1 Tan natan agawa a legan a si Alma so mambabaroy a nanlapu ed dalin na Gideon a mampaabalaten, a paarap ed dalin na Manti, nia, dia ed baleg a kelaw to, naabet to so saray lalaki ya anak nen Mosiah a sikara so mambabaroy a mampaarap ed dalin na Zarahemla.

2 Natan saraya a lalaki ya anak nen Mosiah so kaiba nen Alma ed saman so unaan a panaon a sakey ya angel so nampanengneng ed sikato; dia ed onia si Alma manliket a mapalalo ed impakanengneng to ed saray kaagian to; tan say lalo ya akaarum ed gayaga to, lapu ed sikara ni so kaagian to ed Katawan; on, tan sikara so pinmalalo ed biskeg na pikakabat ed katuaan; tan sikara so totoo ya awalaan na marantal a pakatalus tan sinukait da so saray masanto a kasulatan a siseseet, pian nakabatan da so salita na Dios.

3 Balet aliwa ni a saya ya amin; ineter da so inkasikara ed dakel a pikakasi, tan panagayuno; dia ed ontan wala ed sikara so espiritu na profesiya, tan say espiritu na puyan, tan sano sikara so mambañgat, sikara so nambañgat a katekep so pakapanyari tan pakaoley na Dios.

4 Tan imbabañgat da so salita na Dios ed dukey na labinapat a taon ed limog na saray Lamanite, a maong so nansumpalan da lapu ed dakel so naawit da ed pikakabat na katuaan; on, dia ed panamegley na pakapanyari na saray salita ra dakel so naawit da ed arap na altar na Dios, ya ontawag ed ñgaran to tan mañgipatua ed saray kasalanan da ed arap to.

5 Natan saraya so kipapasen a wala ed sikara dia ed saray baroy da, lapu ed awalaan ira na dakel a kairapan; sikara so nanirap a mapalalo, mandapag dia ed laman tan kanunotan, a siñga eras, inkapgaan tan banal, tan ontan met ed dakel a kimey ed espiritu.

6 Natan saraya so baroy da; Lapu ed tinaynan da si ama ra a si Mosiah ed unaan a taon na saray okom; lapu ed ag da inawat so panarian a pilalek nen ama ra ya ipalima ed sikara, tan saya met so wala ed kanunotan na saray totoo;

7 Angaman ontan sikara so tinmaynan a pinmaway ed dalin na Zarahemla, tan inawit da so saray espada ra, tan saray pika ra, tan saray pabekang da, tan saray pana ra; tan saray palsot da; tan saya so ginawa ra pian nawalaan ira na naakan ya onkana ed sikara legan a wala ra ed kalawakan.

8 Tan dia ed onia sikara so pinmikal ya amaarap ed kalawakan a kaiba ra so saray apili a pigara, ya onla ya ontakdang ed dalin na Nephi, a mañgipulong na salita na Dios ed saray Lamanite.

9 Tan agawa a sikara so nambaroy ed dakel ya agew ed kalawakan, tan sikara so nanayuno na dakel tan sikara so nampikasi na dakel pian say Katawan iter to so kabiañgan na Espiritu to a miolop ed sikara, tan miayam ed sikara, pian manmaliw ira ya ikakana ed lima na Dios ed pañgawit da, no nayari, ed saray kaagian da, saray Lamanite, ed pikabat na katuaan, dia ed pikabat da ed inkauges na sisia a tawir na kaamaan da, a saraya so aliwa a duga.

10 Tan agawa a say Katawan dinalaw to ra ed panamegley na Espiritu to, tan inkuan to ed sikara: Naligliwa kayo. Tan sikara so aligliwa.

11 Tan say Katawan inkuan to met ed sikara: Onla kayo ed limog na saray Lamanite, a kaagian yo, tan iletneg yo so salitak; iñgen kaukolan yo so mananos ed andukey a panagtepel tan kairapan, pian nipanengneng yo so maong a pañgaligan ed sikara niseseñgeg ed siak, tan gawaen takayo ya ikakana ed limak ya onkana ed kilalaban na dakel a kamarerua.

12 Tan agawa a saray puso na saray lalaki ya anak nen Mosiah, tan ontan met ed saray kaiba ra, so awalaan na biskeg na linawa ya onla ed saray Lamanite pian ibawag da ed sikara so salita na Dios.

13 Tan agawa a sanen akasabi ra ed ketegan na dalin na saray Lamanite, sikara so nansisian tan nagsitaynan la ra ed balang sakey, a sitatalek ira ed Katawan a makapanduromog ira lamet dia ed kayari na panagani ra; lapu ed impasen da a baleg a kimey so ingapo ra.

