inkamatua ra tan kaptekan da ed amin a beñgatla; tan sikara so ag-nagiing ed pananisia ed si Cristo, angan dia ed kasampotan.

28 Tan say pakanengneng da ed panagpaterter na dala na saray kaagian da so sankabalegan a pambusol; tan sikara so ag la kapiganman nakuyong a mandemet na saray agamil da ed bakal sumpa ed saray kaagian da; tan ag ira kapiganman onnengneng ed patey a wala so antokaman a takot, lapu ed say ilalo tan pakamuria ra ed si Cristo tan say kioli ed bilay; dia ed ontan, say patey so naakmon la ed sikara ed panamegley na pantaluna nen Cristo ed saya.

29 Dia ed ontan, mantepel ira na patey ed mapalalo tan makapasinagem a kanengneñgan a nipalikna manlapu ed saray kaagian da, sakbay ya alaen da so saray espada da odino melag a espada a pamatey da.

30 Dia ed saya sikara so sakey a maseseg tan inararo a totoo, saray sankamapalaran a totoo na Katawan.