1 Tan agawa a si Moroni so ag tinmonda ed pangagawa to na paraan onkana ed bakal, odino say pañgiagel to ed saray totoo to sumpa ed saray Lamanite; tan kinaukolan to a saray ñgayew to so ongapo ed ingapo na komaduamplo a taon ya oley na saray okom, ya igapo ra so mankutkot na saray bunton na dalin ed kaliber-liber na amin a ciudad, ed lapag na amin a dalin a kayarian na saray Nephite.

2 Tan dia ed tapew na saraya a pilapil a dalin ingangan to a mañgipaalagey ira na lusek, on, saray kimey ed lusek a kiew so impaalagey da a siñga kinaatagey na too, ed kaliber-liber na saray ciudad.

3 Tan ingangan to a dia ed tapew na saraman so lusek a kiew mañgiyan ira na mautok a palpal ed saray lusek a mampaliber; tan saraya so mabiskeg tan atagey.

4 Tan ingangan to a mañgipaalagey ira na saray tori ya osusdoñgan to so saraya a kimey a mautok a palpal, tan nampagawa na saray pasen a salimbeñgan ed saraya a tori, pian saray bato tan pana na saray Lamanite ag makasugat ed sikara.

5 Tan sikara so akaparaan pian no mañgitupak ira na bato manlapu ed tuktok to nia, unong ed labay da tan biskeg da, tan napatey da so siopaman a salien to so onasinger ed alar na ciudad.

6 Dia ed onia si Moroni imparaan to so saray mabiskeg ya alar sumpa ed isabi na saray kabusol da, ed kaliber-liber na balang sakey a ciudad ed amin a lapag na dalin.

7 Tan agawa a si Moroni kinaukolan to a saray ñgayew to so onla ed bokig a kalawakan; on, tan sikara so linma tan dinagdag da ya amin so saray Lamanite a wala ed bokig a kalawakan ya amaarap ed dili a dalin da, a wala ed abalaten na dalin na Zarahemla.

8 Tan say dalin na Nephi so maptek a nigulis manlapu ed bokig a dayat ya anga ed sagur.

9 Tan agawa a sanen asunson la nen Moroni so amin a Lamanite ya apapaway ed bokig a kalawakan, a saraya so wala ed baybay na dalin a kayarian da, ingangan to ed saray manaayam ed dalin na Zarahemla tan dia ed saray kaliber-liber a dalin ya onla ed bokig a kalawakan, angan dia ed ketegan a wala ed gilig na dayat, tan kayarianen da so dalin.

10 Tan añgipasen met na saray ñgayew ed abalaten, ed ketegan na saray kayarian da, tan ingangan to a mampaalagey ira na salimbeñgan pian niagel da so saray ñgayew da tan saray totoo ra ed lima na saray kabusol da.

11 Tan dia ed onia asakbayan to ya amin so saray biskeg na ñgayew na Lamanite dia ed bokig a kalawakan, on, tan ontan met ed sagur, tan pinabiskeg to so nanleetan na saray Nephite tan saray Lamanite, dia ed baetan na dalin na Zarahemla tan say dalin na Nephi, manlapu ed sagur a dayat, a mamaarap ed ulo na ilog na Sidon—saray Nephite kayarian da ya amin so dalin a mamabaybay, on, angan amin a dalin a mamabaybay ed dalin na Bountiful, unong ed kaliktan da.

12 Dia ed onia si Moroni, kaiba to so saray ñgayew to, a sikara so inagew-agew ya ondarakel lapu ed angapo so duarua ra ed saray panañgiagel a kimey to so añgawit ed sikara, inanap to a taksiñgen so biskeg tan pakapanyari na saray Lamanite ed saraman a dalin a kayarian da, pian sikara so ag nawalaan na pakapanyari ed saray dalin a kayarian da.

13 Tan agawa a saray Nephite ginapoan da so mañgiletneg na sakey a ciudad, tan tinawag da so ñgaran na ciudad a Moroni; tan saya so wala ed bokig a dayat; tan saya so wala ed abalaten a kadasig na saray kayarian na saray Lamanite.

14 Tan ginapoan da met so mañgiletneg na sakey a ciudad ed baetan na ciudad na Moroni tan ciudad na Aaron, ya impansaip da so ketegan na Aaron tan Moroni; tan tinawag da so ñgaran na ciudad, odino saya a dalin, na Nephihah.