14 Tan petepeteg a saya so baleg, lapu ed ginawa ra so pañgipulong ed salita na Dios ed sakey ya atap tan inmaawet tan masebeg-puso a totoo; sakey a totoo a panliketan da so pampatey ed saray Nephite, tan pantulisan tan panagsamsaman ed sikara; tan say puso ra so akateen ed kayamanan, odino dia ed balitok tan pilak, tan saray ankabli bato; iñgen kaliktan da ya alaen so saraya a beñgatla dia ed panamegley na panagpatey tan panagsamsam, pian ag ira mansagpot ed saray dili a lima da.

15 Dia ed onia sikara so totoo a mañgiñgiras, a dakel ed sikara so mañgigagalang ed saray talintao, tan say ayew na Dios nipelag ed sikara lapu ed saray sisia a tawir na kaamaan da; manwari ya ontan say sipan na Katawan so niiter met ed sikara likud no mambabawi ra.

16 Dia ed ontan, saya so makaseñgeg kanian saray lalaki ya anak nen Mosiah inawat da so saya a kimey, ag la piga naawit da ra ed pambabawi; ag la piga a naawit da ra ed pikakabat ed plano na karundon.

17 Dia ed ontan sikara so nansisian ed balang sinansakey, tan sikara so linma ya akilimog ed sikara, balang sakey a too nambokbukor, unong ed salita tan pakapanyari na Dios a niiter ed sikato.

18 Natan lapu ed si Ammon so pinagkapañgulo ra, odino sikato so managtalima ed sikara, tan sikato so tinmaynan ed sikara, kayari na impambendicion to ed sikara unong ed nanduroma a kipapasen da, ya initer to so salita na Dios ed sikara, odino inasikaso to ra sakbay na intaynan to; tan dia ed onia sikara so pinmikal ed saray nanduroma a baroy da ed amin a lapag na saman a dalin.

19 Tan si Ammon so linma ed dalin na Ishmael, say dalin a niñgaran ed saray lalaki ya anak nen Ishmael, a sikara met so nanmaliw a Lamanite.

20 Tan dia ed inloob nen Ammon ed dalin na Ishmael, saray Lamanite inala ra tan binalor da, lapu ed ugali ra a baloren so saray Nephite a napelag ed saray lima da, tan awiten da ya iarap ed ari; tan dia ed onia akaoley la so ari ed kaliktan to a papatey, odino pagnayonen to ra ya adakep, odino ibantak to ra ed pañgawan, odino ibantak to ra ed paway na sakop na saman a dalin, unong ed linawa tan kaliktan to.

21 Tan dia ed onia si Ammon so naawit ed arap na ari a mañguoley ed dalin na Ishmael; tan say ñgaran to Lamoni; tan sikato so kapolian nen Ishmael.

22 Tan say ari tinepetan to si Ammon no pilalek to so manayam ed dalin da ed limog na saray Lamanite, odino dia ed limog na saray totoo to.

23 Tan si Ammon inkuan to ed sikato: On, pilalek ko so miayam ed limog na saya a totoo ed pigara a panaon; on, tan nayari ya anga ed agew na ipatey ko.

24 Tan agawa a si ari Lamoni so makakaliket ed si Ammon, tan ingangan to ya ukbaran da so balor to; tan kinaliktan to a si Ammon alaen to so sakey ed saray anak to a bibii pian saya so asawaen to.

25 Balet si Ammon inkuan to ed sikato: Andi, balet manmaliw ak la ya igagangan mo. Dia ed ontan si Ammon so nanmaliw ya igagangan nen ari Lamoni. Tan agawa a sikato so impasen da ed limog na saray arum ya igagangan a mambantay ed saray ayayep nen Lamoni, unong ed ugali na saray Lamanite.

26 Tan kayari na talora ya agew ya impanlingkor to ed ari, sanen wala ed olop na saray igagangan a Lamanite ya iyaakar da so saray ayayep ed kawalaan na danum, a saya so tatawagen da a danum na Sebus, tan amin a Lamanite diman da susonsonen so saray ayayep da, pian diman da ra painomen—

27 Dia ed ontan, sanen si Ammon tan saray arum ya igagangan dadagdagen da so saray ayayep da ed saya a pasen a kawalaan na danum, nia, sakey a bilang na Lamanite, a kaiba ra so saray ayayep da ya oninum, so tinmalindeg tan intaytayak da so saray papastolan nen Ammon tan saray igagangan na ari, tan intaytayak da ra kanian saraya so batik ed nanduroma a pasen.