15 Tan ginapoan da met ed saman a taon so mañgipaalagey na dakel a ciudad dia ed baybay, sakey ed saraya so niduma ya inñgaran da na Lehi, a saya so wala ed baybay ya onketeg ed gilig na dayat.

16 Tan dia ed onia so impansampot na komaduamplo a taon.

17 Tan dia ed saraya a maaliguas a kipapasen saray totoo nen Nephi ginmapo so komaduamplo tan sakey a taon ya oley na saray okom ed saray totoo nen Nephi.

18 Tan sikara so inmaliguas a mapalalo, tan sikara so yinmaman a maong; on, tan sikara so dinmakel tan binmiskeg ed saman a dalin.

19 Tan dia ed onia anengneng tayo no panon so panañgasi tan kaptekan na pililimog na Katawan, ed panumpal to ed amin a salita to ed saray anak na totoo; on, nanengneng tayo a saray salita to so apaneknekan, angan dia ed saya a panaon, a sinalita to ed si Lehi, a nankuan:

20 Mapalar ka tan saray ilalak mo; tan sikara so nabendicionan, ya unong no onoren da so saray gangan ko sikara so onaliguas ed dalin. Balet nunoten mo, ya unong no ag da onoren so saray gangan ko sikara so taksiñgen ko ed kawalaan na Katawan.

21 Tan anengneng tayo a saraya a sipan so apaneknekan ed saray totoo nen Nephi; lapu ed saray kolkulan da tan saray baliñgaan da, on, saray panagpatey da, tan saray panagsamsam da, say panagpikasi ra ed talintao, saray inkabalangkantis da, tan saray karumsisan da, a saraya so wala ed limog da a dili, so añgawit ed sikara na saray bakal tan kadederal da.

22 Tan saraman so matuor ya añgonor ed saray gangan na Katawan so nilaban ed amin a panaon, balet nilibo ed saray mauges a kaagian da so nipasen ed inkaaripen, odino sikara so ompatey ed panamegley na espada, odino sikara so onlasay ed ag-pananisia, tan milimog ira ed saray Lamanite.

23 Balet nia angapo ni kapiganman so sankaliketan a panaon ed limog na saray totoo nen Nephi, nanlapu ed saray agew nen Nephi, nen dia ed saray agew nen Moroni, on, angan dia ed saya a panaon, ed komaduamplo tan sakey a taon ya oley na saray okom.

24 Tan agawa a say komaduamplo tan dua a taon ya oley na saray okom so nansampot met ed kareenan; on, tan ontan met ed komaduamplo tan talo a taon.

25 Tan agawa a dia ed ingapo na komaduamplo tan apat a taon ya oley na saray okom, wala met so kareenan ed limog na saray totoo nen Nephi no ag makaseñgeg ed sakey a baliñgaan ya agawa ed limog da nipaakar ed dalin na Lehi, tan say dalin na Morianton, a nansuldoñgan ed ketegan na Lehi; a saraya a dua so wala ed ketegan dia ed gilig na dayat.

26 Tan nia, saray totoo a makankayarian ed dalin na Morianton kakayarianen da so kabiañgan na dalin na Lehi; dia ed ontan wala so ginmapo ya ampetang a baliñgaan ed baetan da, a makaseñgeg ed saya saray totoo nen Morianton inala ra so saray ayura ra sumpa ed saray kaagian da, tan tibukel so linawa ra ed panamegley na espada a mamatey ed sikara.

27 Balet nia, saray totoo a makankayarian ed dalin na Lehi binmatik ira ed campo nen Moroni tan kinmerew ira ed sikato na tulong; tan nia ag ira nankasalanan.

28 Tan agawa a sanen saray totoo nen Morianton, a sikara so impañgulo na sakey a too a say ñgaran to Morianton, nalmoan to a saray totoo nen Lehi so binmatik ed campo nen Moroni, mapalalo so takot da ag la piga saray ñgayew nen Moroni so onsabi ed sikara tan deralen da ra.

29 Dia ed ontan, si Morianton inian tonaekal ed trono na ed saray puso ra ya ombatik ira a mamabaybay, a saya so alaknaban na baleg a pasen na danum, tan kayarianen da so dalin a wala ed mamabaybay.