28 Natan saray igagangan na ari ginapoan da so manmere-mere, a nankuan: Natan say ari pateyen to itayo, a siñga unong ed ginawa to ed saray kaagian tayo lapu ed saray ayayep da so intaytayak na karelmeñgan na saraya a totoo. Tan sikara so ginmapo a manakis a mapalalo, a kuan da: Nia, saray ayayep tayo so ataytayak la.

29 Natan sikara so manakis lapu ed takot da a napatey. Natan sanen anengneng nen Ammon so saya say puso to napno na liket ed dalem na pagew to; kanian, inkuan to, ipanengneng ko so pakapanyarik ed saraya a kakaibak ya igagangan, odino say pakapanyari a wala ed siak, ed pañgipawil ko na saray ayayep na ari, pian natanguyor ko so puso na saraya a kakaibak ya igagangan, pian niwanwan ko ra a manisia ed saray salitak.

30 Tan natan, saraya so wala ed kanunotan nen Ammon, sanen anengneng to so sinagem na saraman so ipapasen to a kaagian to.

31 Tan agawa a sikara so sinagyat to ed saray salita to, a nankuan: Kaagian ko, manliket kayo tan onla itayo a mananap ed saray ayayep, tan tiponen tayo ra tan awiten tayo ra ya ipawil ed pasen a kawalaan na danum; tan dia ed onia angapo so natigway ed saray ayayep na ari tan ag to itayo pateyen.

32 Tan agawa a linma ra a nananap ed saray ayayep, tan tinumbok da si Ammon, tan sikara so linma ed mapalalo a peles tan asakbayan da so saray ayayep na ari, tan tinipon da so saraya lamet ed pasen a kawalaan na danum.

33 Tan saraman so totoo tinmalindeg ira lamet pian itayak da so saray ayayep da; balet si Ammon inkuan to ed saray kaagian to: Liktob yo so saray ayayep a paliberan pian ag ira ombatik; tan siak so onla a milaban ed saraya a totoo a mantatayak ed saray ayayep tayo.

34 Dia ed ontan, ginawa ra so unong ed gangan nen Ammon ed sikara, tan sikato so linma tan tinmalindeg a milaban ed saray wala ed asinger ed danum na Sebus; tan wala so bilang da ya aliwa a pigpigara.

35 Dia ed ontan ag ira antakot ed si Ammon, lapu ed impasen da a sakey labat ed saray totoo ra sikato napatey da unong ed kaliktan da, lapu ed ag da amta a say Katawan insipan to ed si Mosiah ya ilaban to so saray anak to a lalaki ed saray lima da; ni say amta ra so antokaman a beñgatla nipaakar ed Katawan; dia ed ontan sikara so nanliket ed kaderal na kaagian da; tan lapu ed saya a pamaakaran kanian sikara so tinmalindeg a mantayak ed saray ayayep na ari.

36 Balet si Ammon so tinmalindeg tan ginapoan to ra a topaken na bato ed panamegley na palsot to; on, ed angaan na pakapanyari na biskeg to impalsot to so saray bato ed limog da; tan dia ed onia apatey to so pigara ed bilang da kanian sikara so ginmapo ya onkelaw ed pakapanyari to; dia ed ontan sikara so apasnokan lapu ed impatey na saray kaagian da, tan pilalek da a sikato so itumba ra; dia ed ontan, anengneng da ya ag da nakena ed saray bato ra, dinago ra a sankaawit da so saray pekpek pian sikato so pateyen da.

37 Balet nia, balang sakey a too ya itagey to so pekpek to ya pankabil ed si Ammon, singwaten to ra ed taklay ed panamegley na espada to; tan asamper to so saray pankabil da ed panamegley na pansigbat to ed taklay da ed ñguro na espada to, a lapu ed onia ginapoan da so onkelaw, tan ginapoan da so ombatik ed arap to; on, tan sikara so aliwa a pigpigara ed bilang; tan apabatik to ra ed panamegley na biskeg na saray taklay to.

38 Natan anemira ed sikara so niparukol ed panamegley na palsot, balet angapo so nilaosan to a pinatey likud labat ed saman so pañgulo ra ed panamegley na espada to; tan sinisingwat to so balang sakey a taklay ya akaatagey a mankabil ed sikato, tan saraya so aliwa a pigpigara.

39 Tan sanen asunson to ra ya apaarawi, sikato so pinmawil tan pinainum da so saray ayayep da tan impawil da so saraya ed pastolan na ari, tan sikara so linma ed ari, ya awit da so saray apotot a taklay a saraya so siningwat nen Ammon ed panamegley na espada, ed saraman so labay da so mamatey ed sikato; tan saraya so inawit da ed arap na ari ya onkana a pamaneknek ed saray beñgatla a ginawa ra.