30 Tan nia, asumpal da so saya a gagala ra, (a saya so señgegan a panermenan da) balet nia, lapu ed si Morianton so sakey a too a mapetang so liknaan to, dia ed onia sikato so amasnok ed sakey ed saray bibii ya igagangan to, tan dinugpaan to tan kinakabil a mapalalo.

31 Tan agawa a saya a bii ya igagangan so binmatik, tan linma ed kawalaan na campo nen Moroni, tan imbaga to ed si Moroni so amin a beñgatla nipaakar ed saya, tan ontan met ed gagala ra ya ombatik ed dalin a mamabaybay.

32 Natan nia, saray totoo a wala ed dalin na Bountiful, odino Moroni, tinmakot ira ag la piga deñgelen da so saray salita nen Morianton tan sikara so mitipon ed saray totoo to, tan dia ed onia nagamoran to so pankayarian ed saraman a kabiañgan na dalin, a saya so pangapoan na letnegan a makapataktakot so pansumpalan to ed limog na saray totoo nen Nephi, on, saraya a pansumpalan so mañgitunton ed kaderal na kawayañgan da.

33 Dia ed ontan si Moroni so añgibaki na ñgayew, kaiba so campo ra, pian sakbayan da so saray totoo nen Morianton, pian patondaen da so itaynan da ya onarap ed dalin a mamabaybay.

34 Tan agawa ya ag da ra asakbayan anga ed insabi ra ed ketegan na dalin na Apalis; tan diman da ra asakbayan, dia ed makisir a dalan a mampaarap ed dayat ya onla ed dalin a mamabaybay, on, dia ed asinger na dayat, ed sagur tan ed bokig.

35 Tan agawa a say ñgayew ya imbaki nen Moroni, ya impañgulo na sakey a too a say ñgaran to Teancum, naabet da so saray totoo nen Morianton; tan agay la so inkabosañgel na saray totoo nen Morianton, (lapu ed asagyat ira ed kaugsan to tan ed saray mapasirayew a salita to) kanian ginmapo so sakey a laban ed baetan da, a dia ed saya si Teancum apatey to si Morianton tan atalo so ñgayew to, tan sikara so dinakep da, tan sikara so pinmawil ed campo nen Moroni. Tan dia ed onia so impansampot na komaduamplo tan apat a taon ya oley na saray okom ed saray totoo nen Nephi.

36 Tan dia ed onia saray totoo nen Morianton so apapawil. Tan dia ed impipaknaan da ya onoren da so kareenan sikara so nipawil ed dalin nen Morianton, tan sakey a tipon so agawa ed baetan da tan saray totoo na Lehi; tan sikara met so nipawil ed saray dalin da.

37 Tan agawa a dia ed saman lamlamang a taon a saray totoo na Nephi nipawil ed sikara so kareenan, a si Nephihah, say komadua a pañgulo ya okom, so inatey, a binembenan to so yuroñgan na panañgokoman ed nagnap a kaptekan ed arap na Dios.

38 Manwari ya ontan, ag to inmabubon ed si Alma a sikato so mañgisinop ed saray kasulatan tan saray beñgatla a pinabli nen Alma tan kaamaan to a saraya so sankasantosan; dia ed ontan si Alma initer to so saraya ed anak to a laki, si Helaman.

39 Nia, agawa a say anak nen Nephihah so aturo a mambemben ed yuroñgan na panañgokoman, a kasalat nen ama to; on, sikato so aturo a pañgulo ya okom tan gobernador na saray totoo, ed samba tan sagrado a tutuntonen a sikato so mañgokom ed inkamatunong, tan pagnayonen to so kareenan tan say kawayañgan na saray totoo, tan iter to ed sikara so saray masanto a pankanawnawa a mañgigalang ed Katawan a Dios da, on, tuloñgan tan pagnayonen to so gagala na Dios ed amin ya agew to, tan awiten to so saray mauges ed maptek a panañgokom unong ed saray kasalanan da.

40 Natan nia, say ñgaran to Pahoran. Tan si Pahoran so nambemben ed niyuroñgan nen ama to, tan ginapoan to so oley to ed sampot na komaduamplo tan apat a taon, ed saray totoo nen Nephi.